Read idoma ISÍKƐ̄LU 36 Bible Online

ISÍKƐ̄LU 36 - idoma bible

ISÍKƐ̄LU 36

¹Óndú ā da um kahíníī, “Ɔlɛcɛ, kɛlā tɛ́ɛcɛ lɛ aɛ́fu kú Ísrɛ̄lu ā. Ká a da uwá kéē jāhɔ̄ lɛ olɛhɔ̄,

²nɛ̄ ami, Óndú ā, nōo wɛ Ɔwɔicō ā gē tū fu uwá ā. Da uwá kahíníī, “Aólɛlā kú Ísrɛ̄lu gē gwō klla í gwéeyē ka, aɛ́fu kú íkée ɔ́ɔmā, ɔ́ɔ kwú pīya ákú aá ɛɛ́.

³Tɔ́ɔna, ká a kɛlā nɛ̄ ami, Óndú ā, nōo wɛ Ɔwɔicō ā yɔ̄ gē ka ā. Eko nɛ̄ aéwɔhá ā gáā kwú aɛ́fu kú Ísrɛ̄lu í catāajɛ, kwú uwā í tá alácɛ̄, klla kwú uwā í pīya ákú uwā ā, odúúdú uwá bá gē cá Ísrɛ̄lu ɛcá.

⁴Ohígbū ɔ́ɔmā, aá jāhɔ̄ lɛ ɛlā nɛ̄ ami, Óndú ā, nōo wɛ Ɔwɔicō ā gē ka lɛ aɛ́fú ā, kwu ɛ́nɛ̄ŋcɛ̄ mɛ́mla aɛ́nɛ̄hi, aáyɔ́kpá mɛ́mla aɔ́pɛ́, mɛ́mla ɛga dúúmā kú ajɛ ā, nēé je kpó catāajɛ mɛ́mla aígelī nɛ̄hi nēe tá alácɛ, nɛ̄ aéwɔhá nōo yɛ ɔ́ jīla tá kpó wu klla gē yá uwā okónu ā.

⁵Ami Óndú ā, nōo wɛ Ɔwɔicō ā lɛ ɛlā ka ipú íwɔ́tū nɛ̄hi kú um nōo lɛbɛ̄ɛka ɔlá nɛ̄hi ā, lɛyíkwú aéwo ɔhá ɔ́ɔmā ɛɛ́. Ofíyɛ́ dúú ā, Ɛ́dɔm. É bá ī gwéeyē abɔ̄ é gáā mīyɛ ajɛ kú um, kéē klla gaá kpó ajɛ ácí kú nū wu.

⁶Ohígbū ɔ́ɔmā, kɛlā lɛ ajɛ kú Ísrɛ̄lu. Le ɔdā nɛ̄ ami Óndú ā, nōo wɛ Ɔwɔicō ā yɔ̄ gē ka ā ka lɛ aɛ́fu, kwu ɛnɛ̄ŋcɛ́ mɛ́mla ɛnɛ̄hi, aáyɔ́kpá mɛ́mla aɔ́pɛ́ ipú íwɔ́tū nɛhi kú um, ohígbū ɔwɛ nɛ̄ aéwɔhá cá uwā ɛcá klla je uwēyī lɛ uwá lɛ ā.

⁷Ami Óndú ā, nōo wɛ Ɔwɔicō ā gē cokónu ka, é géē je uwēyī lɛ aéwɔhá dóódu ɔ́ɔmā.

⁸Amáŋ ɛyí aɛ́fu kú Ísrɛ̄lu ā, ɔcí géē jɛ̄, le ēpū klla gwá īkpō lɛ aá igbɔhá kpɔ́ ɛ́ɛ́. Aá, ācɛ Ísrɛ̄lu, nēe wɛ ācɛ ɔlɛ́ um ā, géē wā ɔlɛ́ ānāānā.

⁹N yɔ̄ ābɔ̄ kú aá. N géē yá ká aá lɛ ajɛ ā hí klla lɛ ɔdɛ̄hɔ̄ kú aá nyi ipú ajɛ ā igbɔhá kpɔ́ ɛɛ́.

¹⁰N géē yá ka ācɛ kú Ísrɛ̄lu kéē nyīla lɛwa. Ācɛ géē pɛ́ í tú aígelī nɛ̄hi kú aá nēé je wúla tāajɛ ā gwó klla í lā uwá.

¹¹N géē nyīla ācɛ mɛ́mla aɛ́na kú aá. É klla í ma ayí alɛwa. Ācɛ ā géē lā abɔ́ɔ, ɛ́gɛ́nɛ̄ é tɛtɛ lā ā. N géē yá kóō lɔhi lɛ uwā, é klla géē gbagbénú fíyɛ́ otɛtɛ kú uwā ā. Cɛ́ɛ́ aá le jé ka ami ɔ́ɔ wɛ Óndú ā á.

¹²N géē kpó ācɛ Ísrɛ̄lu, ācɛ ɔlɛ́ um ā wā í lā ipú ajɛ kpɔ́ ɛɛ́. O géē í wɛ ajɛ kú abɔ̄yī aá. Ɔkpɛtā í klla gáā ŋmó ayí uwā gbóógbóō ɛ́ɛ́ gɛ ŋ́.

¹³Ami, Óndú ā nōo wɛ Ɔwɔicō ā ka abɔ̄ ācɛ géē ka ka ajɛ kú Ísrɛ̄lu ɔ́ɔ gē kpó ācɛ lé klla ī cɛ̄ lɛ ayí kú ācɛ nēe lā anú ā kéē pɛ́ kwú ŋmá abɔ̄ uwā.

¹⁴Amáŋ oŋmá eko nyā gɔbū, ajɛ kú Ísrɛ̄lu, á gáā kpó ācɛ lé klla cɛ̄ lɛ ayí kú ācɛ nēe lā ipú uwɔ ā kéē pɛ́kwú ŋmá uwá abɔ̄ gɛ ŋ́. Ami Óndú ā, nōo wɛ Ɔwɔicō ā ī ka ɛɛ́.

¹⁵Ajɛ klla gáā jāhɔ̄ lɛ aéwo ā bá ī yá uwɔ ɛbɛ́ igbɔhá ɛ́ɛ́ nēé gē kpó uwēyi tū uwɔ ɛyí gɛ ŋ́. Ajɛ í kē gáā yá ká ācɛ nēe lā ipú nū kéē je kpó yíífi igbɔhá gɛ ŋ́. Ami Óndú ā, nōo wɛ Ɔwɔicō ā le ka ɛɛ́.

¹⁶Óndú ā kɛlā gā um igbɔhá kpɔ́.

¹⁷Ó kahíníī, “Ɔlɛcɛ, eko nɛ̄ ācɛ kú Ísrɛ̄lu lā ipú ajɛ kú uwá ā, é kwú ɔ̄ ú tēelihɔ oŋmá lɛ ucē nēé ī yá ā mɛ́mla ɔwɛ nēé lā oyēeyī ā. N je ucē nɛ̄ uwá yá ā ká o wɛ ɔdēēlihɔ bɛ̄ɛka ɔnyā nōo yɔ̄ ipú ōnyílá kú nū ā.

¹⁸N cɛ̄ lɛ uwá lɛ ōwē má nɛ̄hi ohígbū ka n le cɔ̄nū mla uwá, ohígbū ācɛ nɛ̄ é ŋmó ipú ajɛ ā, mɛ́mla ɛ̄cī nɛ̄ uwá gbɛ̄gbā je ajɛ ā tēelihɔ á.

¹⁹N lɛ uwá ŋmó ɛpɔ̄bí ohígbū ucē nēe yá mɛ́mla ɔwɛ nēé lā oyēeyī lɛ ā, klla kwú uwā í kpó pahīla tū ipú aéwɔhá.

²⁰Ɛga dúúmā nēé nyɔ̄, é ba ī bī uwēyī gé lɛ iyē kú um nɛ̄ iyē ɔhá dúúmā í tōō le gbla ɔ́ ŋ, ohígbū ka ācɛ gē bá ī ka, ‘Ācɛ nēe bá nyā wɛ ācɛ kú ɔlɛ́ Óndú ā, amáŋ é lɛ uwá nū ŋmá ipú ajɛ kú ɔlɛ́ uwá nɛ̄ ó je lɛ uwá ā.’

²¹Ɔdā nɛ̄ ācɛ kú aéwo nɛ̄ ācɛ kú Ísrɛ̄lu gā ajɛ ɔlɛ́ uwā gaá je uwēyī ga um ā, gbɛlá lɛyíkwu um ā kwú um iyē nɛ̄hi ā.

²²Ohígbū ɔ́ɔmā, lɛ ɛhɔ̄ nɛ̄ ami, Óndú ā, nōo wɛ Ɔwɔicō ā ge tū fu Ísrɛ̄lu ā cɛ̄ lɛ uwá. Da uwá ka ɔdā nɛ̄ n gáā yá ā, ó wɛ ohígbū uwā ŋ́, amáŋ ohígbū iyē kú um nɛ̄ iyē ɔhá dúúmā í tōō gbla anú ŋ mā nēé ge je uwēyī lɛ ɔ́, ɛga dóódu nēé nyɔ̄ ipú aéwɔhá ā á.

²³Eko nɛ̄ n le mafu lɛ aéwɔhá ɔ́ɔmā ka iyē kú um nēe je uwēyī lɛ ɔ́ ā, í tōō le gbla iyē ɔhá dúúmā ŋ́, é géē jé ka ami ɔ́ɔ wɛ Óndú á. Ami Óndú ā, nōo wɛ Ɔwɔicō ā le ka ɛɛ́. N géē bī uwɔ mafú lɛ aéwo dóódu, ka ń tōō le gbla ɔdā ɔhá dúúmā ŋ́.

²⁴N géē kpó aá ŋmá ipú aéwɔhá mɛ́mla ajɛ ɔhá dóódu wā ipú ajɛ kú aá.

²⁵N géē mī éŋkpɔ̄ oyēŋēē klla aá, kllá í je aá yá yēŋēē, ŋmá ipú ɛci ōpā kú aá mɛ́mla ipú ucē ɛbí ɔhá dúúmā nɛ̄ aá yá nēe je aá tēelihɔ ā.

²⁶N géē je ɔtū mɛ́mla odo ɛ̄yīpɛ̄ lɛ aá. N géē je odo olɔfú bɛ̄ɛka ɛcɔ̄ ā ŋmá ɔtū kú aá, klla í je ɔtū nōo ī lɛyítáajɛ ā lɛ aá.

²⁷N géē je ɔfú kú um tá ipú ɔtū kú aá, klla í má ka aá lɛyítáajɛ lɛ íne kú um klla yɛce odúúdú ɔ́da nɛ̄ n je lɛ aá ā.

²⁸Eko ɔ́ɔmā, aá géē lā ajɛ nɛ̄ n je lɛ aádáádā aá. Aá géē wɛ ācɛ ɔlɛ́ um, n kē ī wɛ Ɔwɔicō kú aá āa.

²⁹N géē nyā aá tá ŋmá ipú ɔdā dóódu nōo gē je aá iyē tēelihɔ ā. N géē je ɔ́da kú ɔdɛ̄hɔ̄ kú aá kóō yá nɛ̄hi, nɛ̄ ɔkpɛtā í klla gáā ŋmó ipú ajɛ kú aá ɛɛ́ gɛ ŋ́.

³⁰N géē yá ka īkpɔ̄cí mɛ́mla ɔdɛ̄hɔ̄ kú aá kéē gwá nɛ̄hi nɛ̄ ɔkpɛtá í klla gáā je uwēyī lɛ aá ɛga aéwɔhá ā gɛ ŋ́.

³¹Eko ɔ́ɔmā aá géē blakwu ɔdōbɔ̄bí mɛ́mla ucē obɔ̄bí nɛ̄ aá ya ā, ó ī kwú aá iyē, aá klla í tū iyī aá uwēyī ohígbū ɔ́bíipú mɛ́mla ucē obɔ̄bí kú aá ā.

³²Ācɛ Ísrɛ̄lu, n tíne ka aá jé ka ń gáā yá ɔdā nyā ohígbū aá ŋ́. N tíne ka aá yá uwēyī ohígbū ucē dóódu nɛ̄ aá bá ī yá ā. Ami Óndú ā, nōo wɛ Ɔwɔicō ā le ka ɛɛ́.”

³³Óndú ā nōo wɛ Ɔwɔicō ā ka igbɔhá kahíníī, “Eko nɛ̄ n lɛ aá yá yēŋēē ŋmá odúúdú ɔ́bíipú kú aá, n géē yá ka aá lā aígelī nɛ̄hi kú aá igbɔhá kpɔ́. Aá klla í tá alácɛ̄ kú uwā ā gwó ɛ́ɛ́.

³⁴Ɔ̄cɛ dúúmā nōo tɛtɛ gáā gwū ajɛ ɛhɔ̄ kú aá tá ā, géē má ɛ́gɛ́nɛ̄ ó mu ácí lɛ a. Amáŋ n géē yá ka aá hɛ́hɔ̄ anú kpɔ́ ɛ́ɛ́.

³⁵Ācɛ dóódu géē bá ī ka kahíníī, “Ɛɛ́! Má ɛ́gɛ́nɛ̄ ajɛ nyā nōo mu ácí tá amānyā ā, je yá lɛbɛ̄ɛka ɛhɔ̄ kú Éden ā. Aígelī nēé le wúla tāajɛ kwú pīya alácɛ̄ ā, klla kwú pīya ɛga nēé ge hɛ́ ɔdɔ tū ɔɔ́ klla í lā anú yɔ̄ á.

³⁶Eko ɔ́ɔmā, aéwoɔhá nēe lā kwu aá jīla tá nēe géē hile ā géē jé ka ami, Óndú ā, gē tū alácɛ̄ kú aígelī nɛ̄hi gwó klla í hí í nyi ipú ajɛ ɛhɔ̄ nēe le mu ácí ā. Ami Óndú ā lɛ okónu ce ka n géē yá ɛnya ɛɛ́, n kē í yá ɔ̄.”

³⁷Óndú ā, nōo wɛ Ɔwɔicō ā klla ka kahíníī, “N géē cɛ̄ ka ācɛ kú Ísrɛ̄lu ká e gbɔ̄ɔkɔ gā um ká n nyīla ɛwa kú uwā. N kē í yá ɔdā nēé ba ā lɛ uwā igbɔhá kpɔ́ ɛ́ɛ́. N klla géē nyīla ɛwa kú uwá bɛ̄ɛka ɛwa nɛ̄hi kú aálá ā.

³⁸Aígelī nēe tá alácɛ̄ abālɔbányā ā, ācɛ géē má uwā bɛ̄ɛka ɛ́gɛ́nɛ̄ aálá nēé gē kpó gwɛ́ɛya eko kú ucɛ ā, í tɛtɛ ī bá Ujerúsālɛm lɛwa lɛwa ā. Eko ɔ́ɔmā, uwá géē jé ka ami ɔ́ɔ wɛ Óndú ā á.”