Read idoma UHOSÍI 10 Bible Online

UHOSÍI 10 - idoma bible

UHOSÍI 10

¹Ó ka ācɛ Ísrɛ̄lu ɛ́ɛ lɛbɛ̄ɛka ɔcí kú ufáyin nōo gwá īkpō alɛwa ā. Ɛ́gɛ́nɛ̄ é gbo agbénú nwuné lɛ ā, ɛ́gɔ́ɔmā nēé gwó ede kú aɔ́wɔ lɛ á. Ó klla ka ka ɛ́gɛ́nɛ̄ ajɛ kú ūwā ɔ́ɔ yá ɔdɛ̄hɔ̄ nwuné lɛ ā, ɛ́gɔ́ɔmā nēé yá ɔ́kpa kú aɛ́cɔ̄ nēé gē gbā ɔ̄ ɛ̄gbā ā lɔhi tōōtɔ̄ɔ̄ lɛ á.

²Ó ka ɔtū kú uwā ɔ́ɔ ī plla uwá. Ka é géē móōwē kú íne nɛ́ɛ bīya ā. Ó klla ka Óndú ā ɔ́ɔ géē je ɔ́kpa kú ɛcɔ̄ kú ūwā nɛ́ɛ gē gbō ɔ̄ ɛ̄gbā ɔ́ɔmā kpó yíífi.

³Ó ka eko kpií ā, ācɛ ā géē bá ī ka ka aá í lɛ ɔcɛ́ ɛ́ɛ́ gɛ ŋ́, ohígbū ka aá í yúufi Óndú ā ŋ́. Amáŋ, é ka ɔdí nɛ̄ ɔcɛ́ ɔ́ɔ kōō í yá lɛ aá ɛ́ɛ́ māa?

⁴Ó ka ācɛ ā ɔ́ɔ gē kɛlā ɛfulɛ́ɛfu ŋmá okónu, klla ī cokónu nēé gē yá ŋ́. É klla ī gwɔ́kpá ɛ̄kɛ̄mgbɛ̄. Ó klla ka ka ɛpɔ̄ okpaakpa ɔ́ɔ kwú pīya ɛpɔ̄ újí bɛ̄ɛka ɔha nōo yɔ̄ ipú ajɛ nēé le hí ɛɛ́ mā.

⁵Ó ka ācɛ nēe lā Usamérīya ā géē fīyégbúlú ohígbū ufi, klla ī yēkwu kú ojibó kú ɛna kú oje ugóolu (oje ɔdɔ) [9] nōo yɔ̄ Ubetafín[10] kú uwā, nōo yɔ̄ Ubɛ́tɛlu ā. Ācɛ ā mɛ́mla ācogwɛ́ɛya nēe gē pā ɛcí ɔ́ɔmā ā, géē jikwū ohígbū nū. É géē jikwū eko nɛ̄ ɛgahi kú ɛna kú oje ɔdɔ ā mɛ.

⁶Ó ka ka é géē je ojibó kú ɛcí ɔ́ɔmā ā ga Asírīya géē je ɔ́ gbā ɔcɛ́nɛ̄hi kú Asírīya ā ɛ̄gbā, kóō wɛ ɔdá kú ojīlīma kú nū nēé bī gé lɛ ɔ́ ŋmá ɛfú. É géē kpó uwēyī tū Ísrɛ̄lu ɛyí. Uwēyī klla géē kwú ɔ́, ohígbū ɛcí ɔ́ɔmā nēé gē gbā ɔ̄ ɛ̄gbā ā.

⁷Ó ka ɔcɛ́ kú Usamérīya géē je yíífi bɛ̄ɛka āpū kú ɔcí lígíí, nōo ce eyī éŋkpɔ̄ ā.

⁸Ɛyí ɛfu kú Afɛ́n, ɛga nɛ̄ ācɛ kú Ísrɛ̄lu pā ɛcí ɔ́ɔmā, ácí mla ujē géē bū tū ɛyí ede kú uwā. Ó ka é géē da ɛfu nɛ̄hi kéē wā í kwú aá ú tayínū ipú nū, é klla í da aɛ́fu nɛ̄ŋ́cɛ́ ā kéē má klá aá báajɛ.

⁹Óndú da ācɛ kú Ísrɛ̄lu ka oŋmífī ɛ̄cī kú Ugíbēya ā nēé húmáyī ī bīya íne á. Ó ka ɔ́dāŋ ka ó lɛ ā, ɛfú í cíkā ō wā í je uwá ca tāajɛ, Ugíbēya ŋ́ nɛɛ?

¹⁰Ó ka anúɔ géē nuunu tá ācɛ ā ohígbū íne nēé bīya nyā, klla í yá ūwā italā. Ó klla ka aéwo ɔhá ɛ́ɛ géē túbá tɔ̄ɔ̄há lɛyíkwu Ísrɛ̄lu, eko nēé géē yá uwā italā ohígbū íne nēé bīya ā.

¹¹Ó ka Ísrɛ̄lu ɔ́ɔ tɛtɛ lɛbɛ̄ɛka ɔyí ɛna nēé le ɛ́gɛ́nɛ̄ é ī wú īkpɔ̄dā lɛ ā nwū ɔ̄ lɔɔlɔhi ā. Ó ka anúɔ kwú úkplākā kú ɛnū ɔcí ō bī hɛ́hɔ̄ ā ú wu ɔ́ ɔkɔ cɛ́ɛ́ kóō yúklɔ́ olɔfú. Ó ka anúɔ cɛ̄ lɛ Ujúda pí úkplākā ɔcí ō bī lɛ hɛ́hɔ̄ ā ajɛ. Ísrɛ̄lu géē yɔ̄ ī pi úkplākā ō bī le hɛ́hɔ̄ ā.

¹² Ó ka anúɔ da ɔ́ kóō lɛ ajɛ ɛ̄yīpɛ̄ hí lɛ iyī nū, cɛ́ɛ́ ká ō lɛ īkpō kú ucē okpaakpa ō yá nyi tū ɔ̄. Cɛ́ɛ́ kéē lɛ īkpō kú ɔhā nōo ī bɛ̄ɛcɛ ŋmá ɛyí ō lɛ táajɛ lɛ anúɔ ā cē. Ó ka eko ɔ́ɔ le yá nēé géē kwúcē igbīhi wā ɛgiyí anúɔ nɛ̄ ɔ́ wɛ Óndú ā ɛɛ́. Cɛ́ɛ́ ka anúɔ yā ɔhā wāajɛ kla uwá.

¹³Amáŋ, ó ka ikɔkɔ ɔ́ɔmā ɛ́ɛ le obɔ̄bí nyī, anɔ́ɔ é le īkpō kú nū cē á. Ó ka ɛ́ɛ le īkpō nɛ̄ ɛ̄kɛ̄mgbɛ̄ kú ūwā ɔ́ɔ nyī ā cē ɛ́ɛ́. Ó ka ohígbū ka é lɛ ɔtū kpó ce úgbɔ́nya ō kpɛ́fú kú ūwā mɛ́mla mla ɔkpacaŋgelī kú aícɔ́ɔja kú uwā ā,

¹⁴O ka ɛfú ɔ́ɔ géē wā ɛgiyí ācɛ ɔlɛ́ ūwā, ka odúúdú inɔ̄ɔda ɔkplɛ́fú kú ūwā ɔ́ɔ géē je kpó yíífi. Ó ka ɔ́ɔ géē lɛbɛ̄ɛka ɛ̄cī nɛ̄ ɔcɛ́ kú Ussáman je ipú ɔlɛ́ kú Ubɛtábɛ wúlatāajɛ eko nɛ̄ ó kpɛ́fú tú ūwā ā, nēé je aɛ́nɛ́ mla ayí ūwā kpó ŋmó ā.

¹⁵Ó da ācɛ kú Ubɛ́tɛlu ka ɔdā ékpónú ɔ́ɔmā gáā yá ūwā ohígbū ɔ́bíipú nɛ̄hi nēé bī ā. Ó klla ka ka ɔkwɔɔkwu nɛ́ɛ géē gbɔɔ́ ō kpɛ́fú ā, ɛ́ɛ géē je ɔcɛ́ kú Ísrɛ̄l ŋmó.