Read idoma ISÍKƐ̄LU 33 Bible Online

ISÍKƐ̄LU 33 - idoma bible

ISÍKƐ̄LU 33

¹Ígbɔhá Óndú ā klla lɛ ɛlā ka gā um.

²Ó kahíníī, “Ɔlɛcɛ, lɛ ka lɛ ācɛ ɔlɛ́ uwɔ ɔdā nōo gē yá eko nɛ̄ n lɛ ɛfú bī wā ipú ajɛ ā. Ācɛ kú ajɛ ɔ́ɔmā géē lɛ ɔ̄cɛ éyi kú uwā fu ká ō wɛ ɔ̄cɛ ogbāājɛ.

³Ɔ́dāŋ́ ka ɔ̄cɛ ɔ́ɔmā lɛ olɛlā má ī wā, nōo le opo tá lɛ ācɛ lɛ ācɛ ā ahɔ̄ pī,

⁴ɔ́dāŋ́ ka ɔ̄cɛ dúúmā nōo le opo ā pó nōo tá ká ō jahɔ̄, nɛ̄ olɛlā ā wā í kwú ɔ̄ ú ŋmó, ayíka oyī kú nū ā ce anú abɔ̄yīnū īyī nū ɛyī.

⁵Anú ŋmó īyī nū á, ohígbū ka ó jāhɔ̄ lɛ ahɔ̄ nēé pi ɔ́ anú ā ŋ́. Ɔ́dāŋ́ ka ó jāhɔ̄ klla pó nɛɛ, ó géē yɛ í lɛ oyēeyī kú īyī nū nyatá.

⁶Amáŋ, ɔ́dāŋ ka, ɔ̄cɛ ogbāājɛ ā lɛ olɛlā má ī wā, anɔ́ɔ ó tá opo, pi ācɛ ā ahɔ̄ ŋ́ má, olɛlā í wā í kpó ācobɔ̄bíipú ɔ́ɔmā ŋmó. Amáŋ oyī kú uwá í ce ɔ̄cɛ ogbāājɛ ā ɛyí.”

⁷“Abālɔbányā, ɔlɛcɛ, n kwú uwɔ ú yá ɔ̄cɛ ogbāājɛ kú éwo kú Ísrɛ̄lu ɛɛ́. Ahɔ̄ ōpi dúúmā nāa géē pó ŋmá ɛgiyí um, a géē ka lɛ uwá.

⁸Ɔ́dāŋ́ ka n le ka ka, ɔ̄cobɔ̄bíipú géē kwú, nɛ̄ á ka lɛ ɔ́, ká ō kwú ucē kú nū ā ú pīyabɔ̄ cɛ́ɛ́ ká ō le nyatá ŋ́, ó géē kwú ipú ɔ́bíipú kú nū ɔ́ɔmā. Amáŋ oyī kú nū ā géē ce uwɔ ɛyí.

⁹Ɔ́dāŋ́ ka a lɛ ɔ̄cobɔ̄bíipú ā ahɔ̄ pi, nōo kwúcē ŋmá ucē ɔ́bíipú kú nū ā ŋ́, ó géē kwú ipú ɔ́bíipú kú nū ā. Oyī kú nū í gáā ce uwɔ ɛyí ŋ́. Ayíka a lɛ īyī uwɔ nyatá ɛɛ́.”

¹⁰Óndú ā klla da um kahíníī, “Ɔlɛcɛ, lɛ ɛlā nɛ̄ ācɛ kú Ísrɛ̄lu bá ī ka ā, ka kwúcē lɛ uwá. É ka, ‘Ɔ́bíipú mɛ́mla ɔdōbɔ̄bí nɛ̄ alɔ bī ā le gbɛnú ce alɔ abɔ̄ bá ɛɛ́. Alɔ gē mɛ ŋmá ajɛ dúúdú ɛɛ́. Abɔ̄ ó yá lɛ ɛ́ɛ́ nɛ̄ alɔ géē yēeyī āa?’

¹¹Lɛ ka lɛ uwá ka ɔkwɛ̄yi, ɛ́gɛ́nɛ̄ Ami nōo wɛ Óndú ā, wɛ Ɔwɔicō nōo yēeyī ā, ikwū kú ɔ̄cobɔ̄bíipú ī he um ɔtū ŋ́. Ó géē he um ɔtū cɛ́ɛ́ ká ō kwúcē ŋmá ɔ́bíipú nɛ̄ ó ī bí ā cɛ́ɛ́ ká ō yēeyī. Ísrɛ̄lu, aá mā ɔdōbɔ̄bí nɛ̄ aá bá ī yá ā tá. Ɔdí yá nɛ̄ aá tíne ō kwú āa?

¹²Ɔlɛcɛ, le ka lɛ ācɛ kú Ísrɛ̄lu ka eko dúúmā nɛ̄ ɔ̄cokpaakpa lɛ ɔ́bíipú bī, okpaakpa kú nū dóódu nɛ̄ ó yá tɛtɛ ā í gáā nyā ɔ́ tá glá ŋ́. Ɔ́dāŋ́ ka ɔ̄cobɔ̄bíipú mā ɔ́bíipú kú nū tá, é gáā yá ɔ̄ italā ŋ́. Okpaakpa nɛ̄ ɔ̄cokpaakpa ā tɛtɛ yá ā í gáā nyā oyēeyī kú nū tá eko nɛ̄ ó gbɔɔ́ ō bɔ̄bíipú ŋ́. Ó géē kwú.

¹³N lɔfú cokónu lɛ ɔ̄cokpaakpa kóō géē yēeyī glá. Anɔ́ɔ ó gbɛlá ka okpaakpa nɛ̄ anúɔ ɔ́ɔ yá ā ɔ́ɔ jɛ̄ ɛɛ́, gbɔɔ́ ō bɔ̄bíipú á. N gáā blakwu ɔdōlɔhi dúúmā nōo yá ɛɛ́ gɛ ŋ́. Ó géē kwú ohígbū ɔ́bíipú kú nū ā.

¹⁴N lɔfú pi ɔ̄cobɔ̄bíipú ahɔ̄ ká ó géē kwú, amáŋ ó lɔfú mā ɔ́bíipú kú nū ā tá klla gbo ɔ́ ō yá ɔdōlɔhi mɛ́mla ɔdā okpaakpa.

¹⁵Ó lɔfú kwú ɔdā ō ɔdōōcabɔ̄ kú ɛ́kplá nɛ̄ ó mīyɛ ā ú kwúcē, ámāŋ kwú ɔdā nōo je uwī ā ú kwúcē igbīhi, nōo mā ɔ́bíipú kú nū tá klla yɔ̄ ī yɛce íne nɛ̄ n je, nōo gē je oyēeyī ā. Ó lɛ ā, ó gáā kwú ŋ́ amáŋ ó géē yēeyī.

¹⁶N géē je ɔ́bíipú nōo bī ā yá ɔ̄ ɛhi. Ó géē yēeyī ohígbū ka ó lɛ ɔdōlɔhi mɛ́mla ɔdā nōo le kpaakpa ā yá ɛɛ́.

¹⁷Ācɛ ɔlɛ́ uwɔ gēe ka ka, ɔdā nɛ̄ ami ɔ́ɔ ī yá ā ɔ́ le kpaakpa ŋ́. Amáŋ ó lɛ ā ŋ. Ɔwɛ kú uwā í le kpaakpa ŋ́ má.

¹⁸Eko nɛ̄ ɔ̄cokpaakpa ā mā ɔdā okpaakpa ō yá kú nū ā tá, klla gbo ɔ́bíipú ō bī, ó géē kwú ohígbū ɔ́bíipú nɛ̄ ó bī ɔ́ɔmā.

¹⁹Ɔ́dāŋ́ ka ɔ̄cobɔ̄bíipú kē mā ɔ́bíipú kú nū ō bī tá, klla gbo ɔdā okpaakpa mɛ́mla ɔdōlɔhi ō yá, ó géē nyā oyēeyī kú īyī nū tá ohígbū ɔ́ɔmā.

²⁰Amáŋ, ācɛ Ísrɛ̄lu, aá gē ka ka ɔdā nɛ̄ ami ɔ́ɔ ī yá ā ɔ́ɔ le kpaakpa ŋ́. N géē kɛpɔ̄ tū aá ŋmá lɛ ɔdā dóódu nɛ̄ aá yá ā.”

²¹Ɛ̄cī ɔ́mɛhɔ̄ kú ɔyā ɔ́migwó kú iháyí ɔ́migwɛ́ɛpa nɛ̄ alɔ bá ajɛ kú Ubábīlɔn ā, ɔ̄cɛ éyi nōo kwu ŋmá Ujerúsālɛm gā ɛgiyí um. Ó gáā da um kéē lɛ Ujerúsālɛm catāajɛ ɛɛ́.

²²Ɔ̄nɔ̄ɔnɛ̄ nōo gbɔbū lɛ ɔ̄cɔ̄ɔ̄cī nɛ̄ ɔ̄cɛ ā wā ā, ɔfú kú Óndú ā yɔ̄ iyē kú um nɛ̄hi. Ohígbū ɔ́ɔmā eko nɛ̄ ɔ̄cɛ ɔ́ɔmā wā ɔ̄cɔ̄ɔ̄cī ā, Óndú ā kwú ɔfú ɛlā ōka ú gā um.

²³Óndú ā lɛ ɛlā ka gā um.

²⁴Ó kahíníī, “Ɔlɛcɛ, ācɛ nēe lā ipú ácakpō kú aígelī nɛ̄hi kú Ísrɛ̄lu ā gē ka ka, ‘Ébrahām wɛ ɔ̄cɛ ékpónú, ɛ́ɛ ké kwú odúúdú ajɛ ā ú lɛ ɔ́. Abālɔbányā, alɔ lɛ ɛwa nɛ̄hi, ohígbū ɔ́ɔmā, ajɛ ā wɛ ákú alɔ mɛ́ɛnɛ.’

²⁵Le ka lɛ uwá ka ami, Óndú ā nōo wɛ Ɔwɔicō ā gē ka, ‘Aá gē lé ɛbɛ́ nɛ̄ oyī kú nū yɔ̄ ipú nū kpɔ́, aá gē pā ɛcí, klla gē ŋmó ɔ̄cɛ. Ɔdí yá nɛ̄ aá gē gbɛlá ka ajɛ ā ɔ́ɔ géē wɛ ákú aá āa?

²⁶Aá kpɔ́tū ce ɔkpacaŋ́gelī kú aá, aá ī yá ucē ɛbí nɛ̄hi, odúúdú aá klla ī gbaajā. Ɔdíyá nɛ̄, aá gē gbɛlá ka ajɛ ā ɔ́ɔ géē wɛ ákú aá āa?’

²⁷Le ka lɛ uwá ka ami, Óndú ā nɛ̄ o wɛ Ɔwɔicō ā gē pi uwá ahɔ̄, ka ɛ́gɛ́nɛ̄ ami abɔ̄yī um wɛ Ɔwɔicō nōo yēeyī ā, odúúdú ācɛ nēe lā ipú ácakpō kú aígelī nɛ̄hi ā, ɛfú géē lé uwā. Ācɛ nēe lā aípɔ́lɛ́ eyīyɛcɛ, aɛ́bɛ́ ipácí géē je uwá kpó kwú lé. Ācɛ nēe kwú í tayínū ɔ̄gɔ̄ ɛcɔ̄ mɛ́mla ɛyí aɛ́fu ā, ōcē obɔ̄bí géē je uwá kpó ŋmó.

²⁸N géē je ajɛ ā tá alácɛ̄, cɛ́ɛ́ ɔfú nēe gē yá ɔbɔ́cɛ̄ kú nū nɛ̄hi ɔ́ɔmā mɛ. Odúúdú aɛ́fu kú Ísrɛ̄lu géē je pīya ipácí nɛ̄hi, nɛ̄ ɔ̄cɛ dúúmā í gáā lɔtū yɛ bū ɔ glá ŋ́.

²⁹Eko nɛ̄ n italā yá ācɛ ā ohígbū ɔ́bíipú kú uwā, kwú ajɛ ɔlɛ́ uwá í tá alácɛ̄, cɛ́ɛ́ uwá le jé ka ami ɔ́ɔ wɛ Óndú ā á.”

³⁰Óndú ā klla da um kahíníī, “Ɔlɛcɛ, ācɛ ɔlɛ́ uwɔ ā gē kɛlā lɛyíkwu uwɔ eko nɛ̄ uwá le jīla ɛgiyí ɔdɔ kú igelī ā ámāŋ okónpinu kú ɔlɛ́ uwā ā. É gē da iyī uwā ka, ‘Alɔ nyɔ̄ ká ālɔ̄ gáā pó ɛlā kú olɛhɔ̄ nōo ŋmá ɛgiyí Óndú ā wā ā.’

³¹Anɔ́ɔ ācɛ ɔlɛ́ um gáā le jīla ká ē pó ɛlā nāa bī gáā ka ā á, amáŋ é gáā yá ɔdā nāa da uwá ká ē yá ā ŋ́. É bī okónu kú uwā áncā ī le mafú ɛ́gɛ́nɛ̄ é yíihɔtū tú um lɛ ā, amáŋ ɔtū kú uwā tá eyī ō kwu ɔdā nēé ī yá ā.

³²Á wɛ ɔdā dúúma ɛgiyí uwa gwū ɔ̄cɛ o gwííjē olɔnyɛ mla ɔkɔ olɔnyɛ, nōo klla jé ō gwō ɔdā oōgwō lɔɔlɔhi tá ŋ́. É ī pó ɛlā nāa gē ka ā, amáŋ é gáā yá odúúmā kú nū ŋ́.

³³Amáŋ eko nɛ̄ odúúdú ɛlā kú uwɔ ā gáā le cɛ̄, ohígbū ka ó kē í cɛ̄, cɛ́ɛ́ uwá le jé ka ɔ̄comɛ́ɛbɛ ɔ́ɔ húmáyī lā ipú uwá.”