Read idoma UDÁNĪYƐ̄LU 11 Bible Online

UDÁNĪYƐ̄LU 11 - idoma bible

UDÁNĪYƐ̄LU 11

²Ɔda nɛ̄ n gáā ka ga uwɔ abālɔbányā wɛ ɔkwɛ̄yi.” Anɔ́ɔ Alelékwū-otɛ̄hɔ̄ ā kahíníī, “Aɔ́cɛ́ ɛtá klá ī lé, ajɛ kú Upɛ́sīya kpɔ́ ɛ́ɛ́. Ɔcɛ́ ɔ́mɛɛnɛ klla í lé, anú ā í lɛ ije mɛ́mla agbénú fíyɛ́ odúúdú uwā á. Ipú ágēnégēne kú ɔfú mɛ́mla agbénú kú nū ā, ó géē kpó ikpɛ́lā kwu ācɛ kú Ugirísi.

³N géē da uwɔ ɔdā nēé tá tū ipú ɔkpá kú ɛlā ɔkwɛ̄yi ā. Ɔcɛ́ éyi nōo lɔfú klla lɛ íkwu nɛ̄hi géē bɛ̄cɛ. Ó kē ī gbō ajɔ̄ɔ̄cɛ́ nɛ̄hi éyi. Ó klla í yá ɔdā dóódu nōo he ɔ́ ɔtū.

⁴Amáŋ ipú ágēnégēne kú ɔfú kú nū ā, ajɔ̄ɔ̄cɛ́ kú nū í je kɔ̄ ɛga ɛnɛ. Ɔcɛ́ nōó ŋmá ipɔ́ɔma kú nū ŋ́ mā géē lé kwɛyí nū, amáŋ ó gáā lɛ ɛdɔ ɔfú nōó lɛ ā ŋ́.

⁵Ɔcɛ́ kú Íjīpiti ā géē lɔfú. Éyi kú aógbēnjūwā kú aícɔ́ɔja kú nū ā, géē lɔfú fíyɛ́ ɔ̄, anɔ́ɔ ó gē gbō ajɔ̄ɔ̄cɛ́ nɛ̄hi nōo nwuné fíyɛ́ ā á.

⁶Eko nɛ̄ iháyí alɛwa gaá le gla ā, ɔcɛ́ kú Íjīpiti ā géē tū ujɔ̄ tɔ̄há mɛ́mla ɔcɛ́ kú Usiríya, klla í je ɔyínɔ̄nyā kú nū lɛ ɔ́ kóō le pīya ɔ̄nyā nū. Amáŋ, ujɔ̄ nēé tū nyā í gáā gbojī ŋ́. É géē je ɔyínɔ̄nyā kú nú ā mɛ́mla ɔbá nū [11] ā mɛ́mla ācotɛ̄hɔ̄ nēe géē nyɔ̄ Usiríya mɛ́mla anú ā kpó ŋmó.

⁷Igbīhāajɛ, éyi kú ɔmáapú ɔnyā ā géē lé ɔcɛ́ kwɛyí ádā nū. Ó ī kpɛ́fú tá aícɔ́ɔja kú ɔcɛ́ kú Usiríya. É géē bēhé ga igá olɔfú kú ɔlɛ́ uwā í yá uwā yálé.

⁸Ó í je aójibó kú oje ɔdɔ (ogoolu) mɛ́mla ɔdā kú ɔdu kú ɔdɔ mɛ́mla oje nɛ̄hɛ́ kú aɔ́wɔ kú uwā kpó kwú cīgbīhi ga Íjīpiti mɛ́mla iyī ūwā. Igbīhi kú eko kú ɛbɔ́ kú iháyí alɛwa ā.

⁹Ɔcɛ́ kú Usiríya ā géē wā í kpɛ́fú tá Íjīpiti, amáŋ é géē yá kóō lɛ cīgbīhi abɔ̄fú.

¹⁰Ayí ɔcɛ́ kú Usírīya ā géē tútū kéē kpɛ́fú. É klla í tū aícɔ́ɔja alɛwa bá nēe géē pɛ́ wā wūū bɛ̄ɛka ɔkpá ō cēenyi ā, cɛ́ɛ́ é gaá lɛ ɔfú kpó kwu íga olɔfú nōo ī gbō ɔlɛ́ kú olɛlā ā.

¹¹Ipú íwɔ́tū ā, ɔcɛ́ kú Íjīpiti ā kē í nyɔ̄ í kpɛ́fú tá ɔcɛ́ kú Usiríya klla í kpó anú mɛ́mla aícɔ́ɔja alɛwa kú ɔlɛ́ nū ā kwú.

¹²Ó géē yɔ̄ ī yá ɔbɔ́ɔ́cɛ ohígbū koó le yálé, klla le aícɔ́ɔja alɛwa kpó ŋmó ā, amáŋ ó gáā yɔ̄ ī yálé píyóó ŋ́.

¹³Ɔcɛ́ kú Usiríya géē nyɔ̄ í tá aícɔ́ɔja nēe lɛwa fíyɛ́ ɛ̄nɛ̄ ó tɛtɛ lɛ ā bá. Eko nɛ̄ eko ɛfú ā le yá ā, ó géē kwúcē mɛ́mla aícɔ́ɔja alɛwa nɛ̄hi mla ɛdɔ kú iyó ō bī kpɛ́fú olɔfú nɛ̄hi.

¹⁴Cɛ́ɛ́ ācɛ alɛwa géē fō klla í bɛyíkwu ɔcɛ́ kú Íjīpiti ā. Ācobɔ̄bíipú ōhī ŋmá éwo kú ɔlɛ́ uwɔ, Udánīyɛlu, gē fō klla í bɛyíkwu ɔcɛ́, o yá kú ɛbɛ nēé má ā kóō lɛ yá jīla. Amáŋ é géē yá uwā lé.

¹⁵Ɔcɛ́ kú Usiríya ā kē í cīíbɔm tū uwā klla í mīyɛ ajɛ ā jāā kwu ɔdɔ kú igá kú ɔlɛ́ ā. Aícɔ́ɔja kú Íjīpiti ā í kē gáā kpɛ́fú gɔbū glá gɛ ŋ́, kwu aícɔ́ɔja olɔfú fíyɛ́ dúú kú uwā ā, í gáā lɔfú dúúmā kéē kpɛ́fú gɔbū glá ŋ́.

¹⁶Ɔdā dúúmā nōo he ācɛ kú Usiríya nēe kpó ɔfú kwu uwá ā ɔtū ā, nēé gáā yá mla uwá á. Ɔ̄cɛ dúúmā ī da uwá ɔdā dúúmā glá ŋ́. Ó géē háyi ipú ajɛ nēé cokónu lɛ uwá ā. Ó klla kē í mīyɛ ajɛ ā dúúdú tɔ̄ɔ̄kwu.

¹⁷Ɔcɛ́ kú Usiríya le ɔtū kú nū yéékpó kóō bī odúúdú ɔfú kú ɛjɛ̄ɛ̄jī aícɔ́ɔja kú ajɔ̄ɔ̄cɛ́ kú nū wā. O yá kóō lɛ ajɔ̄ɔ̄cɛ́ kú olɛlā kú nū yíífi ā, ó géē wā í yá ɛbɔ́ mɛ́mla anú cɛ́ɛ́ ó kwú ɔyínɔ̄nyā kú nū[12] ú lɛ ɔ́ kóō lɛ ɔ́ lɛ ɔnyā nū. Amáŋ ojuju kú nū ɔ́ɔmā ī gāa kwú ɔ̄ lɛ ɔ́ ŋ́.

¹⁸Igbīhi ɛ̄nyā ā, ó géē kpɛ́fú tá aéwo nēe bá okónu ísu ā. Ó géē yá alɛwa kú ūwā lé. Amáŋ otrɛ̄yí kú éwɔhá éyi, géē wā ī yá ɔ̄ lé, klla í je oōgɔ̄ kú nū pīya áncā. Ó géē je oōgɔ̄ kú ɔcɛ́ kú Usiríya ā ŋmó tū ɔ̄ okónu.

¹⁹Ɔcɛ́ kú Usiríya ā í kwu ga ɛgotayínū kú nū nōo yɔ̄ ipú ajɛ kú nū ā, amáŋ é ī yá ɔ̄ lé, cɛ́ɛ́ ɔ́ɔmā kwú pīya oŋmɛ́yí kú nū.

²⁰Ɔcɛ́ ɔhá ī lé igbīhi nū, nōo í tū aígabɔ̄ kú nū ɛhɔ̄ nyɔ̄ ī pīya ācɛ tū mɛ́mla o lɛ ije kú élí tū ɔ̄ nɛ̄hi, cɛ́ɛ́ kú agbénú kú ajɔ̄ɔ̄cɛ́ kú nū kóō nwuné nɛ̄hi. Eko kpií ā, é í je ɔcɛ́ ā ŋmó wɛɛlɛ, nɛ̄ ācɛ ī gáā jé ŋ́, ɛ́ɛ́ nōó gē wɛ o ŋmó ɔgbɛ́fú ŋ́.”

²¹Anɔ́ɔ alelékwū-ōtɛ̄hɔ̄ ā klla kahíníī, “Ɔcɛ́ kú Usiríya ɔhá géē bī ɔ́bíipú nɛ̄hi, nōó cíkā kóō lé ɔcɛ́ ŋ́, amáŋ ó géē wā igbledū mla ula, í wā ī mīyɛ ɔcɛ́ ā lé abɔ̄fú.

²²Ɔ̄cɛ dúúmā nōó cɛ̄ mɛ́mla anú ŋ́, ó kōō ɔ̄cogwɛ́ɛya kú Ɔwɔicō ā, ó géē je ɔ́ ŋmó tónū.

²³Ó géē bī ula yɔ̄ ī plla aéwɔhá ka anúɔ yɔ̄ ī yá ɛbɔ́ mɛ́mla uwá, cɛ́ɛ́ ó yɔ̄ ī lɔfú tōōtɔ̄ɔ̄, nááná nɛ̄ éwo nōó gē gbō í nwuné ŋ́ mā.

²⁴Ó géē kpó ɔfú kwu ajɛ olagbénú nɛ̄hi ā igbledū, ɔdōbɔ̄bí nɛ̄ aádáádā nū í yá ŋ́ mā, nōó gē yá á. Ó kē í kɔ̄ agbénú nōó kpó uwī ŋmá ɔgbɛ́fú ā lɛ odúúdú ācɛ nēe cɛ̄ gē yɛce ɔ̄ ā. Ó géē tū ujɔ kóō nyɔ̄ í kpɛ́fú ga ɛga o lɔfú ō tayínū kú igelī ā, amáŋ eko kú nū géē mɛ fíyaa.

²⁵Ó géē lɛ ɔtū klla í kpó aícɔ́ɔja alɛwa nɛ̄hi í nyɔ̄ í kpɛ́fú tá Íjīpiti, nōo lɛ aícɔ́ɔja kú nū tútū tá ajɛ ī gbēyī uwā ā. Ó klla í kpɛ́fú tá uwá nɛ̄hi. Amáŋ é gē plla ɔcɛ́ kú Íjīpiti ā klla í yá ɔ̄ lé.

²⁶Ācɛ nōo gē nwū ɔ̄ ɛlā fíyɛ́ dúú ā, gáā ŋmó ɔ̄ tāajɛ á. É géē ŋmó aícɔ́ɔja alɛwa kú nū, klla í je aícɔ́ɔja kú nū kpó ŋmó ŋmá ajɛ.

²⁷Cɛ́ɛ́ aɔ́cɛ́ ɛpa ā kē í cīce bá ī lé ɔdōlé tɔ̄há ɛyí utéblu ékpónú, amáŋ ɔtū kú uwá kē bɔ̄bí lɛ iyī uwā. É géē bá ī kɛ̄mgbɛ̄ lɛ iyī uwā. Amáŋ é gáā lɛ ɔdā nēé gē tíne ā ŋ́. Ohígbū ka eko kú ɔdā ɔ́ɔmā í wā ɛ́ɛ́ ŋ́.

²⁸Ɔcɛ́ kú Usiríya ā géē pīyɛyí wā ɔlɛ́ mɛ́mla odúúdú iyó nōó wu ŋmá ɔgbɛ́fú ā. Ó klla ī lɛ abɔ̄ kwu ɔtū kóō je ɛ̄gbā nɛ̄ ācɛ kú Ɔwɔicō gē gbā ɔ̄ ā bīya. Ó géē yá ɔdā dóódu nōo he ɔ́ ɔtū ā, cɛ́ɛ́ ó kwúcē i tá ajɛ ɔlɛ́ nū.

²⁹Igbīhāajɛ ó klla géē kpɛ́fú tá Íjīpiti kpɔ́, amáŋ igbɛ́nyā ā, ó gáā kwú ɔ̄ lɛ ɔ́, ɛ́gɛ́nɛ̄ ó leyī ce ā ɛ́ɛ́ gɛ ŋ́.

³⁰Ācɛ Uróm géē yɛ ipú aúgbéenyi kú uwā wā í kpɛ́fú tá ɔ̄, ufi kē géē yá ɔ̄ nɛ̄hi. Cɛ́ɛ́ ó géē kwúcē mla ícɔ̄nū nɛ̄hi gaá je ɛ̄gbā nɛ̄ ācɛ kú ɔlɛ́ Ɔwɔicō gē gbā Ɔwɔicō ā bīya. Ó géē pó ɛlā kú ācɛ nēe le igbīhi cē kwu Ɔwɔicō ā ɛɛ́ mā.

³¹Aícɔ́ɔja ōhī kú nū géē wā í je Agblīihɔ-nɛ̄hi kú Óndú tēelihɔ. É géē je ɛya nēé gē gwó lɛ Óndú ipú Agblīihɔ-nɛ̄hi eko dóódu ā ci, cɛ́ɛ́ é kwú ɔdā kú ɛbɛ ohéyē (icɛ̄bɔ̄) ū ce icō ɛyí ede.[13]

³²Ɔcɛ́ ā bī ula mɛ́mla ɛ́plla le yá kú ācɛ nēe le igbīhi cē kwu ɔwɛ o gbā Ɔwɔicō ɛ̄gbā ɛɛ́ mā kéē cɛ̄ɛ̄lā kú nū. Amáŋ ācɛ nēe jé Ɔwɔicō kú uwā kpaakpa ā géē pīyeyī kwu ɔ́, géē nuunu tá ɔ̄.

³³Aótrɛ̄yí o jéeyī kú ācɛ ā géē tá ācɛ alɛwa abɔ̄ kéē jɛ́yí ɔdā nēé jé ā. Amáŋ eko kpíii ā, é géē ŋmó ācɛ ōhī kú uwá ɔgbɛ́fú, ámāŋ o je ācɛ ōhī kú uwā yɔlá ga ɔlékwū. É kē í hɛ́ ācɛ ōhī kú uwā éjulúkwu klla í je uwá pīya aálagbá.

³⁴Eko nēé yɔ̄ ī ŋmó ācɛ ā, ācɛ géē wā í tá ācɛ kú Ɔwɔicō ā abɔ̄ lígílígí. Amáŋ ācɛ ōhī nēe géē wā í tá uwā abɔ̄ ā géē bá ī yá ula í yá ákú ɔtū kú abɔ̄yī uwā icííci.

³⁵É géē je aótrɛ̄yí o jéeyī ōhī ā kpó ŋmó, amáŋ ɛ̄nyā ā géē cɛ̄ lɛ ācɛ géē je iyē gwu yēŋēē lɛ Ɔwɔicō. Ɛ̄nyā géē yɔ̄ ī yá jāā gbéeko nɛ̄ eko kú oŋmɛ́yí nɛ̄ Ɔwɔicō le tū ā gā ā.

³⁶Ɔcɛ́ kú Usiríya géē yɔ̄ ī yá ɔdā dóódu nōo he ɔ́ ɔtū. Ó géē yɔ̄ ī gwō ka anúɔ lɔfú fíyɛ́ dúú á, ka anúɔ klla nwuné fíyɛ́ aɔ́wɔ dóódu á. Ó kōō í ka ka anúɔ fíyɛ́ Ɔwɔicō abɔ̄yī nū nōo yá ɔdā dóódu ā dúú á. Ó géē lɔfú yá ɛ̄nyā jāā gbéeko nɛ̄ Ɔwɔicō géē yá ɔ̄ italā. Ɔwɔicō ī yá ɔdā dóódu nōó tútū lɛyíkwu ɔ́ ā jīla piíí.

³⁷Ɔcɛ́ ā géē leyī gwu aɔ́wɔ, nɛ̄ aádáádā nū pā ā bónū, mɛ́mla aɔ́wɔ nōo he ācɛnyā ɔtū ā. Ó gáā pó ɛlā kú ɛjɛ̄ɛ̄jī ɔwɔ ɔhá dúúmā ŋ́, ohígbū koó géē gbɛlá ka anúɔ nwuné fíyɛ́ aɔ́wɔ dóódu á.

³⁸Ikɔkɔ ɔ́ɔmā, ó géē gbā ɔwɔ nōo ī gbō inu o lɛ ɔdɔ olɔfú ō tayínū kú igelī ā. Ó klla géē je oje ɔdɔ, oje udɔ, oje nɛ̄hɛ́, ɔtángbédē mɛ́mla ɔdā agbénú ɔhá lɛ aɔ́wɔ, nɛ̄ aádáádā nū ī pā ŋ́ mā.

³⁹Ó géē bī aéwɔhá lɛ gbō inu olɔfú ɛgotayínū kú nū ā. Ó géē lɛ ojīlīmā ce ācɛ dúúmā nēe mīyɛ anú ká anú ɔ́ɔ wɛ ɔcɛ́ kú uwā á. Ó géē kpó uwā ce āhɔ̄ onwuné nɛ̄hi, klla í je ajɛ cíla uwá ulé.

⁴⁰Eko nɛ̄ eko ámōōmɛ kú ɔcɛ́ kú Usiríya gā ā, ɔcɛ́ kú Íjīpiti ā géē kpɛ́fú tá ɔ̄, ɔcɛ́ kú Usiríya ā géē bī odúúdú ɔfú mɛ́mla odúúdú iyɛ́fú kú nū, aɔ́nya kú ɛfú, aúgbɔ́ɔ́nya o kpɛ́fú mɛ́mla aúgbéenyi kú nū lɛ kpɛ́fú tú ɔ̄. Ó klla í nyɔ̄ í kpó aéwo alɛwa wu, bɛ̄ɛka éŋkpɔ̄ ō cenyi klá ɔ̄cɛ wuu ā.

⁴¹Ó klla í kpɛ́fú nyɔ̄ í tú ācɛ ajɛ nɛ̄ Ɔwɔicō cokónu lɛ uwá ā dúú, klla ī ŋmó ācɛ úlúúlā igwíígwó kú uwā. Amáŋ, aéwo kú Ɛ́dɔm, Umówābu mɛ́mla ācɛ nēe géē hile kú Ámɔ̄n ā géē kwu ŋmá abɔ̄ nū.

⁴²Eko nōó lɛ ɛfú kpó tú odúúdú aéwo ā, ó gáā habɔ̄ Íjīpiti tá ŋ́ dúú.

⁴³Ó géē je agbénú kú oje ɔdɔ (Ugoolu) otayínū kú Íjīpiti ā, mɛ́mla oje nɛ̄hɛ́, mɛ́mla oje udɔ ā kpó ga ɔlɛ́ nū. Ó géē yá Ulíbīya mɛ́mla Usudán lé klla í mīyɛ ajɛ kú uwá dúú.

⁴⁴Cɛ́ɛ́ ɔ̄kā kú ɔdā nōo yá ajɛ kú ɛnɔ̄ɔ̄cī mɛ́mla ɛhíícō nōó géē pó ā, géē tū ɔ̄ ufi nɛ̄hi eko ɔ́ɔmā. Ó klla géē kpɛ́fú tá ācɛ alɛwa nɛ̄hi, klla í ŋmó ācɛ alɛwa bónū.

⁴⁵Ó géē lɛ aáklɔ̄kpɛ kú ɔcɛ́ kú nū pi kwaajɛ ɔtāhɛ̄ kú ísu mɛ́mla ɛyí ɛfu, ɛga nɛ̄ Agblīihɔ-nɛ̄hi kú Óndú ā kwu ā. Amáŋ ɔcɛ́ nyā géē kwú ōfōōfūnū, nōó gáā má ɔ̄cɛ dúúmā lɛ abɔ̄ tá ɔ̄ eyī klá ámāŋ tá ɔ̄ okónu bī eko nōó géē kwú ā ŋ́.”