Read idoma ISÍKƐ̄LU 40 Bible Online

ISÍKƐ̄LU 40 - idoma bible

ISÍKƐ̄LU 40

¹Ɔdā nyā yá ɛ̄cī igwó kú ɔyā aflɛ́yí kú iháyí ɔ́mofucɛhɔ̄ nēé kpó alɔ abɔ̄fú ga ajɛ Ubábīlɔn ā. Iháyí ɔ́ɔmā iháyí ɔ́migwɛ́nɛ ŋmá eko nēé je Ujerúsālɛm catāajɛ ā. Ɛ̄cī ɔ́ɔmā ɔfú kú Óndú ā gā ipú iyē um nɛ̄hi, klla kwú um ú nyɛ̄ɛ̄.

²Ipú ɛbɛ oōmá, Ɔwɔicō kwú um ú ga ajɛ kú Ísrɛ̄lu gáā kwú um ce ɛyí ɛfu olicō nɛ̄hi éyi. Anɔ́ɔ n má odée ɔwɛ ɛhícō nōo lɛbɛ̄ɛka igelī nɛ̄ ɔlɛ́ alɛwa bá anú ā.

³Ó klla tū um wā ajaajɛ, anɔ́ɔ n má ɔ̄cɛ éyi nōo gē ceyī ŋaáŋaá bɛ̄ɛka oje udɔ ā. Ó bī ɔ́ngbá ōmiya ajɛ, mla ɔcí ōmiya ajɛ abɔ̄ māháyi Okómpinu kú igelī ā.

⁴Anɔ́ɔ ɔ̄cɛ ɔ́ɔmā da um kahíníī, “Ɔlɛcɛ, leyīkwu ɛcɛ, jāhɔ̄ lɔɔlɔhi ká ā lɛ ɛlá kwu ɔdā dóódu nɛ̄ n gáā mafu gā uwɔ ā lɔɔlɔhi. Ohígbū ka ɔdā nōo yá ɛ́ɛ́ nēé bī uwɔ wā amānyā ā yɔ̄ á. A géē ka lɛ ācɛ Ísrɛ̄lu ɔdā dóódu nāa má ā.”

⁵Ɔdā nɛ̄ n má ā wɛ Agblīihɔ-nɛ̄hi nēé lɛ igá ɔdɔ gwó tū ɔ̄ yɛ jīla tá. Anɔ́ɔ ɔ̄cɛ ā kwú ɔcí ōmiya ajɛ kú nū, nōo wɛ umita ɛtá ā ú, anɔ́ɔ ó lɛ ɔdɔ ā mīya á. Olɔwá kú nū wɛ umíta ɛtá, ocɔkpɛ́nú kú nū kē wɛ umíta ɛtá.

⁶Anɔ́ɔ ó le yɛ tá okómpinu nōo pīyeyī kwú ɛnɔ̄ɔ̄cī ā. Ó lɛ ikpó ce agidigbé kú nū gicō ga okónu nū. Anɔ́ɔ ó lɛ okómpinu ā mīya abɔ́ɔ á. Olipú kú nū wɛ umíta ɛtá.

⁷Oyɛ ɔwɛ ga ipú ɔwɛ ā, ɔwɛ ō yɛ ga eyīpú éyi yɔ̄ abɔ́ɔ nɛ̄ aínu kú ācogbɔ̄ɔwɛ ā ɛtɛ́ɛ́tá bá ābɔ̄ ɛplɛ́ɛ́pa kú nū. Éyééye kú aínu ā lɛ ɔ́kíkā ɛnɛ jonjilɛ nēe wɛ umíta ɛtá āyā dóódu. Ocɔkpɛ́nú kú aɔ́dɔ nēe tá ɔtāhɛ̄ uwā ā wɛ umíta ɛpa ce āyā. Igbīhi kú aínu kú ācɛ ogbō ɔwɛ ā, ɛplá éyi yɔ̄ abɔ́ɔ nɛ̄ olɔwá kú nū wɛ umíta ɛtá nōo yɛ ga ipú inu o yɛ ga eyīpú éyi, nōo pīyeyī kwú Agblīihɔ-nɛ̄hi ā.

⁸Ó lɛ inu ɔ́ɔmā mīya, ó má ka ipú nū ɔ́ɔ wɛ umíta ɛpa.

⁹Inu ɔ́ɔmā gáā kwú oŋmɛ́yí kú okómpinu nōo kwu ipú Agblīihɔ-nɛ̄hi ā ajaajɛ ā. Ocɔkpɛ́nú kú oŋmɛ́yí ánáánūmā kú nū ā wɛ umíta éyi.

¹⁰Aínu kú ācɛ ogbō ɔwɛ ā nēe wɛ ɛtɛ́ɛ́tá ābɔ̄ ɛplɛ́ɛ́pa, é nwuné jōnjīlɛ̄. Aɔ́dɔ nēe tá ɔtāhɛ̄ kú uwá ā cɔkpɛ́nú jōnjīlɛ̄.

¹¹Anɔ́ɔ ɔ̄cɛ ā lɛ ɔwá kú okómpinu ā mīya á. Odúúdú nū wɛ umíta ɛhīlī ce āyā. Ɛplá nōo tá ŋmá ɛga ɔwɛ ā wɛ umíta ɛhɔ̄.

¹²Iyɔ̄bū kú éyééye kú aínu kú ācɛ ogbō ɔwɛ ā, ɔdɔ otū wā ajɛ éyi yɔ̄ abɔ́ɔ, olicō kú nū wɛ āyā kú umíta. Ocɔkpɛ́nú kú nū wɛ āyā kú umíta. Ipú kú éyééye kú aínu ā kē wɛ umíta ɛtá ɔ́kīkā ɛnɛ ā.

¹³Ó le mīya ŋmá ɔdɔ kú igbīhi inu éyi ga ɔdɔ kú igbīhi inu nōo pīyeyī kwu ɔɔ́ abɔ̄ ɔhá kú ɛplá nōo tá ɔtāhɛ̄ ā. Ó wɛ umíta igwɛ́ɛpa ce āyā.

¹⁴Inu kú ɛga oŋmɛ́yí kú ɛplá ā yɛ ga odúúdɔ̄lɛ́ eyīyɛ̄cɛ kú Agblīihɔ-nɛ̄hi ā. Ó lɛ inu ɔ́ɔmā mīya, ó má ka ɔwá kú nū wɛ umíta igwó.

¹⁵Īkpō kú nū oŋmá okómpinu ɛcɛ ā jāā ga oŋmɛ́yí kú inu nōo yɔ̄ ɛga kú ɛplá ā wɛ umíta ofu ce ɛhɔ̄ dúúdú.

¹⁶Uwíndo nɛ̄ŋcɛ́ tá ɔdɔ kú eyīyɛ̄cɛ kú aínu ā, mɛ́mla ɔdɔ kú eyīpú nōo kwu ɛplá kú aínu ā. É lɛ ifotó kú alī kpó tū ɔdɔ nōo kwú ɛplá nɛ̄ ācɛ gē yɛ ā.

¹⁷Anɔ́ɔ ɔ̄cɛ ā lɛ um bī bēé ɔwɛ ā gā Ódúúdɔ̄lɛ́ eyīyɛ̄cɛ kú Agblīihɔ-nɛ̄hi ā á. É lɛ ipú inū ofu cigwó gwó kwu ɔdɔ kú Ódúúdɔ̄lɛ́ eyīyɛ̄cɛ ā. Iyɔ̄bū aínu ɔ́ɔmā ā ó lɛ ɛga éyi ajɛ nēé lɛ ɛcɔ̄ kpó wu ɔ́, lɛ ɔ́ plla.

¹⁸Ɛga nēe plla mla ɛcɔ̄ ā yɛ ódúúdɔ̄lɛ́ eyīyɛ̄cɛ tá biílí jīla. Eyīyɛ̄cɛ ā tū wā ajɛ fíyɛ́ ipɔ́ɔnū eyīpú kú Agblīihɔ-nɛ̄hi ā á.

¹⁹Okómpinu éyi yɔ̄ ɛhícō kú nū, nōo yɛ ga Ódúúdɔ̄lɛ́ eyīpú kú Agblīihɔ-nɛ̄hi ā. Ɔ̄cɛ ā le mīya ŋmá okónɔɔwɛ kú eyīyɛ̄cɛ ā ga okónɔɔwɛ kú ódúúdɔ̄lɛ́ eyīpú ā. Ó wɛ umíta ofɛpa cigwó.

²⁰Anɔ́ɔ ɔ̄cɛ ā lɛ okómpinu kú ɛhícō nōo bū ga ódúúdɔ̄lɛ́ eyīyɛ̄cɛ ā mīya.

²¹Omiya kú aínu kú ācogbɔ̄ɔwɛ ɛtá nōo yɔ̄ ābɔ̄ ɛplɛ́ɛpa kú ɛplá ā, aɔ́dɔ kú ɔtāhɛ̄ uwā mɛ́mla inu nōo kwu oŋmɛ́yí kú okómpinu nɛ̄ ɔ̄cɛ ī yɛ ga ódúúdɔ̄lɛ́ eyīpú kú nū ā, wɛ ékpónú mɛ́mla ákú okómpinu kú ɛnɔ̄ɔ̄cī ā. Opīyatɔ̄há kú olīkpō kú ɔwɛ ā wɛ umíta ofu ce ɛhɔ̄. Ɔwá kú nū wɛ umíta igwɛ́ɛpa ce āyā.

²²Inu kú okómpinu o yɛ ga eyīpú nū á, mɛ́mla aúwíndo, mɛ́mla aífotó kú alī nēé kpó tū ɔ̄ ā wɛ ékpónú bɛ̄ɛka ákú okómpinu kú ɛnɔ̄ɔ̄cī ā. Abɔ́ɔ ā, agidigbé ikpó ahāapa yɛ ga okómpinu ā. Ipú inu nōo kwu okómpinu ā yɔ̄ oŋmɛ́yí lɛ eyī pīya kwú ódúúdɔ̄lɛ́ eyīyɛ̄cɛ kú Agblīihɔ-nɛ̄hi ā.

²³Ābɔ̄ ɔhá pīyeyī kwu okómpinu kú ɛhícō ā, okómpinu ɔhá klla yɔ̄ abɔ́ɔ nōo yɛ ga ódúúdɔ̄lɛ́ eyīpú kú Agblīihɔ-nɛ̄hi ā, ɛ́gɛ́nɛ̄ ó lɛ okómpinu kú ɛnɔ̄ɔ̄cī ā. Ɔ̄cɛ a lɛ ɛplá nōo tá ɔtāhɛ̄ kú ɔwɛ ɛpa ɔ́ɔmā mīya, ó kē wɛ umíta ofɛpa cigwó.

²⁴Oŋmá abɔ́ɔ, ɔ̄cɛ ā lɛ um bī ga ɛháajɛ ā. okómpinu ɔhá kē yɔ̄ abɔ́ɔ. Ó lɛ ɔ́ mīya, ó kē jōnjīlɛ̄ mɛ́mla aókómpinu ɔhá ā.

²⁵Aúwíndo bá ipú aínu okómpinu nyā bɛ̄ɛka aókómpinu ɔhá ā. Īkpō kú ɔwɛ nyā dúúdú ā wɛ umíta ofu ce ɛhɔ̄, ɔwá kú nū kē wɛ umíta igwɛ́ɛpa ce āyā.

²⁶Agidigbé ikpó ahāapa yɛ gicō ga okómpinu ā. Inu nōo kwu okómpinu ā yɔ̄ oŋmɛ́yí kú nū lɛ eyī pīya kwu ódúúdɔ̄lɛ́ eyīyɛ̄cɛ kú Agblīihɔ-nɛ̄hi ā. Ifotó kú alī bá ɔdɔ nōo kwu ɛplá nɛ̄ ācɛ gē yɛ ā.

²⁷Amānyā ā dúú, ɔwɛ éyi yɔ̄ ga ipɔ́ɔnū eyīpú kú Agblīihɔ-nɛ̄hi ā. Anɔ́ɔ ɔ̄cɛ ā lɛ ɛplá nōo tá ɔtāhɛ̄ ŋmá okómpinu kú ódúúdɔ̄lɛ́ eyīyɛ̄cɛ ga okómpinu ɔ́mpa nōo tá ga ódúúdɔ̄lɛ́ eyīpú ā mīya ā. Ó wɛ umíta ofɛpa cigwó.

²⁸Ɔ̄cɛ ā lɛ um bī bū okónɔɔwɛ kú ɛháajɛ ā ga ódúúdɔ̄lɛ́ eyīpú ā. Anɔ́ɔ ó lɛ okómpinu ā mīya. Ó wɛ ɔdā ékpónú mɛ́mla aókómpinu kú ɔdɔ kú eyīyɛ̄cɛ ā.

²⁹Aínu kú ācogbɔ̄ɔwɛ, mɛ́mla inu nōo kwu okómpinu ā mɛ́mla aɔ́dɔ kú ɛplá kú nū wɛ ékpónú mɛ́mla aókómpinu ɔhá ā. Aúwíndo bá ipú aínu kú nū dúú. Odúúdú íkpō kú nū wɛ umíta ofu cɛ̄hɔ̄. Ɔwā kú nū wɛ umíta igwó ɛpa ce āyā.

³⁰

³¹Inu nōo kwu okómpinu ā pīyeyī kwu Ódúúdɔ̄lɛ́ eyīyɛ̄cɛ ā. É lɛ aífotó kú alī yá tū ɔdɔ kú ɛplá nɛ̄ ācɛ ī yɛ ā dúú. Agidigbé ikpó ahātá yɛ gicō ga okónɔɔwɛ nyā á.

³²Ɔ̄cɛ ā lɛ um bī bū okómpinu kú ɛnɔ̄ɔ̄cī ā ga ipɔ́ɔnū eyīpú ā. Ó lɛ okómpinu ā mīya, ó kē wɛ ɔdā ékpónú mɛ́mla aókómpinu ɔhá ā dúú.

³³Omiya aínu kú ācogbɔ̄ɔwɛ kú nū ā mɛ́mla inu nōo kwu okómpinu ā, mɛ́mla aɔ́dɔ kú eyīpú kú nū ā wɛ ékpónú mɛ́mla aókómpinu ɔhá ā. Uwíndo yɛ̄ jīla aínu kú nū ā tá, klla mɛ́mla inu nōo kwu okómpinu ā dúú. Īkpō kú nū wɛ umíta ofu cɛ̄hɔ̄, ɔwá kú nū kē wɛ umíta igwɛ́ɛpa ce āyā.

³⁴Inu nōo kwu okómpinu ā pīyeyī kwú ódúúdɔ̄lɛ́ eyīyɛ̄cɛ ā. É le aífotó kú alī kpó tū aɔ́dɔ kú ɛplá nɛ̄ ācɛ ī yɛ ā dúú. Agidigbé ikpó ahātá yɛ gicō ga okómpinu nyā dúú á.

³⁵Anɔ́ɔ ɔ̄cɛ ā lɛ um bī ga okómpinu kú ɛhícō ā á. Ó lɛ ɔ́ mīya, ó kē wɛ ɔdā ékpónú mɛ́mla aókómpinu ɔhá ā.

³⁶Ó lɛ aínu kú ācogbɔ̄ɔwɛ, mɛ́mla aɔ́dɔ kú eyīpú nēé lɛ ífa yá tū ɔ̄, mɛ́mla inu nōo kwu okómpinu ā, mɛ́mla aúwíndo nēe yɛ jīla anú tá ā miya. Īkpō kú nū wɛ umíta ofu cɛ̄hɔ̄, ɔwá kú nū kē wɛ umíta igwɛ́ɛpa ce āyā.

³⁷Inu nōo kwu okómpinu ā pīyeyī kwu ódúúdɔ̄lɛ́ eyīyɛ̄cɛ ā. É klla lɛ aífotó kú alī kpó tū aɔ́dɔ ɛpa kú ɛplá nɛ̄ ācɛ ī yɛ ā. Agidigbé ikpó ahātá yɛ gicō ga okómpinu nyā á.

³⁸Ódúúdɔ̄lɛ́ eyīyɛ̄cɛ kú Agblīihɔ-nɛ̄hi ā, inu éyi yɔ̄ nēé gwó kwú ɛhícō kú okómpinu kú eyīpú ā ajaajɛ. Ó nwūla ga inu nōo kwu okómpinu pīyeyī kwu ódúúdɔ̄lɛ́ eyīyɛ̄cɛ ā. Abɔ́ɔ ā, nēé ī nā aókwū aɛ́bɛ́ kú ɛya nēé gē je yɔlá dúúdú ā á.

³⁹Ipú inu nōo kwu okómpinu nyā, autéblu ɛnɛ bá abɔ́ɔ. Aútéblu ɛpɛɛpa bá āyā ɛpa kú inu ā. Ɛyí aútéblu ɔ́ɔmā nēe gē ŋmó ɛbɛ́ kú ɛya nēé ī yɔlá dúúdú, mɛ́mla ɛya nɛ̄ ɔ̄cɛ nōo lɛ ɔ́bíipú bī gē gwó ā, mɛ́mla ɛya nēé ī gwó kéē cíla ulé ā.

⁴⁰Aútéblu ɛnɛ ɔhá bá ɛcɛ kú inu nyā. Ɛpɛɛpa bá āyā ɛplɛ́ɛ́pa kú okómpinu kú ɛhícō ā.

⁴¹Odúúdú autéblu pīyatɔ̄há, é wɛ ahātá nēé gē ŋmó ɛbɛ́ kú ɛya ā ɛyí uwā á. Ɛnɛ bá ipú inu ā, ɛnɛ kē bá ɛcɛ kú inu ódúúdɔ̄lɛ́ eyīyɛ̄cɛ ā.

⁴²Aútéblu ɛnɛ kú ipú inu ā nēé gē na ɛbɛ́ kú ɛya nēé ī yɔlá ā ɛyí nū ā, é gbā uwā ŋmá ápátɛ́cɔ̄. Olicō kú uwā wɛ āyā kú umíta. Ɛyí uwā wɛ isentímīta ofɛtá cigwɛ́hɔ̄ ābɔ̄ kú uwā dóódu. É lɛ odúúdú aɔ́dā nēé gē bī le ŋmó ɛbɛ́ kú ɛya ā, kpó bá ɛyí autéblu ā.

⁴³É lɛ odée kwu ogwu kú ɛyí autéblu ā biílí nɛ̄ ɔwá kú ɔdā ɔ́ɔmā wɛ umilímīta ofɛtá cigwɛ́hɔ̄. É le odúúdú ɛbɛ́ nēé bī gáā gwɛ́ɛya ā kpó ce ɛyí autéblu ā.

⁴⁴Anɔ́ɔ ɔ̄cɛ ɔ́ɔmā lɛ um bī wā ódúúdɔ̄lɛ́ eyīpú ā á. Inu ɛpa bá abɔ́ɔ, nēe gē nwūla ga ódúúdɔ̄lɛ́ eyīyɛ̄cɛ ā. Éyi kú aínu ā lɛ eyī pīya kwu ɛháajɛ áklō kú okómpinu kú ɛhícō ā. Ɔhá ā kē lɛ eyī pīya kwú ɛhícō, áklō kú okómpinu kú ɛháajɛ ā.

⁴⁵Anɔ́ɔ ɔ̄cɛ ā da um ka, inu nōo pīyeyī kwú ɛháajɛ ā wɛ ákú ācogwɛ́ɛya nēe gē yúklɔ́ ipú Agblīihɔ-nɛ̄hi ā.

⁴⁶Inu nōo pīyeyī kwú ɛhícō ā wɛ ákú ācogwɛ́ɛya, nēe gē yúklɔ́ ɛyí ede kú Agblīihɔ-nɛ̄hi ā. Odúúdú ācogwɛ́ɛya nyā ŋmá ipɔ́ɔma kú Usádɔ̄ku. Uwá ofōōfū uwā nēé je ɛga lɛ uwá ŋmá ipɔ́ɔma kú Ulífāyi ká ē nyɔ̄ ɛga nɛ̄ Óndú ā yɔ̄ ā nyɔ̄ ī gbā ɔ̄ ɛ̄gbā á.

⁴⁷Ɔ̄cɛ ā lɛ ódúúdɔ̄lɛ́ eyīpú ā mīya. Ābɔ̄ kú nū dóódu ā wɛ umíta ofɛpa cigwó. Agblīihɔ-nɛ̄hi ā kwú abɔ̄ ɛnɔ̄ɔ̄nɛ̄ ā, ede ā kē kwu iyɔ̄bū nū.

⁴⁸Anɔ́ɔ ó lɛ um bī ga inu nōo kwu okómpinu kú Agblīihɔ-nɛ̄hi ā. Ó lɛ Okónpinu ā mīya. Olipú kú nū wɛ umíta ɛpa ce āyā. Ɔwá kú nū wɛ umíta ahāapa. Ocɔkpɛ́nú kú ɔdɔ kú nū ā wɛ umíta éyi ce āyā, abɔ̄ kú nū dóódu.

⁴⁹Agidigbé yɛ gicō ga inu nōo kwu okómpinu ā. Ɔwá kú nū wɛ wɛ umíta igwó, ipú kú nū kē umíta ɛhīlī. Aúpíla ɛpa bá ābɔ̄ ɛplɛ́ɛ́pa kú okónɔɔwɛ ā. Éyi yɔ̄ ābɔ̄ kú nū, éyi kē yɔ̄ ābɔ̄ ɔhá.