Read idoma ISÍKƐ̄LU 27 Bible Online

ISÍKƐ̄LU 27 - idoma bible

ISÍKƐ̄LU 27

¹Anɔ́ɔ Óndú ā lɛ ɛlā nyā ka ga um.

²Ó kahíníī, “Ɔlɛcɛ, lɛ ijēēlihɔ gwó lɛyíkwu Utáya.

³Ó wɛ igelī, nōo kwu okónu ísu klla ītá ɔ́su mla ācɛ nēe lā aókónu ísu ā. Le ɔdā nɛ̄ Óndú ā nōo wɛ Ɔwɔicō ā ka lɛ ɔ́ ā da ɔ́. Da ɔ́ kahíníī, ‘Utáya, a gwō kú ɔhi nɛ̄hi kú uwɔ nɛ̄ ó lɛ ɛnyá ŋ́ mā,

⁴Ísu ā wɛ ɔlɛ́ uwɔ á. Ācɛ nēe gwó uwɔ ā lɛ uwɔ gwó bɛ̄ɛka úgbéenyi olɔhi nɛ̄hi ā.

⁵É bī ɔcí nēé hī ufɛ́ɛ ŋmá ɛyí ɛfu kú Uhámɔn ā le gwó uwɔ, klla le ulóko kú Ulɛ́bānɔn le tá aflá kú uwɔ.

⁶É bī ɔcí nēé hī ka óoku ŋmá Ubássan ā le gbā óci o pɛ́ ɔwú kú uwɔ. Ɔcí nēé hī ka upáyin ŋmá Usáyíprɔsi ā nēé le yá ajɛ kú uwɔ nɛ̄ ācɛ ī bá ī pɛ́ úgbéenyi á. Anɔ́ɔ é klla le ayīnu adāgbá pla tū ɛyí aɔ́cí ā, kú ō ceyī gllóglló.

⁷Ɛ́nɛ́nɛ̄ īlī nēé hī ka Ulínim ā ŋmá Íjīpiti, nēé nɛ̄ é bī le hīijā tū ɔ̄, nēé bī le yá īlī ōklá aflá kú uwɔ á. Ɔ̄cɛ dúúmā géē je ɔ́ ŋmá ɛga oligbó bōōbū ka ɔ́ ŋmá Íjīpiti. Īlī nōo ī gbo obobowú ce ɔ̄cɛ kú uwɔ ā, e yá ɔ mla īlī nɔ̄wá nōo ŋmá idɔ nēé hī ka Usáyíprɔ̄si ā.

⁸Ācɛ nɛ̄ ē ī lɛ óci le pɛ́ ɔwú kú uwɔ ā ŋmá Usídɔn mɛ́mla Aáfādi. Ācɛ nēe ī pɛ́ uwɔ piíí ā wɛ ācɛ o jé ō pɛ́ úgbéenyi kú Utáya ā.

⁹Ācɛ nɛ̄ ē gbā ɔcí kú uwɔ ā, klla ī glla uwɔ yá ā wɛ ācɛ nēé nwū je ŋmá Ubáyíblɔsi. Odúúdú ācɛ nēe gē yɛ ipú úgbéenyi ā gē tá ɔsú ipú aɛ́ga o je odée lā kú uwɔ.

¹⁰Ācɛ ŋmá Upɛ́sīya, Ulídīya, Ulíbīya, wɛ aícɔ́ɔja kú ɔlɛ́ uwɔ dúú. É kpó ɔkplɛ́fú mla ɔdā okwɛyí kú ɛfú kú uwā, pla ɔdɔ kú ɔlɛ́ uwɔ. Uwá ā wɛ ācɛ nēe cɛ̄ gā uwɔ lɛ ɛgahi nɛ̄hi á.

¹¹Ācɛ nēe ŋmá Aáfādi mɛ́mla Uhɛ́lɛki ā ī gbo ɔdɔ kú ɔlɛ́ uwɔ á. Ācɛ kú Ugamádi, kē ī gbo inɔ̄ɔda nēé ī ce ī gbāajɛ kú ɔlɛ́ uwɔ ā á. Uwá gē kpó ɔkplɛ́fú kú uwā pla ɔdɔ kú ɔlɛ́ uwɔ ā. Uwá wɛ ācɛ nēe yá nāa héyīfuú á.

¹²Aá tá ɔ́sú ga Uspéni gē mīyɛ oje nɛ̄hɛ́, oje ɔlamu, mɛ́mla ɛdɔ aóje ɔhá kú ɔ́lá kú iyó agbénú nɛ̄hi nāa lɛ ā.

¹³Ācɛ Ugríísi, Utúbalu, mɛ́mla Umésēki gē je aɔ́fiyɛ mɛ́mla aíyó nēé yá ŋmá udɔā lá gā awɔ kwɛyí iyó ɔ́sú kú uwɔ.

¹⁴A gē je iyó kú uwɔ lá lɛ ācɛ Ubɛtogáma, cɛ́ɛ́ kéē kpó aɔ́nya oōce, aɔ́nya opi úgbɔ́nya, mɛ́mla ɛdɔ aɔ́nya nɛ̄ ɔcɛ́ gē ce ā le cíla uwɔ ulé.

¹⁵A gē kpó ɔ́lá lá lɛ ācɛ kú Udɛ́dan mɛ́mla ācɛ nēe lā ajɛ alɛwa kú okónu ísu ā. É kē ī kpó ayīnu adāgbá mɛ́mla ɔká le cíla awɔ ulé kú iyó kú uwɔ nāa ī kpó lá lɛ uwá ā.

¹⁶Ācɛ kú Usírīya gē lá iyó agbénú alɛwa kú uwɔ ā. É kē ī kpó ɛdɔ īlī ɛ́nɛ́nɛ̄ mɛ́mla ohéyīfuú ɛyɛ́ɛyɛ́yí alɛwa, klla mɛ́mla aɛ́cɔ̄ ogbɔɔ́lá nɛ̄hi le cíla uwɔ ulé kú iyó kú uwɔ nāa kpó lá lɛ uwá ā.

¹⁷Ācɛ Ujúda mɛ́mla Ísrɛ̄lu bī īkpɔ̄dā,[1] enyi ɛnwú, anɔ̄ kú ɔcí ólifu mla ɔtulalī le cíla uwɔ ulé kú iyó kú uwɔ.

¹⁸Ācɛ kú Udamáscɔsi lá iyó ɔ́sú mɛ́mla agbénú ŋmá ɛgiyí uwɔ, klla kpó ejé kú Uhɛ́lbɔn mɛ́mla owú kú Usáha ī cíla uwɔ ulé uwā.

¹⁹ācɛ Udén mɛ́mla Ugríisi kpó oje ɔlamu ɛ́nɛ́nɛ̄ mɛ́mla ɔtulalī le cílá uwɔ ulé kú iyó kú uwɔ.

²⁰Ācɛ Udɛ́dan bī īlī uka kú ɔnya le cílá ulé kú iyó kú uwɔ nāa je lá lɛ uwá ā.

²¹Ācɛ Arébīya mɛ́mla aɔ́cɛ́ kú ajɛ kú Ukɛ́da ā kpó aómlede, aálá, mɛ́mla aɛ́wū le cílá uwɔ ulé kú iyó kú uwɔ nēé lá ā.

²²Ācɛ kú Ussɛ́ba mɛ́mla Uráma kpó aɛ́cɔ̄ ogbɔɔ́lá, ugóolu (oje ɔdɔ) mɛ́mla aɔ́tulalī ɛ́nɛ́nɛ̄ le cílá uwɔ ulé kú iyó kú uwɔ nēé lá ā.

²³Ācōtɔ́sú ŋmá aígelī nɛ̄hi nēé hī ka Uháran, Ukáne, Ídɛn, Ussɛ́ba, Ássɔ, Ukílmadi ā tá ɔ́sú mla uwɔ dúú.

²⁴É kpó īlī ɛ́nɛ́nɛ̄, īlī ohéyīfuú, īlī nēé lɛ ijā he tū ɔ̄, īlī tukpɔɔ ole tá ajɛ nēé lɛ ɛwɔ́ ohéyīfuú nya ɔ́, mɛ́mla ɛ́nɛ́nɛ̄ ɔ́ŋgbá lá gā uwɔ.

²⁵Aúgbéényi kú Utássīsi gē kpó iyó kú uwɔ ga ɛga dóódu nāa tíne ō kpó uwā nyɔ̄ á. A lɛbɛ̄ɛka úgbéenyi nōo ce eyī ísu lɛ iyó kpó omōmu ā.

²⁶Eko nɛ̄ ācɛ nēe gē pɛ́ uwɔ ā lɛ uwɔ bī wɛ̄ɛcɛ wā ɔtāhɛ̄ ísu ā, owu kú ɛnɔ̄ɔ̄cī ā kwú uwɔ ú gbayibó ɛga nōo ligbó ŋmá ajɛ ɛɛ́ mā.

²⁷Odúúdú agbénú kú iyó ɔ́sú kú uwɔ ā, odúúdú ācɛ nēe bá ipú uwɔ mɛ́mla aɛ́nɛ̄ ī pɛ́ uwɔ ā, odúúdú ācɛ nēe gē gbā ɔcí kú uwɔ ā, mɛ́mla ācɛ ɔ́sú kú uwɔ, mɛ́mla odúúdú aícɔ́ɔja nēe bá ipú uwɔ ā, odúúdú uwá kwú kpó yíífi, eko nɛ̄ awɔ nōo wɛ úgbéenyi nyā gbayibó ipú ísu ā.

²⁸Ācɛ nēe lā okónu ísu, pó íbáa nɛ̄ ācɛ nēe ī pɛ́ uwɔ ā bá ī dɛ̄ eko nēé bá ī bī ipú ísu ā.

²⁹Odúúdú ācɛ nēe ī pɛ́ úgbéenyi ā kwú kwu hɛ̄ odúúdú aúgbéényi kú uwā tá. Cɛ́ɛ́ odúúdú uwā kwú pɛ́ bɛ̄cɛ gaá hayi okónu ísu ā,

³⁰bá ī jikwū nɛ̄hi ohígbū uwɔ. É lɛ úmúlá wu klá ɛyí, klla bá ī lɛ īyī wā mīya ewo bá ī dɛ̄ gbōō.

³¹É kwú ɛyí í kpó plá ohígbū uwɔ, kwú īlī ekwu ú kpó wiiyē, bá ī yá ɔtūnōbí, bá ī jikwū uwɔ.

³²É gwííjē elihɔ gā uwɔ ka, ‘Ɔnyɛ lɛbɛ̄ɛka Utáya nōo tá Símmm ipú ísu nyā āa?

³³Eko dúúmā nɛ̄ aíyó ɔ́sú kú uwɔ le tá ogbeé ísu nɛɛ, é gē yá ɛgbá kú ācɛ éwo dóódu lɛ uwá. Aɔ́cɛ́ ɛbɛɛbɛ ī lɛ agbénú ŋmá lɛ agbénú kú iyó ɔ́sú kú uwɔ.

³⁴Ícɛ nyā, a gebí ipú ísu ɛɛ́, A gebí i tá ɔkɛkɛlɛ kú ísu ɛɛ́. Odúúdú iyó kú uwɔ mɛ́mla ācɛ nɛ̄ ē ge yúklɔ́ gā uwɔ ā, gebí ipú ísu ɛɛ́.’

³⁵“Ɔdā nōo yá uwɔ nyā le yá odúúdú ācɛ nēe lā okónu ísu ā eyījii klla í hɛ́ uwá idáagó. Kwu aɔ́cɛ́ kú uwá bá ī yúufi, ufi ā klla yɔ̄ ī mafú eyī kú uwā.

³⁶Ákú uwɔ mɛ ɛɛ́. É lɛ uwɔ catāajɛ ɛ́dɔ obɔ̄bí ā. Odúúdú ācotɔ́hí kú ɛcɛ ā bá ī yúufi ā, lɛ okónu nwūla tɔ́ɔtɛ́ ohígbū ɔdā nɔ́ɔ yá uwɔ nyā ā.”