Read idoma ISÍKƐ̄LU 32 Bible Online

ISÍKƐ̄LU 32 - idoma bible

ISÍKƐ̄LU 32

¹Ɛ̄cī aflɛ́yí kú ɔyā ɔ́migwɛ́ɛpa kú iháyí ɔ́migwɛ́ɛpa nɛ̄ alɔ bá ajɛ Ubábīlɔn ā, Óndú ā lɛ ɛlā ka gā um.

²Ó kahíníī, “Ɔlɛcɛ, lɛ ɔcɛ́ kú Íjīpiti ahɔ̄ pi ipú ɛgíkwū otu lɔfú lɔfú, lɛ olɛhɔ̄ nōo ŋmá ɛgiyí um nyā cɛ̄ lɛ ɔ́. Da ɔ́ kahíníī, “A gē yá ucē bɛ̄ɛka ágábá ipú odúúdú aéwo ā, amáŋ a gbla íkwu nōo yɔ̄ ipú ísu, ī tágwā ā fíyɛ́. A gē lɛ gē bī ikpó kú uwɔ í yɛ ipú éŋkpɔ̄ ā gē bú ɔ̄ gbɔɔdɔɔ.

³Eko nɛ̄ éwo alɛwa gáā le jīla, ami, Óndú ā, nōo wɛ Ɔwɔicō ā géē kwú uwɔ mla ɛ́yá kú um klla í cɛ̄ lɛ uwá pi uwɔ mla ɛ́yá ɔ́ɔmā wɛ̄ɛcɛ.

⁴N géē je uwɔ tɛ́cɔ̄ tɛ́ɛcɛ ajɛ áncā, klla í kpó odúúdú aígbáanɔ mɛ́mla aɛ́bɛ́ wā í je okwū uwɔ wu lé ŋmá ajɛ.

⁵N géē wá okwū uwɔ klá ɛfu mɛ́mla ɔpɛ́ dóódu.

⁶Oyī kú uwɔ géē pɛ́ klá ɛfu ga ɔpɛ́ jāā gbéeko nōo kwú cēenyi tū ipú aɔ́kpá ā.

⁷Eko nɛ̄ n géē je uwɔ yíífi ā, n géē je obū klá ɔkpáncō, klla í kpó aínyílɔ́wɔ ā dobū. Ɛnɔ géē gaá tayínū igbīhi ojuja, ɔyā í kē gáā fíyɛ́ ajɛ ŋ́.

⁸N géē je odúúdú aɔ́lá nēe ī fíyāajɛ ŋmá ɔkpáncō ā kpó nyí, cɛ́ɛ́ ajɛ kú ɔlɛ́ uwɔ tá ipú obū kpímmm. Ami, Óndú ā, nōo wɛ Ɔwɔicō ā le ka ɛɛ́.

⁹Eko nɛ̄ aéwo ɔhá nɛ̄ á pó ɔ̄kā uwa jéjée ɛ́ɛ́ ŋ́ mā, géē pó ɔ̄kā kú ífi kú uwɔ nyā ā, ó géē je unwalu lɛ uwá ɔtū nɛ̄hi.

¹⁰Ɔdā nɛ̄ n géē yá uwɔ ā, géē hɛ́ aéwo alɛwa ɛ́nyɔ́, í yá uwā eyījii. Eko nɛ̄ n géē miya ɔkpacaŋ́gelī kú um kwu uwá ā, aɔ́cɛ́ géē hɛ́ gliíglií ipú ufi. Ɛ̄cī nēé í je uwɔ catāajɛ ā, ɔnyɔɔnyɛ kú aɔ́cɛ́ ā géē yɔ̄ ī yúufi kú oyēeyī kú nū.”

¹¹Óndú ā, nōo wɛ Ɔwɔicō ā gē da ɔcɛ́ kú Íjīpiti ā kahíníī, “Ɔcɛ́ kú Ubábīlɔn ā géē bī ɔkpacaŋ́gelī kú nū wā í kpɛ́fú tú uwɔ.

¹²N géē cɛ̄ lɛ aícɔ́ɔja ŋmá aéwo olɔnɔɔtū, wā í pi aɔ́kpacaŋ́gelī kú uwā í kpó ācɛ ɔlɛ́ uwɔ ŋmó dúúdú. Odúúdú ācɛ ɔlɛ́ uwɔ mɛ́mla ɔdā dúúmā ɔhá nāa gē yá ɔbɔ́cɛ uwā ā géē je kpó yíífi.

¹³N géē kpó ɛna kú uwɔ hɛ́ ɔkɔ okónu ɔ̄gɔ̄ kú éŋkpɔ̄ dóódu. Kwú ācɛ mɛ́mla aɛ́na í klla gáā yɔ̄ ɛɛ́, nēe gē je éŋkpɔ̄ ā bū igbɔhá ɛ́ɛ́ gɛ ŋ́.

¹⁴N géē yá ka éŋkpɔ̄ kú uwɔ ká ō kwú gbēyī péee, ká ísu kú uwɔ ā ká ō tá hímmyɔ̄ ī pɛ wulɛ́wulɛ́ bɛ̄ɛka ɛ́gɛ́nɛ̄ anɔ̄ ólifu gē pɛ́ ā. Ami nōo wɛ Óndú ā, nōo wɛ Ɔwɔicō ā le ka ɛɛ́.

¹⁵Eko nɛ̄ n kwú Íjīpiti ú catāajɛ, lɛ ɔ́ pīya alácɛ̄, klla kwú ācɛ nēe lā anú ā í kpó ŋmó, é géē jé ka ami ɔ́ɔ wɛ Óndú ā á.

¹⁶Ahɔ̄ nɛ̄ n yɔ̄ ī pi ɛmɛɛma nyā géē je pīya ijē elihɔ̄ kú ɛyíkwū. Ācɛnyā kú aéwɔhá ā géē bá i gwííjē nyā, cɛ́ɛ́ ká e jikwū klla yēekwu kú Íjīpiti mɛ́mla ákú odúúdú ācɛ kú Íjīpiti ā. Ami nōo wɛ Óndú ā, nōo wɛ Ɔwɔicō ā le ka ɛɛ́.”

¹⁷Ɛ̄cī igwɛ́ɛhɔ̄ kú ɔyā aflɛ́yí kú iháyí ɔ́migwɛ́ɛpa nɛ̄ alɔ bá ajɛ kú Ubábīlɔn ā, Óndú ā lɛ ɛlā ka gā um.

¹⁸Ó kahíníī, “Ɔlɛcɛ, yēekwu kú odúúdú ācɛ Íjīpiti. Lɛ uwá kpó ga ɔlékwū mɛ́mla ācɛ olɔfú kú aéwo ɔhá ā.

¹⁹Le da uwá kahíníī, “Aá gbɛlá ka aá ɔ́ɔ héyīfuú fíyɛ́ ācɛ aéwɔhá dóódu á nɛɛ? Aá géē ga ɔlékwū, nyɔ̄ ī gwutá abɔ́ɔ pi ācɛ nēé wɛ ákú Ɔwɔicō ŋ́ mā.

²⁰Ācɛ Íjīpiti géē pɛ́ kwú mɛ́mla ācɛ nēé ŋmó ɛfú ā dúú. Ikwū le tútū ō je odúúdú uwá kpó ŋmó ɛɛ́.

²¹Ācɛ nēe lé ogbēnjūwā kú ɛfú ā, nēe cē ācɛ Ijípiti kpɛ́fú ā, géē bá ɔlékwū bá ī yá ācɛ Íjīpiti omáaba wā ɔlékwū. É tɔ́ɔga ka, ‘Ācɛ nēé wɛ ákú Ɔwɔicō ŋ́, nēé kpó ŋmó ɛfú ā gā amānyā dúú ɛɛ́. Uwá gwutá bɛ̄ɛka aá ā.

²²Asírīya yɔ̄ abɔ́ɔ, únóji kú aícɔ́ɔja kú ɔlɛ́ nū, yɛ ɔ́ jīla tá biílí. Ɛfú lé odúúdú uwá á.

²³Aúnóji kú uwá ā bá ɛga nōo lipú fíyɛ́ dúú kú ɔlékwū ā á. Ɛfú lé odúúdú aícɔ́ɔja kú ɔlɛ́ nū ā. Únóji kú uwá yɛ ɔ́ jīla tá. Amáŋ, é tɛtɛ gē tū ācɛ nōo yēeyī ɛcɛ ā ufi.

²⁴Ɛlam yɔ̄ abɔ́ɔ, aúnóji kú aícɔ́ɔja kú ɔlɛ nū kē yɛ ɔ́ jīla tá biílí. Ɛfú lé odúúdú uwá dúú á. Uwá í wɛ ákú Ɔwɔicō ŋ jāā gbéeko nēé ga ɔlékwū. Éko nēé yēeyī ā, é tɛtɛ gē tū ācɛ ufi ɛga dóódu kú ɛcɛ. Amáŋ ícɛ nyā, é gekwú uwēyī kē lɛ uwā kwú ɔlékwū ɛɛ́.

²⁵Ɛlam gwutá ipú ācɛ nēé ŋmó ipú ɛfú ā. Únóji kú odúúdú aícɔ́ɔja kú ɔlɛ́ nū le jīla tū ákú nū. Odúúdú uwā í wɛ ákú Ɔwɔicō ŋ́, é kē kpó uwā ŋmó ɔgbɛ́fú. Eko nēé yēeyī ā, é ī tū ācɛ ufi amáŋ é gekwú uwēyī kē lɛ uwá kwú ɔlékwū ɛɛ́. Ɔdā nōo gē yá ācɛ nēé ŋmó ɔgbɛ́fú ā, yá uwā dúú á.

²⁶Umɛ́sɛ̄ki mɛ́mla Utúbalu bá abɔ́ɔ, aúnóji kú odúúdú aícɔ́ɔja kú ɔlɛ́ uwā yɛ uwá jīla abɔ́ɔ. É wɛ ācɛ kú Ɔwɔicō ŋ́, é kē kpó uwā ŋmó ɔgbɛ́fú dúú. Amáŋ é tɛtɛ ī tū ācɛ nēe yēeyī ɛcɛ ā ufi.

²⁷É nyi uwá okwū kú ojīlīmā bɛ̄ɛka aɔ́cɛ́fú kú īkée ā ŋ́. É nyi ācɛ ojīlīmā ɔ́ɔmā lɛ odúúdú iyɔ́fú kú uwā kpó tū uwá iyē ɛɛ́ nēé nyī uwá ga ɔlékwū ā. É kwú aɔ́kpacaŋ́gelī kú uwā í tá ɛháajɛ kú ɛyí kú uwā, kllá kwú ɔkplɛ́fú kú uwá ú klá uwá ɔtū. Aɔ́cɛ́fú nyā lɔfú nɛ̄hi nɛ̄ odúúdú ācɛ tɛtɛ gē yúufi uwā.

²⁸ɛ́gɔ́ɔmā nēé gáā ca ācɛ Íjīpiti gwutá ɔlékwū mɛ́mla ācɛ nēé wɛ ákú Ɔwɔicō ŋ́, nēé kpó ŋmó ɔgbɛ́fú ā dúú á.

²⁹Ɛ́dɔm yɔ̄ abɔ́ɔ mɛ́mla aɔ́cɛ́ kú ɔlɛ́ nū. É tɛtɛ wɛ aícɔ́ɔja nēe lɔfú nɛ̄hi amáŋ é gwutá ɔlékwu ícɛ mɛ́mla ācɛ nēe wɛ ákú Ɔwɔicō ŋ́, nēé ŋmó ɔgbɛ́fú ā.

³⁰Odúúdú aɔ́cɛ́ kú ajɛ ɛhícō ā bá abɔ́ɔ, ācɛ Usídɔn kē bá abɔ́ɔ dúú. Ɔfú kú uwā tɛtɛ wɛ ɔdā ufi. Amáŋ ícɛ nyā uwá gwutá ipú uwēyī ɔlékwu mɛ́mla ācɛ nēé wɛ ákú Ɔwɔicō ŋ́, nēé kpó ŋmó ɔgbɛ́fú ā. Uwēyī kú ācɛ nēe gē ga ɔlékwū ā lɛ uwá kwú dúú ɛɛ́.

³¹Abɔ̄ ɔcɛ́ kú Íjīpiti í má odúúdú ācɛ nēé kpó ŋmó ipú ɛfú nyā, ó gē tá anú mɛ́mla aícɔ́ɔja kú ɔlɛ́ nū ā ɔtū lé.” Abɔ̄ Óndú ā, nōo wɛ Ɔwɔicō ā ka lɛ a á.

³²“Ami yá ka ɔcɛ́ kú Íjīpiti ká ō tū ācɛ kú ɛcɛ ufi ā. Amáŋ é géē je anú mɛ́mla aícɔ́ɔja kú ɔlɛ́ nū kpó ŋmó ɔgbɛ́fú, klla í kpó uwá nyi ipú únóji gáā bá mɛ́mla odúúdú ācɛ nēé wɛ ákú Ɔwɔicō ŋ́, nēé kpó ŋmó ɔgbɛ́fú ā.” Óndú ā, nōo wɛ Ɔwɔicō ā le ka ɛɛ́.