Read idoma ISÍKƐ̄LU 42 Bible Online

ISÍKƐ̄LU 42 - idoma bible

ISÍKƐ̄LU 42

¹Ɔ̄cɛ ā kwú um ú bɛ̄cɛ wā odúúdɔ̄lɛ́ eyīyɛ̄cɛ ā, anɔ́ɔ o lɛ um bī ga ɛgiyí aɔ́lɛ́ ɛpa nēe bá ɛhícō kú Agblīihɔ-nɛ̄hi ā. É ligbó ŋmá ɛgiyí inu nōo kwu ɛnɔ̄ɔ̄nɛ̄ ā ŋ́.

²Īkpō kú aɔ́lɛ́ ā wɛ umíta ofɛpa cigwó, ɔwá kú uwā kē wɛ umíta ofu cɛ̄hɔ̄.

³Āyā kú uwā éyi, pīyeyī kwú ɛga nōo wɛ umíta igwó, nōo tá áncā yɛ pi Agblīihɔ-nɛ̄hi ā. Āyā ɔhá kē pīyeyī kwú úbɔ́ kú odúúdɔ̄lɛ́ eyīyɛ̄cɛ ā. É gwó aɔ́lɛ́ ā ce ɔhá āyā ɛtá. Āyā éyééye yɛ ga igbīhi fíyɛ́ ɛ̄nɛ̄ o ce ɛyí nū ā.

⁴Āyā kú ɛhícō kú aínu ā, ɛpá tá abɔ́ɔ, nɛ̄ ɔwá kú nū wɛ umíta ɛhɔ̄, īkpō kú nū kē wɛ umíta ofɛpa cigwó. Aókómpinu kú aínu ā kē pīya kwu āyā ɔ́ɔmā.

⁵Aínu nēe bá ɛhícō fíyɛ́ dúú ā nyɛ́ fíyɛ́ aínu kú ɔtāhɛ̄ mɛ́mla ákú ɛháajɛ kú nū ā, ohígbū ka uwá tú ga igbīhi fíyɛ́ aɔ́há ā.

⁶Odúúdú aɔ́lɛ́ ɛtá nēe ce ɛyí īyī wā icō nyā ce ɛyí úbɔ́ kú īyī uwā. Upíla dúúmā í kwu uwá ká ō bī uwā háyi, bɛ̄ɛka aɔ́lɛ́ ɔhá kú odúúdɔ̄lɛ́ eyīyɛ̄cɛ kú Agblīihɔ-nɛ̄hi ā ŋ́.

⁷Ɔdɔ kú inu kú ɛháajɛ kú eyɛ̄ɛ̄cɛ kú inu a cɔkpɛ́nú, umíta ofu cɛ̄hɔ̄. Ɔ́ɔmā wɛ āyā kú umíta kú ikpō kú nū. Inu klla bá nɛ̄ ipú nū wɛ umíta ofu cɛ̄hɔ̄ nōo hile ɔhá ā.

⁸Inu nōo ce inu kú ɛháajɛ ā icɔ̄ ā, ípú inu bá odúúdú īkpō kú inu a dúúdú.

⁹ɛháajɛ kú inu ɛpa kú ɛnɔ̄ɔ̄cī kú oŋmɛ́yí kú inu ā, ɛga nɛ̄ ɔdɔ gbo ɔ́ ā, ɔwɛ éyi yɔ̄ abɔ́ɔ, nōo tá ga eyɛ̄ɛ̄cɛ kú ɛga otá pée kú eyɛ̄ɛ̄cɛ ā.

¹⁰Ɛháajɛ kú āyā kú Agblīihɔ-nɛ̄hi ā, ɛdɔ inu ékpónú ɔ́ɔmā bá abɔ́ɔ á. Ó ligbo ŋmá inu oŋmɛ́yí kú ɛnɔ̄ɔ̄nɛ̄ kú Agblīihɔ-nɛ̄hi ā ŋ́.

¹¹Ɛplá ō yɛ tá iyɔ̄bū aínu bɛ̄ɛka ákú āyā kú ɛhícō ā. Omiya kú nū mɛ́mla ɛ́gɛ́nɛ̄ é gwó ɔ̄ɔ̄ lɛ a klla mɛ́mla okómpinu kú nū ā wɛ ɛdɔ ékpónú mɛ́mla ákú ɔhá ā.

¹²Okómpinu éyi yɔ̄ ɛháajɛ kú aínu nōo yɔ̄ āyā ɛháajɛ kú ɔlɛ́ ā, oŋmɛ́yí kú ɛnɔ̄ɔ̄cī ɛga nɛ̄ ɔdɔ ā gbɔɔ́ ā.

¹³Anɔ́ɔ ɔ̄cɛ ā da um kahíníī, “Aínu ɛplɛ́ɛpa nyā wɛ ákú Ɔwɔicō abɔ̄yī nū. Ipú aínu nyā nɛ̄ ācogwɛ́ɛya, nēe gē ga ɛga nɛ̄ Óndú ā yɔ̄ ā gē lé ɛbɛ ɛya nōo wɛ ákú Ɔwɔicō abɔ̄yī nū fíyɛ́ dúú ā á. Abɔ̄ aínu nēe bá nyā wɛ ákú Ɔwɔicō abɔ̄yī nū ā, ācogwɛ́ɛya ā gē kpó aɛ́ya mɛ́mla aɔ́dā ɛ̄gbā nōo wɛ ákú Ɔwɔicō abɔ̄yī nū fíyɛ́ dúú ā bá abɔ́ɔ. Aɔ́ɔmā wɛ ɛya kú īkpɔ̄dɛ̄hɔ̄, ɛya nɛ̄ ɔ̄cɛ gē gwó kéē je ɔbíipú yá ɔ̄ ɛhi ā, ákú okónu ōce mɛ́mla ɛ̄nɛ̄ ɔ̄cɛ gē gwó kóō le cīla ulé ā.

¹⁴Eko nɛ̄ ācogwɛ́ɛya ā le tá ipú ɛga nōo wɛ ákú Ɔwɔicō abɔ̄yī nū kú Agblīihɔ-nɛ̄hi ā, anɔ́ɔ é tíne ō gā ódúúdɔ̄lɛ́ eyīyɛ̄cɛ kú Agblīihɔ-nɛ̄hi ā ɛgiyí ācɛ ā, é géē je odúúdú úwé mɛ́mla īlī kú Ɔwɔicō nēé gē bī gbā Óndú ā ɛ̄gbā ā kpó pla bá ipú aínu nyā piíí. É í kpó īlī ɔhá wiiyē gbɔbū kéē ga ɛga nɛ̄ ācɛ jīla bá eyīyɛ̄cɛ.

¹⁵Eko nɛ̄ ɔ̄cɛ ā lɛ ipú kú Agblīihɔ-nɛ̄hi ā mīya kwɛ́yí ā, ó lɛ um bī ga ɛcɛ bū ɔwɛ kú ɛnɔ̄ɔ̄cī ā gaá lɛ eyīyɛ̄cɛ kú Agblīihɔ-nɛ̄hi ā mīya.

¹⁶Ó kwú ɔcí ōmiya ajɛ ú lɛ āyā ɛnɔ̄ɔ̄cī kú nū mīya. Ó wɛ umíta ofu igwáhāpa cigwó.

¹⁷Ó lɛ pīya gaá lɛ āyā ɛhícō kú nū miya. Ó wɛ umíta ofu igwáhāpa cigwó dúú.

¹⁸Ó lɛ ɛháajɛ kú nū miya. Ó kē wɛ ɔdā ékpónú ɔ́ɔmā dúú.

¹⁹Ó klla lɛ ɛnɔ̄ɔ̄nɛ̄ miya, ó kē wɛ umíta ofu igwáahāpa cigwo ā dúú. Āyā kú nū dóódu ā wɛ umíta ofigwáhāpa cigwó.

²⁰Ohígbū ɔ́ɔmā, Agblīihɔ-nɛ̄hi ā wɛ umíta ofigwáhāpa cigwó āyā dóódu ā. Ɔdɔ ā lɛ ɔdā nōo wɛ ákú Ɔwɔicō abɔ̄yī nū ā kɔ̄ hī ɔdā nɛ̄ ó wɛ ákú Ɔwɔicō abɔ̄yī nū ŋ́ mā tá.