Read idoma ISÍKƐ̄LU 8 Bible Online

ISÍKƐ̄LU 8 - idoma bible

ISÍKƐ̄LU 8

¹Ɛ̄cī ɛhɔ̄ kú ɔyā ɛhīlī kú iháyí ɔ́mɛhīlī nēé kpó alɔ ga ajɛ Ubábīlɔn abɔfú ā, Aótrɛ̄yí kú ācɛ Ujúda nēe bá ajɛ abɔ́ɔ ā cīce mla um ɔlɛ́ um. Igbēékpónú ɔfú kú Óndú ā nōo wɛ Ɔwɔicō ā ga iyē kú um.

²N pīyeyī má icō, anɔ́ɔ n má ɔ̄cɛ éyi nōo ī ceyī bɛ̄ɛka ɔlá ā á. Oŋmá ohí wā ajɛ kú nū lɛbɛɛka ɔlá, oŋmá ohí ga icō kú nū kē yɔ̄ í fíyāajɛ bɛ̄ɛka udɔ nēé le nya ā.

³Ó lɛ odée nōo lɛbɛ̄ɛka abɔ̄ kú ɔ̄cɛ ā nāńdaa gáā bī um inyīlɛ̄yí. Ipú ɛbɛ nɛ̄ n yɔ̄ í má ā, Alelékwū kú Ɔwɔicō kwú um ú ga icīīcō ipú owu, klla kwú um ú bī ga Ujerúsālɛm. Ó kwú um ga inu eyīpú kú ɔwɛ kú ɛhícō kú Agblīihɔ-nɛ̄hi ɛga nɛ̄ ɛcí nōo gē wú Óndú ɔtū nɛ̄hī ā yɔ̄ á ā.

⁴Ofíyáajɛ kú ɛgahi nɛ̄hi kú Ɔwɔicō kú Ísrɛ̄lu ā yɔ̄ abɔ́ɔ, bɛ̄ɛka ɛ́gɛ́nɛ̄ n má aflɛ́yí, eko nɛ̄ n yɔ̄ okónu ísu kú Ucɛ́ba ā.

⁵Ɔwɔicō da um kahíníī, “Ɔlɛcɛ, pīyeyī má ɛhícō.” N pīyeyī, anɔ́ɔ n má ɛcí nōo ī wā Óndú ɔtú nɛhi kwu ɛgiyí ede ɔwɛ kú ɛhícō ā ajaajɛ.

⁶Ɔwɔicō da um kahíníī, “Ɔlɛcɛ, a má ɔ̄da nōo yɔ̄ gē yá āa? Má ɔdōbɔ̄bí nɛ̄hi nɛ̄ ācɛ Ísrɛ̄lu bá ī yá amānyā ā, bá ī nū um nyɔ̄ piyóó ŋmá ɛga otīihɔ kú um ā ā?. A klla géē má ɔdá uwēyī ɔhá fíyɛ́ ɛ̄nyā ɛ́ɛ́.”

⁷Anɔ́ɔ ó kwú um ú ga ɛgiyí Okónpinu ɔwɛ, nōo yɛ wā ipú Agblīihɔ-nɛ̄hi ā, gáā lɛ ɔ̄gɔ̄ éyi nōo tá ɔdɔ abɔ́ɔ ā mafú gā um.

⁸Anɔ́ɔ o da um kahíníī, “Ɔlɛcɛ, lɛ ɔdɔ nyā bu beé amānyā.” N lɛ ɔdɔ ā bu beé abɔ́ɔ, anɔ́ɔ n gáā lɛ ɔwɛ éyi má á.

⁹Ó da um kahíníī, “Le beé nyɔ̄ ka á má ucē ɛbí nɛ̄hi nēé bá ī yá amānyā ā.”

¹⁰Anɔ́ɔ n kwú bēé, anɔ́ɔ n má ka, é lɛ ifotó kú aɛ́gwā mɛ́mla aɛ́bɛ́ elihɔ ɔhá, mɛ́mla aɔ́dā dóódu ɔhá nɛ̄ ācɛ kú Ísrɛ̄lu bá gē gbā ā kpó bā ɔdɔ ā ɛga dóódu.

¹¹Anyākwɔ́cɛ kú ācɛ kú Ísrɛ̄lu ofɛtá cigwó bá abɔ́ɔ, kwu Ujaasáníya, ɔyí kú Ussafán. Ɔnyɔ̄ɔnyɛ kú uwá lɛ ɔtulalī kwu ɔlá ipú ákánjɔ̄, klla bī ɔ̄ abɔ̄ yɔ̄ ī tá ódūdū.

¹²Ɔwɔicō da um kahíníī, “Ɔlɛcɛ, a má ɔdā nɛ̄ aótrɛyí kú ācɛ Ísrɛ̄lu tayínū amānyā bá i yá ā? É bá ī gbā ɛdɔ ojibó dóódu ɛ̄gbā ipú inu ā. Ɔdā nēé gē lɛ abɔ̄ bá ɔ̄ ā lé ka, Óndú í má alɔ ŋ́ mā. Ó kwú igbīhi ú cē kwu ajɛ ɔlɛ́ alɔ ɛɛ́.”

¹³Anɔ́ɔ Óndú ā da um kahíníī, “A klla géē má uwá bá ī yá aúcē ɛbí ɔhá nēe fíyɛ́ ɔ́ɔmā kpɔ́ ɛ́ɛ́.

¹⁴Anɔ́ɔ ó kwú um ú ga ɔwɛ kú ɛhícō kú Agblīihɔ-nɛ̄hi a, anɔ́ɔ n má ācɛnyā bá ī jikwū kú ikwū kú ɛcí, nɛ̄ hī ka Utamúsu ā.

¹⁵Anɔ́ɔ ó da um kahíníī, “Ɔlɛcɛ, a má ɔ́ɔmā āa? A klla géē má ucē ɛbí obɔ̄bí nōo fíyɛ́ ɔ́ɔmā kpɔ́ ɛ́ɛ́.”

¹⁶Anɔ́ɔ ó kwú um ú ga inu eyīpú kú ipú Agblīihɔ-nɛ̄hi ā. Abɔ́ɔ ā, ɛgiyí ɔwɛ kú ɛga otīihɔ ā, ɛplá ede mɛ́mla ɛga nɛ̄ ācɛ gē yɛ ā, ācɛ lɛbɛ̄ɛka ofu cɛ̄hɔ̄ ā bá abɔ́ɔ. É lɛ igbīhi kú uwá pīya kwu ɛga otīihɔ ā, lɛ eyī pīya kwu ɛnɔɔcī bá ī tū kpɛɛ́ bá ī gbā ɛnɔ ɛ̄gbā.

¹⁷Anɔ́ɔ Óndú da um kahíníī, “Ɔlɛcɛ, a má ɔ́ɔmā a? Aúcē ɛbí nɛ̄hi nɛ̄ ācɛ Ujúda ī yá kpɛ́mm ɔ́ɔmā mɛ́mla ɔ́bíipú nɛ̄hi nɛ̄ ācɛ kú Ujúda bá ī yá ajɛ í jɛ uwá ɛ́ɛ́ ŋ́. Amáŋ ipú Agblīihɔ-nɛ̄hi kú um nyā piíí ā, nēé gē wā í yá aɔ́dōbɔbí ɔ́ɔmā mɛ́ɛ̄ á ká ē yá um cɔ̄nū fíyɛ́ á. A má ɛdɔ ɛcá nɛ̄hi nēé cá um ipú Agblīihɔ-nɛ̄hi kú um āa?

¹⁸N géē bī ícɔnū kú um le yá uwā odée nɛhi. N gáā habɔ̄ uwā tá ɛ́ɛ́ nɛ̄ n gē ményinyi uwá ŋ́. É géē bá ī gbɔ̄ɔkɔ gā um gbōmgbōm, amáŋ ń gáā jāhɔ̄ lɛ uwá ŋ́.”