Read idoma UHOSÍI 11 Bible Online

UHOSÍI 11 - idoma bible

UHOSÍI 11

¹Óndú ā ka ka eko nɛ̄ Ísrɛ̄lu ɔ́ɔ wɛ ɔyípɛ̄ ɛ́ɛ́ ma, anɔ́ɔ yíihɔtū tá ɔ̄. Ó ka ɔ́ɔmā ɔ́ɔ yá ɛ́ɛ́ nɛ̄ anúɔ bī ɔ̄ bɛ̄cɛ ŋmá Íjīpiti á.

²Ó ka amáŋ ɛ́gɛ́nɛ̄ anúɔ bī uwā bɛ̄cɛ fíyaa lɛ ā, ɛ́gɔ́ɔmā nēé nyɛ̄ɛ̄ ŋmá ɛgiyí anúɔ fíyaa lɛ á. Ó ka ācɛ ɔlɛ́ anúɔ ɛ́ɛ bá ī gwɛ́ɛya lɛ Ubáal, klla bá ī yi ɔtulalī ɔlá lɛ aɛ́cí ā.

³Ó ka anúɔ bī ācɛ Ísrɛ̄lu abɔ̄ nɛ̄ anúɔ nwū uwā iyāwu ō yɛ á. Amáŋ, é ka ɛ́ɛ́ jé kwu anúɔ ka anúɔ ɔ́ɔ leyīkwu uwá ā ŋ́.

⁴Ó ka anúɔ le abɔ̄ tū ūwā abɔ̄ ipú eyīnyinyi mla ihɔtū. Ó ka anúɔ kwú uwā bɔ́ɔ́tū, le ábáa bá uwā ábáa, Ó klla ka anúɔ túkpɛɛ́, ɛ́ɛ́ nɛ̄ anúɔ gē je ɔdōlé lɛ uwá á.

⁵Ó ka ɛ́ɛ géē cīgbīhi ga ajɛ kú Íjīpiti. Ka ācɛ Asírīya géē wɛ ɔcɛ́ kú uwā piíí, ohígbū ka é tá kéē cīgbīhi wā ɛgiyí anúɔ.

⁶É géē wā í kpɛ́fú tá aígelī nɛ̄hi kú uwā lɔfú-lɔfú, klla í je odūngwɔ̄wɛ nɛ̄hi kú igá kú uwā ā kpó ca. Ó ka ɛfú ā ɔ́ɔ géē je ācɛ ɔlɛ́ anúɔ kpó yíífi ohígbū ka é gē yá ɔdā nɛ̄ uwá gbɛlá ka ɔ́ɔ lɔhi fíyɛ́ dúú ā īkpēyī kú iyī uwā.

⁷Ó ka ācɛ ɔlɛ́ anúɔ lɛyí bū kwu oōnyɛ̄ ŋmá ɛgiyí anúɔ. Ó ka é géē jikwú ohígbū iyó kú úkplākā ogbɛnú nōo wu uwā ɔkɔ ā, amáŋ é gáā má ācɛ dúúma je ɔ́ ŋmá uwá ɔkɔ ŋ́.

⁸Ó ka anúɔ í gáā mā ācɛ Ísrɛ̄lu tá glá ŋ́, ɛ́ɛ́ nɛ̄ anúɔ ī cīgbīhi kwu Ísrɛ̄lu glá ŋ́. Ó klla ka ɛ́gɛ́nyā nɛ̄ anúɔ géē cīgbīhi kwu Ísrɛ̄lu āā? Ó ka anúɔ géē lɔfú yá ūwā ífi ɛ́gɛ́nɛ̄ anúɔ yá Ádima āa ámāŋ ka o yá ūwā ɔdā nɛ̄ anúɔ yá Uséboyim āa? Ó ka ɔtū kú anúɔ ɔ́ gáā cɛ̄ lɛ anúɔ yá ūwā lɛ ā ŋ́, ka ihɔtū mɛ́mla eyīnyinyi ūwā kú anúɔ ɔ́ɔ le anúɔ kwú báajɛ.

⁹Ó ka anúɔ í gáā yá ūwā italā, eko nɛ̄ anúɔ cɔ̄nū ā ŋ́. Ó ka anúɔ í gáā je Ísrɛ̄lu yíífi igbɔhá gɛ ŋ́. Ohígbū ka anúɔ wɛ Ɔwɔicō, ka anúɔ í wɛ ɔ̄cɛ ŋ́. Ó ka anúɔ nɛ̄ ɔ̄cɛ dúúmā í lɛbɛ̄ɛka anúɔ ā ŋ́ mā, yɔ̄ mla uwá. Ó ka anúɔ í gáā wā ɛgiyí ūwā eko nɛ̄ ɔtū ɔ́ɔ gē wú anúɔ ŋ́.

¹⁰Ó ka ācɛ ɔlɛ́ anúɔ géē yɛ ce anúɔ Ó ka eko nɛ̄ anúɔ géē tōoji bɛ̄ɛka ágábá lɛyíkwu aólɛlā kú uwā, é géē ŋmúleyīkwū ŋmá ɛnɔ̄ɔ̄nɛ̄ wā í yɛ ce anúɔ.

¹¹Ó ka ɛ́ɛ géē wā ŋmá Íjīpiti fíyaa bɛ̄ɛka aígbáanɔ ā. É klla í wā ŋmá Asírīya bɛ̄ɛka okóohō ā. Ó ka anúɔ géē cē uwá cīgbīhi wā ɔlɛ́ uwā kpɔ́.

¹²Óndú ā ka ācɛ kú Ísrɛ̄lu ɔ́ɔ le anúɔ yɛ jīla tá mla ɛ̄kɛ̄mgbɛ̄, mla ɛ́plla. Ó ka ācɛ kú Ujúda ɛ́ɛ bá ī yíīkpɛ̄yí olɔfú tá anúɔ nōo tīihɔ ā kpɔ́ ɛ́ɛ́.