Read idoma ISÍKƐ̄LU 43 Bible Online

ISÍKƐ̄LU 43 - idoma bible

ISÍKƐ̄LU 43

¹Anɔ́ɔ ɔ̄cɛ ā lɛ um bī ga ɔwɛ nōo pīyeyī kwú ɛnɔ̄ɔ̄cī ā.

²Abɔ́ɔ ā n má ofíyáajɛ kú ɛgahi nɛ̄hi kú Ɔwɔicō kú Ísrɛ̄lu ā yɔ̄ ī wā ŋmá ɛnɔ̄ɔ̄cī. Ɔkɔ kú Ɔwɔicō yɔ̄ ī kɛlā kwūūū bɛ̄ɛka úgbagwú kú ísu ā. Ajɛ tá pálúúú ohígbū ofíyáajɛ kú ɛgahi nɛ̄hi kú Óndú ā.

³Ɛbɛ nyā lɛbɛ̄ɛka ɛ̄nɛ̄ n má eko nɛ̄ Ɔwɔicō wā í je Ujerúsālɛm yíífi ā mɛ́mla ɛ̄nɛ̄ n má okónu ísu kú Ucɛ́ba ā. Anɔ́ɔ n lɛ īyī um tá fīyɛ̄ ajɛ gblugudu, kwú eyī pīya klá ajɛ á.

⁴Anɔ́ɔ ofíyáajɛ kú ɛgahi nɛ̄hi kú Óndú nyā gáā le bēé okómpinu kú ɛnɔ̄ɔ̄cī ā gā ipú Agblīihɔ-nɛ̄hi ā á.

⁵Alelékwū kú Óndú ā kwú um ú gicō ŋmá abɔ́ɔ, lɛ um bī ga ódúúdɔ̄lɛ́ eyīpú kú Agblīihɔ-nɛ̄hi ā. Anɔ́ɔ n má ka ofíyáajɛ kú ɛgahi nɛ̄hi kú Óndú ā yɔ̄ ī fíyajɛ ipú Agblīihɔ-nɛ̄hi ā ɛga dóódu á.

⁶Abɔ̄ ɔ̄cɛ ā māháyi pī um abɔ́ɔ ā, n pó ɔkɔ kú Óndú ā kɛlā gā um ŋmá ipú Agblīihɔ-nɛ̄hi ā.

⁷Ó kahíníī, “Ɔlɛcɛ, amānyā wɛ akpa ɔcɛ́ kú um á. N géē lā amānyā ipú ācɛ Ísrɛ̄lu, klla í gbō uwā piyóó. Kwu ācɛ Ísrɛ̄lu, amáŋ aɔ́cɛ́ kú uwā í klla gáā je uwēyī lɛ iyē kú um nɛ̄ iyē ɔhá í tōō le gbla ɔ́ ŋ́ mā gbóógbóó ŋmá lɛ ɛcí ōpā mɛ́mla okwū kú aɔ́cɛ́ kú uwā ōnyi amānyā gɛ ŋ.

⁸Aɔ́cɛ́ ā gwó okómpinu mɛ́mla odūngwɔ̄wɛ kú agblɔ̄cɛ́ kú uwā kwu okónɔɔwɛ mɛ́mla odūngwɔ̄wɛ kú Agblīihɔ-nɛ̄hi kú um, nɛ̄ ɔdɔ ékpónú ōfōōfūnū tá ɔtāhɛ̄ ami mɛ́mla uwá á. É je uwēyī lɛ iyē kú um nɛ̄ iyē ɔhá í tōō le gbla anú ŋ mā ŋmá lɛ ucē ɛbí nɛ̄hi dóódu nɛ̄ uwá gē yá ā. Ohígbū ɔ́ɔmā, n le cɔ̄nū lɛyíkwu uwá kwú uwā ú kpó yíífi.

⁹Amáŋ abālɔbányā, é géē mā ɛcí ōpā tá, cɛ́ɛ́ ká ē lɛ okwū kú aɔ́cɛ́ kú uwā kpó fu ŋmá ipú Agblīihɔ-nɛ̄hi kú um. Ɔ́dāŋ́ ka é le ɔ́ɔmā yá, n géē lā ipú uwā piyóó.”

¹⁰Óndú ā klla kɛlā gā um kpɔ́ kahíníī, “Ɔlɛcɛ, kɛlā lɛ ācɛ Ísrɛ̄lu lɛyíkwu Agblīihɔ-nɛ̄hi ā. Ká ē klla lɛ eyī yɛ omiya kú nū. Cɛ́ɛ́ ka uwēyī ká ō lɛ uwá kwú ohígbū ucē ɔ́bíipú kú uwā.

¹¹Ɔ́dāŋ́ ka é yá uwēyī ohígbū ɔdā nēé yá ā, lɛ ōmiya kú Agblīihɔ-nɛ̄hi ā mafú lɛ uwá péee. Kwu ɛ́gɛ́nɛ̄ é gwó ɔ̄ lɛ ā, aókónɔɔwɛ ō ga ipú nū mɛ́mla ō bɛ̄cɛ ŋmá anú, mɛ́mla ɛ́gɛ́nɛ̄ ɔ́gɔgɔ́ kú nū lɛ a. Kwu ɛ́gɛ́nɛ̄ é kpó aɔ́dā nēe bá ipú nū ā bá ā mɛ́mla odúúdú íne mɛ́mla ɔ́da kú nū. Lɛ odúúdú nū tá tāajɛ lɛ uwá cɛ́ɛ́ kéē jé ɔdā dóódu kú nū péee, nēé géē yá ɔdā nɛ̄ íne kú nū dóódu ka ā.

¹²Ɛ̄nyā wɛ íne kú Agblīihɔ-nɛ̄hi ā á. Ɛga dóódu nōo kwu ɔ́ yɛ jīla tá biílí icō kú ɛfu wɛ ákú Ɔwɔicō.”

¹³Ɛ̄nyā wɛ ōmiya kú ede, nēé bī ɔdā ole miya odée ékpónú nēé le mīya Agblīihɔ-nɛ̄hi ā le miya ɔ́ á. É lɛ ɔ́glɔ́ na ɛháajɛ kú ede ā biílí, nɛ̄ olipú kú nū wɛ usentímīta ofɛpa cigwó, ɔwá kú nū kē wɛ usentímīta ofɛpa cigwó. Akā ce ɔ́ okónu ɛcɛ yɛ biílí nɛ̄ icō kú nū ŋmá ajɛ kē wɛ isentímīta ofu cɛhɔ̄.

¹⁴Ɛháajɛ kú ede, ŋmá icō kú nū kwu ɔkwu nū ā wɛ umíta éyi. Āyā nōo gboce ɛháajɛ ā tá ɔtāhɛ̄ ā le hɛ́ ga igbīhi ŋmá ogwu kú nū biílí usɛntímīta ofɛpa cigwó. Olicō kú nū kē wɛ umíta ɛpa. Āyā ɔhá nōo gboce āyā ɔ́ɔmā icō ā le hɛ́ ga igbīhi ŋmá ogwu kú nū ā wɛ usentímīta ofɛpa cigwó dúú.

¹⁵Olicō kú ɛhícō kú nū ɔ́ɔmā nēé gē yi aɔ́dā ɛya ɔlá anú ā, wɛ umíta ɛpa. Aábɔ̄ kú ɔ́kíkā ɛnɛ kú nū nēe hɛ́ wɛ̄ɛcɛ ā licō fíyɛ́ ɛhícō kú ede ā á.

¹⁶Omiya kú abɔ̄ ɛnɛ kú ɛyí ede ā jóonjilɛ̄. É wɛ umíta ɛhīlī.

¹⁷Āyā ɔtāhɛ̄ kú ede ā lɛ abɔ̄ ɛnɛ nēe jóonjilɛ̄ dúú. Abɔ̄ kú nū dóódu wɛ umíta ahāapa. Akā nōo wɛ usentímīta ofu cɛ̄hɔ̄ ce ɔ́ okónu biílí. Ɔ́glɔ́ kú ɔkwu nū ā wɛ usentímīta ofɛpa cigwó. Agidigbé nōo yɛ gicō kú ede ā yɔ̄ āyā kú ɛnɔ̄ɔ̄cī ā.

¹⁸Óndú ā, nōo wɛ Ɔwɔicō ā da um kahíníī, “Ɔlɛcɛ, jāhɔ̄ lɛ ɛlā nɛ̄ n gē ka gā uwɔ ā. Ɔ́dāŋ́ ka é lɛ ede ā gwó, a géē je ede ā gā um, oŋmá lɛ o gwɛ́ɛya ɛya oyɔlá ɛyí nū mɛ́mla oyī kú ɛbɛ́ kú ɛya ā oōmī klā ede ā.

¹⁹Ācogwɛ́ɛya, nēe ŋmá ipɔ́ɔnū kú Usádɔku kú ipɔ́ɔma kú Ulífāyi ā ofōōfū uwā géē wā ɛgiyí um gaá gbā um ɛ̄gbā á. Ami Óndú ā, nōo wɛ Ɔwɔicō ā je ɔ́da nyā á. Aá géē je ɛdrɔ́ kú ɔbá ɛna lɛ uwá ka é je gwɛ́ɛya ohígbū ɔ́bíipú ā.

²⁰A géē hɛ oyī kú ɛna ā klá abɔ̄ kú aɔ́kíkā kú ede ɛnɛ nēe hɛ́ wɛ̄ɛcɛ ā, mɛ́mla aɔ́kíkā kú āyā ɔtāhɛ̄ kú ede ā, mɛ́mla akā nōo yɛ ɔ́ɔ biílí ā. Ɔwɛ nyā nēé géē je ede ā yá yēŋēē, í je ɔ́ pīya ákú um á.

²¹Ɔbá ɛna nēé bī gáā le gwɛ́ɛya ohígbū ɔ́bíipú ɔ́ɔmā, a géē je ɔ́ nyɔ̄ ga eyīyɛ̄cɛ kú Agblīihɔ-nɛ̄hi ā, nyɔ̄ ī je ɔ́ yɔɔlá dúúdú ɛga nɛ̄ n géē mafú ga uwɔ ā.

²²Oŋmɔ́cī nū, a géē je opī nōo lɛ ɛnyá dúúmā ŋ́ mā gwɛ́ɛya ohígbū ɔ́bíipú. A géē bī oyī kú nū le gwu ede ā yēŋēē, ɔwɛ ékpónú nāa mī oyī kú ɔbá ɛna ā klá ede ā.

²³Eko nāa lɛ ɔ́ɔmā yá kwɛyí, kwú ɛdrɔ́ kú ɛna mɛ́mla omlede nēé lɛ ɛnyá dúúmā ŋ́ mā ú,

²⁴ká a kwú uwá ú kpó gē um. Ācogwɛ́ɛya ā géē mi ɔmā klá uwá, klla í je ɛbɛ kú uwá kpó yɔlá gā um dúúdú ká ō wɛ ɛ̄gbā kú um.

²⁵Ɛ̄cī dóódu ipú ɛ̄cī ahāapa ce ɔhá ā, a géē yɔ̄ ī bī ɛwū, ɛna, mɛ́mla omlede le gwɛ́ɛya ohígbū ɔ́bíipú gā um. Odúúdú uwā í gáā lɛ ɛnyá dúúmā ŋ́.

²⁶Ipú ɛ̄cī ahāapa ɔ́ɔmā, ācogwɛ́ɛya ā géē bá ī gwu ede ā yēŋēē, klla í je ɔ́ gā um kóō le pīya ákú um.

²⁷Eko nɛ̄ ɛ̄cī ahāapa ā le yá ī yɛ, cɛ́ɛ́ ācogwɛ́ɛya ā géē gbɔɔ́ ō gwɛ́ɛya oyɔlá mɛ́mla ákú ɛbɔ́ ɛyí ede ā lɛ ācɛ ā. Cɛ́ɛ́ ɔtū géē he um mla aá. Ami Óndú ā, nōo wɛ Ɔwɔicō ā le ka ɛɛ́.