Read idoma ISÍKƐ̄LU 5 Bible Online

ISÍKƐ̄LU 5 - idoma bible

ISÍKƐ̄LU 5

¹Óndú ā da um kahíníī, “Ɔlɛcɛ, kwu ɔkpacaŋ́gelī ō lulé éyi ú ka á lɛ īnyīlɛ̄yí kú uwɔ mɛ́mla ɔnwāgba kú uwɔ plá. Kwú īnyīlɛ̄yí mɛ́mla ɔnwū ɔ́ɔma í ce ɔdā ole mīya ɔdā ká a lɛ ɔ́ miya, cɛ́ɛ́ a lɛ ɔ́ kɔ̄ ɛga ɛtá.

²Eko nɛ̄ ɛcí kú íbɔm nāa cē tū Ujerúsālɛm ā mɛ, kwú āyā éyi kú īnyīlɛ̄yí mɛ́mla ɔnwū ɔ́ɔmá ú ka á kwú ɔ́ u yɔɔlá ipú igelī ā. Kwú āyā ɔhá ú ka a lɛ ɔ́ hɛ́ kpɛɛ́kpɛɛ́ mla ɔkpacaŋ́gelī abɔ̄ a géē yɔ̄ ī yɛ gicō gajɛ eyīyɛcɛ kú igelī ā. Kwú āyā ɔ́mɛtá ā ú kpó tá gico ɛbɛɛbɛ kú owu kóō kpó uwā. N kē í nū uwá inya mla ɔkpacaŋ́gelī abɔ̄yī um.

³Amáŋ kwú ōhī kú īnyīlɛyí mɛ́mla ɔnwū ā ú kpó tayínū ipú ābɔ̄ īlī kú uwɔ.

⁴Klla kwú olígíí ú ŋmá ipú aɛ́nɛ̄ a kpó tū ābɔ̄ īlī ɔ́ɔmā ú ká ā kwú ɔ́ ú kpó tū ɔlá ká ō kwú yɔlá. Ɔlá ā gē nyīla ŋmá ɛgiyī aɔ́ɔmā klá odúúdú Ísrɛ̄lu.

⁵Anɔ́ɔ Óndú ā nōo wɛ Ɔwɔicō ā kahíníī, “Má ɔ̄, n kwú Ujerúsālɛm í kwu ɔtāhɛ̄ kú odúúdú ɛcɛ nɛ̄ aéwo ɔhá dúúdú yɛ ɔ́ jīla tá.

⁶Amáŋ ó le īkpɛ̄yí olɔfú yá tá um. Ó klla le mafú ka anúɔ bɔ̄bíipú, í klla lɛyítáajɛ lɛ íne kú um ŋ́ fíyɛ́ odúúdú aéwo nēe yɛ ɔ́ jīla tá ā. Ó tá íne kú um, í klla yɛce ɔ́da kú um ŋ́.

⁷Ohígbū ɔ́ɔmā, ācɛ Ujerúsālɛm, aá pó ɛlā nɛ̄ ami nōo wɛ Óndú ā nōo lɔfú fíyɛ́ dúú ā kaā. Aá je unwalu mla ákanya gā um fíyɛ́ odúúdú aéwo ɔhá nēe yɛ aá jīla tá á, ohígbū ka aá tá ō lɛyítáajɛ lɛ íne kú um mɛ́mla ō le ɔ́da kú um. Aá klla bá ī yá ucē kú aéwɔhá ā.

⁸Ohígbū ɔ́ɔma, ācɛ Ujerúsālɛm, ami abɔ̄yī um nōo wɛ Óndú ā nōo lɔfú fíyɛ́ dúú ā lɛ ɛyí bú kwu aá. N géē kɛpɔ̄ tū aá í yá aá ōwē ipēyī aéwɔhá ā.

⁹Ohígbū odúúdú ɔdōbɔ̄bí nɛ̄hi nɛ̄ aá yá nōo ī wu um ɔtū ā, n géē yá aá ōwē ɛ́gɛ́nɛ̄ n yá aá jéjée ɛ́ɛ́ ŋ́, nɛ̄ n kē gáā yá aá gbóógbóō ɔhá gɛ ŋ́ má.

¹⁰Ohígbū ɔ́ɔmā, ipú aá a aádā géē lé ɛbɛ́ ayí uwā, ayí kē í lé ɛbɛ́ aádā uwá. N géē kɛpɔ̄ tū aá, í yá aá ōwē klla í je ācɛ ɔlɛ́ aá nēe hile ā pahīla ga ɛbɛɛbɛ.

¹¹Aá lɛ Agblīihɔ-nɛ̄hi kú um tēelihɔ mla ɔdā īcīci mɛ́mla ucē obɔ̄bí kú aá. Ohígbū ɔ́ɔmā, ɛ́gɛ́nɛ̄ ami nōo wɛ Óndú ā nōo lɔfú fíyɛ́ dúú ā yēeyī lɛ ā, n géē ŋmó aá bónū. N kē gáā ményinyi aá ŋ́.

¹²Ōcē obɔ̄bí mɛ́mla ɔkpɛtá géē ŋmó āyā éyi ŋmá ipú ɛtá kú aá ipú igelī ā. É géē bī ɔkpacańgelī le ŋmó āyā ɔ́mpa kú aá eyīyɛcɛ kú ipú igelī ā. Āyā ɔ́mɛtá kú aá ā, n gē kpó uwā patūla ga ɛbɛɛbɛ klla í bī ɔkpacaŋ́gelī nū uwá inya.

¹³N géē yá aá ōwē ohígbū ka n yɔ̄ ī cɔ̄nū tū aá jāā gbéeko nɛ̄ n lɛ aá gwó ɔcí. Cɛ́ɛ́ eko ɔ́ɔmā aá le jé ka ami, nɔ́ɔ wɛ Óndú ā, ɔ́ɔ le cɔ̄nū mla aá.

¹⁴N géē je ɔlɛ́ aá pīya alácɛ̄ nɛ̄ ācɛ aéwɔhá nēe yɛ aá jīla tá ā mɛ́mla ācɛ nēe í wā í yɛ ɔwɛ pi aá ā géē bá ī yá aá okónu.

¹⁵Eko nɛ̄ n géē cɔ̄nū tū aá, í yá aá ōwē āa, aéwɔhá ā, í má ɔ̄, ufi nɛ̄hi géē kwú uwā. Ɔ́ɔmā kē ī nwū uwā ɛlā. Eko ɔ́ɔmā, uwēyī géē kwú aá, aéwɔhá ā kē í yá aá ɛbɛ́. Ami, Óndú ā le ka ɛɛ́.

¹⁶“N géē tū ɔkpɛtā klá aá nōo í kpó aá yíífi. Ɛ́gɛ́nɛ̄ ɔyī géē lɔnɔ tū ɔ̄cɛ iyē ā, ɛ́gɔ́ɔmā nɛ̄ ɛmiyɛ géē ŋmó aá á. N kē gáā je ɔdōlé lɛ aá ŋ́.

¹⁷N géē tū ɔkpɛtā mla Aɛ́bɛ́ ipácí klá aá, nēe í kpó ayí aá ŋmó ŋmá aá abɔ̄. Ōcē obɔ̄bí géē kwú aá, ɛfú kē í lé aá. Ami, Óndú ā le ka ɛɛ́.”