Read idoma ISÍKƐ̄LU 4 Bible Online

ISÍKƐ̄LU 4 - idoma bible

ISÍKƐ̄LU 4

¹Ighīhāajɛ, Óndú ā da um kahíníī, “Ɔlɛcɛ, kwú ublɔ́ɔku kú ɔmɛ ú, kwú ɔ̄ ú tá iyɔ̄bū uwɔ, cɛ́ɛ́ ká ā a lɛ ifotó kú igelī nōo lé ka Ujerúsālɛm ā kpó tū ɔ́.

²O yá ká ā cābɔ̄ íbɔm ō cē tū ɔ̄ɔ ā, lɛ ɔ̄gɔ̄ bū yɛ ɔ́ jīla tá biílí, lɛ ajɛ ma gicō yɛ igá kú nū tá biílí, lɛ aádɛ́fú kpó gwó yɛ ɔ́ jīla tá biílí, ká ā klla lɛ aɔ́dā o le ca ɔdɔ yá kwu odūngwɔ̄wɛ mɛ́mla ɔdɔ kú nū.

³Cɛ́ɛ́ ka á kwú ɔgbamgbam kú oje u gwū ɔ̄ ɔtāhɛ̄ kú uwɔ mla igelī ā bɛ̄ɛka ɔdɔ kú oje ā. Lɛ eyī pīya kwu ifotó kú igelī nāa kpó ɔ́ɔmā. Cɛ́ɛ́ ó géē lɛbɛ̄ɛka ɔdā nēé lɛ íbɔm ce tū ɔ̄ ā. Ó kē ī wɛ ɔdōcābɔ̄ lɛ ācɛ Ísrɛ̄lu.”

⁴Óndú ā klla da um kpɔ́ kahíníī, “Má gwutá ce abɔ̄lúfīyē kú uwɔ. N géē je ɛpɔ̄bí kú ewo kú Ísrɛ̄lu ce uwɔ ɛyí. A géē klá ɛ́gɔ́ɔmā ɛ̄cī ofu igwáaháanɛ ce igwó, í yɔ̄ ī móōwē ɛpɔ̄bí kú uwā. N lɛ uwɔ tū ōwē kú ɛ̄cī éyi nāa géē móōwē ā kóō kwɛyí iháyí éyi kú odúúdú eko nēé géē móōwē ohígbū ɔ́bíipú kú uwā ā.

⁶Eko nāa lɛ aɛ́cī ɔ́ɔmā yá mɛ, klla má gwutá igbɔhá ce abɔ̄lɔ́ná kú uwɔ, ɛ̄cī ofɛpa. A í yá ɔ́ɔmā ká ā móōwē kú ɛpɔ̄bí kú ācɛ Ujúda. Ɛ̄cī dóódu géē kwɛyí iháyí éyi.

⁷Lɛ eyī pīya kwu ocābɔ̄ kú Ujerúsālɛm nāa cīíbɔm tū ɔ̄ ā. Miya abɔ̄ kwu ɔ́, ká ā kɛlā obɔ̄bí tɛ́ɛcɛ lɛyíkwu ɔ́.

⁸N géē gbō uwɔ ɔ́ŋgbá nɛ̄ á gáā pīyeyī ga ɛga dúúmā glá ŋ́, jāā gbéeko nɛ̄ ɛ̄cī kú íbɔm nāa cē tū Ujerúsālɛm ā le yá mɛ.”

⁹Ó klla da um kahíníī, “Lɛ umu kú igwu, ocikāpā, eje,ágwúgwú mla eglīngli pīya tɔ̄há. Ká ā le igbō yá ŋmá uwá le iyī uwɔ. Igbō ɔ́ɔmā nāa gaá lé ɛ̄cī ofu igwáahānɛ ce igwó (390) nāa géē gwutá ce āyā abɔ̄lúfīyē kú uwɔ ā á.

¹⁰A géē yɔ̄ ī lé ɔdōlé nɛ̄ ogbɛnú kú nū wɛ Usɛ́kɛlu ofu kú ɔdōlé ɛ̄cī. Ɔ́ɔmā kē í bī uwɔ gbó oŋmɔ́ɔcī nū.

¹¹Cɛ́ɛ́ ká ā klla lɛ ikókwū kú éŋkpɔ̄ ɛpa miya, nāa géē yɔ̄ ī gwá ɛ̄cī dóódu ā.

¹²Emī oŋmókókó kú ācɛ, nāa géē bī gwɔ́ɔ́lá kú igbō nyā á. Lɛ igbō ā yá ɔlá ā, cɛ́ɛ́ ká ā lé ipéyī ācɛ dóódu. Ka é má uwɔ.”

¹³Óndú ā da um kahíníī, “Ɔ́ɔmā í cābɔ̄ ɛ́gɛ́nɛ̄ ācɛ kú Ísrɛ̄lu géē ba í lé ɔdōlé nōo le nyílá, ipú ācɛ nɛ̄ n gáā nū uwá nyɔ̄ ipú uwá ā.”

¹⁴Anɔ́ɔ n da ɔ́ kahíníī, “Ɛhɛ́ɛ! Óndú, awɔ Ɔwɔicō nōo fíyɛ́ dúú ā. Ń tēelihɔ iye jéjée ɛ́ɛ́ ŋ́. Oŋmá eko ɔyípɛ̄ kú um jāā kwiícɛ nyā, ń lé ɔdā dúúmā nōo gekwú abɔ̄yī nū amáŋ nɛ̄ ɛbɛ́ obɔ̄bí kú ipácí ŋmó ā ŋ́. Ɛbɛ́ elihɔ dúúmā í ga ipú okónu kú um jéjée ɛ́ɛ́ ŋ́.”

¹⁵Anɔ́ɔ Óndú da um kahíníī, “Olɔhi, ayíka, a lɛ igbō kú uwɔ a yá ɛyí ɔlá kú emī ɛna mɛnɛ, ikɔkɔ emī kú ɔ̄cɛ ā.”

¹⁶Anɔ́ɔ ó klla da um kahíníī, “Ɔlɛcɛ, ń gáā cɛ̄ lɛ ɔdōlé yɔ̄ Ujerúsālɛm jɛ ācɛ gɛ ŋ. Ɔtū géē yɔ̄ ī hɛ́ ācɛ ā ko klla ī wu klíicō lɛ uwá abɔ̄ é géē bá ī miya ɔdōlé mɛ́mla éŋkpɔ̄ kú uwā ɛ́ɛ́ kéē lé klla gwá ā.

¹⁷Abɔ̄ ɔdōlé mɛ́mla éŋkpɔ̄ géē ŋá nɛ̄ɛ̄nɛ̄hi ā, é géē bá ī yúufi, í kē gáā tá ɔ́mpā uwā abɔ̄ glá ŋ. É kē í nyinyi jāā í je pɛ́kwú ohígbū ɔ́bíipú kú uwā.