Read idoma UDÁNĪYƐ̄LU 10 Bible Online

UDÁNĪYƐ̄LU 10 - idoma bible

UDÁNĪYƐ̄LU 10

¹Ipú iháyí ɔ́mɛtá nɛ̄ Usáyírɔ̄si wɛ ɔcɛ́nɛ̄hi kú Upɛ́sīya ā, Ɔwɔicō lɛ olɛhɔ̄ éyi mafú lɛ Udánīyɛlu nēé hī ka Ubeltɛssása ā. Olɛhɔ̄ ā wɛ ɔkwɛ̄yi, amáŋ ó lɔnɔ nɛ̄hi kú ɔ̄cɛ kóō jɛ́yí nū[10] Amáŋ ó le ɛyí kú ɛlā ā jé. Ó klla kē le ɔwɔ ō cɛ̄ kú ɔna ā jé dúú.

²Ami nōo wɛ Udánīyɛlu ā yɔ̄ ekwu aláadi ɛtá eko ɔ́ɔmā ā.

³N lé ɔdōlé ɛ́nɛ́ɛ́nɛ̄ dúúmā ŋ́. Ń lé ɛbɛ́ ŋ́, ɛ́ɛ́ nɛ̄ n gē gwá ɔdā dúúmā ŋ́. Ń gwá ejé dúúmā ŋ́. Ń klla kōō lɛ anɔ̄ nya iyē ɛ́ɛ́ nɛ̄ n gē fíyɛ́yí ŋ́.

⁴Ɛ̄cī ofu ce ɛnɛ kú ɔyā aflɛ́yí kú iháyí ā, n māháyi okónu ísu nɛ̄hi kú Utígrīsi.

⁵N je eyī gicō, anɔ́ɔ n má ɔ̄cɛ éyi māháyi lɛ īlī nɛ̄hɛ́ wiiyē klla lɛ ɔkpá ō kwɛ́nyɔ́ kú oje ɔdɔ (ugóolu) kwu ɛ́nyɔ́.

⁶Iyē kú nū yɔ̄ ī fíyajɛ bɛ̄ɛka ɔwɔ o límanya ā, eyī kú nū gē cɛ bɛ̄ɛka ɔlá kú akpáabana ā. Īkpēyī kú nū yɔ̄ ī cɛ̄ bɛ̄ɛka ígblɛ́nyī ɔlá ā. Abɔ̄ mɛ́mla ikpó kú nū gē fíyajɛ bɛ̄ɛka oje ɔdɔ nēé le nyā péee ā. Ɔkɛlā kú nū gē gwō bɛ̄ɛka ɔkɔ kú ɛwa nɛ̄hi kú ācɛ ā.

⁷Ami ōfōōfū um má ɛbɛ nyā á. Ācɛ nēe bá pī um ā, í má ɔdā dúúmā ŋ́, amáŋ ufi nɛ̄hi le uwá kwú, anɔ́ɔ é le kwu gaá le pɛ́ tayínū á.

⁸Anɔ́ɔ ami ōfōōfū um māháyi abɔ́ɔ yɔ̄ ī mɛ́ɛbɛ ohéyī nyā á. Ipú kú um le gbogodo, ɔfú dúúmā ī yɔ̄ ipú um ɛ́ɛ́ gɛ ŋ́, īkpēyī kú um kwú pīya ɔhá, nɛ̄ ɔ̄cɛ dúúmā í klá jé um glá ɛ́ɛ́ gɛ ŋ́.

⁹Eko nɛ̄ n lɛ ɔkɔ kú nū pó ā, n le hɛ́kwú tá ajɛ kɔ́ngɔ́ɔ́, lɛ eyī pīya kláajɛ.

¹⁰Abɔ̄ kú ɔ̄cɛ éyi gaá bī um, kwú um ŋmáajɛ, cɛ̄ gā um le okwúukwu mɛ́mla abɔ̄ kpó kwaajɛ. N kōō yɔ̄ ī fīyégbúlú kpɔ́.

¹¹Alelékwū ōtɛ̄hɔ̄ ā da um kahíníī, “Udánīyɛlu, Ɔwɔicō yíhɔtū tá uwɔ nɛ̄hi. Cāŋjɛ ká ā jāhɔ̄ lɔɔlɔhi lɛ ɔdā nɛ̄ n gáā ka ā. É tū um ɛhɔ̄ fu uwɔ.” Eko nōó le ɛ̄nyā ka ā, n cāŋjɛ háyiicō klla yɔ̄ ī fīyégbúlú kpɔ́.

¹²Anɔ́ɔ ó da um kahíníī, “Udánīyɛlu, á yúúfi ŋ́. Oŋmá eko nɛ̄ a miya ka anúɔ í tá iyī anúɔ wāajɛ, cɛ́ɛ́ kú anúɔ lɛ odéeyi jé ā, nɛ̄ Ɔwɔicō pó ɔkɔ nɛ̄ a gbā ā á. N bī ohi kú ɔkɔ nɛ̄ a gbā ā gé lɛ uwɔ nɛ.

¹³Alelékwū nōo ī leyīkwu ajɔ̄ɔ̄cɛ́ kú Upɛ́sīya ā le um hɛ́tū ɔwɛ, ɛ̄cī ofu ce éyi. Anɔ́ɔ Umáyíkɛ̄lu, éyi kú aótrɛ̄yí kú aálelékwū-otɛ̄hɔ̄ ā, wā ī le um tá abɔ̄, ohígbū kéē habɔ̄ um tá ōfōōfū um Upɛ́sīya abɔ́ɔ

¹⁴N wā ká n̄ yá ká ā lɛ ɛyí kú ɔdā nōo gáā yá ācɛ ɔlɛ́ uwɔ ɛ̄cɔ̄bū ā jé. Ɛ̄nyā wɛ ɛbɛ oōmá lɛyíkwu ɛ̄cɔ̄bū nɛ n.”

¹⁵Eko nōó lɛ ɛ̄nyā ka ā, n kwú eyī ú kwaajɛ cíí, okónu í kōō hɛ́ um ŋ́.

¹⁶Anɔ́ɔ alelékwū-ōtɛ̄hɔ̄ nōo gbla ɔ̄cɛ ā, le abɔ̄ nā daa, anɔ́ɔ ó le abɔ̄ kwu um ákpókónu á. Anɔ́ɔ n da ɔ́ kahíníī, “Ɛbɛ nɛ̄ n má nyā lɛ um iyē catāapū. Ó yá ká n̄ yɔ̄ ī fīyégbúlú.

¹⁷N lɛbɛ̄ɛka ɔfiyɛ nōo māháyi iyɔ̄bū óndú nū ā. Anɔ́ɔ n da ɔ̄kā kahíníī, “Abɔ̄ ó yá lɛ ɛ́ɛ́ nɛ̄ n géē kɛlā ga uwɔ glá āa? Ɔfú dúúmā ī yɔ̄ ipú um ɛ́ɛ́ gɛ ŋ́.”

¹⁸Ó klla kwú abɔ̄ í bī um igbɔhá, anɔ́ɔ n kwú lɔfú iyē fíyɛ́ á.

¹⁹Anɔ́ɔ ó da um kahíníī, “Ɔwɔicō yíihɔtū tá uwɔ, Udánīyɛlu, ā cɛ̄ lɛ ɔdā dúúmā je unwalu gā uwɔ ɛ́ɛ́, nɛ̄ ɔdā dúúmā gē tū uwɔ ufi ŋ́.” Eko nōo lɛ ɛ̄nyā ka ā, iyē kú um klla kwú lɔfú tōōtɔ̄ɔ̄ gɔbū, anɔ́ɔ n da ɔ́ kahíníī, “Ɔkpani, kɛlā nɛ̄ a bī ā gā um mɛ́ɛ́nɛ, a cɛ̄ lɛ iyē i lɔfú gā um ɛɛ́.”

²⁰Anɔ́ɔ ó da um ɔ̄kā kahíníī, “A jé ɔdā nōo yá ɛ́ɛ́, nɛ̄ n wā ā? N wā gaá ma ɔdā nēé tá tū ipú ɔkpá kú ɛlɔ̄kwɛ̄yi ā fú gā awɔ. Amáŋ abālɔbányā, n géē kwúcē īgbīhi gaá nuunu tá alelékwū nōo gē leyīkwu Upɛ́sīya ā. Igbīhi ɔ́ɔmā ā, alelékwū ō leyīkwu Ugirísi ā géē wā.

²¹Ɔ̄cɛ dúúmā ī yɔ̄ nōo géē tá um abɔ̄ ŋ́, ayíka Umáyíkɛ̄lu, alelékwū-ōtɛ̄hɔ̄ nōo gē gbō ācɛ Ísrāel ā nɛ.