Read idoma ISÍKƐ̄LU 31 Bible Online

ISÍKƐ̄LU 31 - idoma bible

ISÍKƐ̄LU 31

¹Ɛ̄cī aflɛ́yí kú ɔyā ɔ́mɛtá kú iháyí ɔ́migwóléyi nɛ̄ alɔ bā ajɛ kú Ubábīlɔn ā, Óndú ā lɛ ɛlā ka gā um.

²Ó kahíníī, “Ɔlɛcɛ, le ka lɛ ɔcɛ́ kú Íjīpiti mɛ́mla odúúdú ācɛ kú ɔlɛ́ nū ka: N lɛ ɔ̄cɛ dúúmā gbla awɔ, ɛ́gɛ́nɛ̄ a lɔfú lɛ a glá ŋ.

³Á lɛbɛ̄ɛka ɔcí kú useda kú Ulébanɔn ā. Ó gwá ābɔ̄ héyīfuú héyīfuú, klla gbo obobowu nɛ̄hi. Ó kē jɛ̄ jāā gáā kwu ojuja.

⁴Éŋkpɔ̄ yɔ̄ abɔ́ɔ nōo géē yá kóō jɛ̄, ísu kē tá yɛ ipú ajɛ yɔ̄ ī kpó éŋkpɔ̄ tū ɔ̄ ɔkwu. Ísu ā cɛ̄ lɛ ɛga nɛ̄ ɔcí ā kwu ā yɔ̄ ī jɛ̄ ā le dɛ sɔɔ ā. Aɔ́kpá nēe pɛ́ ŋmá ísu ā klla kwú cēenyi tá ɔkwu odúúdú aɔ́cí ɔhá kú ipú ūpū ā.

⁵Abɔ́ɔ ó lɛ éŋkpɔ̄ lɔhi lɔhi ā, ɔcí ā kē le jɛ fíyɛ́ aɔ́cí ɔhá dóódu kú ipú ūpū ā. Ó kē lɛ ābɔ̄ okpɔ́cíi mɛ́mla olīkpō kwu.

⁶Ɛdɔ kú aígbáanɔ dóódu gē gwó ɔlɛ́ uwá ce ābɔ̄ nū, aɛ́bɛ́ ipácí klla ī wā ī ma ayí uwā obobowú kú nū. Aéwo kú ɛcɛ ī wā í mulɛ́nyɔ́ ɔkwu nū.

⁷Ɔcí ɔ́ɔmā héyīfuú nɛ̄hi, ó jɛ nɛ̄hi, ābɔ̄ kú nū klla līkpō nɛ̄hi. Ó lɛ ā ohígbū ka ó tá ɛgba jāā ga ipú éŋkpɔ̄ kú ipíípú ajɛ ā.

⁸Uséda kú ipú ɛhɔ̄ kú Ɔwɔicō ɔhá dúúmā ī tū o le gbla anú ŋ́. Ɔcí ɔhá dúúmā, kwú ɔcí ufíg dúúmā i kwajɛ, kwā ābɔ̄ kpɔ́cíi klla héyīfuú bɛ̄ɛka anú ā ŋ́. Ɔcí dúúmā nōo í yɔ̄ ipú ɛhɔ̄ kú Ɔwɔicō nōo héyīfuú bɛ̄ɛka anú ā ŋ́.

⁹N lɛ ɔ́ yá héyīfuú mla abɔ̄ nɛ̄ ó tá lɛwa nɛ̄hi ā. Anú nɛ̄ ɔcí dóódu ɔhá kú ɛhɔ̄ kú Éden kú Ɔwɔicō ā géē yá eyī fuúfuú ō lɛbɛ̄ɛka anú ā.

¹⁰Abālɔbányā, ami Óndú ā, nōo wɛ Ɔwɔicō ā géē da uwɔ ɔdā nōo gáā yá ɔcí ɔ́ɔmā, nōo jɛ̄ jāā lɛyí kwu ojuja ā. Ɛ́gɛ́nɛ̄ ó jɛ̄ gicō lɛ a, ɛ́gɔ́ɔmā nɛ̄ ɔbɔ́cɛ kú nū jɛ̄ lɛ dúú á.

¹¹Ohígbū ɔ́ɔmā, n tá ɔ̄ ɛɛ́, n klla í je ɔ́ lɛ ɔcɛ́ kú aéwɔhá. Ɔcɛ́ ɔ́ɔmā géē yá ɔcí ɔ́ɔmā ɔdā nōo cíkā lɛ ɔ́bíipú nɛ̄hi kú nū ā.

¹²Ācɛ aéwoɔhá nɛ̄ e lɔnɔɔtū nɛ̄hi ā, géē hɛ́ ɔ̄ wā ajɛ, ī mā ɔ̄ tá bá ajɛ abɔ́ɔ. Abɔ̄ mla ūkwābɔ̄ kú nū mla ēpū kú nū géē pahīla klá ɛyí ɛfu mɛ́mla ɔpɛ́ dóódu, kú ajɛ ā. Odúúdú aéwɔhá nēe húmáyī mlɛ́nyɔ́ ɔkwu nū ā géē nyɛ̄ɛ̄ ŋmá ɔkwu nū.

¹³Aígbáanɔ géē wā í pɛ́ ce ɔcí ā nōo hɛ́ tá ajɛ ā. Aɛ́bɛ́ ipácí kē ī yɔ̄ ī yɛ ɛyí ūkwābɔ̄ kú nū nēe bá ajɛ ā.

¹⁴Oŋmá abālɔbányā gɔbū ā, ɔcí dúúmā ɔhá, ɛ́gɛ́ dúú nē é kpó éŋkpɔ̄ tū ɔ̄ ɔkwu lɛ ā, í klla gáā jɛ̄ bɛ̄ɛka anú ā, ɛɛ́ nōo ī gáā kwu ojuja gɛ ŋ́. Odúúdú ɔcí ā géē gbɔɔ́ ō pɛ́ kwú bɛ̄ɛka ɔlɛcɛ ā, klla í pɛ́ ga ɔlékwu ɛgiyí ācɛ nēe kwú ā dúú.”

¹⁵Óndú ā nōo wɛ Ɔwɔicō ā kahíníī, “Ɛ̄cī nɛ̄ ɔcí ā géē nyɔ̄ ɔlékwū ā, n géē yá ka éŋkpɔ̄ kú ipú ajɛ ā kóō pɛ́ klá anú. Ɔ́ɔmā kē í wɛ ocābɔ̄ kú ekwu kú nū. Kwu ísu mɛ́mla aɔ́kpá nɛ̄ŋcɛ́ ā, n gáā cɛ̄ lɛ uwá pɛ́ ga ɛcɛ ŋ́. Ohígbū ka ɔcí ā gekwú ɛɛ́ mā, n géē bī obū wā í klá ɛyí ɛfu kú Ulɛ́bānɔn klla í je odúúdú aɔ́cí kú ūpū kú Ulɛ́bānɔn a kpó ŋmɔ́lá ŋmá ajɛ.

¹⁶Eko nɛ̄ n gáā tū ɔcí ā ɛyí ga únóji ā, odúúdú aéwo ā géē jīliyē. Odúúdú aɔ́cí kú Éden, mɛ́mla aɛ́nɛ́nɛ̄ ɔcí ɔhá kú Ulɛ́bānɔn, nēé géē kpó éŋkpɔ̄ tū uwā ɔkwu lɔɔlɔhi ā, nēe le pɛ́ gekwú ɛ́ɛ́ mā géē gwéeyē ipú únóji ohígbū oōhɛ́ wāajɛ gwōnū kú nū.

¹⁷Uwá nááná ā géē nyɔ̄ ɔlékwū mɛ́mla anú ga ɛgiyí ācɛ nēe tɛtɛ le ŋmó ɛɛ́ mā. Odúúdú ācɛ nēe lā obobowu kú nū ā géē je pahīla tū ipú aéwo kú ɛcɛ ā.

¹⁸Ɛyí ita kú ɔcí nyā wɛ ɔcɛ́ kú Íjīpiti mɛ́mla odúúdú ācɛ ɔlɛ́ nū. Ɔcí kú Éden dúúmā í klla jɛ̄, lɔhi bɛ̄ɛka anú ā ɛɛ́ gɛ ŋ́. Amáŋ ícɛ nyā, bɛ̄ɛka ɔ́cí ɔhá dóódu kú Éden ā, ó géē nyɔ̄, ɔlékwū gaá yɔ̄ mla ācɛ nēé wɛ ákú Ɔwɔicō ŋ́ mā mɛ́mla ācɛ nēé kpó ŋmó ɔgbɛ́fú ɛfú ā. N le ka ɛɛ́.” Abɔ̄ Óndú ā, nōo wɛ Ɔwɔicō ā ka lɛ a á.