Read idoma ISÍKƐ̄LU 39 Bible Online

ISÍKƐ̄LU 39 - idoma bible

ISÍKƐ̄LU 39

¹Ondú ā da um kahíníī, “Ɔlɛcɛ kɛlā cɛ̄ klá Ugɔ́gu, nōo wɛ ɔcɛ́ kú aéwo kú Umessɛ́ki mɛ́mla Utúbalu ká ā da ɔ́ ka Óndú ā ɔ́ɔ ka, ‘Ami, Óndú ā nōo wɛ Ɔwɔicō ā wɛ olɛlā kú uwɔ.

²N géē pīya uwɔ eyī ŋmá ɛga nāa tɛtɛ leyīkwu ā, í pi ɔ ŋmá ɛga oligbó kú ɛhícō ā, géē bī ɔ wā gaá kpɛ́fú tú ɛyí aɛ́fu kú Ísrɛ̄lu ā.

³Cɛ́ɛ́ n lɛ ɔtā kú uwɔ nú ŋmá uwɔ abɔ̄lúfīyē, klla cɛ̄ lɛ aɔ́yī hɛ́ uwɔ abɔ̄lɔ́ná wā ajɛ.

⁴Ugɔ́gu, awɔ mɛ́mla aícɔ́ɔja kú ɔlɛ́ uwɔ, mɛ́mla ācɛ aéwɔhá nēe yɛce uwɔ wā ā géē pɛ́ kwu ɛyí aɛ́fú kú Ísrɛ̄lu ā. Aígbáanɔ nōo ī wu icō ā mɛ́mla aɛ́bɛ́ kú ipácí géē kpó okwū kú aá lé á.

⁵Aá géē pɛ́ kwú ɛcɛ péee. Ami, Óndú ā, nōo wɛ Ɔwɔicō ā le ka ɛɛ́.

⁶N géē tū ɔlá klá ajɛ kú Umágɔ̄gu mɛ́mla aájɛ kú okónu ísu ɛga nɛ̄ ācɛ lā ɛbɔ́ ā. Odúúdú ācɛ kē í jé ka ami ɔ́ɔ wɛ Óndú ā á.

⁷N géē yá ka ācɛ ɔlɛ́ um, Ísrɛ̄lu ā ká ē lɛ iyē kú um nɛ̄ iyē ɔhá dúúmā í tōō le gbla ɔ́ ŋ́ mā jé píii. Ń klla gáā cɛ̄ lɛ ɔ̄cɛ dúúmā je uwēyī lɛ iyē kú um igbɔhá ɛ́ɛ́ gɛ ŋ́. Cɛ́ɛ́ odúúdú ācɛ kú aéwɔhá ā géē jé ka ami ɔ́ɔ wɛ Óndú á nōo wɛ Ɔwɔicō otīihɔ kú Ísrɛ̄lu ā á.’”

⁸Óndú ā, nōo wɛ Ɔwɔicō ā klla ka kahíníī, “Ɛ̄cī nɛ̄ n kɛlā nū ā géē wā piíí, ɔdā nɛ̄ n ka ā kē í yá ɛ́gɛ́nɛ̄ n ka ā piíí.

⁹Ācɛ nēe lā aígelī nɛ̄hi kú Ísrɛ̄lu ā géē nyɔ̄ ɛcɛ í kpó iyɔ́fú nɛ̄ ācɛ ā kwú hɛ̄ uwā tá bá ajɛ ā le gwɔ́ɔ́lá. É géē kpó ɔ́kplɛ́fú, ɔtā, ɔyī, obō mɛ́mla ogbló kú ācɛ ā le gwɔ́ɔ́lá. É kē ī bá ī bī iyó nyā gwɔ́ɔ́lá iháyí ahāapa.

¹⁰É gáā cɛgbá ō ce ɛfú ŋmá ɛhɔ̄ ɛ́ɛ́ nēé gē hɛ́ ɔcí ŋmá ipú ūpū ŋ́. Ohígbū ka aíyɛ́fú nēe kwu hɛ̄ uwā tá ā géē bá cabácabá lɛ uwá ō le gwɔ́ɔ́lá. É géē wu aíyó kú ācɛ nēe kpó aíyó kú uwā ā. É klla í kpó aíyó kú ācɛ nēe kpó aíyó kú uwā ā. Ami, Óndú ā nōo wɛ Ɔwɔicō ā le ka ɛɛ́.”

¹¹Óndú ā kahíníī, “Eko ɔ́ɔmā, n géē je okwū Ugɔ́gu mɛ́mla aókwū kú aícɔ́ɔja kú ɔlɛ́ nū ā kpó nyi ajɛ Ísrɛ̄lu abɔ́ɔ, ipú ‘Ɔpɛ́ kú ācɛ o ga iyāwu,’ nōo kwu ɛnɔ̄ɔ̄cī kú ísu kú ɔmā ā. Aúnóji ā géē ŋmó ɔwɛ tū ācɛ nēe ī yɛ abɔ́ɔ ga iyāwu ā. Ohígbū ɔ́ɔmā é géē hī ɔpɛ́ ɔ́ɔmā ka, ‘Ɔpɛ́ kú aícɔ́ɔja kú Ugɔ́gu.’

¹²Ó géē je ācɛ kú Ísrɛ̄lu ɔyā ahāapa ɛɛ́, nēé gáā kpó okwū kú ācɛ ɔ́ɔmā nyi kwɛyí, ká ē klla je ajɛ ā yá yēŋée igbɔhá á.

¹³Ācɛ dóódu kú ipú ajɛ Ísrɛ̄lu í bá ī tá abɔ̄ kéē kpó uwá nyi. É kē í je ojīlīmā lɛ uwá ohígbū otábɔ̄ nyā, ipú ɛ̄cī nɛ̄ ācɛ í má ofíyáajɛ kú ɛgahi onwuné kú um ā. Ami, Óndú ā nōo wɛ Ɔwɔicō ā le ka ɛɛ́.

¹⁴Eko nɛ̄ ɔyā ahāapa ā géē gla ā, é géē fu ācɛ kéē bá ī yɛ ī jila ajɛ ā ga ɛbɛɛbɛ, cɛ́ɛ́ ká e géē kpó okwū ɔhá dúúmā nēe géē hile bá ɛcɛ ā nyi, cɛ́ɛ́ ká ē kwú ajɛ ā ú yá yēŋēē.

¹⁵Abɔ́ɔ é géē bá ī yɛ ga ajɛ gicō ipú ajɛ ā, eko nēé lɛ ikpokwú kú ɔ̄cɛ má tá ajɛ, é géē je ɔdōcābɔ̄ kwu ajɛ pī ɔ. É ī yá ɔ́ɔmā cɛ́ɛ́ ka ācɛ onyi okwū ā ká e géē wā í kwú uwā í kpó nyi Ɔpɛ́ kú aícɔ́ɔja kú Ugɔ́gu.

¹⁶Igelī éyi géē yɔ̄ kwú abɔ̄ ajaajɛ nēé géē hī ɔ̄ iyē kwu aícɔ́ɔja ā. Oŋmá lɛ ɔ́ɔmā nɛ̄ í je odúúdú ajɛ ā yá yēŋēē igbɔhá ā.”

¹⁷Óndú ā, nōo wɛ Ɔwɔicō ā da um kahíníī, “Ɔlɛcɛ, lɛ aɛ́bɛ́ mɛ́mla aígbáanɔ dóódu kpó hīgwú wā ŋmá ɛga dóódu ká ē wā í lé ɛbɛ ɛya, nɛ̄ n gáā gwó lɛ uwá ā. Ó géē wɛ ucɛ nɛ̄hi ɛyí aɛ́fu kú Ísrɛ̄lu, nēé géē lé ɛbɛ́ klla í gwá oyī ā.

¹⁸Da uwá kéē géē lé ɛbɛ́ kú aícɔ́ɔja klla í gwá oyī kú aɔ́cɛ́ kú aéwɔhá ā, nɛ̄ n géē kpó ŋmó lɛbɛ̄ɛka aómlede, ayí álá, aɛ́wū mɛ́mla aɔ́bá ɛna ojɔ̄kwū ā.

¹⁹Da aígbáanɔ mla aɛ́bɛ́ ipácí ka eko nɛ̄ n kwú odúúdú ācɛ ā í kpó ŋmó lɛbɛ̄ɛka ɛbɛ́ kú ɛya ā, kéē géē lé ɛbɛ́ ɛ́gɛ́ dóódu nēé géē lé glá, klla í gwá oyī jāā gbéeko nɛ̄ ó lɛ uwá kwú bɛ̄ɛka ejé ā.

²⁰Ɛyí utéblu kú um ā, é géē lé ɛbɛ́ aɔ́nya mɛ́mla ācɛ oce aɔ́nya ā, mɛ́mla aícɔ́ɔja mɛ́mla ācɛ okpɛ́fú. Ami, Óndú ā nōo wɛ Ɔwɔicō ā le ka ɛɛ́.

²¹Óndú ā kahíníī, “N géē yá ká odúúdú aéwo ā ká ē má onwuné kú ɛgahi kú um, mɛ́mla ɛ́gɛ́nɛ̄ n géē bī ɔfú kú um le kɛpɔ̄ tū uwā klla í yá uwā italā.

²²Ācɛ kú Ísrɛ̄lu í jé ŋmá eko ɔ́ɔmā gɔbū, ka ami ɔɔ́ wɛ Óndú á, nōo wɛ Ɔwɔicō kú uwá ā á.

²³Odúúdú aéwɔhá ā géē jé ka ācɛ Ísrɛ̄lu, ɛ́ɛ ga ajɛ kú ɔfiyɛ ohígbū ɔ́bíipú nēé bī ā nɛ̄. Ka abɔ̄ uwā í yá ucē kpaakpa ŋ́ mā yá ɛ́ɛ́ nɛ̄ n je igbīhi cē kwú uwá, ɛ́ɛ́ nɛ̄ aólɛlā kú uwā yá uwā lé klla kpó uwá ŋmó ɔgbéfú á.

²⁴Ɔdā nōo cíkā ā nɛ̄ n yá uwá ohígbū ɔ́bíipú mɛ́mla ucē ɔdāhá kú uwā á, abɔ̄ n je eyī kú um pīya ŋmá ɛgiyí uwā á.”

²⁵Óndú ā, nōo wɛ Ɔwɔicō ā klla kahíníī, “Amáŋ abālɔbányā, n géē ményinyi kú ayááyí kú Ujékɔ̄pu nēe wɛ ācɛ Ísrɛ̄lu ā, klla í yá uwá ká ē agbénú kóō klla lɔhi lɛ uwá igbɔhá kpɔ́ ɛ́ɛ́. N kē géē jimélī ohígbū iyē kú um nɛ̄ ó tōō le gbla iyē ɔhá ŋ mā.

²⁶Eko nēé mā lā ipú ajɛ kú abɔ̄yī uwā, nɛ̄ ɔ̄cɛ dúúmā í gáā tū uwá ufi gɛ ŋ́ mā, é géē je mlanyī ɛ́gɛ́nɛ̄ é je uwēyī lɛ uwá lɛ, ohígbū ka é kwú um ú tátónū ā.

²⁷O yá ɛ́ɛ́ ká n̄ le mafú lɛ odúúdú aéwɔhá ā ka ɔ̄cɛ dóódu í lɛbɛ̄ɛka ami ā ŋ́ mā, n géē kpó ācɛ ɔlɛ́ um kwúcē wā ɔlɛ́ uwā ŋmá ipú ajɛ aéwɔhá mɛ́mla ɛga nɛ̄ aólɛlā kú uwá lā ā.

²⁸Eko ɔ́ɔmá, ācɛ ɔlɛ́ um ā géē jé ka ami ɔ́ɔ wɛ Óndú ā, nōo wɛ Ɔwɔicō kú aá á. É géē jé lɛ ā ohígbū ka n lɛ uwá kpó tɛ̄hɔ̄ ga ajɛ kú ɔfiyɛ, anɔ́ɔ n klla lɛ uwá túbá klla kpó uwá kwúcē wā ipú ajɛ kú abɔ̄yī uwā. Ń klla habɔ̄ ɔ̄cɛ dúúmā kú uwá tá abɔ́ɔ ŋ.

²⁹N géē pīya alelékwū kú um klá ācɛ Ísrɛ̄lu, nɛ̄ ń klla gáā cē igbīhi kwu uwá igbɔhá gbóógbóō gɛ ŋ́. Ami Óndú ā, nōo wɛ Ɔwɔicō ā le ka ɛɛ́.”