Read idoma ISÍKƐ̄LU 44 Bible Online

ISÍKƐ̄LU 44 - idoma bible

ISÍKƐ̄LU 44

¹Ɔ̄cɛ ā lɛ um bī wā ɛgiyí okómpinu kú eyīyɛ̄cɛ kú ɛnɔ̄ɔ̄cī kú Agblīihɔ-nɛ̄hi ā. Ɔwɛ ā le gwū.

²Anɔ́ɔ Óndú ā da um kahíníī, “Ɔwɛ nyā géē wɛ oōgwū piyóó, ɔ̄cɛ dúúmā í gáā nwūla anú ŋ́. Ɔlɛcɛ dúúmā í gáā bū ɔwɛ nyā ŋ́. Ohígbū ka ami Óndú ā, Ɔwɔicō kú Ísrɛ̄lu ā le bū ɔ̄ɔ̄ wā ipú Agblīihɔ-nɛ̄hi ā ɛɛ́. Ohígbū ɔ́ɔmā ā, ɔwɛ ā géē wɛ oōgwū piyóó.

³Ɔcɛ́ kú ācɛ Ísrɛ̄lu ofōōfūnū géē nyɔ̄ abɔ́ɔ gáā lé ɔdōlé ipéyī um abɔ́ɔ glá ā. Amáŋ ɔwɛ kú inu nɛ̄ kwu oŋmɛ́yí kú ɛplá nōo yɛ ga ipɔ̄nū eyīpú ā, nɛ̄ ó géē bū wā abɔ́ɔ, klla í yɛ bɛ̄cɛ ŋmá abɔ́ɔ dúú á.

⁴Anɔ́ɔ ɔ̄cɛ ā le um bī bū okómpinu kú ɛhícō ā ga iyɔ̄bū kú Agblīihɔ-nɛ̄hi ā gáā māháyi ɛcɛ. Abɔ̄ n tá eyī wā ajɛ le ɛbɛ má á, n má ka ofíyáajɛ kú ɛgahi nɛ̄hi kú Óndú ā le mu ipú Agblīihɔ-nɛ̄hi ā. Anɔ́ɔ n lɛ īyī um tá fīyɛ̄ ajɛ gblugudu, kwú eyī ú pīya klá ajɛ.

⁵Anɔ́ɔ Óndú ā da um kahíníī, “Ɔlɛcɛ, jāhɔ̄ lɛ ɔdā dúúmā nāa pó klla má ā. N géē ka aíne mɛ́mla aɔ́da kú Agblīihɔ-nɛ̄hi kú um ā gā uwɔ. Lɛ ɛlá kwu ɔ́ lɔɔlɔhi ká ā jé ācɛ nēe géē ga ipú Agblīihɔ-nɛ̄hi kú um mɛ́mla ācɛ nɛ̄ é gáā ga ipú Agblīihɔ-nɛ̄hi kú um ŋ́ mā.

⁶Lɛ ka lɛ ācɛ Ísrɛ̄lu, nēe ī yīkpɛ̄yí olɔfú ā ka, Ami, Óndú ā, nōo wɛ Ɔwɔicō ā, ɔ́ɔ ka ucē ɛbí nɛ̄hi kú uwá nēé gē yá ā ɔ́ɔ jɛ̄ ɛɛ́.

⁷É kwú Agblīihɔ-nɛ̄hi kú um ú tēelihɔ ohígbū kéē gē je ɛga lɛ ācɛ aéwɔhá nēé hɛ́ apī ŋ́, í klla lɛyítáajɛ gā um ŋ́ mā, kéē wā ipú Agblīihɔ-nɛ̄hi kú um eko nēé gē je ijē mɛ́mla oyī kú ɛbɛ́ ɛya ā gbā um ɛ̄gbā ā. Ohígbū ɔ́ɔmā ā, ācɛ ɔlɛ́ um, kwú okónu nɛ̄ n ce mɛ́mla uwá ú tēelihɔ ohígbū ucē ɛbí dóódu nēé gē yá ā.

⁸É leyīkwu aúculo kú ɔdēēlihɔ kú Agblīihɔ-nɛ̄hi kú um ā abɔ̄yī uwā ŋ́. Ikɔkɔ ɔ́ɔmā, é kwú aúculo ā ú kpó tū aéwɔhá abɔ̄.

⁹Ami Óndú ā, nōo wɛ Ɔwɔicō ā gē ka ka ācɛ aéwɔhá dúúmā nēé wɛ ācɛ kú um ā ŋ́, ɔ̄cɛ dúúmā nɛ̄ ó lɛyítáajɛ gā um ŋ́, í gáā ga ipú Agblīihɔ-nɛ̄hi kú um ā gɛ ŋ́. Kwu ācɛ aéwɔhá nēe bá ipú ācɛ ɔlɛ́ um, ācɛ Ísrɛ̄lu ā.”

¹⁰Óndú ā da um kahíníī, “N géē je ōwē lɛ ayí kú Ulífāyi nēe cīgbīhi hɛ̄ um tá mɛ́mla ācɛ o hile kú Ísrɛ̄lu, gáā bá ī pā ɛcí ā.

¹¹É géē lɔfú yúklɔ́ ōgbō ɔwɛ kú Agblīihɔ-nɛ̄hi kú um, klla í yúklɔ́ ɔhá ipú Agblīihɔ-nɛ̄hi kú um ā glá. É géē lɔfú ŋmó ɛbɛ́ kú ɛya dóódu ā glá. É klla í yúklɔ́ bá ī cɛ̄ ācɛ ā ɛhɔ̄.

¹²Amáŋ ohígbū ka ācɛ úlífāyi ɔ́ɔmā pā ɛcí lɛ ācɛ kú Ísrɛ̄lu ā, nēe bū ipú ɔwɛ nyā lɛ ācɛ kú Ísrɛ̄lu kpó ga ipú ɔ́bíipú ā, Ami Óndú ā, nōo wɛ Ɔwɔicō ā lɛ ɔkpá gbo ka é géē móōwē ohígbū ɔ́bíipú kú uwā piíí.

¹³Ohígbū ɔ́ɔmā, uwá í gáā wɛ ācogwɛ́ɛya kú um gɛ ŋ́, ɛɛ́ nɛ̄ uwá gē túblá ɔdā otīihɔ dúúmā ámāŋ ka ɔdā otīihɔ fíyɛ́ dúú kú um ā ŋ́. Ɔ́ɔmā wɛ ōwē kú aúcē ɛbí nēé yá ā á.

¹⁴Aúklɔ́ ohɛkɛhɛkɛ mɛ́mla olɔnɔ ā nēé géē bá ī yá ipú Agblīihɔ-nɛ̄hi kú um ā mɛ́ɛ̄ á.”

¹⁵Óndú ā nōo wɛ Ɔwɔicō ā klla kahíníī, “Ācogwɛ́ɛya nɛ̄ ē ŋmá ipɔ́ɔma kú Ulífāyi ipú inū kú Usádɔ̄ku ā lɛyítáajɛ gā um, klla gbā um ɛ̄gbā kpaakpa, eko nɛ̄ ācɛ Ísrɛ̄lu o hile ā kwúcē ŋmá ɛgiyí um ā. Ohígbū ɔ́ɔmā, uwá gáā cɛ̄ um ɛhɔ̄ klla í wā ɛyí ede kú um ā gáā je ijē mɛ́mla oyī kú aɛ́bɛ́ ɛya ā gā um á.

¹⁶Uwá ofōofū uwā géē bēé wā ipú Agblīihɔ-nɛ̄hi kú um, gbā um ɛ̄gbā ɛyí ede klla yá ɔdā dóódu kú ɛ̄gbā ōgbā ipú Agblīihɔ-nɛ̄hi kú um á.

¹⁷Eko nɛ̄ uwá le bēé okómpinu kú ódúúdɔ̄lɛ́ eyīpú kú Agblīihɔ-nɛ̄hi ā, uwá géē kpó īlī nēé hī ka ulínin wiiyē. Uwá í gáā lé ɔdā dúúmā nēé yá ŋmá owú wiiyē eko nēé gē yúklɔ́ ódúúɔ̄lɛ́ eyīpú ámāŋ ka ipú Agblīihɔ-nɛ̄hi abɔ̄yī nū ā ŋ́.

¹⁸O yá ka uwá kéē bāahɛ ŋ́ mā, uwá géē lɛ īlī ogbɛ̄yí kú ulínin gbō ɛyí mɛ́mla ikakí ogbɔ̄lɔ̄ kú ulínin wu ikpó.

¹⁹Gbɔbū ɛ́ɛ́ ká e géē ga ódúúdɔ̄lɛ́ eyīyɛ̄cɛ ɛgiyí ācɛ ā, uwá géē je aílī nēé le wiiyē yúklɔ́ ipú Agblīihɔ-nɛ̄hi ā kpó plá bá ipú aínu kú um ā. Uwá í kpó úwé ɔhá wiiyē cɛ́ɛ́ ka īlī otīihɔ kú uwá ā kóō kpó ɛbí tū ācɛ ā, eko nēé géē ga ipú uwā ā ŋ́.

²⁰Ācogwɛ́ɛya ī gáā plá ɛyí ɛ́ɛ́ nɛ̄ ɛyí kú uwá gē gwā nɛ̄hi ŋ́. É géē bá ī wā ɛyí kú uwá tá eko nū eko dóódu.

²¹Ɔ̄cogwɛ́ɛya dóódu kóō gwá ejé dúúmā, ɛ́ɛ́ ka ō ga ódúúdɔ̄lɛ́ eyīpú kú Agblīihɔ-nɛ̄hi ā ŋ́.

²²Ɔ̄cogwɛ́ɛya kóō lɛ ɔnyā nɛ̄ ɔbá nū gekwú ŋ́. Ayíka ɔnyōkwū nɛ̄ ɔbá nū wɛ ɔ̄cogwɛ́ɛya gbɔbū ɛ́ɛ́ nɛ̄ ó kwú ā. Ó híī lɛ ɔnyā dúúmā nɛ̄ ɔbá nū tá ɔ̄ ŋ́. Ó géē lɛ ɔyípɔ̄ncɛ́nyā ŋmá Ísrɛ̄lu nɛ̄ ó jé ɔnyīlɔ jéjée ɛ́ɛ́ ŋ́.

²³Ācogwɛ́ɛya a géē nwū ācɛ ɔlɛ́ um ɛyɛ́ɛ́yí kú ɔdā nōo wɛ ákú um abɔ̄yī um mā mɛ́mla ɔdā nɛ̄ ó wɛ ákú ɔlamu ā. kéē ka nwū uwā kéē jé ɛyɛ́ɛ́yɛ́yí kú ɔdēēlihɔ mɛ́mla ɔdā nōo le yéŋéé ā.

²⁴Eko dúúmā nɛ̄ ikpɛ́lā yɔ̄, ācogwɛ́ɛya ā géē kɛpɔ̄ ɔ́ɔmā ɛ́gɛ́nɛ̄ íne kú um lɛ a. É géē yá odúúdú ucɛ kú ɛ̄gbā ōgbā um eko dóódu ɛ́gɛ́nɛ̄ íne kú uculo ā lɛ ā. É klla géē lɛ ɛ̄cī nɛ̄ n kéē yúklɔ́ ŋ́ mā tū gā um ɛ́gɛ́nɛ̄ n ka ā.

²⁵Ɔ̄cogwɛ́ɛya ā í gáā lɛ abɔ̄ kwu okwū ɔhá dúúmā je īyī nū iyē tēelihɔ ŋ́. Amáŋ ó lɔfú lɛ abɔ̄ kwu okwū kú ɛ́nɛ́ nū ámāŋ ka ádā nū, ayí nū ámāŋ ayínɛ́ nū nɔnyīlɔ ámāŋ ɔyínɛ́ nū nɔ̄nyā dúúmā nɛ̄ é lɛ ɔbá ɛɛ́ ŋ́.

²⁶Eko dúúmā nɛ̄ ɔ̄cogwɛ́ɛya kwú abɔ̄ u kwu okwū ɔhá dúúmā, ó kwu īyī nū iyē ú tēelih. Eko nēé lɛ ɔ́ iyē gwu, ó í gbēyī ɛ̄cī ahāapa gbɔbū ɛ́ɛ́ kóō je yá yéŋéé.

²⁷Gbɔbū ɛ́ɛ́ kóō ga ódúúdɔ̄lɛ́ eyīpú kú Agblīihɔ-nɛ̄hi ā gaá yúklɔ́ kú nū kpɔ́, ó géē gwɛ́ɛya ohígbū ōyá yēŋēē kú nū. Ami, Óndú ā, nōo wɛ Ɔwɔicō ā lɛ ɛlā ka ɛɛ́.”

²⁸“Ami wɛ ukpɛ̄ kú ācogwɛ́ɛya ā á. É kē gáā lɛ agbénú dúúmā ipú ācɛ kú Ísrɛ̄lu gɛ ŋ́. Ami ā wɛ ɔdā dóódu nēé ce ɛgbá á.

²⁹Ɛya kú īkpɔ̄dɛ̄hɔ̄, ɛya nēé ī gwó ohígbū ɔbíipú ā, ɛya nēé ī gwó kéē le cílā ulé ā, géē wɛ ɔdōlé kú ācogwɛ́ɛya á. Ɔdā dúúmā nɛ̄ ācɛ Ísrɛ̄lu í je gā um ā kē í wɛ ákú uwā.

³⁰Ācogwɛ́ɛya ā géē lɛ ɔdɛ̄hɔ̄ kú aflɛ́yí nɛ̄ ācɛ ɔlɛ́ um cē ā mɛ́mla ɔdā dúúmā ɔhá nēé je gwɛ́ɛya gā um ā. Eko dúúmā nɛ̄ ɔ̄cɛ dúúmā yɔ̄ ī yá igbō, ó géē je igbō kú aflɛ́yí ā lɛ ācogwɛ́ɛya kú ɛ̄gbā ōgbā. Cɛ́ɛ́ ká n̄ hɔ́hā cē uwá mɛ́mla ɔlɛ́ uwá.

³¹Ācogwɛ́ɛya ā í gáā lé igbáanɔ ámāŋ ɛbɛ́ dúúmā nōo gekwú abɔ̄yī nū, amáŋ nɛ̄ ɛbɛ́ obɔ̄bí lɛ ɔ́ ŋmó ŋ́.”