Read idoma ISÍKƐ̄LU 37 Bible Online

ISÍKƐ̄LU 37 - idoma bible

ISÍKƐ̄LU 37

¹Eko ɔhá igbīhāājɛ, ɔfú kú Óndú ā gā ipú iyē um, anɔ́ɔ alelékwū kú Óndú ā, kwú um ú gáā kwú ajɛ ɔpɛ́ éyi á. Aíkpokwú kú ācɛ nēe le ŋmókókó bá ɔpɛ́ ā láyí ɛbɛɛbɛ bɛɛ̄ɛ̄.

²Anɔ́ɔ ó lɛ um bī bilíbilí ga ɛga dóódu kú ɔpɛ́ ā, anɔ́ɔ n má ka aíkpokwú kú ācɛ bá ajɛ abɔ́ɔ lɛwa nɛ̄hi, é kē le ŋmókókó nɛ̄hi.

³Ó da um ɔ̄kā kahíníī, “Ɔlɛcɛ, aíkpokwú nēe bá nyā géē yēeyī igbɔhá kpɔ́ glá ɛ́ɛ́?” Anɔ́ɔ n tá ɔ ohi kahíníī, “Óndú, awɔ nōo wɛ Ɔwɔicō ā ofōōfū uwɔ géē cīla ɔ̄kā ɔ́ɔmā glá á.”

⁴Ó da um kahíníī, “Kɛlā cɛ̄ lɛ aíkpokwú nyā, ká ā da uwá ká ē jāhɔ̄ lɛ ɛlā kú Óndú ā.

⁵Le ka lɛ uwá ka ami, Óndú ā, nōo wɛ Ɔwɔicō ā gē da uwá kahíníī, “N géē je owu tū aá ipú klla í kpó aá héyī igbɔhá ɛ́ɛ́.

⁶N géē je íli mɛ́mla ɛ́nɛ́bɛ́ lɛ aá klla í kpó ɔkpíyē klá aá iyē. N géē je owu tū aá ipú, géē je aá kpó héyī ká aá yēeyī. Cɛ́ɛ́ aá le jé ka ami ɔɔ́ wɛ Óndú ā á.”

⁷Anɔ́ɔ n gbɔɔ́ ō kɛlā cɛ̄ lɛ uwá ɛ́gɛ́nɛ̄ Óndú da um ā á. Abɔ̄ n bī ɛlā okónu kpɔ́ ɛ́ɛ́ mā, n gbɔɔ́ ō pó uya kú aíkpokwú bá ī fīyɛ̄ iyī uwā ā. Aíkpokwú ā gáā gbɔɔ́ ō pɛ́ kwɔhá. Ɔnyɔɔnyɛ nyɔ̄ ī kwu ikpokwú kú iyī nū.

⁸Abɔ̄ n yɔ̄ ī má ɔdā nōo yɔ̄ ī yá ā, aíli mɛ́mla ɛ́nɛ́bɛ́ ɔkpíyē gáā klá uwá iyē, anɔ́ɔ ɔkpíyē gáā klá uwá á. Amáŋ é lɛ owu dúúmā ipú uwá ɛ́ɛ́ ŋ́.

⁹Anɔ́ɔ Óndú ā da um kahíníī, “Ɔlɛcɛ, kɛlā lɛ owu. Lɛ ka lɛ owu ka, Óndú ā, nōo wɛ Ɔwɔicō ā le ɔ́da je gā uwɔ ka ā wā ŋmá ɛga dóódu, gáā fu tū ipú aókwū nēe bá nyā kā a lɛ uwá kpó héyī ká ē yēeyī.”

¹⁰Anɔ́ɔ n lɛ ɛlā ka cɛ̄ lɛ owu ɛ́gɛ́nɛ̄ Óndú ā da um ā á. Anɔ́ɔ owu gáā le tá ipú uwā, anɔ́ɔ uwá kwú kpó héyī, yēeyī klla cāŋ́jɛ háyi icō á. É lɛ ɛwa nɛ̄hi, nēe géē wɛ ɛwa nɛ̄hi kú aícɔ́ɔja glá.

¹¹Ɔwɔicō da um kahíníī, “Ɔlɛcɛ, ācɛ Ísrɛ̄lu lɛbɛ̄ɛka aíkpokwú nyā ā. É ī ka ka aá ɔ́ɔ kwú ŋmó ŋmá ajɛ ɛɛ́, ka aá í kē lɛ eyīyōce kú oócí dúúmā gɛ ŋ́.

¹²Ohígbū ɔ́ɔmā, kɛlā cɛ̄ lɛ ācɛ ɔlɛ́ um, Ísrɛ̄lu, ká ā da uwá ka, ami, Óndú ā nōo wɛ Ɔwɔicō ā ɔ́ɔ kahíníī, “N gē je aúnóji kú aá kpó nwūla. N géē kpó aá wɛ̄ɛcɛ ŋmá ipú aúnóji ā, klla í kpó aá kwúcē ga ɔlɛ́ aá, ajɛ kú Ísrɛ̄lu.

¹³Eko nɛ̄ n kwú aúnóji, ɛga nēé nyi okwū kú aá ā í kpó nwūla, klla kwú aá í kpó bɛ̄cɛ, cɛ́ɛ́ aá le jé ka ami ɔ́ɔ wɛ Óndú ā á.

¹⁴N géē je owu kú um tá ipú aá, klla í je aá kpó héyī nɛ̄ aá í yēeyī. N kē í cɛ̄ lɛ aá wā ī lā ipú ajɛ kú ɔlɛ́ abɔ̄yī aá ā. Eko ɔ́ɔmā aá géē jé ka n cokónu ka n géē yá ɛ̄nyā, ka n kē lɛ ɔ́ yá ɛɛ́. Ami Óndú ā le ka ɛɛ́.”

¹⁵Óndú ā le ɛlā ka ga um igbɔhá kpɔ́.

¹⁶Ó kahíníī, “Ɔlɛcɛ, kwu ābɔ̄ kú ɔcí ú ká ā le tá tū ɔ̄ ka, ‘Ajɔ̄ɔ̄cɛ́ kú Ujúda’. Kwu ābɔ̄ kú ɔcí ɔhá ú, ka á le tá tū ɔ̄ ka, ‘Ajɔ̄ɔ̄cɛ́ kú Ísrɛ̄lu’.

¹⁷Cɛ́ɛ́ a bī ābɔ̄ kú ɔcí ɛpa nyā kwú uwā í kwu ɔhá mɛ́ɛ́lɛ́, cɛ́ɛ́ ká ē lɛbɛ̄ɛka ékpónú ā ipú abɔ̄ kú uwɔ ā.

¹⁸Eko nɛ̄ ācɛ ɔlɛ́ uwɔ lɛ ɔ̄kā kú ɛyí ɔdā nāa yá nyā da uwɔ

¹⁹da uwá ka ami, Óndú ā, nōo wɛ Ɔwɔicō ā, géē kpó ɔcí nōo kwɛyí Ísrɛ̄lu kwu ɔhá mɛ́mla ɔcí nōo kwɛyí Ujúda. Uwá ɛplɛ́ɛpa ɔ́ɔmā géē je pīya ɔcí ékpónú, nɛ̄ n géē bī ipú abɔ̄ kú um.

²⁰Bī aɔ́cí ɛpa nāa tá ɔkpá tū ɔ̄ ā ipú abɔ̄ kú uwɔ cɛ́ɛ́ ka odúúdú ācɛ ā ká ē má uwā.

²¹Klla ka lɛ uwá ka, ‘Ami, Óndú ā, nōo wɛ Ɔwɔicō ā géē kpó odúúdú ācɛ ɔlɛ́ um ŋmá ipú aéwɔhá ɛga nēé nyɔ̄ ā, géē tá uwā bá tɔ̄há, géē kpó uwá cīgbīhi wā ipú ajɛ kú uwā.

²²N géē je uwá pīya éwo ékpónú ipú ajɛ ā, ɛyí aɛ́fu kú Ísrɛ̄lu. É géē lɛ ɔcɛ́ ékpónú nōo géē gbō uwā. É klla gáā wɛ éwo ɛpa ɛɛ́ nɛ̄ uwá gē kɔ̄ ajɔ̄ɔ̄cɛ́ ɛpa gɛ ŋ́.

²³É gáā je iyī uwā tēelihɔ mla aɛ́cī mɛ́mla aójibó otīīhilɛ mɛ́mla ucē obɔ̄bí oyá ɛ́ɛ́ gɛ ŋ́. N géē hɛ́ uwā tá ŋmá ipú odúúdú ɔwɛ nēé kwúcē hī um tá klla bī ɔ́bíipú ā. N géē yá uwá yēŋēē. É géē wɛ ācɛ ɔlɛ́ um, n kē í wɛ Ɔwɔicō kú uwá.

²⁴Ɔcɛ́ nōo ŋmá ipɔ́ɔma kú Udéfīdi, ɔ̄cocɛ̄hɔ̄ kú um ā géē wɛ ɔcɛ́ kú uwá á. É géē pīyatɔ̄ha ɛháajɛ ɔ̄cogbāálá ékpónú, klla í lɛyítáajɛ lɛ íne kú um dóódu kpaakpa.

²⁵Uwá mɛ́mla ayááyí uwā géē lā ipú ajɛ nɛ̄ n je lɛ ɔ̄cocɛ̄hɔ̄ kú um Ujékɔ̄pu ā, ajɛ nɛ̄ aádáádā uwá lā ā piyóó. Ɔcɛ́ nōo lɛbɛ̄ɛka Udéfīdi, ɔ̄cocɛ̄hɔ̄ kú um ā géē gbo uwá piyóó.

²⁶N géē gbɛka mɛ́mla uwá, nōo géē yá kú uwá kéē lā ɛbɔ́ piyóó. N géē bū uwá tū, klla ī cɛ̄ lɛ uwā nyīla nɛ̄hi. N klla í je Agblīihɔ-nɛ̄hi kú um ā kwu ipú ajɛ kú uwá piyóó.

²⁷N géē lā abɔ́ɔ pī uwā. N géē wɛ Ɔwɔicō kú uwá, uwá kē ī wɛ ācɛ ɔlɛ́ um.

²⁸Eko nɛ̄ n kwú Agblīihɔ-nɛ̄hi ā ú kwu ipú uwā abɔ́ɔ piyóó ā, aéwo ɔhá ā géē jé ka ami ɔ́ɔ nōo wɛ Óndú á ɔ́ɔ je ācɛ Ísrɛ̄lu kéē wɛ ákú um á.”