Read idoma UDÁNĪYƐ̄LU 7 Bible Online

UDÁNĪYƐ̄LU 7 - idoma bible

UDÁNĪYƐ̄LU 7

¹Ipú iháyí aflɛ́yí nɛ̄ Ubɛ́lssása wɛ ɔcɛ́ kú Ubábīlɔn ā, Udánīyɛlu le ɔ̄na nā klla le ɛbɛ éyi má otú, eko nōó gwutá yɔ̄ ī gbiyɔ̄lā ā. Anɔ́ɔ ó le ɔ̄na ɔ́ɔmā tá tāajɛ á. Ɛ̄nyā kē wɛ ɔ̄na kú nū nōó tá tāajɛ á.

²Udánīyɛ̄lu kahíníī, “Ipú ɔ̄na kú um otú ā, n má owu yɔ̄ ī tá ŋmá ɔ́kíkā ɛnɛ kú ɛcɛ ā ga itekwú éyi ā, nōo cɛ̄ lɛ úgbagwú yɔ̄ ī tá eyī kú nū.

³Anɔ́ɔ aɛ́bɛ́ nɛ̄hi ɛnɛ kwú pɛ́ bɛ̄cɛ ŋmá ipú itekwú ā. É wɛ ɛyɛ́ɛyɛ́yí gwū iyī uwā tá

⁴Ɛbɛ́ kú aflɛ́yí ā lɛbɛ̄ɛka ágábá ā, ó klla lɛ acá bɛ̄ɛka okpé ā. Abɔ̄ n yɔ̄ ī má ɔ̄ ā, é kwú acá kú nū ā í kpó fu, kwú ɔ̄ ú gicō ŋmá ajɛ. Anɔ́ɔ é kwú ɔ̄ ú háyi icō bɛ̄ɛka ɔ̄cɛ ā. Anɔ́ɔ é kwú ɔtū mɛ́mla ohílīpú kú ɔ̄cɛ ú lɛ ɔ́ á.

⁵Anɔ́ɔ ɛbɛ́ ɔ́mpa nɛ̄ n má ā, lɛbɛ̄ɛka ɔgwú nōo bī ikpó igbīhi kú nū háyi icō bɛ̄ɛka ɔlɛɛcɛ ā. Ó le ikpokwú íkélí ɛtá kpó kwu aīnu. Anɔ́ɔ é da ɔ́ kahíníī, “Cāŋjɛ ká ā nyɔ̄ í lé ɛbɛ́ ɛ́gɛ́ dóódu nōo he uwɔ ɔtū.”

⁶Anɔ́ɔ n klla má ɛbɛ́ ɔ́mɛtá nōo lɛbɛ̄ɛka ɛjɛ ā. Ó lɛ acá ɛnɛ kú aígbáanɔ kpó kwu igbīhi. Ɛbɛ́ nyā ā lɛ ɛyí ɛnɛ. Anɔ́ɔ é lɛ íkwu mɛ́mla ɔfú kpó lɛ ɔ́ á.

⁷Igbīhi ɛ̄nyā ā, n klla le ɛbɛ́ ɔ́mɛɛnɛ má ipú ɔ̄na kú um ā kpɔ́. Ɛbɛ́ nyā bɔ̄bí nɛ̄hi klla tūufi ō má nɛ̄hi. Ó lɔfú nɛ̄hi, ó klla bū aīnu oje nōo nwuné nɛ̄ɛ̄nɛ̄hi. Ó gē je aólɛlā kú nū catāajɛ, klla ī lɛ ikpó da uwá bá ajɛ. Ɛbɛ́ nyā lɛ aájī igwó, ó kē wɛ ɛyɛ́ɛ́yí gwū aɛ́bɛ́ ohile ā tá

⁸Eko nɛ̄ n yɔ̄ ī má aájī kú nū igwó ā, n klla má ajī nɛ̄ncɛ́ ɔhā klla yɔ̄ ī bū kwu ɔtāhɛ̄ aájī kú nū ā. Ajī nɛŋcɛ́ nōo yɔ̄ ī bū nyā le aájī ɛtá nēe tɛtɛ yɔ̄ abɔ́ɔ ā kpó fu ŋmá ɛga nēé tɛtɛ kwu ā. Ajī nɛ̄ncɛ́ ā lɛ ikpēyī bɛ̄ɛka īkpēyī kú ɔ̄cɛ ā, ó klla lɛ okónu nōo yɔ̄ ī gwō kú ɔbɔ́ɔ̄cɛ nɛ̄hi.

⁹Abɔ̄ n yɔ̄ ī mɛ́ɛbɛ ā, é kwu aákpa kú ɔcɛ́ ū kpó kwaajɛ. Anɔ́ɔ ɔ̄cɛ nōo húmáyī yēeyī piyóó ā, gaá cīce ɛyí éyi kú aákpa ā. Īlī kú nū wɛ ɛnɛ̄hɛ́ kwɛ́mm bɛ̄ɛka áfū ā. Īnyīlɛyí kú nū tɛ́ɛ́hɛ́ kɛ̄lííí bɛ̄ɛka owú otutú ā. Ikpó kú akpa kú ɔcɛ́ ā kwu aákā nēe bá ī cɔ̄lá blublu

¹⁰Anɔ́ɔ ɔlá yɔ̄ ī pɛ́ wɛ̄ɛcɛ ŋmá anú bɛ̄ɛka éŋkpɔ̄ ā. Anɔ́ɔ ācɛ úlúúlā bā abɔ́ɔ, nēe gē cɛ̄ ɔ̄ ɛhɔ̄. Ācɛ úlúúlā okokolo háyi iyɔ̄bū nū abɔ́ɔ dúú, mɛ́mla ācɛ nēé gbo uwá áluka glá ŋ́ mā, bá iyɔ̄bū nū. Anɔ́ɔ é gbɔɔ́ ō kɛpɔ̄ á, anɔ́ɔ é le aɔ́kpá ā nwūla á.

¹¹Abɔ̄ n yɔ̄ ī mɛ́ɛbɛ ā, n yɔ̄ ī pó ɔkɔ kú ajī nɛ̄ncɛ́ ā yɔ̄ ī gwō klla ī jókónu pléplé kpɔ́. Abɔ̄ n kē yɔ̄ ī má ɔ̄ cíí ā. É lɛ ɛbɛ́ ɔ́mɛɛnɛ ā ŋmó, anɔ́ɔ é kwú okwū kú nū í tá ga ipú ɔlá, anɔ́ɔ ɔlá kwú ɔ̄ ū yi ŋmá ajɛ á.

¹²É mīyɛ ɔfú, mɛ́mla íkwu kú aɛ́bɛ́ ohile ā. Amáŋ é lɛ ɛga je lɛ uwá kéē yēeyī gaá kwu eko éyi.

¹³Ipú ɛbɛ nɛ̄ n má otú ɔ́ɔmā piíí ā, n má odée nōo lɛbɛ̄ɛka ɔlɛɛcɛ ā. Ó yɔ̄ ī wā ɛgiyí um, ojuja le yɛ ɔ́ jīla tá. Anɔ́ɔ ó le yɛ tá ɛgiyí ɔ̄cɛ nōo húmáyī yɔ̄ ŋmá íkííkée ā, anɔ́ɔ é kwú ɔ̄ ú bī wā iyɔ̄bū nū á.

¹⁴Ó le íkwu, ojīlīmā, ofu mɛ́mla ɔfú kú ɔcɛ́ je lɛ ɔ̄cɛ ā, cɛ́ɛ́ kú ācɛ kú éwo dóódu, ucē dóódu mɛ́mla ipɔ́ɔma dóódu kéē cē ɔ̄ ɛhɔ̄. Íkwu kú nū nyā kē yɔ̄ piyóó. Ajɔ̄ɔ̄cɛ́ kú nū ī kē gāa mɛ ŋ́.

¹⁵Ɛbɛ nɛ̄ n má nyā hɛ um ohí nɛ̄hi, ó klla je unwalu gā um.

¹⁶Anɔ́ɔ n le yɛ ga ɛgiyí ɔ̄cɛ éyi nōo háyi abɔ́ɔ mɛ́mla uwá ā gaá da ɔ́ ɔ̄kā kóō lɛ ɛyí ɛbɛ nyā ka gā um. Anɔ́ɔ ó lɛ ɛyí nū ka gā um dúúdú á.

¹⁷Ó kahíníī, “Aɛ́bɛ́ ɛnɛ nɛ̄ a má ā, wɛ ajɔ̄ɔ̄cɛ́ ɛnɛ ɔhá nēe géē wā ipú ɛcɛ ā.

¹⁸Ācɛ kú Ɔwɔicō nōo lɔfú fíyɛ́ dúú ā géē mīyɛ ɔfú kú ɔcɛ́ ō lé, klla í bī ɔfú ɔ́ɔmā piyóó.”

¹⁹Anɔ́ɔ n klla tíne kú n jé odée fíyɛ́ kpɔ́ lɛyíkwu ɛbɛ́ ɔ́mɛɛnɛ nōó gbla aɛ́bɛ́ ɛtá ɔhá ŋ́ ma, nōo bī ūkwū kú nū nōo lɛbɛ̄ɛka oje udɔ ā mɛ́mla aīnu oje kú nū, le aólɛlā kú nū fā klá ajɛ ā. Ó klla lɛ ikpó da uwá bá ajɛ.

²⁰N klla tíne ō jé odée lɛyíkwu aájī kú nū igwó nēe kwu ɔ́ ɛyí ā mɛ́mla ajī nɛ̄ŋcɛ́ ɔhá nōo bɛ̄cɛ̄ wā ī je aájī nɛ̄hi kú nū ɛtá otɛtɛ ā kpó fu ā. Ajī nɛ̄ŋcɛ́ nyā lɛ ikpēyī mɛ́mla okónu, nōo yɔ̄ ī gwō. Anú tū um ufi fíyɛ́ odúúdú aɛ́bɛ́ ɔhá ā á.

²¹Abɔ̄ n yɔ̄ ī mɛ́ɛbɛ ā, ajī ɔ́ɔmā le ɛfú kpó tá ācɛ kú Ɔwɔicō, klla le uwá yálé

²²Anɔ́ɔ ɔ̄cɛ nōo húmáyī yɔ̄ ŋmá íkííkée ā wā gaá le ɛpɔ̄hi hɛ́ lɛ ācɛ kú Ɔwɔicō nōo lɔfú fíyɛ́ dúú ā. Eko gā nɛ̄ ācɛ kú Ɔwɔicō gáā mīyɛ ɔfú kú ɔcɛ́ mɛ́mla ajɔ̄ɔ̄cɛ́ kú uwā ɛɛ́.

²³Ohi nōó tá um ā yɔ̄ á, “Ɛbɛ́ ɔ́mɛɛnɛ ɔ́ɔmā, wɛ ajɔ̄ɔ̄cɛ́ ɔ́mɛɛnɛ nōo gē wā ipú ɛcɛ, nōo kē ī wɛ ɛyɛ́ɛ́yí hī odúúdú aájɔ̄ɔ̄cɛ́ ohile ā tá. Ó gēe je odúúdú ɛcɛ catāajɛ klla í lɛ ikpó da ɔ́ tāajɛ.

²⁴Aájī igwó ɔ́ɔmā, wɛ aɔ́cɛ́ igwó nēe gáā gbō ajɔ̄ɔ̄cɛ́ ɔ́ɔmā ā. Ɔcɛ́ ɔhá kē ī wā, ó kē ī wɛ ɛyɛ́ɛ́yí hɛ aɔ́cɛ́ ohile ā tá. Ó kē í je aɔ́cɛ́ ɛtá ā kpó nū wā ajɛ ŋmá akpa kú ɔcɛ́

²⁵Ó géē kɛlā obɔ̄bí lɛyíkwu Ɔwɔicō nōo fíyɛ́ dúú ā, ó klla ī yá ācɛ kú Ɔwɔicō ōwē í lɛ abɔ̄ da uwá ɛyí tāajɛ. Ó géē yá abɔ̄ dóódu cɛ́ɛ́ kóō kwú íne kú Ɔwɔicō mɛ́mla ɔwɛ nɛ̄ ācɛ kú Ɔwɔicō gē bī le gbɛ̄ɛ̄gbā ā í pīyabɔ̄. Ācɛ kú Ɔwɔicō kē ī bá ɛháajɛ ɔfú kú nū iháyí ɛtá ce ɔyā ɛhīlī.

²⁶Cɛ́ɛ́ ācɛ o kɛ̄pɔ̄ kú ɔkpáncō ā kē ī cīce kéē kɛpɔ̄ tū ɔ̄. É í mīyɛ ɔfú mɛ́mla íkwu kú nū ŋmá ɛgiyí nū, dúúdú klla í je ɔ́ yíífi ŋmá ajɛ dúúdú.

²⁷Anɔ́ɔ Ɔwɔicō nōo lɔfú fíyɛ́ dúú ā géē je ɔfú mɛ́mla íkwu lɛ ācɛ ɔlɛ́ nū kéē bī le gbō ācɛ. É í cɔcɛ́ géē bī ɔfú nɛ̄hi le gbō odúúdú aɔ́cɛ́ kú ipú ɛcɛ ā kpɛ́mm. Ɔfú kú ɔcɛ́ kú uwā nyā í gáā mɛ gɛ ŋ́. Odúúdú aɔ́cɛ́ kú ɛjɛ̄ɛ̄jī ɛcɛ ā í cɛ̄ ūwā ɛhɔ̄ klla í lɛ ojīlīmā ce uwá.”

²⁸Ɛ̄nyā wɛ oŋmɛ́yí kú ɛbɛ ā á. Ɛ́gɛ́nɛ̄ ɔtū wogodo gā um lɛ ā, ó cɛ̄ gā um kwú ŋmɛ́nɛ̄hɛ́ ŋmá ajɛ, n kē le ɔdā dóódu ā kpó tū ipú ɔtū.