Read idoma UHOSÍI 13 Bible Online

UHOSÍI 13 - idoma bible

UHOSÍI 13

¹Eko tɛtɛ ā, eko nɛ̄ Ɛfrēm le ɛlā ka, ācɛ gē fīyégbúlú. Ācɛ kú Ísrɛ̄lu o hile le eyī kpóce Ɛfrēm. Amáŋ, ó le íne bīya, o ŋmá lɛ Ubáal nɛ̄ ó pā ā. É géē pɛ́ kwú ohígbū íne nēé bīya nyā ā.

²Ó ka ɛ́ɛ bá ī bīya íne ā gɔbū kpɔ́, o ŋmá lɛ íkpékwīja kú oje nēé yɔ̄ ī ma ā, mɛ́mla ɛcí kú oje nɛ̄hɛ́ nēé yá ŋmá ɛlá nɛ̄ ɔtū kú uwā gbo, nɛ̄ ɔlɛɛcɛ klla bī abɔ̄ yá ā, anɔ́ɔ ɛ́ɛ klla géē ka ka aá gwɛ́ɛya lɛ uwá. Ó ka ɔwɛ nyá nɛ̄ ācɛ ɔ́ɔ bá ī lɛ okónu kwu ojibó kú ɛcí nēé yá ɛ́gbla ɔbá ɛna ā okónu ā.

³Ó ka ohígbū ɛ̄nyā ā, ācɛ nēe bá nyā géē lɛbɛ̄ɛka ébú kú ɔ̄cɔ̄ɔ̄cī ā, ébú kú ɔ̄cɔ̄ɔ̄cī nɛ̄ ó gē yɔ̄ gbó ɔlɛ́ɛnɔ ŋ́ mā. Ó ka ɛ́ɛ géē lɛbɛ̄ɛka igbóngbō kú īkpɔ̄dā, nɛ̄ owu gē kpó bónū ŋmá ɛga owíīkpo-ɔ̄dā ā. Ó klla ka ka ɛ́ɛ géē lɛbɛ̄ɛka ódūdū, nōo yɔ̄ ī bɛ̄cɛ ajīlɛ̄yí inu ā.

⁴Ó ka anúɔ wɛ Óndú, Ɔwɔicō kú ūwā, nōo kpó ūwā bɛ̄cɛ ŋmá ajɛ kú Íjīpiti á. Ka ɛ́ɛ híī lɛ Ɔwɔicō ɔhá gwū anúɔ tá gɛ ŋ́. Ka anúɔ ōfōōfūnū ɔ́ɔ wɛ ohɔ́nyɛtá kú ūwā á.

⁵ Ó ka anúɔ leyīkwu uwá ipú ígbíli, ajɛ íkpākplā á.

⁶Amáŋ ó ka eko nɛ́ɛ le tá ajɛ olɔhi, le ɔdōlé lé, le ipú nū ā, ɛ́ɛ gbɔɔ́ ō yá ɔbɔ́ɔ̄cɛ klla kwú mlanyī anúɔ.

⁷Ohígbū ɔ́ɔmā ā, ó ka anúɔ géē nuunu tá ūwā bɛ̄ɛka ágábá ā, bɛ̄ɛka ɛjɛ ā, ka anúɔ géē kwāajɛ ɔwɛ gbēyī ūwā.

⁸Ó ka anúɔ géē nuunu tá ūwā bɛ̄ɛka ɔgwú nēé kwú ayí nū ú kpó uwī ā. Ó klla ka anúɔ géē je uwá ipú kpó yíla, ka anúɔ klla géē je uwá kpó yíífi ŋmá ajɛ bɛ̄ɛka ɛ́gɛ́nɛ̄ ágábá gē je ɛbɛ́ híla lé ŋmá ajɛ ā.

⁹Ó ka anúɔ géē kpó ācɛ Ísrɛ̄lu yíífi. Ka ɔ̄nyɛ ɔhá ɔ́ɔ yɔ̄ nōo géē tá ūwā abɔ̄ glá āā?

¹⁰ Ó ka ɛ́ɛ da anúɔ ɔ̄kā ka anúɔ kwú ɔcɛ́ mɛ́mla otrɛ̄yí í kpó lɛ uwú. Ó klla da uwá ɔ̄kā ka iní nɛ̄ ɔcɛ́ mɛ́mla otrɛ̄yí kú ūwā ɛ́ɛ bá abālɔbányā ā kéē nya uwá tá ā?[11]

¹¹ Ó ka ipú ícɔ̄nū kú anúɔ, anúɔ le aɔ́cɛ́ kpó lɛ uwá. Amáŋ ipú íwɔ́tū kú anúɔ, anúɔ le aɔ́cɛ́ ā kpó ŋmá ɛgiyí ūwā.

¹²Ó ka é le íne nɛ̄ Ísrɛ̄lu bīya ā tá tāajɛ, é klla kwú ɔ̄ ú tayínū lɔɔlɔhi.

¹³Ó ka Ísrɛ̄lu ɔ́ɔ lɛ ɛga kóō yēeyī kpɔ́ ɛ́ɛ́, amáŋ íla kú nū ā í je ɛga lɛ ɔ́ ŋ́. Ó ka Ísrɛ̄lu ɔ́ɔ lɛbɛ̄ɛka ɔyí nēé gáā ma, nōo tá kóō wɛ̄ɛcɛ ŋmá ipú kú ɛ́nɛ́ nū ā.

¹⁴ Ó ka anúɔ í gáā nyā ācɛ nēe bá ɔ́ɔmā tá, ŋmá abɔ̄ kú ɔlékwū ŋ́. Anúɔ í klla gáā hɛ́ ūwā tá ŋmá ɔfú kú ikwū ŋ́. Ó da ikwū kóō bī ōcē obɔ̄bí kú nū ā wā. Ɔlékwū, kóō bī ífi kú nū ā wā. Ka anúɔ í klla gáā ményīnyi ācɛ nɛ̄ bá ā igbɔhá ɛ́ɛ́ gɛ ŋ́.

¹⁵Ó ka nááná nɛ̄ Ísrɛ̄lu ɔ́ɔ kōō jɛ̄ bɛ̄ɛka ácí kú okónu ɔkpá ā. Ó ka anúɔ géē tū owu okwɔ́lá kú ɛnɔ̄ɔ̄cī ā wā í je njɔlɔ kú éŋkpɔ̄ kú nū ā ŋmó ŋmá ajɛ. Ɔdā dóódu nōo ce ɔ́ ɛ̄gbā kóō bī ɔ̄ jɛ̄ ā, anúɔ géē kpó ɔ̄ ŋmá ajɛ.

¹⁶Ó ka anúɔ géē yá Usamérīya italā ohígbū īkpɛ̄yí olɔfú nɛ̄ ó yá tá anúɔ ā. Ó klla ka ācɛ kú Usamérīya ɔ́ɔ géē pɛ́kwú ɔgbɛ́fú. Ka é géē kpó ayípɛ̄ ɔlɛ́ ūwā, í tá ūwā fīyajɛ kéē pɛ́kwú. É kē í klla je anyā ō yīipú kú uwā ipú yíla klá ɛcɛ.