Read idoma ISÍKƐ̄LU 29 Bible Online

ISÍKƐ̄LU 29 - idoma bible

ISÍKƐ̄LU 29

¹Ɛ̄cī ɔ́migwɛ́ɛpa kú ɔyā ɔ́migwó, kú iháyí ɔ́migwó nēé kpó alɔ ga ajɛ Ubábīɔn abɔ̄fú ā, Óndú ā lɛ ɛlā ka gā um.

²Ó kahíníī, “Ɔlɛcɛ, lɛ eyī pīya kwu ɔcɛ́ kú Íjīpiti ká ā ŋmó ɔ̄ ɛpɔ̄bí. Le ka lɛ ɔ́ mɛ́mla odúúdú ācɛ ajɛ kú Íjīpiti ɛ́gɛ́nɛ̄ é gáā je ōwē lɛ uwá ā.

³Ka lɛ ɔ́ ka ɛlā nyā nɛ̄ ami, Óndú ā, nōo wɛ Ɔwɔicō ā ɔ́ɔ gē ka lɛ ɔ́ á. ‘Ɔcɛ́ kú Íjīpiti, awɔ nōo lɛbɛ̄ɛka íkwu, ɛbɛ́ obɔ̄bí nɛ̄hi nōo yɔ̄ ī yɛ ipú ísu kú Unáyilu ā, n kwú pīya olɛlā kú uwɔ ɛɛ́. A ka ísu kú Unáyilu ɔ́ɔ wɛ ákú anúɔ, ka anúɔ yá ɔ́ɔ á.

⁴N géē je uwɔ bū uwɔ alagbá klla í cɛ̄ lɛ ɛbéenyi kú ipú ísu kú ɔlɛ́ uwɔ ā kwu uwɔ āpū ká. N géē je awɔ mɛ́mla odúúdú ɛbéenyi nēe kɔ̄ klá uwɔ āpū ā kpó pi wɛ̄ɛcɛ ŋmá ipú ísu kú Unáyilu.

⁵N géē je awɔ mɛ́mla odúúdú ɛbéenyi nēe kɔ̄ klá uwɔ iyē a kpó tá ga ipú ígbíli. Okwū kú uwɔ géē tá abɔ́ɔ áncā, ɛcɛ pée, é gáā je uwɔ nyi ŋ́. N géē je okwū kú uwɔ lɛ aígbáanɔ nēe ī wu icō mɛ́mla aɛ́bɛ́ ipácí ká ō wɛ ɔdōlé kú uwā.

⁶Cɛ́ɛ́ ācɛ kú Íjīpiti le jé ka ami ɔ́ɔ wɛ Óndú á.” Óndú ā klla ka kahíníī, “Ācɛ kú Ísrɛ̄lu kpɔ́tū ce awɔ mɛ́mla ācɛ ɔlɛ́ uwɔ ká aá wā í tá uwā abɔ̄, amáŋ, a lɛbɛ̄ɛka ácí ékpó nēé le kwu ajɛ, hī ɔ̄ ka ɔ́kpa okwajɛ ā.

⁷Eko nēé le gbɛnú ce uwɔ ā, a le cē, le bū tū uwā ipú ácáabɔ̄ bēhé, klla cɛ̄ lɛ uwá lɛ ohí cē.

⁸Abālɔbányā, ami, nōo wɛ Óndú ā gē da uwɔ ka, n géē kpó aícɔ́ɔja nēe bī ɔkpacaŋ́gelī wā í kpɛ́fú tá aá. É klla í kpó ācɛ mɛ́mla aɛ́bɛ́ kú ɔlɛ́ uwɔ ŋmó.

⁹Íjīpiti géē je pīya ipú alácɛ̄. Cɛ́ɛ́ a le jé ka ami ɔ́ɔ wɛ Óndú ā á. “Ohígbū ka a gē ka ka ísu kú Unáyilu ɔ́ɔ wɛ ákú anúɔ, anúɔ ɔ́ɔ yá ɔ̄ á,

¹⁰n kwú pīya olɛlā kú uwɔ mɛ́mla ísu kú Unáyilu ā ɛɛ́. N géē je odúúdú Íjīpiti yíífi í je ɔ́ tá alácɛ̄, ŋmá igelī nōo lé ka Umígdɔl ɛhícō ā, jāā ga ɛ̄nɛ̄ é hī ka Ásiwan ɛháajɛ ā, klla jāā gaá kwú ɛjī kú ajɛ Itiyópīya ā.

¹¹Kwu ācɛ mla ɛbɛ́ dúúmā í gáā bū ipú nū ŋ́. Iháyí ofɛpa, ɔdā dúúmā í gáā lā abɔ́ɔ ŋ́.

¹²Íjīpiti nɛ̄ n gáā je tá alácɛ̄ fíyɛ́ dúú, ipú odúúdú aéwo kú ɛcɛ ā. Iháyí ofɛpa ā, aígelī nɛ̄hi kú nū géē tá alácɛ̄, fíyɛ́ aígelī nɛ̄hi ɔhá dúúmā nēé je tá alácɛ̄ ā. N géē je ācɛ kú Íjīpiti yá ācɛ nēe ī kwinya ɛfú ga ajɛ éwɔhá. Uwá géē kwu nyɔ̄ ga ipú ajɛ éwo dóódu nyɔ̄ ī lā abɔ́ɔ.”

¹³Óndú ā, nōo wɛ Ɔwɔicō ā klla ka kahíníī, “Eko nɛ̄ iháyí ofɛpa le yá le yɛ ā, n géē kpó ācɛ kú Íjīpiti wā ɔlɛ́ uwā ŋmá ipú éwo dóódu nɛ̄ n pa uwá hīla nyɔ̄ ā.

¹⁴N kē ī yá ká ē lā ɛháajɛ kú ajɛ Íjīpiti, ɔlɛ́ abɔ̄yī uwā ā piíí nēé tɛtɛ lā ā. Eko ɔ́ɔmā, é géē wɛ éwo nɛ̄ ó lɔfú ŋ́.

¹⁵É géē wɛ ajɔ̄ɔ̄cɛ́ nōo lɔfú ŋ́ fíyɛ́ dúú ā, é klla gáā lɔfú gbō aéwɔhá dúúmā glá ɛ́ɛ́ gɛ ŋ́. N géē je uwá yá ɔplɛ́ca nēé klla gáā lɔfú dúúmā da éwɔhá ɔdā dúúmā ō yá glá ɛɛ́ gɛ ŋ.

¹⁶Ācɛ Ísrɛ̄lu í klla gáā gbɛnú ce uwá kú otábɔ̄ igbɔhá ɛ́ɛ́ gɛ ŋ́. Ɔdā nōo gē yá Íjīpiti ā géē mafú lɛ ācɛ Ísrɛ̄lu ɛ́gɛ́nɛ̄ obɔ̄bí ō lɛ kéē nyɔ̄ ī gbɛnú ce ācɛ Íjīpiti kú otábɔ̄ a. Cɛ́ɛ́ ācɛ Ísrɛ̄lu kē í jé ka ami ɔ́ɔ wɛ Óndú, nōo wɛ Ɔwɔicō á.

¹⁷Ɛ̄cī aflɛ́yí kú ɔyā aflɛ́yí kú iháyí ɔ́mofu ce ahāapa nɛ̄ alɔ bá ajɛ kú Ubábīlɔn ā, Óndú ā klla lɛ ɛlā igbɔhá kā gā um.

¹⁸Ó kahíníī, “Ɔlɛcɛ, Unebúkádinēsa, ɔcɛ́ kú Ubábīlɔn ā kpɛ́fú tá ācɛ Utáya. Ó yá ka aícɔ́ɔja kú ɔlɛ́ nū ká ē kpó iyɔ́fú ogbɛnú nɛ̄hi nyɔ̄, nɛ̄ ɛyí kú uwā le kpó fakpá, nɛ̄ ácábɔ̄ kú uwā klla le kpó hípí ā. Amáŋ kwu ɔcɛ́ ā mɛ́mla aícɔ́ɔja kú ɔlɛ́ nū ā í lɛ ilɛ ɔdā dúúmā ŋmá ákanya kú uwā ɔ́ɔmā ŋ́.

¹⁹Abālɔbányā, ɛ̄nyā wɛ ɔdā nɛ̄ ami, Óndú ā, nōo wɛ Ɔwɔicō ā gē ka á. ‘N géē je ajɛ kú Íjīpiti tá ipú abɔ̄ kú Unebúkádinēsa. Ó géē kpó iyó kú uwā wu, klla í je odúúdú agbénú kú Íjīpiti kpó, ka ɔ́ɔmā ká o wɛ ulé nɛ̄ ó géē cíla aícɔ́ɔja kú ɔlɛ́ nū.

²⁰N ge je Íjīpiti cílá anú ulé kú úklɔ́ nɛ̄ ó yá ga um ā. Ohígbū ka ami nɛ̄ aícɔ́ɔja kú ɔlɛ́ nū bá ī yúklɔ́ ga um á.” Ami, Óndú ā, nōo wɛ Ɔwɔicō ā le ka ɛɛ́.

²¹Eko nɛ̄ ɔdā nyā le yá, ācɛ kú Ísrɛ̄lu géē je lɔfú iyē, n klla í yá awɔ, Isíkɛ̄lu, ká ē kɛlā gbōmgbōm, ɛga nɛ̄ ācɛ dóódu géē pó., Cɛ́ɛ́ ká uwá ká ē le jé ka ami ɔ́ɔ wɛ Óndú ā á.”