Read idoma ISÍKƐ̄LU 38 Bible Online

ISÍKƐ̄LU 38 - idoma bible

ISÍKƐ̄LU 38

¹Óndú ā le ɛlā ka gā um kpɔ́.

²Ó kahíníī, “Ɔlɛcɛ, kɛlā klá Ugɔ́gu, nōo wɛ ɔcɛ́ kú aéwo kú Umɛ́sɛ̄ki mɛ́mla Utúbalu ipú ajɛ kú Umágōgu ā. Kɛlā klá anú.

³Ká ā ka lɛ ɔ́ ka, ami Óndú ā, nōo wɛ Ɔwɔicō ā ɔ́ɔ kwú pīya olɛlā kú nū ɛɛ́.

⁴N géē pīya anú eyī biílí, í je uwɔ wu ɔ́ alagba, klla í je anú mɛ́mla aícɔ́ɔja kú ɔlɛ́ nū ā kpó pi nyɔ̄. aícɔ́ɔja kú ɔlɛ́ nū nēe ī lɛ ɛdɔ īlī ékpónú wiiyē gē ce ɔnya ā, aɔ́nya ɛfú kú nū ā lɛwa nɛ̄hi. Odúúdú uwā bī Ɔkpacaŋ́gelī mɛ́mla ɔkplɛ́fú kú uwá kpɛ́mm.

⁵Kwu ācɛ nēe ŋmá Upɛ́sīya, Itiyópīya, mɛ́mla Ulíbiya, nɛ̄ ē bá pi anú mɛ́mla aícɔ́ɔja kú nū ā, é kē bī ɔkplɛ́fú mla ɔdōkwɛyí kú oje.

⁶Odúúdú aícɔ́ɔja kú ajɛ kú Ugóma mɛ́mla Ubɛ́togāma nēe ŋmá ɛhícō ā bá pi ɔ̄ɔ̄. Ācɛ kú aéwɔhá alɛwa kē bá pi ɔ́ lɛ ā dúú.

⁷Le ka lɛ ɔ́ kóō le tútū klla lɛ odúúdú aícɔ́ɔja kú ɔlɛ́ nū tútū ká ō je ɔ́da lɛ uwá.

⁸Eko nɛ̄ iháyí alɛwa gáā le gla n gēe je ɔ́da lɛ ɔ́ ká ō gáā kpɛ́fú tá ācɛ nēé kpó tɔ̄há kwúcē ŋmá ipú aéwo alɛwa, nēe kē lā ɛbɔ́, í yúufi ɛfú dúúmā gɛ ŋ́ mā. Ó géē kpɛ́fú tá ācɛ nēe lā ɛyí aɛ́fu kú Ísrɛ̄lu nēe húmáyī tá ipú alácɛ̄ gbojī ɛɛ́ mā, amáŋ nɛ̄ odúúdú ācɛ Ísrɛ̄lu ā lā anú ɛbɔ́ eko ɔ́ɔmā ā.

⁹Anú mɛ́mla ɛwa kú aícɔ́ɔja kú ɔlɛ́ nū, mɛ́mla ācɛ aéwɔhá nēe gē wā mɛ́mla anú ā, gēe wā í kpɛ́fú tá ajɛ Ísrɛ̄lu bɛ̄ɛka owu nɛ̄hi ā, klla í wā í klá anú kpímmm bɛ̄ɛka ojuja ā.”

¹⁰Ɛ̄nyā wɛ ɔdā nɛ̄ Óndú ā, nōo wɛ Ɔwɔicō ā ka lɛ Ugɔ́gu á. “Eko nɛ̄ eko ɔ́ɔmā gā ā, a géē yɔ̄ ī gbo ojuju obɔ̄bí éyi.

¹¹A géē yɔ̄ ī gbo ojuju ō nyɔ̄ í kpɛ́fú tú aígelī nɛ̄hi nɛ̄ ācɛ lā ɛbɔ́, í cē igá dúúmā tū īyī uwā ɛ́ɛ́ nēé ī le odūngwɔ̄wɛ tū ɔ́ɔ ka ó gbō uwá ŋ́ mā.

¹²A géē je ācɛ nēe lā ipú aígelī nɛ̄hi nēe tɛtɛ tá ipú alácɛ̄ ā iyó kpó wu. É kpó ācɛ ɔ́ɔmā ŋmá ipú aéwo ɔhá ā, amáŋ é lɛ ɔdāajɛ mɛ́mla aíyó lɛ ɛɛ́. É kē lā ɔtāhɛ̄ kú ɛcɛ ā.

¹³Ācɛ otɔ́sú kú Ussɛ́ba, Udɛ́dan géē da uwɔ ɔ̄kā ka, ‘A lɛ aícɔ́ɔja kú uwɔ túbá ká ē nyɔ̄ í ŋmó ācɛ, wúla ɔlɛ́ uwā tāajɛ ká ē kpó uwā iyó wu ɛɛ́? A gbɛlá ka anúɔ géē kpó ugóolu (oje ɔdɔ), oje nɛ̄hɛ́, aɔ́dāajɛ mɛ́mla agbénú ŋmá abɔ́ɔ nɛɛ?’”

¹⁴Ohígbū ɔ́ɔmā, Óndú ā, nōo wɛ Ɔwɔicō ā tū um ɛhɔ̄ ká n̄ le ɔdā nɛ̄ ó yɔ̄ ī ka ā ka lɛ Ugɔ́gu. Ó kahíníī, “Eko nɛ̄ ācɛ ɔlɛ́ um, Ísrɛ̄lu lá ipú ajɛ kú uwá ɛbɔ́ ā, a gē gbɔɔ́

¹⁵ŋmá ɔlɛ́ uwɔ ɛhícō ɛga oligbó ā. Ɛwa kú aícɔ́ɔja olɔfú nɛ̄hi ŋmá aéwɔhá alɛwa, nēe cē aɔ́nya ɛfú kú uwá géē wā mɛ́mla awɔ.

¹⁶A géē kpɛ́fú tá ācɛ ɔlɛ́ um, Ísrɛ̄lu, í mīyɛ ajɛ tū abɔ̄ bɛ̄ɛka ojuja nɛ̄hi nōo ī klá ajɛ kpímm ā. Eko nɛ̄ eko ɔ́ɔmā le yá, n géē tū uwɔ nyɔ̄ í kpɛ́fú tú ajɛ kú ācɛ ɔlɛ́ um ā, cɛ́ɛ́ ká n le mafú lɛ odúúdú aéwɔhá ā kú ɔ̄cɛ dúú í lɛbɛ̄ɛka ami ā ŋ́. N géē yá lɛ ā oŋmá lɛ ɔdā nɛ̄ n géē yá uwɔ ā.

¹⁷Awɔ wɛ ɔ̄cɛ nɛ̄ n húmáyī kɛlā nū, eko nɛ̄ n tɔ́ɔna lɛ ācɛ kú Ísrɛ̄lu bū okónu kú ācomɛ́ɛbɛ ā ka, Eko géē wā nɛ̄ n géē bī ɔ̄cɛ éyi wā í kpɛ́fú tá Ísrɛ̄lu.” Óndú ā, nōo wɛ Ɔwɔicō ā le ka ɛɛ́.

¹⁸Óndú ā, nōo wɛ Ɔwɔicō ā kahíníī, “Ɛ̄cī nɛ̄ Ugɔ́gu géē kpɛ́fú wā í gwū Ísrɛ̄lu ā, n géē cɔ̄nū nɛ̄hi.

¹⁹N ka ipú ánya mɛmla ícɔ̄nū kú um ka ɛ̄cī ɔ́ɔmā, ajɛ géē jīliyē nɛ̄hi Ísrɛ̄lu.

²⁰Odúúdú aɛ́béenyi, aígbáanɔ, aɛ́bɛ́ ajɛ,kwu ɛnɛ̄hi kwu ɛnɛ̄ŋ́cɛ́ mɛ́mla ɔ̄cɛ dúúmā nōo lā ipú ɛcɛ ā géē fīyēgbúlú ohígbū ufi um. Aɛ́fu í jīliyē, aɛ́cɔ̄ í ca munumunu wā ajɛ, aɔ́dɔ géē je kpó wúla tāajɛ.

²¹N géē bī ɛdɔ ífi dóódu le tū Ugɔ́gu ufi. Ami, Óndú ā, nōo wɛ Ɔwɔicō ā le ka ɛɛ́. aícɔ́ɔja kú Ugɔ́gu klla í pīyeyī kwú īyī uwā, í kpó īyī uwā ŋmó mla ɔkpacaŋ́gelī.

²²N géē je ōwē lɛ Ugɔ́gu ŋmá lɛ ōcē obɔ̄bí mɛ́mla ācɛ oŋmó. Ɛcɔ̄ ɔwɔ, ofulutu,ɔlá mɛ́mla ōwō géē yā klá Ugɔ́gu mɛ́mla aícɔ́ɔja kú ɔlɛ́ nū mɛ́mla ācɛ aéwɔhá alɛwa nēe yɛce ɔ́ ā.

²³Ɔwɛ nyā, n géē mafú lɛ odúúdú aéwo kú ɛcɛ ā ka n lɔfú nɛ̄hi, ka ń klla tōō le gbla ɔ̄cɛ ɔhá dúúmā ŋ́. É kē í jé ka ami ɔ́ɔ wɛ Óndú á.”