Read idoma ISÍKƐ̄LU 47 Bible Online

ISÍKƐ̄LU 47 - idoma bible

ISÍKƐ̄LU 47

¹Anɔ́ɔ ɔ̄cɛ nōo húmáyí bī um jé ɔwɛ ā lɛ um bī kwúcē ga Okómpinu kú Agblīihɔ-nɛ̄hi ā. Ɔkpá éyi yɔ̄ ī pɛ́ wɛ̄ɛcɛ ŋmá ɛháajɛ kú nū ā ga ɛnɔ̄ɔ̄cī ɛga nɛ̄ Agblīihɔ-nɛ̄hi ā pīyeyī kwú ā. Éŋkpɔ̄ ā yɔ̄ ī pɛ́ ŋmá ɛháajɛ kú āyā ɛháajɛ kú Agblīihɔ-nɛ̄hi ā bū ɛháajɛ kú ede ā.

²Anɔ́ɔ ɔ̄cɛ ā lɛ um bī ŋmá abɔ́ɔ bū ɔwɛ kú ɛhícō ā biílí ga okómpinu nōo pīyeyī kwu ɛnɔ̄ɔ̄cī ā. N má ɔ̄ abɔ̄ éŋkpɔ̄ ā yɔ̄ ī pɛ́ wɛ̄ɛcɛ wulɛ́wulɛ́ bū āyā ɛháajɛ kú okómpinu ā.

³Anɔ́ɔ ɔ̄cɛ ā kwú ɔcí omīya ajɛ kú nū ā ú lɛ umíta ulā ce ofɛhɔ̄ (500) mīya lɛyíkwu ɛnɔ̄ɔ̄cī ā. Ó lɛ um bī bū ipú ɔkpá ā abɔ́ɔ. Éŋkpɔ̄ ā kwú um oŋmíkpālī.

⁴Ó lɛ umíta úla ce ofɛhɔ̄ (500) ɔhá mīya gɔbū, anɔ́ɔ éŋkpɔ̄ ā gáā kwú um okwúukwu á. Ó klla lɛ umíta úlā ce ofɛhɔ̄ (500) ɔhá miya gɔbū kpɔ́, éŋkpɔ̄ ā gáā kwú um ohí.

⁵Ó lɛ umíta úlā ce ofɛhɔ̄ (500) ɔhá mīya gɔbū, anɔ́ɔ éŋkpɔ̄ ā kwú lipú nɛ̄hi nɛ̄ n yāwu ipú nū glá gɛ ŋ́ má. Ó le lipú fíyɛ́ ɔdā nɛ̄ ɔ̄cɛ í yāwu anú glá, ayíka ó tágwā bū ɔ̄ mɛ́ɛ́nɛ.

⁶Anɔ́ɔ ɔ̄cɛ ā da um kahíníī, “Ɔlɛcɛ, bī ɔdā nāa má nyā ɔtū lɔɔlɔhi.” Anɔ́ɔ ɔ̄cɛ ā lɛ um bī kwucē ga okónu ísu ā á.

⁷Eko nɛ̄ n le tá abɔ́ɔ ā, n má aɔ́cí alɛwa kwu abɔ́ɔ, okónu ísu ā abɔ̄ ɛplɛ́ɛ́pa.

⁸Anɔ́ɔ ó da um kahíníī, “Éŋkpɔ̄ kú ísu nyā gē pɛ́ lɛyíkwu ajɛ kú ɛnɔ̄ɔ̄cī, gaá bū ɔpɛ́ kú ísu kú Ujɔ́dan ga ísu nɛ̄hi kú ɔmā ā. Eko dúúmā nɛ̄ ó le pɛ́ ga ísu nɛ̄hi ɔ́ɔmā, ó í je ɔmā kú ísu nɛ̄hi kú ɔmā ɔ́ɔmā na ŋmá anú klla je éŋkpɔ̄ kú nū yá lɔhi.

⁹Ɛga dúúmā nɛ̄ éŋkpɔ̄ kú ísu nyā gē pɛ́ nyɔ̄ ā, ɛdɔ ɛbɛ́ éŋkpɔ̄ alɛwa mɛ́mla ɛbéenyi dúúmā géē lɛ oyēeyī. Ohígbū ka éŋkpɔ̄ kú ísu nyā í nyɔ̄ í je éŋkpɔ̄ kú ísu nɛ̄hi kú ɔmā ā yá lɔhi. Ɛga dúúmā nōo gē pɛ́ nyɔ̄ ā, ó gē bī oyēeyī gé lɛ ɔdā dúúmā nēe yá abɔ́ɔ.

¹⁰Oŋmá áyɔ́kpá kú Éngēdi jāā ga áyɔ́kpá kú Enegléyim ā, ācokwɛ́bényi gē bá okónu ísu nɛ̄hi ā. É í nā ɛ́yá kú uwá daa klla ɛcɛ ká ō ŋmó. Ɛdɔ ɛbéenyi alɛwa gē bá abɔ́ɔ bɛ̄ɛka ákú ísu nɛ̄hi kú Umeditarénīya ā.

¹¹Amáŋ éŋkpɔ̄ kú nū nōo hɛ́tá kweé kweé okónū nū ā í gáā je lɔhi ŋ́. Aɔ́ɔmā gē bá abɔ́ɔ, cɛ́ɛ́ ká ē wɛ ɛga nēé ī bu ɔmā ŋmá.

¹²Abɔ̄ ɛplɛ́ɛpa kú okónu ísu ā aɔ́cí ɛdɔ alɛwa nēé gē lé géē bá ī jɛ̄. Ēpū kú uwā í gáā ŋmó ŋ́, é géē bá ī gwá īkpō kú uwá eko dóódu. É gē bá ī gwá īkpō ɛ̄yīpɛ̄ ɔyā dóódu ohígbū ka éŋkpɔ̄ nōo gē pɛ́ ŋmá Agblīihɔ-nɛ̄hi ā gē pɛ́ tū uwā. Ācɛ gē lé aíkpō kú aɔ́cí ā, klla í bī ēpū kú aɔ́cí ā le tū ɛcí lɛ ācɛ ká ō hɛ́ uwā tá ŋmá ōcē kú uwá.”

¹³Óndú ā, nōo wɛ Ɔwɔicō ā klla kɛlā gā um gɔbū kpɔ́. Ó kahíníī, “Aɛ́jī kú ajɛ nēé géē kɔ̄ lɛ aípɔ́ɔma igwɛ́ɛpa kú Ísrɛ̄lu ā bá yɔ̄ á. Ipɔ́ɔma kú Ujófɛ̄fu géē lɛ āyā ɛpa.

¹⁴N tɛtɛ lɛ okónu ce lɛ ɔkpá gwá lɛ aádáádā aá ka n géē je ajɛ ā lɛ uwá. Abālɔbányā ā, aá lɛ ajɛ ā kɔ̄ lɛ īyī aá jōonjīlɛ̄ ká ō wɛ ɔdā úgwū kú uwá.

¹⁵Ɛjī kú ajɛ ā ɛhícō ā yɛ lɛyíkwú ɛnɔ̄ɔ̄cī ŋmá ɛgiyí ísu nɛ̄hi kú Umeditarénīya ā ga igelī nēé hī ka Uhɛ́tlɔn, ga okónɔɔwɛ kú Uhamáti, klla ga igelī nēé hī ka Usédadi.

¹⁶Ó ŋmá abɔ́ɔ ga aígelī nɛ̄hi nēé hī ka Ubɛrótaa mɛ́mla Usibréyim nēe bá ɛjī kú ajɛ kú ajɔ̄ɔ̄cɛ́ kú Udamáskúsi mɛ́mla ajɔ̄ɔ̄cɛ́ kú Uhamáti. Ó ŋmá abɔ́ɔ jāā ga igelī nēé hī ka Utíkɔn nōo kwu ɛjī kú ajɔ̄ɔ̄cɛ́ kú Uháwuran ā.

¹⁷Ɛ́gɔ́ɔ́ɔmā nɛ̄ ɛjī kú ɛhícō ā géē gbɔɔ́ ŋmá ísu nɛ̄hi kú Umeditarénīya lɛyíkwu ɛnɔ̄ɔ̄nɛ̄ jāā ga igelī nēé hī ka Énɔn nōo tū ɛjī mɛ́mla Udamáskúsi klla mɛ́mla Uhamáti ga ɛhícō kú nū ā.

¹⁸Ɛjī kú ɛnɔ̄ɔ̄cī ā gē gbɔɔ́ ŋmá ɛjī kú ajɛ kú Udamáskúsi mɛ́mla Uháwuran gaá kwu ɛjī kú ísu kú Ujɔ́dan ā, nōo wɛ ɛjī ɔtāhɛ̄ kú ajɛ kú Ísrɛ̄lu nōo yɔ̄ ɛnɔ̄ɔ̄nɛ̄ ā mɛ́mla Ugílɛ̄di nōo yɔ̄ ɛnɔ̄ɔ̄cī ā. Ó géē tá jāā gáā kwu Utáma ɛgiyí ísu kú ɔmā ā.

¹⁹Ɛjī kú ɛháajɛ ā géē gbɔɔ́ ŋmá Utáma jāā ga ɛga aɔ́kpá kú Ukadesi, klla ga ɛgiyí ɛjī ajɛ kú Íjīpiti mɛ́mla ísu nɛ̄hi kú Umeditarénīya ā.

²⁰Ɛjī kú ɛnɔ̄ɔ̄nɛ̄ ā géē wɛ ísu nɛ̄hi kú Umeditarénīya ga ɛhícō jāā ga ɛga nɛ̄ ɔwɛ ō yɛ ga Uhamáti gáā bū ā.

²¹Aá lɛ ajɛ nyā kɔ̄ lɛ īyī aá ɛ́gɛ́nɛ̄ aípɔ́ɔma kú aá lɛ ā.

²²Ó géē wɛ ɔdūúgwū kú aá piyóó. Ācɛ aéwɔhá nēe lā ipú aá, lɛ ayí ma ipú aá ā géē lɛ ukpɛ̄ ákú uwā ipú ajɛ ā eko nāa géē kɔ̄ ajɛ ā dúú. Aá géē yá uwá bɛ̄ɛka ācɛ kú Ísrɛ̄lu abɔ̄yī nū ā. Uwá klla í tá ūlī ká ē je ajɛ kú uwā lɛ uwá mɛ́mla aípɔ́ɔma kú Ísrɛ̄lu ā dúú.

²³Éwɔhá dúúmā nōo lā ipɔ́ɔma dúúmā, géē mīyɛ ukpɛ̄ kú ajɛ kú nū mɛ́mla ācɛ ipɔ́ɔma nɛ̄ ó lā mɛ́mla uwā ā. Ami, Óndú ā, nōo wɛ Ɔwɔicō ā le ka ɛɛ́.”