Read idoma ISÍKƐ̄LU 30 Bible Online

ISÍKƐ̄LU 30 - idoma bible

ISÍKƐ̄LU 30

¹Óndú ā lɛ ɛlā ka gā um kpɔ́.

²Ó kahíníī, “Ɔlɛcɛ, ka ɛbɛ tɛ́ɛcɛ ká ā tɔ́ɔna kú ɔdā nɛ̄ ami, Óndú ā nōo wɛ Ɔwɔicō ā gē ka ā. Tɔ́ɔna kú ɛlā nyā gbōmgbōm ka, “Ɛ̄cī otūufi nɛ̄hi yɔ̄ ī wā ɛɛ́!

³Ɛ̄cī nɛ̄ Óndú ā gáā yá odée ā le bá ɛɛ́. Ɛ̄cī ɔ́ɔmā géē wɛ ɛ̄cī kú ojuja odobū mɛ́mla ɛ̄cī unwalu lɛ éwo dóódu.

⁴Ɛfú géē yɔ̄ ī kpó ajɛ kú Íjīpiti. Ákanya nɛ̄hi géē bī Itiyópiya, É géē ŋmó ācɛ alɛwa nɛ̄hi Íjīpiti. É í kpó agbénú kú ajɛ ɔlɛ́ nū wu, klla í je ɔ́ tá alácɛ̄.

⁵Ɛfú ɔ́ɔmā géē lé odúúdú aícɔ́ɔja nēé plla ŋmá Itiyópiya, Ulídiya, Ulíbīya, Arabiya, kwu Ukúbu mɛ́mla aícɔ́ɔja kú ācɛ ɔlɛ́ um abɔ̄yī uwā dúú.”

⁶Óndú ā, nōo wɛ Ɔwɔicō ā kahíníī, “Ŋmá Umígdɔl ɛhícō, jāā ga Ásiwan ɛháajɛ ā, é géē je odúúdú ācɛ nēe ī cɛ̄ɛpɔ̄ Íjīpiti ā kpó ŋmó. Ɛfú géē lé aícɔ́ɔja oyɔ́bɔ́cɛ́ kú Íjīpiti ā. Ami, Óndú ā, nōo wɛ Ɔwɔicō ā le ka ɛɛ́.

⁷Ajɛ kú Íjīpiti ā í tá alácɛ̄ fíyɛ́ dúú ipú odúúdú aéwo kú ɛcɛ ā. É géē je odúúdú igelī ā yíífi, í je ɔ́ɔ tá alácɛ̄.

⁸Eko nɛ̄ n kwú Íjīpiti ú yɔɔlá, klla kwú odúúdú aícɔ́ɔja nēe ī cɛ̄ɛpɔ̄ uwá ā ú kpó ŋmó, cɛ́ɛ́ é le jé ka ami ɔ́ɔ wɛ Óndú ā á.”

⁹Eko nɛ̄ eko ɔ́ɔmā gā, nēé kwú Íjīpiti ú yíífi. N géē kpó aócɛhɔ̄ tū úgbéenyi nyɔ̄ ī wu ɔtū kú ācɛ kú Itiyópiya klícō, uwá géē yúufi nɛ̄hi. Ɛ̄cī ɔ́ɔmā yɔ̄ ī wā ɛɛ́.

¹⁰Óndú ā, nōo wɛ Ɔwɔicō ā ka igbɔhá kahíníī, “N géē bī Unebúkádinēsa, ɔcɛ́ kú Ubábīlɔn wā í je agbénú kú Íjīpiti yíífi kwɛyí.

¹¹Anú mla aícɔ́ɔja olɔnɔɔtū nɛ̄hi kú ɔlɛ́ nū ā géē wā í je ajɛ Íjīpiti ā wúla tāajɛ dúúdú. É í kpó ɔkpacaŋ́gelī le kpɛ́fú tá ācɛ Íjīpiti, kē í ŋmó ācɛ, nɛ̄ okwū í bá ɛbɛɛbɛ láyí ipú ajɛ ā.

¹²N géē je Ísu kú Unáyilu ŋmó ŋmá ajɛ, klla í je Íjīpiti tá ipú abɔ̄ kú ācɛ o yá ɔdōbɔ̄bí. Aéwɔhá ā géē je odúúdú ajɛ kú Íjīpiti catāajɛ. Ami nōo wɛ Óndú ā le ka ɛɛ́.”

¹³Óndú ā, nōo wɛ Ɔwɔicō ā kahíníī, “N géē je aɛ́cí mɛ́mla aójibó nēe bá Umemfisi ā yíífi. Ɔ̄cɛ dúúmā í gáā yɔ̄, nōo géē gbāajɛ kú Íjīpiti gɛ ŋ́. N kē í tū odúúdú ācɛ ā ufi.

¹⁴N géē je igelī nōo lé ka Upátrosi, nōo yɔ̄ ɛháajɛ kú ajɛ kú Íjīpiti ā tá alácɛ̄, klla í je ɛ̄nɛ̄ é hī ka Usóyan nōo yɔ̄ ɛhícō ā tū ɔlá. N géē yá ɔlɛ ɔtāhɛ̄ nōo lé ka ufébēsí ā italā.

¹⁵N géē yá ka Upelúsīyum, nōo wɛ igelī nēé lɛ igá olɔfú cē tū ɔ̄ɔ kú Íjīpiti ā, ká ō móōwē nɛ̄hi ŋmá lɛ ícɔ̄nū kú um. N kē í je ɛwa kú aícɔ́ɔja nēe bá Utébēsi ā kpó yíífi.

¹⁶N géē tū ɔlá klá Íjīpiti, Upelúsiyum kē í yɔ̄ ipú ɔnɔ mɛ́mla ákanya. Ɔdɔ kú Utébēsi ā géē je ca klá ajɛ, ɔkpá kē ī cēenyi tū igelī ā.

¹⁷Ayípōklóbīya kú aígelī nɛ̄hi nēe lé ka Uhɛliyōpɔ́lis mɛ́mla Ububástisi ā géē pɛ́ kwú ɔgbɛ́fú ā, é klla í kpó aóhile kú ācɛ ā aálagbá kú ɛfú.

¹⁸Obū ī wā í klá Utapánhesi eko nɛ̄ n géē je ɔfú kú Íjīpiti nōo wɛ ɔdā ɔbɔ́cɛ kú uwā nɛ̄hi ā catāajɛ ā. Ojuja odobū géē klá Íjīpiti,abɔ̄ é géē bá i kpó odúúdú ācɛ kú igelī ā aálagbá kú ɛfú ā.

¹⁹Eko nɛ̄ n lɛ ɛpɔ̄ ka tū Íjīpiti, lɛ italā yá ɔ̄ ɛ́gɛ́nyā, cɛ́ɛ́ é le jé ka ami ɔɔ́ wɛ Óndú ā á.”

²⁰Ɛ̄cī ɔ́migwóléyi, kú ɔyā aflɛ́yí kú iháyí ɔ́migwóléyi nɛ̄ alɔ bá ajɛ Ubábīlɔn ā, Óndú ā lɛ ɛlā ka gā um.

²¹Ó kahíníī, “Ɔlɛcɛ, n le ɔcɛ́ kú Íjīpiti abɔ̄ cē ɛ́ɛ́. Ɔ̄cɛ dúúmā í gáā lɛ igbogbo gbō abɔ̄ kú nū ā, ɛ́ɛ́ nɛ̄ ɔ̄cɛ dúúmā gē lɛ ɔ́ŋgbá tū ɔ̄ ɔkɔ kóō lɛ abɔ̄ ā playi anú ɛ́ɛ ká o pi ɔɔ́, ka ó fúlá, ɛɛ́ kóō bī ɔkpacaŋ́gelī glá gɛ ŋ́.

²²Abālɔbányā, ami, Óndú ā, nōo wɛ Ɔwɔicō ā gē ka ka n géē wɛ olɛlā kú ɔcɛ́ kú Íjīpiti. N klla í kpó abɔ̄ kú nū ɛplɛ́ɛpa ā cē kpɔ́. Kwú abɔ̄ kú nū olɔhi mla ɛ̄nɛ̄ o kwú cē ɛɛ́ mā, cɛ́ɛ́ ɔkpacaŋ́gelī ā hɛ́ ɔɔ́ abɔ̄ tá ajɛ.

²³N géē je ācɛ kú Íjīpiti pahīla klá ajɛ kú aéwo dóódu kú ipú ɛcɛ.

²⁴Eko ɔ́ɔmā, n géē yá abɔ̄ kú ɔcɛ́ kú Ubábīlɔn lɔfú, kllá í je Ɔkpacaŋ́gelī kú um tá ɔ̄ abɔ̄. Amáŋ n géē cē ɔcɛ́ kú Íjīpiti abɔ̄, ó kē í yɔ̄ ī tá ifu iyɔ̄bū olɛlā kú nū bɛ̄ɛka ɔ̄cɛ nēé le yá ágbe yɔ̄ ī kwú ā.

²⁵N géē yá ɔ̄ kóō kwú kwáahi klla í yá ɔcɛ́ kú Ubábīlɔn lɔfú. Eko nɛ̄ n kwú ɔkpacaŋ́gelī kú um ú wu ɔcɛ́ kú Ubábīlɔn abɔ̄, nɛ̄ ó kwú ɔ́ɔ ú miya kwu Íjīpiti ā, ɔ̄cɛ dóódu géē jé ka ami ɔ́ɔ wɛ Óndú ā á.

²⁶N géē pa ācɛ kú Íjīpiti hīla ga ajɛ kú aéwo dóódu kú ɛcɛ. Cɛ́ɛ́ é le jé ka ami ɔ́ɔ wɛ Óndú ā á.”