Read idoma ISÍKƐ̄LU 34 Bible Online

ISÍKƐ̄LU 34 - idoma bible

ISÍKƐ̄LU 34

¹Óndú ā lɛ ɛlā ka gā um.

²Ó kahíníī, “Ɔlɛcɛ, lɛ aótrɛ̄yí kú ācɛ kú Ísrɛ̄lu ā ŋmɛ́pɔ̄bí. Ka ɛlā lɛ uwá ká ā da uwá ka ami, Óndú ā, nōo wɛ Ɔwɔicō ā gē da uwá ka, ‘Ákú aá mɛ ɛɛ́, aá ācogbāálá nēe ī gbō Ísrɛ̄lu ā. Aá gē leyīkwú īyī aá, amáŋ aá lɛ ɛlá wu aálá ā ŋ́.

³Aá gē gwá enyi amɛ̄ álá, ī yá īlī ŋmá ɔnwū kú uwā le wu iyē, klla í ŋmó aálá nēe jɔ̄kwū fíyɛ́ dúú ā lé. Amáŋ aá gē leyīkwu aálá a ŋ́.

⁴Aá lɛ ɔfú tū aálá nēe kwáhi ā iyē ŋ́. Aá nyā aɛ́nɛ̄ e ī doōcē ā tá ŋ́. Aá tá ágbe kú aɛ́nɛ̄ ágbe yá uwá ā ŋ́. Aá pīya aɛ́nɛ̄ e bá ī bí ā ɛyí wā ɔlɛ́, ɛ́ɛ́ nɛ̄ aá klla tine aɛ́nɛ̄ e gebí ā ká aá kpó uwā wā ɔlɛ́ ŋ́. Ikɔkɔ ɔ́ɔmā, aá gē bī ɔnɔɔtū le gbō uwā.

⁵Abɔ̄ aálá ā í lɛ ɔ̄cɛ nōo ī gbō uwá ŋ́ mā, é kwu uwā pahīla, anɔ́ɔ aɛ́bɛ́ ipácí bá ī kwú ī ŋmó uwā lé.

⁶Ohígbū ɔ́ɔmā, aálá kú um bá ī yɛ daála ɛyí aɛ́fu mɛ́mla ɔpɛ́ dóódu. É le pahīla klá ɛcɛ ɛga dóódu. Ɔ̄cɛ dúúmā í lɛ ɛlá wu uwá, kéē tíne uwá ɛ́ɛ́ nēé gē pīyɛ̄ uwā ŋ́.

⁷“Ohígbū ɔ́ɔma, aá nēe wɛ ācogbāálá ā, aá jāhɔ̄ lɛ ɛlā, nɛ̄ ami, Óndú ā, gē ka lɛ aá ā.

⁸Ɛ́gɛ́nɛ̄ ami, nōo wɛ Ɔwɔicō ā oyēeyī ā, aá jāhɔ̄. Aɛ́bɛ́ obɔ̄bí kwú aálá kú um í kpó kwú, lɛ uwá kpó ŋmó lé ɛɛ́, ohígbū ka é lɛ ācɛ o gbo uwá ŋ́. Ācogbāálá kú um ā í tíne aálá ā ŋ́. Uwá bá ī lɛ ɛlá kwú īyī uwā, í lɛ ɛlá wu aálá ā ŋ́.

⁹Aá jāhɔ̄ gā um, ācogbāálá.

¹⁰Ami, Óndú ā nōo wɛ Ɔwɔicō ā le ka ka, n kwú pīya olɛlā kú aá ɛɛ́. N géē kpó aálá kú um ŋmá ɛgiyí aá, aá gáā wɛ ācogbāálá kú um ā gɛ ŋ́. Ń klla gáā cɛ̄ lɛ aá bá ī lɛ ɛlá kwu iyī aá ɛ́ɛ́ gɛ ŋ́. N géē hɛ́ aálá kú um tá ŋmá abɔ̄ kú aá, n gáā cɛ̄ lɛ aá je uwá kpó ŋmó lé ɛ́ɛ́ gɛ ŋ.

¹¹Ami, Óndú ā nōo wɛ Ɔwɔicō ā gē da aá ka, ami abɔ̄yī um géē tíne aálá kú m klla í leyīkwu uwá mɛ́ɛ̄ á.

¹²N géē tū uwá bá ɔwɛ ékpónú, nɛ̄ ɔ̄cogbálá gē tū álá kú nū nēe pahīla ā bá kllá ī lɛ ɛlá kwu uwá ā. N géē tá odúúdú uwá bá, ŋmá ɛga dóódu nēé pa uwá hīla nyɔ̄ ɛ̄cī kú obū mɛ́mla ífi ā.

¹³N géē kpó uwá ŋmá ipú aéwɔhá, í tá uwá bá, klla í kpó uwá wā ipú ajɛ ɔlɛ́ uwā. N géē bī uwá cīgbīhi wā ɛyí aɛ́fu mɛ́mla aɔ́kpá kú Ísrɛ̄lu, klla í kpó uwá nyɔ̄ í lúlé ipácí olɔhi.

¹⁴N géē cɛ lɛ uwá nyɔ̄ í lúlé ɛbɔ́ ipácí kú ɛyí aɛ́fú ā mɛ́mla aɔ́pɛ́, klla í yɔ̄ ī lé odúúdú ácí ɛ̄mɛ̄ɛ̄mɛ̄ dóódu kú Ísrɛ̄lu ā.

¹⁵Ami, abɔ̄yī um géē wɛ ɔ̄cogbálá kú álá kú um á. N ke í tíne ɛga omulɛ́nyɔ́ lɛ uwá. Ami, Óndú ā, nōo wɛ Ɔwɔicō ā le ka ɛɛ́.

¹⁶N géē tíne aálá nēe gebí ā, í kpó aɛ́nɛ̄ e yɔ̄ ī bī ā kwúcē wā ɔlɛ́, í tá ágbe kú aɛ́nɛ̄ e lɛ ágbe ā, klla í nya aɛ́nɛ̄ e gē doōcē ā tá. Amáŋ aálá nēe jɔ̄kwū klla lɔfú nɛ̄hi ā, n géē je uwá kpó ŋmó, ohígbū ka ami ā wɛ ogbálá nɛ̄ ō gē yá ɔdā okpaakpa á.

¹⁷Ohígbū ɔ́ɔmā, aálá kú um, ami, Óndú ā nōo wɛ Ɔwɔicō ā ī da aá ka n géē jila ɔnyɔ̄ɔnyɛ kú aá, géē yā aólɔfú ŋmá ipú aɛ́nɛ̄ e lɔfú ŋ́ mā, klla í yā aálá ŋmá ipú aɛ́wū.

¹⁸Ācɛ ohī kú aá, ácí olɔhi nɛ̄ aá gē lé ā, í jɛ̄ aá ŋ́, amáŋ aá gē lɛ ikpó da aɛ́nɛ̄ aá lé ŋ́ mā tāajɛ. Aá lɛ éŋkpɔ̄ oyēŋēē gwá klla kwú éŋkpɔ̄ nōo hile ā í bū gbɔdɔɔ.

¹⁹Aálá kú um ɔhá ā gē lé ácí nɛ̄ aá lɛ ikpó da ɔɔ́ tāajɛ ɔ́ɔmā, klla ī gwá éŋkpɔ̄ nɛ̄ aá bū gbɔdɔɔ ɔ́ɔmā dúú.

²⁰Ohígbū ɔ́ɔmā ā, ami, Óndú ā nōo wɛ Ɔwɔicō ā gē da aá ka, n géē kɛpɔ̄ kú aálá nēe jɔ̄kwū klla lɔfú ā mɛ́mla aálá nēe kē lɔfú ŋ́ mā.

²¹Aá nēe jɔ̄kwū klla lɔfú ā bī iyē mɛ́mla ajī kú aá le kwú aálá nēe lɔfú ŋ́ mā jāā kwú uwā ú nū ŋmá ipú ajɛ ā.

²²Amáŋ n géē hɛ́ álá kú um ā tá, ń gáā cɛ̄ lɛ uwā móōwē igbɔhá ɛ́ɛ́ gɛ ŋ́. N géē kɛpɔ̄ tū álá kú um dóódu, klla í yā olɔhi ā ŋmá ipú obɔ̄bí ā.

²³N géē je ɔcɛ́ bɛ̄ɛka Udéfīdi, ɔ̄cocɛ̄hɔ̄ kú um ā lɛ uwá, cɛ́ɛ́ kóō kwú pīya ogbāálá kú uwā, ká ō leyīkwu uwá.

²⁴Ami, Óndú ā, géē wɛ Ɔwɔicō kú uwā á. Ɔcɛ́ lɛbɛ̄ɛka Udéfīdi, ɔ̄cocɛ̄hɔ̄ kú um ā géē wɛ ɔcɛ́ kú uwā á. N le ka ɛɛ́.

²⁵N kē í cokónu mla uwá nōo géē yá kéē yɔ̄ ɛbɔ́. N géē je odúúdú ɛbɛ́ ipácí oŋmácɛ ā kpó nū ŋmá ipú ajɛ ā, cɛ́ɛ́ ka aálá kú um ké ā lúlé ɛbɔ́ ipácí, klla gbɔlā ɛbɔ́ ipú aúpū ā.

²⁶N géē hɛ́ ɔhā ce uwá klla í yá ké ē lā yɛ ɛyí ɛfu kú um ā tá biílí ɛbɔ́. N géē je ɔwɔ lɛ uwá eko nɛ̄ ó cē ɛgbá ā abɔ́ɔ. Ɔwɔ ā géē yā cabácabá lɛ uwá.

²⁷Ɔcí géē gwá īkpō, ɛhɔ̄ géē yá ɔdɛ̄hɔ̄, ācɛ dóódu géē lā ɔlɛ́ uwá ɛbɔ́ ipú ajɛ ā. Eko nɛ̄ n kwú agbá kú ācɛ ɔlɛ́ um ú hɛ́, kwú uwá u hɛ́tá ŋmá abɔ̄ kú ācɛ nēe bī uwá ɔfíyɛ ā, cɛ́ɛ́ é le jé ka ami ɔ́ɔ wɛ Óndú ā á.

²⁸Aéwo opɛ̄cí ā í gáā kpó uwā ɔlɛ́ wu ɛ́ɛ́ gɛ ŋ́, aɛ́bɛ́ ipácí oŋmɔ́cɛ ā í klla gáā kwú uwá kpó ŋmó lé gɛ ŋ́. É géē lā ɛbɔ́, ɔ̄cɛ dúúmā í gáā tū uwá ufi gɛ ŋ́.

²⁹N géē je ajɛ ɛhɔ̄ olɔhi lɛ uwá, nōo géē yá ká ɔkpɛtā kú ō ŋmó uwā ɔhá gɛ ŋ. Aéwɔhá ā, í gáā yá uwá eyī ŋɔɔ́ɔ ɛ́ɛ́ gɛ ŋ́.

³⁰Odúúdú uwā géē jé ka ami, Óndú ā nōo wɛ Ɔwɔicō kú uwā ā yɔ̄ pi uwā. Ka uwá nēe wɛ ācɛ Ísrɛ̄lu ā ɔ́ɔ wɛ ācɛ ɔlɛ́ um.

³¹Aá, aálá kú um nɛ̄ n gē je ɔdōlé lɛ aá ā, wɛ ācɛ ɔlɛ́ um, ami kē wɛ Ɔwɔicō kú aá á.” Abɔ̄ Óndú ā, nōo wɛ Ɔwɔicō ā ka lɛ ā á.