Read idoma UHOSÍI 14 Bible Online

UHOSÍI 14 - idoma bible

UHOSÍI 14

¹Ó da ācɛ Ísrɛ̄lu kéē kwúcē ga ɛgiyí Óndú, Ɔwɔicō kú úwā ā. Ó ka íne nēé bīya ā, ɔ́ɔ cɛ̄ lɛ uwá le ikpó gbāājɛ klla má gwōnū.

²Ó da uwá kéē kwúcē ga ɛgiyí Óndú ā, Ɔwɔicō kú ūwā, cɛ́ɛ́ kéē cɛ̄ kú ɔkɔ nēé gbā ā kóō kwú pīya bɛ̄ɛka ɛya nēé gwó lɛ ɔ́ ā. É da ɔ́ kóō kwú odúúdú íne nɛ̄ aá bīya ā í yá aá ɛhi, kóō klla lɛ ɔkɔ nɛ̄ aá gbā lɛ ɔ́ ā pó, cɛ́ɛ́ kú aá géē cɛ̄tra anú ɛ́gɛ́nɛ̄ aá cokónu lɛ ā.

³É ka ācɛ Asírīya í nya aá tá glá ŋ́, ɔnya o kpɛ́fú ō lɛ ɔ́ɔ́ kē gbō aá glá ŋ́, ɛ́ɛ́ nɔ́ɔ gē hɛ́ aá tá glá ŋ́. É ka aá í gáā da íkpíkwīja nɛ̄ aá ɔ́ɔ bī abɔ̄ kú aá yá ā ka ɔ́ɔ wɛ Ɔwɔicō kú aá ɛ́ɛ́ gɛ ŋ́. É ka Óndú, ɔ́ɔ gē ményinyi kú ayókwū.

⁴Óndú ā ka anúɔ géē bī ācɛ ɔlɛ́ anúɔ cīgbīhi wā ɛgiyí anúɔ. Ó ka anúɔ géē yíihɔtū tú ūwā mla odúúdú ɔtū kú anúɔ. Ó ka anúɔ í klla gáā cɔ̄nū mla uwá ɛ́ɛ́ gɛ ŋ́.

⁵Ó ka ɛ́gɛ́nɛ̄ ɔwɔ ɔ́ɔ gē yá tāajɛ oŋmókókó kú ácí kóō lū kpɔ́ ā, nɛ̄ anúɔ gáā yá lɛ mla ācɛ kú Ísrɛ̄lu á. Óndú ā ka anúɔ géē bu uwá tū kli bɛ̄ɛka aɔ́cí kú Ulɛ́bānɔn ā.

⁶Ó ka é géē yēeyī, í lūgwū ɛ̄yīpɛ̄ klla í lɔhi bɛ̄ɛka ɔcí nēé hī ka ɔlífu ā. Ó ka ɛ́ɛ géē kpóocu kwūū bɛ̄ɛka ɔcí nēé hī ka Usɛ́da kú Ulɛ́bānɔn ā.

⁷Ó klla ka ɛ́ɛ géē bá ɛga nɛ̄ anúɔ géē leyīkwu uwá kpɔ́ ɛ́ɛ́ mā. Ó ka, ɛ́ɛ géē nyi īkpɔ̄dɛ̄hɔ̄ kú uwā ipú ajɛ ā, ó ka ɛ́ɛ í ma nyīla bɛ̄ɛka ɔcí kú ufáyin ā. Ó ka ɛ́ɛ géē lóofu bɛ̄ɛka ejé kú Ulɛ́bānɔn ā.

⁸Ó ka ācɛ Ísrɛ̄lu, “Ɔdí nɛ̄ n gē yá mla íkpékwīja ā? Ami ā gē pó ɔkɔ nɛ̄ aá gbā ā, klla gē leyīkwu aá má. Ami ā lɛbɛ̄ɛka ɔcí nēé hī usáyipurɛ̄si nɛ̄ ēpū kú nū gē wɛ ɛ̄mɛ̄ɛ̄mɛ̄ cɔŋgɔdɔ́ɔ́ piyóó á, ɛgiyí um nɛ̄ ɔhā kú aá gē ŋmá á, ɛ́gɛ́nɛ̄ ɔcí ā gē gwá īkpō ā.”

⁹Ó ka ɔ̄cɛ dúúmā nɔ́ɔ jéeyī kóō jé ɔdā nēé tá ā. Ó ka ɔ̄cɛ dúúmā nōo lɛ ohílīpú kóō kwú ɔ̄ ú tá ɔtū, cɛ́ɛ́ kóō jé ɔ̄. Ɔwɛ kú Óndú ā ɔ́ɔ le kpaakpa nɛ̄ ɔ̄cɛ nēe gē yá ɔdā okpaakpa ā géē yēeyī ŋmá lɛ ō yɛ ce ɔ́. Amáŋ ka ācobɔ̄bíipú ā gē túgagá gē gwōnū, ohígbū ka é kwú eyī í gwū ɔ̄ bónū.