Read idoma ISÍKƐ̄LU 9 Bible Online

ISÍKƐ̄LU 9 - idoma bible

ISÍKƐ̄LU 9

¹Anɔ́ɔ n pó bá Óndú ā dɛ̄gba kahíníī, “Aá wā amānyā. Aá nēé gáā yá igeli a italā. Aá lɛ iyɔ́fú kú aá kpó wā.”

²Obōōbū ā, ācɛ ɛhīlī kwú bēé ŋmá ɔwɛ kú ɛhícō kú Agblīihɔ-nɛ̄hi ā. Ɔnyɔ̄ɔnyɛ kú uwā bī iyɔ́fú. Ɔ̄cɛ éyi yɔ̄ mla uwá nōo lɛ īlī nɛ̄hɛ́ wiiyē, klla bī ɔdōtɔ́kpá. Odúúdú uwā wā gáā māháyi ɛgiyí ede nɛ̄é yá ŋmá oje udɔ ā.

³Anɔ́ɔ ofíyáajɛ kú ɛgahi nɛ̄hi kú Ɔwɔicō kú ācɛ Ísrɛ̄lu ā nyɛɛ gicō ŋmá ɛyí aɔ́dā oōlɛ acá oōbī wu ā, ɛga nōo tɛtɛ yɔ̄ ā. Anɔ́ɔ ó le yɛ ga ɔwɛ kú Agblīihɔ-nɛ̄hi ā. Anɔ́ɔ Óndú ā hī ɔ̄cɛ nōo lɛ ili nɛ̄hɛ́ wiiyē, nōo bī ɔdōtɔ́kpá ā igwú.

⁴Ó da ɔ́ Ka, “Nyɔ̄ gaá yɛ ipú odúúdú igelī kú Ujerúsālɛm ka á lɛ ína pi tū údɔbū kú odúúdú ācɛ nɛ̄ ucē ɛbí nɛhi nɛ̄ ācɛ gē yá ipú igelī gē kwú uwā iyē klla ī je unwalu lɛ uwá ā.

⁵Anɔ́ɔ n pó abɔ Óndú da ācɛ o hile ā kahíníī, “Aa yɛ ce ɔ́ nyɔ̄ ga ipú igelī ā gáā ŋmó ācɛ ā. Aá mā ɔ̄cɛ dúúmā tá, ɛ́ɛ́ nɛ̄ aá gé ményinyi kú ɔ̄cɛ̄ dúúmā ŋ́.

⁶Aá ŋmó anyākwɔ́cɛ, ayípōklóbīya, áncɛ́nyā, aɛ́nɛ́ mla ayípɛnɛncɛ́. Amáŋ, aá lɛ abɔ̄ kwu ɔ̄cɛ dúúmā nɛ̄ ína yɔ̄ anú údɔbū ŋ́. Aá gbɔɔ́ ŋmá ipú Agblīihɔ-nɛ̄hi kú um amānyā.” Anɔ́ɔ é gbɔɔ́ ō ŋmó Aótrɛ̄yí nēe māháyi ipú Agblīihɔ-nɛ̄hi abɔ́ɔ ā á.

⁷Ɔwɔicō da uwá kahíníī, “Aá lɛ Agblīihɔ-nɛ̄hi ā nyílá. Aá lɛ ipú nū mu mla okwū. Aá gbo úklɔ́ kú aá. Anɔ́ɔ ē gbɔɔ́ ō ŋmó ācɛ nɛ̄ bá ipú igelī ā á.

⁸Abɔ́ɔ é bá ī ŋmó ācɛ ā, n yɔ̄ abɔ́ɔ ofōōfū um. N le iyī um tá pīyeyī klá ajɛ gblugudu, klla dɛ̄ íbá kahíníī, “Óndú, awɔ nōo wɛ Ɔwɔicō ā, a le cɔ̄nū mla ācɛ Ujerúsālɛm jaā nāa gáā je odúúdú ācɛ o hile kú Ísrɛ̄lu ā ŋmó nɛɛ?.”

⁹Ɔwɔicō tá um ohi kahíníī, “Ācɛ Ísrɛ̄lu mla ācɛ Ujúda lɛ ɔdōbɔ̄bí nɛ̄hi yá lɛ ɛpɔbí lé. É ba ī ŋmó ācɛ ɛga dóódu, klla bá ī yá ucē obɔbí Ujerúsālɛm ɛbɛɛbɛ. É ka, ami, Óndú ā ɔ́ɔ kwú ɛlá gwū hɛ́ ajɛ ɔlɛ́ aá, í klla má aá ŋ́.

¹⁰Amáŋ n gáā ményīnyinyi uwá ŋ́. N géē yá uwá ɔdā nēé yá ācɛ ɔhá ā.”

¹¹Anɔ́ɔ ɔ̄cɛ nōo lɛ ili nɛ̄hɛ́ wiiyē klla bī ɔdōtɔ́kpá ā lɛ ohi kpó lɛ Óndú ā kahíníī, “N lɛ úklɔ́ mla ɔ́da kú uwɔ, nāa je ā yá ɛɛ́.”