Read idoma ISÍKƐ̄LU 41 Bible Online

ISÍKƐ̄LU 41 - idoma bible

ISÍKƐ̄LU 41

¹Oŋmá abɔ́ɔ ā ɔ̄cɛ ā kwú um ú ga inu ɔtāhɛ̄ nōo wɛ ɛga otīihɔ kú Agblīihɔ-nɛ̄hi ā. O lɛ ɔwɛ̄ nōo yɛ wā ipú nū ā mīya. Ipú nū wɛ umíta ɛtá,

²ɔwá kú nū wɛ umíta ɛhɔ̄, ocɔkpɛ́nú kú nū kē wɛ umíta ɛpa ce āyā áklō kú nū dóódu. Anɔ́ɔ ó lɛ inu ā abɔ̄yī nū ā mīya. Īkpō kú nū wɛ umíta ofu, ɔwá kú nū kē wɛ umíta igwó.

³Anɔ́ɔ ó le tá inu eyīpú fíyɛ́ dúú ā á. Ó lɛ ɔwɛ nēé ī yɛ ga ipú nū ā mīya. Olipú kú nū wɛ umíta éyi, ɔwá kú nū wɛ umíta ɛtá, ocɔkpɛ́nú kú nū āyā dóódu kē wɛ umíta ɛtá ce āyā.

⁴Ó lɛ inu abɔ̄yī nū ā mīya. Āyā kú nū dóódu wɛ umíta igwó. Inu ā kē kwu igbīhi inu ɔtāhɛ̄ ā. Anɔ́ɔ o da um kahíníī, “Amānyā ā, tīhɔ fíyɛ́ dúú á.”

⁵Ɔ̄cɛ ā lɛ ocɔkpɛ́nú kú ɔdɔ kú eyīpú kú Agblīihɔ-nɛ̄hi ā mīya. Ó wɛ umíta ɛtá. É lɛ aínu lígílígí nɛ̄ ɔwá kú uwá wɛ umíta ɛpa ā gwó kwu ɔdɔ kú Agblīihɔ-nɛ̄hi ā biílí.

⁶Aínu nyā wɛ inīcō ɛtá ce ɔhá icō. Aínu ofu cigwó bá éyééye kú inīcō ā. Ɛ́gɛ́nɛ̄ ɔdɔ kú Agblīihɔ-nɛ̄hi ā lɛ a, ɛ̄nɛ̄ o yɔ̄ ɛhícō ā cɔkpɛ́nú fíyɛ́ ɔdɔ nōo yɔ̄ ɛháajɛ nū á. Cɛ́ɛ́ ka aínicō ā ká o bayi ɔdɔ kú Agblīihɔ-nɛ̄hi ā, amáŋ kéē playi anú gaá gbɛnú ce ɔɔ́ ŋ́.

⁷Ohígbū ɔ́ɔmā, ɔ́dāŋ nɛ̄ ɔ̄cɛ lɛ ocɔkpɛ́nú kú ɔdɔ kú Agblīihɔ-nɛ̄hi ā má ŋmá eyīyɛ̄cɛ, ó gbɛlá ka ɔ́ɔ wɛ ékpónú ŋmá ajɛ jāā kwu icō. É lɛ agidigbé ɛpa gwó kwú ɔdɔ kú eyīyɛ̄cɛ kú Agblīihɔ-nɛ̄hi ā, ɛcɛ kú aínīcō nyā, nɛ̄ ɔ̄cɛ géē yɛ ŋmá inīcō éyi ga inīcō ɔ́mpa mɛ́mla ɔ́mɛtá ā gláá.

⁸Ocɔkpɛ́nú kú eyīyɛ̄cɛ kú ɔdɔ kú aínicō ā wɛ umíta ɛpa ce āyā. Ɔwɛ éyi yɛ ga ipú aínu kú ābɔ̄ ɛhícō kú Agblīihɔ-nɛ̄hi ā, ɔhá klla yɛ ga ipú aínu kú ābɔ̄ kú ɛháajɛ ā dúú. N má ka ɔwá kú aínu ā kwu ikpó kú Agblīihɔ-nɛ̄hi ā wɛ umīta ɛpa ce āyā biílí jīla. Oŋmá ajɛ gicō kú nū ā wɛ umíta ɛtá, gáā jónjīlɛ̄ mɛ́mla etikpa kú aínicō kú Agblīihɔ-nɛ̄hi ā. Ɛga nōo tá ɔtāhɛ̄ ŋmá ɛgiyí aínu nēe kwu ɛháajɛ kú Agbīihɔ-nɛ̄hi ā ga ɛgiyí aínu kú ācogwɛ́ɛya ā wɛ umíta igwó, pīya cíla áklō kú Agblīihɔ-nɛ̄hi ā.

¹²Oŋmɛ́yí kú ɛga nōo tɛ́ɛcɛ ɛnɔ̄ɔ̄nɛ̄ kú Agblīihɔ-nɛ̄hi ā, inu éyi yɔ̄ abɔ́ɔ. Īkpō kú nū wɛ umíta ofɛpa cɛ̄hɔ̄, ɔwá kú nū kē wɛ umíta ofu cigwɛ́ɛhɔ̄. Ocɔkpɛ́nú kú ɔdɔ kú nū ā wɛ umíta ɛpa ce āyā biílí.

¹³Ɔ̄cɛ ā lɛ ɛcɛ kú Agblīihɔ-nɛ̄hi ā mīya, īkpō kú nū wɛ umíta ofɛpa cigwó. Oŋmá igbīhi kú Agblīihɔ-nɛ̄hi ā gaá bū ɛga nōo tá áncā ā jāā ga oŋmɛ́yí kú inu ā ɛnɔ̄ɔ̄nɛ̄ ā, wɛ umíta ofɛpa cigwó.

¹⁴Ɔwá kú iyɔ̄bū kú Agblīihɔ-nɛ̄hi ā ɛnɔ̄ɔ̄cī ā mɛ́mla odúúdɔ̄lɛ́ nēe kwu ābɔ̄ ɛpa ā wɛ umíta ofɛpa cigwó.

¹⁵Ó le īkpō kú Agblīihɔ-nɛ̄hi ā nōo kwu ɛnɔ̄ɔ̄nɛ̄ ā, kwu aínu nēe kwu okómpinu kú nū ābɔ̄ ɛplɛ́ɛ́pa ā kpó miyo. Ó wɛ umíta ofɛpa cigwó. Inu nōo kwu okómpinu kú Agblīihɔ-nɛ̄hi ā, ɛga otīihɔ ā mɛ́mla ɛga nōo tīhɔ fíyɛ́ dúú ā,

¹⁶é lɛ ɔcí pla bá ɔdɔ kú odúúdú uwā ŋmá ajɛ kwu aúwíndo. É lɔfú je odée klá aúwíndo ɔ́ɔmā glá.

¹⁷É lɛ ifotó kú aɔ́cí alī mɛ́mla aúcérūbim kpó tū ɔdɔ kú eyīpú kú Agblīihɔ-nɛ̄hi ā, jāā gaá kwú icō kú odúúdú aókómpinu ā. Ifotó kú Ucérūbim mɛ́mla ákú alī ā gboce iyī uwā éyééyé lɛ ā ɛjɛ̄ɛ̄jī ɔdɔ ā. Ɔnyɔɔnyɛ kú aúcérūbim ā lɛ eyī ɛpā.

¹⁹Eyī kú ɔ̄cɛ le pīya kwu alī éyi ābɔ̄ éyi, eyī kú ágábá kē le pīya kwú alī ɔhá ābɔ̄ ɔhá. Ó lɛ ā jāā jīla ɔdɔ ā tá,

²⁰ŋmá ajɛ kwú icō kú ɔwɛ kú Agblīihɔ-nɛ̄hi ā.

²¹Aɔ́cí kú okónɔɔwɛ kú ɛga otīihɔ ā lɛ ɔ́gɔgɔ́ ɛnɛ nēe jōnjīlɛ̄. Iyɔ̄bū okómpinu kú ɛga otīihɔ kú Agblīihɔ-nɛ̄hi ā, odée yɔ̄ abɔ́ɔ nōo lɛbɛ̄ɛka

²²ede kú ɔcí ā. Olicō kú nū wɛ umíta éyi ce āyā, ɔwá kú nū kē wɛ umíta éyi. É yá ɔ́kpa kú ɔ́kíkā kú nū ā, ɛháajɛ kú nū mɛ́mla áklō kú nū ŋmá ɔcí. Ɔ̄cɛ ā da um kahíníī, “Ɛ̄nyā wɛ Itébulu nōo ī háyi ipéyī Óndú ā á.”

²³Okómpinu éyi kwu oŋmɛ́yí kú ɛplá nōo yɛ ga ɛga otīihɔ ā. Ɔwɛ ɔhá yɔ̄ dúú nōo tá oŋmɛ́yí kú ɛplá nōo yɛ ga ɛga ōtīhɔ fíyɛ́ dúú ā.

²⁴Aódūngwɔ̄wɛ kú uwā lɛ ābɔ̄ ɛpa kwu ɔhá nēé gē nwūla ɔtāhɛ.

²⁵É lɛ aífotó kú alī mɛ́mla ucérūbim kpó hɛ́ tū odūngwɔ̄wɛ kú ɛga otīihɔ ā, bɛ̄ɛka ɛ́gɛ́nɛ̄ é yá tū ɔdɔ ā. É lɛ ɔcí gbā gwū icō kú okómpinu kú inu nōo kwu Okómpinu kú Agblīihɔ-nɛ̄hi ā.

²⁶Inu nyā lɛ aúwíndo áklō kú nū dúúdú. É lɛ ɔdɔ ā yá ifa mla ifotó kú alī.