Read idoma ISÍKƐ̄LU 7 Bible Online

ISÍKƐ̄LU 7 - idoma bible

ISÍKƐ̄LU 7

¹Igbɔhá Óndú ā da um ka,

²“Ɔlɛcɛ, ɔdā nɛ̄ ami Óndú ā nōo lɔfú fíyɛ́ dúú ā gē ka lɛ ācɛ ajɛ kú Ísrɛ̄lu ā wɛ ka oŋmɛ́yí kú odúúdú ajɛ ɔlɛ́ uwā gā ɛɛ́.

³Da uwá ka oŋmɛ́yí kú uwā gā ɛɛ́. Ká n̄ géē bī íwɔ́tū kú um le yá uwā ɛlā nɛ̄hi. Ká n̄ klla géē kɛpɔ̄ tū aá ohígbū ɔdā nɛ̄ aá yá ā. N géē cíla aá ulé kú ucē ɛbí kú aá.

⁴N gáā habɔ̄ aá tá, ɛ́ɛ́ nɛ̄ n ge ményinyi aá ŋ. N géē je ōwē kú ɔdā ɛbí nɛ̄ aá yá ā lɛ aá. Cɛ́ɛ́ ka aá le jé ka ami ɔ́ɔ́ wɛ Óndú ā á.”

⁵Óndú ā nōo lɔfú fíyɛ́ dúú ā klla kahíníī, “Ífi alɛwa géē yá aá ce ɔhɔ́ɔ́há.

⁶Eko nēé gáā je aá yíífi ā ga ɛɛ́. Ákú aá mɛ ɛɛ́.

⁷Ācɛ Ísrɛ̄lu, aá nēe lā ipú ajɛ kú ɔlɛ́ aá ā, ɛ̄cī nēé í kpó aá ŋmó ā gē wā ɛɛ́. Eko le bá nɛ̄ aá klla gáā bá i yá ucɛ gē tɔ́ɔga ɛyí aɛ́fú ā gɛ ŋ́. Amáŋ aá géē bá ī dɛ̄ íbá ipú ígbáji.

⁸Eko kpií nōo gē wā a, n géē cɛ̄ lɛ aá jé ɔnɔ nɛ̄hi ohígbū ka aá lɛ um yá cɔ̄nū. N géē kɛpɔ̄ kú ɔdā nɛ̄ aá yá ā tū aá. N klla í cílá aá ulé kú ucē ɛbí nɛ̄hi nɛ̄ aá yá ā.

⁹Ń gáā habɔ̄ aá tá ɛ́ɛ́ nɛ̄ n gē má eyīnyinyi aá ŋ́. N géē yá aá italā kú ucē ɛbí nɛ̄hi nɛ̄ aá yá ā, cɛ́ɛ́ kú aá le jé ka ami ɔ́ɔ́ wɛ Óndú ā nɔ́ɔ yá aá italā nyā lɛ ā á.

¹⁰Ɛ̄cī nɛ̄ ámíyā géē yá ācɛ Ísrɛ̄lu ī wā ɛɛ́. Ācɛ ā bá ī lɔnɔ ɔtū lɛ ɔ́mpā uwā ɛbɛɛbɛ. Ɔbɔ́ɔ̄cɛ kú uwā kē le fíyɛ́ abɔ̄.

¹¹Ɔnɔɔtū nēé bá ī yá ā cɛ̄ lɛ ucē ɔ́bíipú ā nyíla tū ipú ajɛ ā. Ɔdā dúúmā í gáā hile lɛ uwá ŋ́. Kwu agbénú, mɛ́mla ɛgahi kú uwá dúúmā í gáā hile ŋ́.

¹²Eko gē wā, ɛ̄cī ā le bá ɛɛ́, nɛ̄ ɔlá ō je lá, mla ɔlá ō lá í gáā lɛɛyí ɛga dúúmā gɛ ŋ́, ohígbū ka Óndú ā géē cɔ̄nū tū odúúdú ācɛ ā klla í yá italā ɔwɛ ékpónú.

¹³Ɔ̄cotɔ́sú dúúmā í gáā yēeyī nōo géē kwúcē ga ɛga nɛ̄ ɔ́sú cē ɔ̄ tū ɔ ā ɛ́ɛ́ gɛ ŋ́, ohígbū ka Óndú ā yɔ̄ ī cɔ̄nū mla odúúdú ācɛ ā. Ɔ̄cɛ dóódu nōo ī yá ɔdōbɔ̄bí ā í gáā hile ŋ́.

¹⁴É lɛ opo tá ɛɛ́, odúúdú ācɛ kē kwú tútū. Amáŋ ɔ̄cɛ dúúmā í gáā ga ɔnɛ̄fú glá ŋ́, ohígbū ka íwɔ́tū mla ɔnū kú Óndú ā klá ācɛ dóódu bá ajɛ.

¹⁵Ɛfú yɔ̄ ī kpó eyīyɛcɛ kú igelī, ɔkpɛtá mɛ́mla ōcē obɔ̄bí kē bá ī ŋmó ācɛ ipú igelī ā. Ɔ̄cɛ dúúmā nōo yɔ̄ eyīyɛcɛ ipú ɛhɔ̄, ɛfú géē je ɔ́ lé. Ɔ̄cɛ dúúmā nōo yɔ̄ ipú igelī ā, ɔkpɛtá mɛ́mla ōcē obɔ̄bí géē je ɔ́ɔ ŋmó.

¹⁶Ācɛ ōhī géē kwu ga ɛyí ɛfu bɛ̄ɛka okóhō nōo yúufi kwu ŋmá ɔpɛ́ ga ɛfu ā. Odúúdú uwā géē jikwū ohígbū ɔ́bíipú kú uwá ā piíí.

¹⁷Abɔ̄ kú odúúdú ācɛ géē je ŋmó tí iyē, okwúukwu kú uwá klla í yɔ̄ ī fíyégbúlú.

¹⁸É géē kpó īlī ekwu wu iyē klla ī bá ī fīyégbúlú ŋmá icō wā ajɛ. É géē Plla ɛyí, uwēyī géē kwú odúúdú uwá.

¹⁹É kpó Ugóolu mɛ́mla ije nɛ̄hɛ́ kú uwá ā bónū úláyi bɛ̄ɛka īmū ā. Ugóolu mɛ́mla ije nɛ̄hɛ́ mla odúúdú agbénú kú uwá a í gáā hɛ́ uwá tá glá ŋ́, eko nɛ̄ Óndú ā géē bī ícɔnū nɛhi kú nū ā le yá uwā italā ā ŋ. É gáā bī ije a ŋmlá ɛgbá kú uwá dúúmā glá, ɛɛ nēé ge lé ɔ́ nū ipú glá ŋ́. Ugóolu mɛ́mla ije nɛ̄hɛ́ ā bī uwá ga ipú ɔbíipú ō bī á.

²⁰Otɛtɛ ā é gē yá ɔbɔ́ɔcɛ kú aɔ́tangbédē oheyīfuú kú uwá ā, amáŋ é klla gbɔɔ́ ō kpó uwā le yá aójibó nēe wɛ ɔdā ɛbí, nēé ī gbā ā. Ɔdā nōo yá ɛ́ɛ́ nɛ̄ Óndú ā klla kwú agbénú kú uwā ā ú pīya īmū mla ɔdēlihɔ lɛ uwá ā yɔ̄ abɔ́ɔ á.

²¹Óndú ā ka anúɔ géē yá ka ācɛ aéwɔhá kéē wī uwá uwī. Ká ācōbɔbíipú ɔɔ́ géē kpó odúúdú agbénú kú uwā klla í je ɔ́ nyílá.

²²Ó klla kahíníī, “N gáā yā ɔdā dúúmā eko nɛ̄ aúwī géē gáā je Agblīihɔ-nɛ̄hi kú um ca, í ga ipú nū klla í je ɔ́ tēelihɔ ā ŋ.

²³Ɔdā dúúmā í nyɔ̄ lɔhi ipú ajɛ ā gɛ ŋ́. Ācɛ alewa bá ī ŋmó ācɛ klla bá ī yá ikpala ipú ajɛ ā.

²⁴N géē bī aéwo nēe bɔ̄bíipú fíyɛ́ dúú ā wā í mīyɛ ɔlɛ́ aá tābɔ. Ācɛ olɔfú kú aá fíyɛ́ dúú, nɛ̄ aá ī bī uwā gwō ā, í gáā lɔfū eko ɔ́ɔmā gɛ ŋ́. N kē ī kpó aéwo ɔhá wā í je aɛ́ga ogbɔ̄ɔkɔ kú aá nyílá.

²⁵Eko nɛ̄ ákanya géē wā ā, aá géē bá ī tíne ɛbɔ́, amáŋ aá gáā mā ŋ́.

²⁶Ífi eyī géē kwūce ɔhá. Ɔkā kú ɔdōbɔ̄bí géē yɔ̄ ī pɛ́ wā ahɔ̄ kú aá cɔhɔ́ɔ́há. Aá géē gbɔ̄ɔkɔ tá ācomɛ́ɛbɛ kéē da aá ɛbɛ nēé má ā. Ācogwɛ́ɛya ā í gáā nwū ācɛ íne ā glá gɛ ŋ́. Anyākwɔ́cɛ ā í gáā má ɛlā dúúmā nēé gē nwū ācɛ ā ɛ́ɛ́ gɛ ŋ́.

²⁷Ɔcɛ́ kú aá géē yēkwu, ɔcɛ́ ogbāajɛ ā í gáā lɛ eyīōce gɛ ŋ́. Ācɛ ā géē bá ī fīyégbúlú ipú ufi. N géē je ōwē lɛ aá kú ɔdā dóódu nɛ̄ aá yá a. N géē kɛpɔ̄ tū aá, ɔwɛ ékpónú nɛ̄ aá kɛpɔ̄ tū ācɛ ɔhá ā. Ɛ̄nyā géē mafú lɛ aá ka ami wɛ Óndú ā á.”