Read idoma UDÁNĪYƐ̄LU 12 Bible Online

UDÁNĪYƐ̄LU 12 - idoma bible

UDÁNĪYƐ̄LU 12

¹Anɔ́ɔ alelékwū-ōtɛ̄hɔ̄ nōo lɛ īlī nɛ̄hɛ́ wiiyē ā kahíníī, “Eko ɔ́ɔmā, Umáyíkɛ̄lu, alelékwū-ōtɛ̄hɔ̄ nɛ̄hi nōo gē gbō ācɛ ɔlɛ́ uwɔ ā géē bɛ̄cɛ. Cɛ́ɛ́ eko kú unwalu mɛ́mla ɛdɔ ífi nēé yá ipú ɛcɛ ā jéejée ɛ́ɛ́ ŋ́ mā gbɔɔ́. Eko nɛ̄ eko ɔ́ɔmā gā, odúúdú ācɛ ɔlɛ́ uwɔ nēé tá iyē kú uwá tū ipú ɔkpá kú Ɔwɔicō ā, géē nyatá

²Ācɛ alɛwa kú uwá nēe tɛtɛ gekwú ɛɛ́ mā géē kpó héyī ŋmá ipú únóji. Ācɛ ōhī kú uwá géē nyɔ̄ í yēeyī piyóó, ācɛ ɔhá ā géē nyɔ̄ ipú ōwē mɛ́mla uwēyī piyóó.

³Aótrɛ̄yí ojéeyī ā géē bá ī fíyajɛ péee bɛ̄ɛka ɔkpáncō ā. Ācɛ nēe gē nwū ācɛ kéē yá ɔdā nōo le kpaakpa ā géē bá ī fíyajɛ bɛ̄ɛka aínyíláɔwɔ ā piyóó.”

⁴Ó da um kahíníī, “Udánīyɛlu, lɛ ɔkpá nyā gwū cɛ́ɛ́ ká ā lɛ ɔja he klá anú, jāā gbó oŋmɛ́yí kú ɛcɛ. Abālɔbányā ā, ācɛ alɛwa géē bá ī kpó iyī ūwā eko bónū bá ī tíne kéē jɛ́ɛ́yí ɔdā nōo yɔ̄ gē yá ā.”

⁵Anɔ́ɔ n má ācɛ ɛpa háyi okónu ísu éyi, ɔ̄cɛ éyi háyi úkɔngɔ̄ éyi, ɔ̄cɛ ɔhá ā háyi úkɔ́ngɔ̄ ɔhá.

⁶Éyi kú ācɛ ā da alelékwū-ōtɛ̄hɔ̄ nōo háyi ɛhíícō kú ísu ā ɔ̄kā kahíníī, “Eko nyā nɛ̄ ɛbɛ ohéyī mɛ́mla ɔdā ō hídáagó nyā géē yɔ̄ gaá kwu āa?”

⁷Anɔ́ɔ alelékwū-otɛ̄hɔ̄ je abɔ̄ kú nū ɛpɛlɛ́ɛpa gicō lɛ ɔ́ pīya kwu ɔkpáncō, klla le okónu ce ipú iyē kú Ɔwɔicō nōo yēeyī piyóó ā kahíníī, “Ó géē wɛ iháyí ɛtá ce ɔyā ɛhīlī, ɛ́ɛ́ nɛ̄ ōwē mɛ́mla oyáŋmó kú ācɛ kú Ɔwɔicō ā géē mɛ á. Odúúdú ɔ́dā nēe bá nyā géē le yá i yɛ ɛɛ́.”

⁸N pó ɔdā nōó ka ā, amáŋ ń jɛ́ɛ́yí nū ŋ́. Anɔ́ɔ n le ɔ̄kā da ɔ́ kahíníī, “Ɔkpani, ɔwɛ nyá nōó géē ŋmɛ́yí āa?”

⁹Ó tá um ohi kahíníī, “Udánīyɛlu, gbɔɔ́ ká ā nyɔ̄ mɛ́ɛ́nɛ, ohígbū ka ɛlā nēe bá nyā géē wɛ ɔdā ō le tayínū jāā gbéeko nɛ̄ eko oŋmɛ́yí ā gā ā.

¹⁰É géē gwu ācɛ alɛwa iyē yēŋēē. Amáŋ ācɛ nēe bɔ̄bíipú ā, í gáā jɛ́ɛ́yí nū ŋ́. É géē bá ī bɔ̄bíipú tōōtɔ̄ɔ̄ nyɔ̄ bū. Amáŋ ācɛ nēe jééyī ā ōfōōfū uwā gáā jɛ́ɛ́yí nū á.

¹¹Oŋmá eko nēé gē je ɛya nēé gē gwó kú ɛ̄cī dóódu kú Agblīihɔ-nɛ̄hi kú Óndú ā ci ā, ɔ́ɔmā lé ka, oŋmá eko nēé géē je ɔdā kú ɛbɛ ohéyī ā (icɛ̄bɔ̄) ce ɛyí ede kú Óndú ā, ɛ̄cī úlā ɛtá cofɛnɛ cigwó ā géē wā í yɛ

¹²Ákú ācɛ nōo háyi kpaakpa lɛ Óndú ā jāā gbéeko, nɛ̄ ɛ̄cī úlā ɛtá cofɛhīlī cigwɛ́ɛhɔ̄ ā gáā le yɛ.

¹³Awɔ Udánīyɛlu ā, háyi kpaakpa lɛ Óndú ā jāā ga oŋmɛ́yí. Cɛ́ɛ́ eko ɔ́ɔmā, a géē kwú, amáŋ a géē héyī cɛ́ɛ́ ká ā mīyɛ ulé kú úklɔ́ nɛ̄ a yá ā, ɛ̄cī ámōōmɛ mɛ́mla eko oŋmɛ́yí kú ɛcɛ ā.”