Read idoma ISÍKƐ̄LU 46 Bible Online

ISÍKƐ̄LU 46 - idoma bible

ISÍKƐ̄LU 46

¹Óndú ā, nōo wɛ Ɔwɔicō ā klla kɛlā gɔbū. Ó kahíníī, “Ɔwɛ kú ɛnɔ̄ɔ̄cī nōo yɛ ga ódúúdɔ̄lɛ́ eyīpú kú Agblīihɔ-nɛ̄hi ā géē wɛ ōgwū ɛ̄cī ɛhīlī kú ipú aláadi nēé gē yúklɔ́ ā. Amáŋ é géē nwūla anú ɛ̄cī nēé gē yúklɔ́ ŋ́ mā mɛ́mla ɛ̄cī kú ucɛ kú ɔyá ɛ̄yīpɛ̄ ā.

²Ɔcɛ́ ā géē ŋmá ódúúdɔ̄lɛ́ eyīyɛ̄cɛ ga ipínu nɛ̄ kwu okómpinu nōo yɛ ga ódúúdɔ̄lɛ́ eyīpú ā. Ó í háyi pi odūngwɔ̄wɛ kú okómpinu ā eko nɛ̄ ɔ̄cogwɛ́ɛya ā géē yɔ̄ ī gwɛ́ɛya ōpá ɔlá dúúdú, mɛ́mla ɛya ole yá ɛbɔ́ ā. Okómpinu abɔ́ɔ ā, ó géē gbɛ̄ɛ̄gbā lɛ Óndú ā klla í kwúcē ga ɛcɛ. Amáŋ é gáā gwū ɔwɛ ā ŋ́ jāā gbó ɔ̄nɔ̄ɔ̄nɛ̄.

³Ɛ̄cī nēé cíkā ō yúklɔ́ ŋ́ mā mɛ́mla eko kú ucɛ ɔyā ɛ̄yīpɛ̄ ā dóódu, odúúdú ācɛ ā géē wā í jīla iyɔ̄bū okómpinu ɔ́ɔmā géē tū kpɛɛ́ klla í gbā Óndú ā ɛ̄gbā abɔ́ɔ.

⁴Ɛ̄cī nēé cíkā ō yúklɔ́ ŋ́ mā dóódu, ɔcɛ́ ā géē bī ayí álá ɛhīlī mɛ́mla omlede éyi, nēé lɛ ɛnyá dúúmā ŋ́ mā, wā í gwɛ́ɛya ōyɔlá dúúdú lɛ Óndú ā.

⁵Ó klá í bī okoolo éyi kú īkpɔ̄dɛ̄hɔ̄ mɛ́mla ɔjá nɛ̄ŋcɛ́ blla omlede dóódu. Ó kē í bī ɔdā dúúmā ɔhá nɛ̄ ohe ɔ́ ɔtū blla álá dóódu wā.

⁶Eko kú ucɛ kú ɔyā ɛ̄yīpɛ̄ ā ó géē kpó ɔbá ɛna éyi, omlede éyi, mɛ́mla aálá ɛhīlī nēe lɛ ɛnyá dúúmā ŋ́ mā, gáā gwɛ́ɛya.

⁷Ó géē bī okoolo éyi kú īkpɔ̄dɛ̄hɔ̄ le blla ɛna mɛ́mla omlede dóódu ā. Ó í bī ɔdā ɔhá dúúmā nōo he ɔ́ ɔtū blla ɔyí álá dóódu ā. Ó géē bī ɔjá nɛ̄ŋcɛ́ kú anɔ̄ olífu le gwɛ́ɛya mɛ́mla īkpɔ̄dɛ̄hɔ̄ ā.

⁸Ɔcɛ́ ā í nyɛ̄ɛ̄ ŋmá ipú inu nōo kwu okómpinu nōo yɛ ga ódúúdɔ̄lɛ́ eyīpú ā ga eyīyɛ̄cɛ ɔwɛ ékpónú nɛ̄ ó bū wā inu ā.

⁹Eko nɛ̄ ācɛ ā wā gáā gbā um ɛ̄gbā eko kú ucɛ dóódu ā, ācɛ nēe bēé wā ipú Agblīihɔ-nɛ̄hi ā bū okómpinu kú ɛhícō ā, í nyɛ̄ ŋmá ipú Agblīihɔ-nɛ̄hi ā bū okómpinu kú ɛháajɛ ā. Ācɛ nēe bēé bū okómpinu kú ɛháajɛ ā géē nyɛ̄ɛ̄ bɛ̄cɛ bū okómpinu kú ɛhícō ā. Ɔ̄cɛ dúúmā í gáā bū ɔwɛ ékpónú wā Agblīihɔ-nɛ̄hi ā, klla bū ɔwɛ ɔ́ɔmā piíí ā ga ɛcɛ ŋ́. Ɔ́dāŋ́ ka é le bū éyi wā inu nɛɛ, é géē bū ɔhá ā ga ɛcɛ.

¹⁰Eko dúúmā nɛ̄ ācɛ ā géē wā ipú Agblīihɔ-nɛ̄hi, nɛ̄ ɔcɛ́ ā géē wā dúú ā. Ó kē ī nyɛ̄ɛ̄ eko nɛ̄ ācɛ ā géē nyɛ̄ɛ̄ ŋmá ipú Agblīihɔ-nɛ̄hi ā.

¹¹Eko kú aúcɛ mɛ́mla aɛ́cī kú aójīleyī ā, ɛya kú īkpɔ̄dɛ̄hɔ̄ ā géē wɛ okoolo éyi blla ɛna éyi, ámāŋ omlede éyi dóódu. Ɔdā dúú nɛ̄ ɔ̄cɛ nōo gwɛ́ɛya ā bī glá ā nɛ̄ ó géē bī blla ayí álá kú ɛya ā á. É géē bī ɔjá nɛ̄ŋcɛ́ kú anɔ̄ olífu blla okoolo éyi kú īkpɔ̄dɛ̄hɔ̄ kú ɛya ā.

¹²Eko dúúmā nɛ̄ ɔcɛ́ ā tíne ō gwɛ́ɛya kú ɔtū kú nū abɔ̄yī nū lɛ Óndú ā, kwu ɛya oyɔlá dúúdú mɛ́mla ɛya ole yá ɛbɔ́, é géē nwūla okómpinu kú ɛnɔ̄ɔ̄cī nōo yɛ ga ódúúdɔ̄lɛ́ eyīpú ā lɛ ɔ́. Ó í gwɛ́ɛya ɔ́ɔmā ɔwɛ ékpónú nōo gē bī gwɛ́ɛya ɛ̄cī nɛ̄ n kéē yúklɔ́ ŋ́ mā. É í je okómpinu kú ɛnɔ̄ɔ̄cī ā gwū eko dúúmā nōo kwucē le tɛ́ɛcɛ.”

¹³Óndú ā klla kahíníī, “Ɔ̄cɔ̄ɔ̄cī dóódu é géē je ɔyí álá kú iháyí éyi nɛ̄ ó lɛ ɛnyá dúúmā ŋ́ gwɛ́ɛya ōyɔlá dúúdú lɛ Óndú ā. É géē gwɛ́ɛya ɔ́ɔmā piíí ɛ̄cī dóódu.

¹⁴É géē lɛ āyā éyi ŋmá oōkɔ̄ ɛga ɛhīlī kú okoolo éyi kú umu gwɛ́ɛya ɔ̄cɔ̄ɔ̄cī dóódu. É géē wīya umu ā tɔ̄há mɛ́mla ɛga éyi ŋmá oōkɔ̄ ɛga ɛtá kú ɔjá nɛ̄ŋcɛ́ kú anɔ̄ olífu. Íne kú ɛya kú īkpɔ̄dɛ̄hɔ̄ lɛ Óndú ā nyā géē yɔ̄ piyóó.

¹⁵É géē bī ɔyí álá, umu mɛ́mla anɔ̄ olífu ā le gwɛ́ɛya lɛ Óndú ā ɔ̄cɔ̄ɔ̄cī dóódu piyóó.”

¹⁶Óndú ā, nōo wɛ Ɔwɔicō ā klla kɛlā gɔbū kpɔ́. Ó kahíníī “Ɔ́dāŋ́ ka ɔcɛ́ ā kwú āyā kú ajɛ kú nū dúúmā ú yá ɔyí nū nɔ̄nyīlɔ dúúmā ɛhi. Ajɛ ɔ́ɔmā gē wɛ ákú ɔyí nū ɔ́ɔmā gbógbóó ipú agbénú kú ipɔ́ɔnū ɔlɛ́ ɔcɛ́ ā.

¹⁷Amáŋ ɔ́dāŋ ka ɔcɛ́ ā kwú ajɛ dúúmā ú lɛ ɔ̄cɛ nōo ī cɛ̄ ɔ̄ ɛhɔ̄, ajɛ ā klla í je pīya ákú ɔcɛ́ ā kpɔ́, eko nɛ̄ iháyí kú ohīla kú ajɛ ā gā ā. Ɔcɛ́ ā mɛ́mla ayí nū ā nɛ̄ ajɛ kú ɔlɛ́ ɔcɛ́ ā géē wɛ ákú uwá piyóó á.

¹⁸Ɔcɛ́ dúúmā í gáā mīyɛ ajɛ ákú ɔ̄cɛ ɔhá dúúmā ŋ́. Ajɛ nɛ̄ ó géē je lɛ ayí nū nɔ̄nyīlɔ ā gēe ŋmá ipú ukpɛ kú ajɛ kú nū nēé miya lɛ ɔ́ ā. Cɛ́ɛ́ ká o híī pīya ɔ̄cɛ dúúmā kú ācɛ ɔlɛ́ um tū oŋmá lɛ omīyɛ uwā ajɛ ŋ́.

¹⁹Anɔ́ɔ ɔ̄cɛ nōo húmáyī bī um yɛ ā lɛ um bī ga ɔwɛ nōo yɛ ga aínu nēe pīyeyī kwu ɛhícō, kwu okómpinu kú ɛháajɛ kú ódúúdɔ̄lɛ́ eyīpú ā ajaajɛ ā. Aínu ɔ́ɔmā wɛ inu ōtīhɔ kú ācogwɛ́ɛya ā. Ó lɛ abɔ̄ mīya kwú ɛga éyi ɛnɔ̄ɔ̄nɛ̄ kú aínu ā.

²⁰Anɔ́ɔ ó da um kahíníī, “Amānyā ā nɛ̄ ācogwɛ́ɛya ā géē lɛ ɛbɛ kú ɛya nēé gwó ohígbū ɔ́bíipú ā mɛ́mla ɛ̄nɛ̄ é ī le cílā ulé ā ce ɔlá á. Amānyā nēé géē yá igbō kú umu kú ɛya ā dúú á. Cɛ́ɛ́ ká ē hii bī ɔdā otīihɔ kú ɛya ā dúúmā ga ódúúdɔ̄lɛ́ eyīyɛ̄cɛ ŋ́ ohígbū nēé í kpó ɛbí tū ācɛ ā.”

²¹Anɔ́ɔ ó lɛ um bī ga ódúúdɔ̄lɛ́ eyīyɛ̄cɛ ā á. Ó lɛ um bī yɛ ga aɔ́kíkā ɛnɛ kú ódúúdɔ̄lɛ́ ā, anɔ́ɔ n má ka ódúúdɔ̄lɛ́ nɛ̄ŋcɛ́ ɔhá yɔ̄ ɔ́kíkā dóódu ā.

²²N má ka īkpō kú ódúúdɔ̄lɛ́ nɛ̄ŋcɛ́ ā wɛ umíta ofu, ɔwá kú nū kē wɛ umíta ɛhɔ̄. Ɔ́kika ɛnɛ ā jōnjīlɛ̄.

²³Éyééye kú uwá a lɛ ɔdɔ yɛ ipú nū jīla tá. É kē lɛ ɛga ogwɔ́lá kú nū gwó kwu ɛháajɛ ɔdɔ ā biílí.

²⁴Anɔ́ɔ ɔ̄cɛ ā da um ka, aínu ɔ́ɔmā wɛ ɛga ō yá ɔdōlé nɛ̄ ācɛ nēe ī yúklɔ́ ipú Agblīihɔ-nɛ̄hi ā í lɛ ɛbɛ́ kú ɛya nɛ̄ ācɛ gē wā í gwó ā ce ɔlá.