Read idoma ISÍKƐ̄LU 3 Bible Online

ISÍKƐ̄LU 3 - idoma bible

ISÍKƐ̄LU 3

¹Anɔ́ɔ Ɔwɔicō da um kahíníī, “Ɔlɛcɛ, kwú ɔkpá nɛ̄ n gē je gā uwɔ nyā ú lé mulɛ, cɛ́ɛ́ ka á nyɔ̄ í kɛlā lɛ ācɛ kú Ísrɛ̄lu.”

²N lɛ okónu kú um nwūla, anɔ́ɔ ó kwú ɔkpá ā ú ga um ká n lé á.

³Anɔ́ɔ ó da um kahíníī, “Ɔlɛcɛ, kwú ɔkpá nɛ̄ n gē je gā uwɔ nyā ú lé, kóō le nū uwɔ ipú.” Anɔ́ɔ n kwú ɔkpá ú lé á. Ó lɔnyɛ tū um bɛ̄ɛka ɛnwú ā ipú okónu kú um.

⁴Anɔ́ɔ ó da um kahíníī, “Ɔlɛcɛ, nyɔ̄ mɛ́ɛ́nɛ ga ɛgiyí ācɛ kú Ísrɛ̄lu ká a gaá kɛlā dúúmā nɛ̄ n da uwɔ lɛ uwá.

⁵Ń tū uwɔ ɛhɔ̄ fu ācɛ éwɔhá nēe gē ka ucē ɔhá dúúmā ŋ́, amáŋ fu ācɛ kú Ísrɛ̄lu.

⁶Ń kē tū uwɔ ɛhɔ̄ fu ācɛ kú ewo nɛ̄hi nēe gē ka ucē nōo lɔnɔ ō jé ɛyí nū ŋ. Ɔ́dāŋ́ ka n lɛ uwɔ tɛ̄hɔ̄ fu ācɛ ɛ́gɔ́ɔmā nɛɛ, é géē yɛ í lɛ ɛlā kú uwɔ pó.

⁷Amáŋ ācɛ kú Ísrɛ̄lu a í gáā jāhɔ̄ ga uwɔ ŋ́, ohígbū ka é tútū ō jāhɔ̄ gā um ŋ́ dúú. Ohígbū ka odúúdú ācɛ kú Ísrɛ̄lu lɛ ɔtū olɔfú mla īkpɛ̄yí-olɔfú.

⁸Amáŋ n géē yá uwɔ ká ā lɛ ɔtū olɔfú mɛ́mla īkpɛ̄yí olɔfú lɛyíkwu uwā bɛ̄ɛka ɛ́gɛ́nɛ̄ é lɛ a, nɛ̄ á gáā cɛ̄ mla uwá ŋ́.

⁹N géē yá uwɔ bɛ̄ɛka ɛcɔ̄ olɔfú nɛ̄hi, mɛ́mla ápátɛ́cɔ̄ nɛ̄ ó tōō ca ŋ́ mā. Ā híī yúufi uwá ɛ́ɛ́, nēé gē tū uwɔ ufi dúúmā ŋ́, nááná nēé wɛ ācɛ oyíkpɛ̄yí olɔfú ā.”

¹⁰Óndú ā klla da um kahíníī, “Ɔlɛcɛ, jāhɔ̄ lɔɔlɔhi lɛ ɛlā nɛ̄ n gē ka gā uwɔ ā ká ā gbɛlá kwú odúúdú nū.

¹¹Nyɔ̄ ga ɛgiyī ācɛ ɔlɛ́ uwɔ nēe bá ajɛ kú ɔfiyɛ Ubábīlɔn ā, ká a gaá da uwá ɛlā nɛ̄ ami nōo wɛ Óndú ā nōo lɔfú fíyɛ́ dúú ā gē ka lɛ uwá ā. Le da uwá ɔ́dāŋ ka é jāhɔ̄, amáŋ é jāhɔ̄ ŋ́ nááná.

¹²Anɔ́ɔ Alelékwū kú Ɔwɔicō kwú um gicō á. N pó uya nɛ̄hi kú ɔkɔ eyī igbīhi um kwūūū yɔ̄ ī ka kéē cɛ̄tra ofíyáajɛ kú ɛgahi nɛ̄hi kú Ɔwɔicō ā ɔkpáncō ɛga nɛ̄ ó lā ā.

¹³Anɔ́ɔ n pó uya kú acá kú aɔ́dā olɛ oyēeyī ɛnɛ ā yɔ̄ ī fīyɛ̄ klá ɔhá kwūūū mɛ́mla uya kú aákā ā kwūūū bɛ̄ɛka eko nɛ̄ ajɛ gē jíliyē ā.

¹⁴Anɔ́ɔ Alelékwū kú Ɔwɔicō kwú um ú ŋmá ajɛ gicō. Ɔfú kú Óndú gaá klá um nɛ̄hi. Abɔ̄ ó yɔ̄ ī je um ŋmá abɔ́ɔ ā, ɔtū le bīya gā um nɛ̄hi.

¹⁵Anɔ́ɔ n gā Utɛ́l Abíbu, nōo kwu áklō kú ísu kú Ucɛ́ba ɛgiyí ācɛ nēe bá ajɛ kú ɔfiyɛ, Ubábīlɔn ā. N klá abɔ́ɔ mla uwá ɛ̄cī aháapa. Okónu í hɛ́ um, ohígbū ka ɔdā nɛ̄ n má klla pó ā le fíyɛ́ abɔ̄.

¹⁶Oŋmɛ́yí kú ɛ̄cī ɔ́mahāapa ā, Óndú ā lɛ ɛlā ka gā um kahíníī.

¹⁷“Ɔlɛcɛ, n kwú uwɔ ú yá ɔ̄cogbāājɛ lɛ ācɛ kú Ísrɛ̄lu ɛɛ́. Ohígbū ɔ́ɔmā a, jāhɔ̄ ká a pó ɛlā nɛ̄ n géē ka gā uwɔ ā ká ā pi uwá ahɔ̄ gā um.

¹⁸Eko nɛ̄ n da ɔ̄cobɔ̄bíipú ka ó géē kwú piíí. Ó géē kwú ɔ́dāŋ nɛ̄ á kɛlā lɛ ɔ́ ká ā pi ɔ ahɔ́, ka ó pīyabɔ̄ ŋmá ɔwɛ ká ɔ́bíipú kú nū, ká ō nyā oyēeyī kú nū tá ŋ́. Amáŋ ɔ́dāŋ nɛ̄ ɔ̄cobɔ̄bíipú ɔ́ɔmā gekwú lɛ ā ipú ɔ́bíipú kú nū, n géē je oyī kú nū ce uwɔ ɛyí.

¹⁹Amáŋ ɔ́dāŋ ka a lɛ ɔ̄ce obɔ̄bíipú ā ahɔ̄ pi, anɔ́ɔ ó kwúcē ŋmá ɔ́bíipú kú nū ā ŋ́ má, ó géē kwú ohígbū ɔ́bíipú kú iyī nū, amáŋ ā lɛ īyī uwɔ nyatá ɛɛ́.”

²⁰Óndú ā klla ka igbɔhá kahíníī, “Ɔ́dāŋ́ ka ɔ̄cɛ okpaakpa kwúcē ŋmá okpaakpa ōyá gbɔɔ́ ō yá ɔdōbɔ̄bí. N géē kpla ukpa lɛ ɔ́. Ɔ́dāŋ nɛ̄ á pi ɔ́ ahɔ̄ ŋ́, ó géē kwú ohígbū ɔ́bíipú kú nū. N gáā blakwu Odúúdú okpaakpa mɛ́mla ucē okpaakpa kú nū ā ɛ́ɛ́ gɛ ŋ́. N kē í je oyī kú nū ce uwɔ ɛyí.

²¹Amáŋ ɔ́dāŋ ka a lɛ ɔ̄cɛ okpaakpa ā ahɔ̄ pi ká ɔ̄ bɔ̄bíipú ŋ́, nɛ̄ ó cɛ̄ í bɔ̄bíipú gɛ ŋ́, ó í yēeyī kpɔ́. Ɛ́mba a kē lɛ īyī uwɔ nyatá ɛɛ́.”

²²Ɔfú kú Óndú ā klá um nɛ̄ɛ̄nɛ̄hi, anɔ́ɔ Óndú ā da um kahíníī, “Cāŋ́jɛ ka a nyɔ̄ ga ɔpɛ́ ā. N géē kɛlā ga uwɔ abɔ́ɔ.”

²³N cāŋ́jɛ le tá ɔpɛ́ ā. Anɔ́ɔ má ofíyáajɛ kú ɛgahi nɛ̄hi kú Óndú ā abɔ́ɔ, bɛ̄ɛka ɛgahi kú Óndú ā nɛ̄ n má okónu ísu kú Ucɛ́ba á. N má gbō klá ajɛ gblugudu kwú eyī ū pīya klá ajɛ.

²⁴Anɔ́ɔ Alelékwū kú Ɔwɔicō gā ipú iyē kú um, kwú um cāŋ́jɛ háyi icō á. Óndú ā da um kahíníī, “Nyɔ̄ ga ɔlɛ́ uwɔ ká ā gáā lɛ ɔwɛ gwū tū īyī uwɔ.

²⁵Awɔ, ɔlɛcɛ ā, é í gbō uwɔ mla ɔ́ŋgbá tá ajɛ nɛ̄ á klla gáā ga ɛcɛ ipú ācɛ ā glá ɛ́ɛ́ gɛ ŋ́.

²⁶N géē je ígblɛ́nyī kú uwɔ gɔ́ bá akpakó kú uwɔ nɛ̄ á gaá kɛlā glá ɛ́ɛ́, nɛ̄ á géē pi ācɛ o yá īkpɛ̄yí olɔfú ɔ́ɔmā ahɔ̄ ŋ́.

²⁷Amáŋ, eko nɛ̄ n lɛ ɛlā ka gā uwɔ, n géē je uwɔ okónu nwūla, cɛ́ɛ́ ká ā da uwá ɛlā nɛ̄ ami nōo wɛ Óndú ā nōo wɛ Ɔwɔicō ā ka ā. Ācɛ ōhī kú ipú uwā géē pó, ācɛ ōhī í kē gáā pó ŋ́, ohígbū ka é wɛ ācɛ oyíkpɛ̄yí olɔfú.”