Read idoma ISÍKƐ̄LU 28 Bible Online

ISÍKƐ̄LU 28 - idoma bible

ISÍKƐ̄LU 28

¹Óndú klla lɛ ɛlā ka gā um igbɔhá kpɔ́.

²Ó kahíníī, “Ɔlɛcɛ, le da ɔcɛ́ kú Utáya, ka ɔdā nyā nɛ̄ ami, Óndú ā, nōo wɛ Ɔwɔicō ā gē ka lɛ ɔɔ́ á. Da ɔ́ ka, ‘Abɔ̄ ɔbɔ́ɔ̄cɛ le mu uwɔ ipú hile ā, a ka anúɔ wɛ ɔwɔ nɛ. A ka anúɔ cīce akpa ɔcɛ́ bɛ̄ɛka ɔwɔ ā, aísu ɔ́ɔ kē le yɛ anúɔ jīla tá biílí. A lɔfú ka ka, anúɔ wɛ ɔwɔ glá, amáŋ á kē wɛ ɔwɔ ŋ́. A wɛ ɔ̄cɛ ɔlamu, nōo lɛ ɔkpíyē gē kwú ā, nááná nāa gbɛlá ka anúɔ ɔ́ɔ jéeyī bɛ̄ɛka ɔwɔ ā.

³A gbɛlá ka anúɔ jéeyī fíyɛ́ Udánīyɛlu á, ka ɔdā dúúmā í tayínū ŋmá ɛgiyí anúɔ glá ŋ́.

⁴A bī íjééyī mɛ́mla ɔdōōjé kú uwɔ ā le gbagbénú kú ugóolu (oje ɔdɔ) mɛ́mla oje nɛ̄hɛ́.

⁵A bī íjééyī yɔ̄ ī tá ɔ́sú klla yɔ̄ ī lɛ itene. Agbénú kú uwɔ ā cɛ̄ ga uwɔ ī yá ɔbɔ́ɔ́cɛ́ nɛ̄hi.

⁶Ohígbū ɔ́ɔmá, ɛlā nyā nɛ̄ ami, Óndú ā, nōo wɛ Ɔwɔicō ā gē ka á. Abɔ̄ a gē gbɛlá ka anúɔ jéeyī bɛ̄ɛka ɔwɔ ā,

⁷n géē kpó aólɛlā obɔ̄bíipú nɛ̄hi, wā í kpɛ́fú tá uwɔ. É géē kpó odúúdú ɔdā ohéyīfuú kú uwɔ nāa lɛ ŋmá íjééyī mla ɔdōōjé kú uwɔ ā yíífi.

⁸É géē ŋmó uwɔ, klla í je uwɔ nyi ipú éŋkpɔ̄ ɔtāhɛ̄ aísu nāa lā ā.

⁹Eko nēé géē wā i je uwɔ ŋmó ā, a géē yɔ̄ ī ka ka anúɔ wɛ ɔwɔ kpɔ́ ɔ̄ɔ̄? Eko nāa kwu eyī ú kwu eyī mla ācɛ nēe géē ŋmó uwɔ ā, eko ɔ́ɔmā, a géē wɛ ɔ̄cɛ ɔlamu, á gáā wɛ ɔwɔ ŋ́.

¹⁰A géē kwú bɛ̄ɛka ɛ́gɛ́nɛ̄ ācɛ nēé wɛ ákú um ā gē kwú ā, ipú abɔ̄ kú ācɛ aéwɔhá nēe jé Ɔwɔicō ŋ mā. Ami, Óndú ā, nōo wɛ Ɔwɔicō ā lɛ ɔ́da je ɛɛ́.”

¹¹Óndú klla lɛ ɛlā ka gā um igbɔhá.

¹²Ó kahíníī, “Ɔlɛcɛ, yá ɔtūnōbí ohígbū ɔdā nōo yɔ̄ ī gbēyī ō yá ɔcɛ́ kú Utáya ā. Lɛ ɔdā nɛ̄ ami, Óndú ā, nōo wɛ Ɔwɔicō ā gē ka lɛyíkwu ɔ́ ā ka lɛ ɔ́. Da ɔ́ ka, ‘A tɛtɛ wɛ ɔdōōcābɔ̄ kú ɔdā nɛ̄ ó lɛ ɛnyá ŋ́. A tɛtɛ joklóbīya klla jíjééyī nɛ̄hi.

¹³A tɛtɛ lā ipú Éden, ɛhɔ̄ kú Ɔwɔicō ā. A klla ī lɛ ɛdɔ ɛcɔ̄ ogbɔɔ́lá dóódu wu iyē. Aɛ́cɔ̄ ogbɔɔ́lá ɔ́ɔmā wɛ aɔ́dīfa mɛ́mla aɔ́tángbédē nēé hī ka, Utɔ́pās, Ubɛrili, Ukanélīyan,Ujáspa, Usáfaya, ɔká mɛ́mla odúúdú aɔ́tangbédē ɔhá dóódu ā. A klla lɛ aɔ́dīfa kú ugóolu (oje ɔdɔ). É yá ɔdā dóódu nēe bá nyā gā uwɔ, ɛ̄cī nēé yá uwɔ ā.

¹⁴N kwú uwɔ í pīya alelékwū-ōtɛ̄hɔ̄ otūufi nɛ̄hi nōo ī gbō odée[2] A lā ɛyí ɛfu otīihɔ kú um, klla ī yāwu ipú aɛ́cɔ̄ nēe ī fíyaajɛ bɛ̄ɛka ɔlá ā.

¹⁵Ucē kú uwɔ ŋmá ɛ̄cī nēé yá uwɔ í lɛ ɛnyá ŋ́ jāā gbéeko nāa gbo ɔ́bíipú ō bī ā.

¹⁶A yɔ̄ ī tá ɔ́sú nɛ̄hi, nɛ̄ ɔ́sú ā kē ga ɔbū gā uwɔ, anɔ́ɔ a gbɔɔ́ ō lɔnɔɔtū, anɔ́ɔ a lɛ ɔ́bíipú bī á. Anɔ́ɔ n kwú uwɔ ú nū abɔ̄ɔfú ŋmá ɛyí ɛfu kú um ā, anɔ́ɔ alelékwū-ōtɛ̄hɔ̄ nōo gē gbō uwɔ ā kwú uwɔ ú nū ŋmá ipú aɛ́cɔ̄ nēe ī fíyaajɛ ā á.

¹⁷Oklóbīya nāa jɛ̄ ā cɛ̄ gā uwɔ gbɔɔ́ ō yá ɔbɔ́cɛ. Olofu kú ɛgahi kú uwɔ ā cɛ̄ gā uwɔ gbɔɔ́ ō yá ucē olíla. Ohígbū ɔ́ɔmā, n lɛ uwɔ hɛ́ fīya ajɛ gblugudu, mā uwɔ tá tá ajɛ abɔ́ɔ, cɛ́ɛ́ ká ā wɛ ɔdōōcābɔ̄ ō le pi odúúdú aɔ́cɛ́ ɔhá ahɔ̄.

¹⁸A yá ɔdōbɔ̄bí nɛ̄hi ipú ɔ́sú nāa ī tá ā jāā nāa kwú ɛga ōgbā ɔkɔ kú uwɔ ā ú nyílá. Ohígbū ɔ́ɔmā, n lɛ ɔlá tū klá igelī kú uwɔ ŋmá ipú ɔlɛ́ uwɔ piíí, kwú ɔ̄ ú yi tāajɛ. Ipéyī odúúdú ācɛ nēe yɔ̄ ī má uwɔ ā, a kwú yi kwú gbo ewo dúúdú.

¹⁹Ákú uwɔ mɛ ɛɛ́. Ocatāajɛ kú uwɔ ā wɛ ɛ́dɔ obɔ̄bí ā. Ɛ́nyɔ́ le hɛ́ lɛ odúúdú aéwo nēe jé uwɔ ā.

²⁰Óndú ā lɛ ɛlā ka gā um igbɔhá kpɔ́.

²¹Ó kahíníī, “Ɔlɛcɛ, lɛ eyī pīya kwu igelī nēé hī ka Usídɔn ā, ká ā ŋmó ɔ̄ ɛpɔ̄bí.

²²Lɛ ɔdā nɛ̄ ami, Óndú ā, nōo wɛ Ɔwɔicō ā gē ka lɛyíkwu uwá ā ka lɛ ācɛ nē e bá abɔ́ɔ ā. Da uwá ka ami ɔ́ɔ ka, ‘Usídɔn, n kwú pīya olɛlā kú uwɔ ɛɛ́. Ācɛ géē cɛ̄tra um ohígbū ɔdā nɛ̄ n géē yá ipú uwɔ ā. É kē géē jé ka ami ɔ́ɔ wɛ Óndú ā á, eko nɛ̄ n le mafú ɛ́gɛ́nɛ̄ n tīhɔ lɛ a ŋmá lɛ ōwē nɛ̄ n gáā je lɛ ācɛ nɛ̄ ē lā ipú ɔlɛ́ uwɔ ā.

²³N géē tū ōcē obɔ̄bí klá uwɔ, géē yá kéē ŋmá ācɛ nɛ̄ɛ̄nɛhi ɛbɛɛbɛ klá aúláyi kú ɔlɛ́ uwɔ. É géē kpɛ́fú tá uwɔ ŋmá āyā dóódu, klla í ŋmó ācɛ ɔlɛ́ uwɔ. Cɛ́ɛ́ a le jé ka ami ɔ́ɔ wɛ Óndú ā á.

²⁴Óndú ā klla ka kahíníī, “Eko nɛ̄ ɔ́ɔmā le yá, odúúdú aéwɔhá nēe yá Ísrɛ̄lu ɛflɛ́ɛfu ā, o dúúmā í klla gáā lɛbɛ̄ɛka ujē nōo gē bū tū ɔ áklō ɛ́ɛ́ gɛ ŋ́. É kē í jé ka ami ɔ́ɔ, wɛ Óndú ā, nōo wɛ Ɔwɔicō á.”

²⁵Óndú ā klla ka gɔbū kahíníī, “N géē kpó odúúdú ācɛ Ísrɛ̄lu cigbīhi wā ɔlɛ́ abɔ̄ iyī um ŋmá ipú ajɛ aéwo dóódu nɛ̄ n pa uwá hīla nyɔ̄ ā. Odúúdú aéwɔhá ā kē í jé ka ami ɔ́ɔ tīhɔ. Ācɛ Ísrɛ̄lu kē ī lā ipú ajɛ kú abɔ̄yī uwā, nɛ̄ n je lɛ Ujékɔ̄pu, nōo wɛ ɔ̄cocɛ̄hɔ̄ kú um ā.

²⁶É géē lā abɔ́ɔ ɛbɔ́, géē gwó inu klla í hɛ́hɔ̄ kú ɔcí ufáyin. Odúúdú aéwɔhá nēe lā kwu uwá, nēe yá uwā kéē lɛbɛ̄ɛka ācɛ ɛflɛ́ɛfu ā, n géē kɛpɔ̄ tū uwā klla ī yá uwā italā. Ācɛ Ísrɛ̄lu kē ī bá ɛbɔ́, ɔtū kú uwā í gáā plicō gɛ ŋ́. É géē jé ka ami ɔ́ɔ wɛ Óndú ā, nōo wɛ Ɔwɔicō kú uwá á.”