Read idoma UDÁNĪYƐ̄LU 6 Bible Online

UDÁNĪYƐ̄LU 6 - idoma bible

UDÁNĪYƐ̄LU 6

¹Udárīyɔs le aígbómína ofɛhīlī fu kéē leyīkwu odúúdú ajɛ kú ipú ajɔ̄ɔ̄cɛ́ nɛ̄hi kú nū ā.

²Anɔ́ɔ ó lɛ Udánīyɛlu mɛ́mla ācɛ ɛpa ɔhá fu kéē leyīkwu úklɔ́ kú aígbómína ā á. Cɛ́ɛ́ kéē klla má ka, ācɛ ā ɔ́ɔ ī yá ɔdā nɛ̄ ɔcɛ́ ɔ́ɔ ka ā.

³Uklɔ́ olɔhi nɛ̄ Udánīyɛlu gē yá ā kwú ɔ̄ ú kwɛɛcɛ péee ka anú ɔ́ɔ fíyɛ́ aɔ́mpa nū mɛ́mla odúúdú aígbómína ofɛhīlī ā á. Anɔ́ɔ ɔcɛ́nɛ̄hi ā le ŋmótū ka anúɔ géē je ɔ́ yá otrɛ̄yí dúúdú kú odúúdú ajɔ̄ɔ̄cɛ́ kú nū ā.

⁴Anɔ́ɔ aɔ́mpa kú Udánīyɛlu ā mɛ́mla aígbómína ofɛhīlī ā gbɔɔ́ ō tíne ɔwɛ nēé gē má ɔdōbɔ̄bí dóódu lɛyíkwu ɔwɛ nɛ̄ Udánīyɛlu gē yúklɔ́ ipú āhɔ̄ kú nū, ipú ajɔ̄ɔcɛ́ ā. Amáŋ é má ɛga dúúmā nɛ̄ Udánīyɛlu yā ɔdōbɔ̄bí, ɛ́ɛ́ nēé gē ka ka ɔ́ɔ nyíleyí ɔwɛ dúúmā ŋ́.

⁵Anɔ́ɔ ācɛ ā tá īyī uwa ohi kahíníī, “Alɔ ī gáā má ɔdōbɔ̄bí dúúmā ɛgiyí Udánīyɛlu nɛ̄ alɔ géē kwú ɔ̄ ŋ́, ayíka ɔdā nōo lɛyíkwu ɔwɛ nōó gé gbā Ɔwɔicō kú nū ɛ̄gbā, klla ī lɛ íne kú Ɔwɔicō kú nū tū ā.”

⁶Anɔ́ɔ aɔ́mpa Udánīyɛlu mɛ́mla aígbómína ā lɛ ojuju yá tɔ̄há le tá ɛgiyí ɔcɛ́ gaá da ɔ́ kahíníī, “Ágábáidu Udárīyɔ̄si, ɛyí kú uwɔ kóō tápátɛ̄cɔ̄, cɛ́ɛ́ kú ā yēeyī piyóó!

⁷Odúúdú alɔ nēe wɛ aígabɔ̄, aótrɛ̄yí, mɛ́mla aígbómína kú uwɔ ā, cɛ̄ tɔ̄há ka, ipú ɛ̄cī ofucigwó nyā, ɔcɛ́ kóō lɛ íne tū ka, ‘Ɔ̄cɛ dúúmā nōo lɛ ɛ̄ba ba ŋmá ɛgiyí ɔwɔ ɔhá, amáŋ ka ɔ̄cɛ, gwū awɔ nōo wɛ ɔcɛ́ ā tá, é gē je ɔ́ tá tū ipú ɔ̄gɔ̄ kú ágábá.’

⁸Ágábáidu, kwú íne nyā ú kwaajɛ cɛ́ɛ́ ká ā lɛ abɔ̄ tá ɔ̄, cɛ́ɛ́ kóō kwú pīya íne kú ācɛ Umédes mɛ́mla Upɛ́sīya nɛ̄ ɔ̄cɛ dúú í gáā pīya anú abɔ̄ glá ŋ́.”

⁹Anɔ́ɔ ɔcɛ́ cɛ̄ kwú abɔ̄ ú tá ɔkpá kú íne ā.

¹⁰Eko nɛ̄ Udánīyɛlu le jé ka, ɔcɛ́ ɔ́ɔ kwú abɔ̄ ú tá íne ā ɛɛ́ mā, ó le yɛ tá inīcō kú ɔlɛ́ nū, le uwíndo kú nū nōo pīyeyī kwu Ujerúsālɛm ā nwūla. Anɔ́ɔ ó kwú okwúukwu ú kwaajɛ gē gbā Ɔwɔicō ɛ̄gbā igbɛtá ɛ̄cī dóódu. Ó klla gē tá ɔ̄ ahínyá ɛ́gɛ́nɛ̄ ó tɛtɛ gē yá ā.

¹¹Eko nɛ̄ aólɛla kú Udanīyɛlu le má ka ɔ́ɔ gē gbā Ɔwɔicō ɛ̄gbā ā,

¹²anɔ́ɔ é le pɛ́ tá ɛgiyí ɔcɛ́ gaá le ɛlā ka lɛ ɔ́ ohígbū íne ā kahíníī, “Ágábáidu, ó wɛ awɔ lɛ abɔ̄ tá ɔkpá kú íne ā ŋ́ nɛɛ? Ka ɔ̄cɛ dúúmā nɛ̄ ɔ́ɔ lɛ ɛ̄gbā gbā ɔwɔ ɔhá, ámāŋ ka ɔ̄cɛ ɔhá, gwū awɔ nōo wɛ ɔcɛ́ ā tá ipú ɛ̄cī ofu cigwó nyā, é géē kwú ɔ̄, í je ɔ́ tá ga ipú ɔ̄gɔ̄ kú ágábá ā ŋ́ nɛɛ?” Anɔ́ɔ ɔcɛ́ tá uwá ohi kahíníī, “Ó lɛ ā gbóó, ɛ́gɛ́nɛ̄ íne kú ācɛ Umédes mɛ́mla Upɛ́sīya lɛ ā, íne dúú nɛ̄ ɔcɛ́ le abɔ̄ tá ɔ̄, í tōō pīyabɔ̄ ŋ́.”

¹³Anɔ́ɔ uwá da ɔcɛ́ kahíníī, “Udánīyɛlu, éyi kú aɔ́fiyɛ nēé kpó ŋmá Ujúda ā, í lɛyítáajɛ lɛ íne kú uwɔ ā ŋ́. Ó gē gbā Ɔwɔicō kú nū ɛ̄gbā igbɛtá ɛ̄cī éyi.”

¹⁴Eko nɛ̄ ɔcɛ́ ā le ɛlā nēé ka lɛyíkwu Udánīyɛlu ā pó ā, ɔtū le bīya lɛ ɔ́, ó je unwalu lɛ ɔ́ nɛ̄hi, ó yá ɔwɛ dóódu ŋmá ɔ̄cɔ̄ɔ̄cī jāā gbó otú, cɛ́ɛ́ kóō géē lɛ Udánīyɛlu hɛ́tá.

¹⁵Amáŋ ācɛ nēe bá nyā lɛ ujɔ̄ tū klla wā ī da ɔcɛ́ kahíníī, “Ágábáidu, alɔ tíne ká ā le jé, ka íne kú ācɛ Umédes mɛ́mla Upɛ́sīya dúúmā nɛ̄ ɔcɛ́ kwú abɔ̄ ū tá ɔ́ ɛɛ́, ó gē pīya abɔ̄ ɛ́ɛ́ gɛ ŋ́.”

¹⁶Anɔ́ɔ ɔcɛ́ le ɔ́da je kéē lɛ Udánīyɛlu bī wā kéē kwú ɔ̄ ú tá ipú ɔ̄gɔ̄ kú ágábá. É le Udánīyɛlu kwú wā, anɔ́ɔ é kwú ɔ̄ ú tá tū ipú ɔ̄gɔ̄ nɛ̄ ágábá wɛ omōōmū nū ā á. Anɔ́ɔ ɔcɛ́ da Udánīyɛlu kahíníī, “Ɔwɔicō kú uwɔ nɛ̄ a gē gbā ɔ̄ ɛ̄gbā eko dóódu ā, kóō lɛ uwɔ hɛ́tá.”

¹⁷É kwú ɛcɔ̄ ū mīya gwū okónu ɔ̄gɔ̄ kú ágábá ā. Anɔ́ɔ ɔcɛ́ mɛ́mla aígabɔ̄, mɛ́mla aɔ́cɛ́ ōhɛ́pɔ̄ kú ɔlɛ́ nū lɛ abɔ̄ mɛ́mla ɔdā nēé ī bī ī le abɔ̄ tá ɔkpá ā kú uwá gbo okónu ɔ̄gɔ̄ kú ágábá ā, cɛ́ɛ́ ká ɔdā dúúmā kóō híī pīyabɔ̄ ohígbū Udánīyɛlu ŋ́.

¹⁸Anɔ́ɔ ɔcɛ́nɛ̄hi ā le tá agbla kú nū, le okónu gwū ohígbū Udánīyɛlu á. É kpó ɛdɔ ijā dúúmā nyɔ̄ í he lɛ ɔ́ ŋ́, ó kē gbiyɔ̄lā ŋ́ otú gbɔ́ɔ̄cī.

¹⁹Ɔcɔ̄ɔ̄cī eko nɛ̄ eyī le nyā ā, ɔcɛ́nɛ̄hi ā cāŋjɛ, anɔ́ɔ ó páápá, le tá okónu ɔ̄gɔ̄ kú ágábá ā.

²⁰Eko nōó gā ajaajɛ kú okónu ɔ̄gɔ̄ kú ágábá ɛga nɛ̄ Udánīyɛlu yɔ̄ ā, ó da Udánīyɛlu ɔ̄kā kahíníī, “Udánīyɛlu eee! Ɔ̄cocɛ̄hɔ̄ kú Ɔwɔicō, nōo yēeyī ā! Ɔwɔicō kú uwɔ nɛ̄ a gē gbā ɔ̄ ɛ̄gbā eko dóódu ā, lɔfú lɛ uwɔ nyatá ŋmá abɔ̄ kú aágábá glá ā ā?”

²¹Anɔ́ɔ Udánīyɛlu tá ɔcɛ́nɛ̄hi ā ohi kahíníī, “Ɔwɔicō kóō lɛ ɔcɛ́ ɛyí tū ápátɛ́cɔ̄!

²²Ɔwɔicō kú um lɛ alelékwū-ōtɛ̄hɔ̄ kú nū tɛ̄hɔ̄ gaá lɛ okónu kú aágábá gwū, aágábá ā ī kē yá um ɔdā dúúmā ŋ́, ohígbū ka ń lɛ ɛnyá dúúmā iyɔ̄bū nū ɛ́ɛ́ nɛ̄ n gē yá ɔdōbɔ̄bí dúúmā iyɔ̄bū uwɔ ŋ́ dúú.”

²³Anɔ́ɔ éeyē le mu ɔcɛ́nɛ̄hi ā ɔtū cabá á. Anɔ́ɔ ó le ɔ́da je kéē kwú Udánīyɛlu ū bɛ̄cɛ ŋmá ipú ɔ̄gɔ̄ kú aágábá ā. Anɔ́ɔ é kwú Udánīyɛlu ú bɛ̄cɛ ŋmá ipú ɔ̄gɔ̄ kú aágábá ā á. Ágábá í lɛ abɔ̄ kwu ɔ́ ɛ́ɛ́ nōó gē yá ɔ̄ ɛdɔ ágbe dúúmā ŋ́, ohígbū koó lɛ ɔtū ce Ɔwɔicō kú nū.

²⁴Anɔ́ɔ ɔcɛ́ ā le ɔ́da je kéē le odúúdú ācɛ nēe kpɛ́lāce Udánīyɛlu ā í kpó kwú. Anɔ́ɔ é le odúúdú ācɛ nēe tū ujɔ̄ obɔ̄bí ā kpó tá ga ipú ɔ̄gɔ̄ kú aágábá, uwá mɛ́mla ayí uwā, mɛ́mla anyā uwā. Ɛ́ɛ́ kéē géē gaajɛ ipú ɔ̄gɔ̄ ā dúú ā, aágábá kwú uwā ikpókwú ū kpó ca kwɛɛ́kwɛɛ́.

²⁵Anɔ́ɔ Udárīyɔs, ɔcɛ́nɛ̄hi ā lɛ ɔkpá tá fu odúúdú ɛcɛ, mɛ́mla aéwo, mɛ́mla ucē dóódu, nōo lā ipú ɛcɛ ā kahíníī, “Ɛbɔ́ kóō yɔ̄ mla aá.

²⁶N le íne yá lɛ abɔ̄ tá ɔ̄, klla kwú ɔ̄ ú kwaajɛ ícɛ, ka odúúdú ācɛ kéē yúúfi, kéē klla gbā Ɔwɔicō kú Udánīyɛlu ɛ̄gbā. Ohígbū ka anú wɛ Ɔwɔicō nōo yēeyī á. Ó klla yɔ̄ piyóó. Ó í cɔcɛ́ piyóó, ɔdā dúúmā í je ɔ́ yíífi glá ŋ́. Ó lɛ ajɛ ɛga dóódu kwú tābɔ̄.

²⁷Ó gē hɛ́ ɔ̄cɛ tá klla ī nya ɔ̄cɛ tá. Ó ī yá ɔdōcābɔ̄ klla ī yá ɔdā ōhídáagó ipú ɛcɛ mɛ́mla ɔkpáncō Anú ā, nya Udánīyɛlu tá ŋmá abɔ̄ kú ágábá á.”

²⁸Anɔ́ɔ Udánīyɛlu le jɛ̄ gɔbū nɛ̄hi, eko nɛ̄ Udárīyɔsi cɔcɛ́ ā mɛ́mla eko nɛ̄ Usáyírɔ̄si, cɔcɛ́ kú Upɛ́sīya ā á.