Read idoma ISÍKƐ̄LU 45 Bible Online

ISÍKƐ̄LU 45 - idoma bible

ISÍKƐ̄LU 45

¹Óndú ā klla kɛlā gā um gɔbū kpɔ́ kahíníī, “Eko nēé géē kɔ̄ ajɛ ā lɛ ipɔ́ɔma dóódu ā, é géē je āyā kú ajɛ ā éyi tá ajɛ gā um. Īkpō kú ajɛ kú Óndú ā ɔ́ɔmā kē í wɛ ukilómīta igwɛ́ɛpa ce āyā, ɔwá kú nū kē í wɛ ukilómīta igwó. Odúúdú ajɛ ɔ́ɔmā géē wɛ ákú um.

²Ipú ajɛ kú um ɔ́ɔmā, é géē je āyā éyi nɛ̄ abɔ̄ kú nū dóódu géē wɛ umíta ofigwɛ́ɛpa cigwó (250) tá ajɛ kú ō wɛ ɛga nēé ī gwó Agblīihɔ-nɛ̄hi kú Óndú ā. Ajɛ áncā ɔhá géē tá kwú ɔ́ yɛ jīla tá, wó í ɛ umíta ofu cɛ̄hɔ̄

³É géē mīya āyā éyi kú ajɛ ā nɛ̄ ikpó kú nū géē wɛ ukilómīta igwɛ́ɛpa, ɔwá kú nū kē ī wɛ ukilómīta ɛhɔ̄ tá ajɛ nēé géē gwó Agblīihɔ-nɛ̄hi ā, ɛga nɛ̄ ákú Óndú abɔ̄yī nū fíyɛ́ dúú ā, kwu ɔ́.

⁴Abɔ́ɔ ā géē wɛ āyā kú Ɔwɔicō ŋmá ipú ajɛ ā nēé hɛ́tá lɛ ācogwɛ́ɛya nēe gē yúklɔ́ ipú Agblīihɔ-nɛ̄hi kú Óndú ā ā. Abɔ́ɔ ā nēé géē gwó aɔ́lɛ́ uwá mɛ́mla Agblīihɔ-nɛ̄hi ā kwu á.

⁵Āyā kú ajɛ ā ɔhá ā í tá ajɛ lɛ ayí kú Ulífāyi nēe gē yúklɔ́ ipú Agblīihɔ-nɛ̄hi ā. É géē gwó aígelī nɛ̄ŋcɛ́ kú uwá abɔ́ɔ nēé géē lā.

⁶É í mīya ɛga ɔhá kú ajɛ gboce ɛga nōo wɛ ákú Ɔwɔicō ā, nɛ̄ īkpō kú nū wɛ ukilómīta igwɛ́ɛpa, nɛ̄ ɔwá kú nū kē wɛ ukilómīta ɛhɔ̄. Ɛga kú ajɛ ɔ́ɔmā ā nɛ̄ ācɛ Ísrɛ̄lu ohile ā géē lā anú á.

⁷É géē je ajɛ tá ajɛ lɛ ɔcɛ́ nōo í yɔ̄ ī gbāajɛ ā. Ajɛ ā í gbó ɔ́ ŋmá ɛ̄jī ɛnɔ̄ɔ̄nɛ̄ kú ɛga kú Ɔwɔicō ā, ga ɛnɔ̄ɔ̄nɛ̄ gaá kwu ísu kú Umeditarénīya ā. Ó kē ī ŋmá ɛ̄jī ɛnɔ̄ɔ̄cī kú ɛga kú Ɔwɔicō ā gáā kwú ɛ̄jī kú ɛnɔ̄ɔ̄cī kú ajɛ ā. Īkpō kú nū ká ō wɛ ékpónú mɛ́mla ákú ajɛ kú aípɔ́ɔma kú ācɛ Ísrɛ̄lu ā.

⁸Ajɛ nyā géē wɛ ukpɛ̄ kú ajɛ ā nōo í wɛ ákú ɔcɛ́ ipú ajɛ kú Ísrɛ̄lu ā, cɛ́ɛ́ ká ɔcɛ́ ā kóō klla pīya ācɛ ɔlɛ́ um tū gɛ ŋ́. Amáŋ ó ī mā ajɛ ohile ā tá lɛ aípɔ́ɔma kú ācɛ Ísrɛ̄lu ā.”

⁹Óndú ā nōo wɛ Ɔwɔicō ā klla kahíníī, “Aɔ́cɛ́ kú Ísrɛ̄lu, aá bɔ̄bíipú jɛ̄ ɛɛ́. Aá ma abɔ̄ ɔnɔɔtū mɛ́mla opīyatū tá. Aá yá ɔdā nōo wɛ ɔkwɔ̄ɔ̄kwɛ̄yi mɛ́mla okpaakpa ā. Aá klla nū ācɛ ɔlɛ́ um bɛ̄cɛ ŋmá ipú ajɛ kú uwá ā igbɔhá ɛ́ɛ́ gɛ ŋ́. Ami Óndú ā, nōo wɛ Ɔwɔicō ā gē da aá ɛ̄nyā á.

¹⁰Ɔnyɔ̄ɔnyɛ kú aá géē bī ɔdā ole miya ogbɛnú kú odée mɛ́mla okoolo ɔkwɔ̄ɔ̄kwɛ̄yi le mīya ɔdā.

¹¹Okoolo kú umu géē jōnjīlɛ mɛ́mla ɛtɛ́-nɛ̄ŋcɛ́ kú enyi. Ɔdā nɛ̄ aá géē le miya ɔ́ ā í wɛ ógo ocɛyí. Okoolo igwó kú umu ámāŋ ɛtɛ́-nɛ̄ŋcɛ́ kú enyi géē wɛ ógo ocɛyí éyi ā.

¹²Ɔdā nɛ̄ aá ī mīya ogbɛnú kú iyó kú aá mɛ́mla ɔ́lá nū ā bá yɔ̄ á. Ugɛ́rā ofu wɛ usɛ́kɛlu éyi. usɛkɛlu ofɛtá géē wɛ umína éyi.

¹³Ɛ̄nyā ī wɛ ōmiya kú ɔdā nɛ̄ aá géē bī wā í gwɛ́ɛya kú aá á. Éyi ŋmá oōkɔ̄ ɛga ɛhīlī kú okoolo kú umu nɛ̄ aá géē je ŋmá ipú ógo ocɛyí éyi kú umu īkpɔ̄dā nɛ̄ é hī uwíiti mɛ́mla ɛ̄nɛ̄ é hī ubáli ā.

¹⁴Anɔ̄ kú ɔcí nɛ̄ é hī olifu ā, aá géē bī ɔgālā le mīya anú (ɔgālā ā jōnjīlɛ̄ mɛ́mla ógo ocɛyí ā). Ó géē wɛ éyi ŋmá oōkɔ̄ ɛga igwo kú ɛtɛ́-nɛ̄ŋcɛ́ ŋmá ɔgālā éyi. Ɔgālā éyi wɛ ɛtɛ́-nɛ̄ŋcɛ́ igwó, ó kē wɛ ɔdā ékpónú mɛ́mla ógo ocɛyí éyi.

¹⁵Aá géē je álá éyi ŋmá ipú aálá ofigwó dóódu kú ajɛ ácí olɔhi kú Ísrɛ̄lu ā. Aá géē bī ɔdā nyā gwɛ́ɛya kú īkpɔ̄dā ɛhɔ̄, ɛya oyɔlá dúúdú mɛ́mla ɛya ole yá ɛbɔ́. Cɛ́ɛ́ kéē kwú ɔbíipú kú aá í kpó yá aá ɛhi. Ami Óndú ā, nōo wɛ Ɔwɔicō ā le ɔ́da je ɛɛ́.

¹⁶Odúúdú ācɛ Ísrɛ̄lu géē bá ī kpó iyɛ́ya nyā gē lɛ ɔcɛ́ kú Ísrɛ̄lu ā.

¹⁷Ɔcɛ́ ā ī je aíyɛ́ya kú ɛya oyɔlá dúúdú, ɛya kú ikpɔ̄dɛ̄hɔ̄, ɛya kú ejé kwu ɛyí odúúdú ācɛ Ísrɛ̄lu, eko kú ucɛ kú ɔyá ɛ̄yīpɛ̄, ɛ̄cī nɛ̄ gē yúklɔ́ ŋ́ mā mɛ́mla aúcɛ kú uwá ɔhá ā á. Anú géē je aíyɛ́ya nɛ̄ ɔ̄cɛ gē gwó eko nɛ̄ ó lɛ ɔbíipí bī, ɛya kú īkpɔ̄dɛ̄hɔ̄, ɛya oyɔlá dúúdú, mɛ́mla ɛya ole yá ɛbɔ́, kéē kwú ɔbíipú kú ācɛ Ísrɛ̄lu kpó yá uwā ɛhi.”

¹⁸Óndú ā, nōo wɛ Ɔwɔicō ā klla kahíníī, “Ɛ̄cī éyi kú ɔya éyi ā, aá géē bī ɛna nōo lɛ ɛ̄nyā dúúmā ŋ́ mā le gwɛ́ɛya kú aá le gwu Agblīihɔ-nɛ̄hi ā.

¹⁹Ācogwɛ́ɛya ā géē je ōhī kú oyī kú ɛya nēé gwó ohígbū ɔ́bíipú ā le nya aɔ́cí kú odūngwɔ̄wɛ kú okómpinu kú Agblīihɔ-nɛ̄hi ā, ɔ́kíkā ɛnɛ kú ede ā, mɛ́mla aɔ́cí kú odūngwɔ̄wɛ kú okómkpinu nōo yɛ ga ódúúdɔ̄lɛ́ eyīpú kú Agblīihɔ-nɛ̄hi ā.

²⁰Ɛ̄cī ɔ́mahāapa kú ɔya ɔ́ɔmā, aá géē yá ɔdā ékpónú ɔ́ɔmā ohígbū ācɛ nēe géē bɔ̄bíipú nēé jégēdē ŋ́ mā. Ɔwɛ ɛ́gɛ́nyā nɛ̄ aá géē lɛ Agblīihɔ-nɛ̄hi ā tū yēŋēē gā um á.

²¹Ɛ̄cī igwɛ́nɛ kú ɔyā éyi ɔ́ɔmā, aá géē gbo ucɛ kú onyatá ō yá. Ɛ̄cī ahāapa, odúúdú ācɛ géē bá ī lé igbō nōo ī nū ŋ́ mā.

²²Ɛ̄cī éyi kú ucɛ nyā, ɔcɛ́ ā géē je ɛna éyi gwɛ́ɛya ohígbū ɔbíipú nōo bī ā mɛ́mla ákú odúúdú ācɛ Ísrɛ̄lu.

²³Ɛ̄cī dóódu kú ipu ɛ̄cī ahāapa ā, ó géē yɔ̄ ī kpó aɛ́na ahāapa mɛ́mla aómlede ahāapa nēe lɛ ɛnyá ŋ́ gwɛ́ɛya oyɔlá dúúdú lɛ Óndú ā. Ó kē í yɔ̄ ī je opī éyi gwɛ́ɛya ohígbū ɔ́bíipú ɛ̄cī dóódu kú ɛ̄cī ahāapa ā.

²⁴O géē bī okoolo kú īkpɔ̄dɛ̄hɔ̄ mɛ́mla ɛtɛ́-nɛ̄ŋcɛ́ kú anɔ̄ olífu bá ɔbá ɛna éyi dóódu mɛ́mla omlede éyi dóódu nɛ̄ ó géē yɔ̄ ī gwɛ́ɛya lɛ Óndú ā.

²⁵Ucɛ kú Aáklɔkpɛ ā gē gbɔɔ́ ɛ̄cī igwɛ́ɛhɔ̄ kú ɔyā ɔ́mahāapa ā. Ɔcɛ́ ā gē kpó aíyɛ́ɛya ékpónú ɔ́ɔmā kú ɛya nēé ī gwó ohígbū ɔ́bíipú, ɛya oyɔlá dúúdú, ɛya kú īkpɔ̄dɛ̄hɔ̄ mɛ́mla ákú anɔ̄ olífu ā le gwɛ́ɛya ɛ̄cī dóódu kú ipú ɛ̄cī ahāapa kú ucɛ ā.”