Read idoma UHOSÍI 2 Bible Online

UHOSÍI 2 - idoma bible

UHOSÍI 2

¹Anɔ́ɔ ɛ̄cī ɔ́ɔmā, a géē hī ayínɛ́ uwɔ “Ācɛ ɔlɛ́ Ɔwɔicō” ā mɛ́mla ayínɛ́ uwɔ nɔ̄nyā nēé hī ka “Ācɛ nɛ̄ Óndú ményīnyi uwā ā” igwú.

²Aá nēe wɛ ācɛ Ísrɛ̄lu nēe lɛbɛ̄ɛka ayí um ā, aá gbɔ̄ɔkɔ lɛ ācɛ éwo kú Ísrɛ̄lu nēe lɛbɛ̄ɛka ɛ́nɛ́ aá ā. Nááná nɛ̄ n tá ācɛ Ísrɛ̄lu ɛ́gɛ́nɛ̄ ɔ̄cɛ ī tá ɔnyā nū, ka ó wɛ ɔnyā anúɔ gɛ ŋ́ mā, ka anúɔ í kē wɛ ɔbá nū gɛ ŋ́ mā. Aá da uwá kē mā ɛcí ō pā tá, ɛ́gɛ́nɛ̄ ɔnyā ō gbajā nōo klla yɔ̄ ī yá akwuna ā, cíkā ō habɔ̄ ɔ̄ tá ā.

³Ɔ́dāŋ ka ācɛ Ísrɛ̄lu í mā ɛcí ō pā tā ŋ́, ɔwɛ éékpó ɔ́ɔmā, nɛ̄ ɔnyā ā, í kē habɔ̄ ajā ō gbo mla akwuna ō yá tá ŋ́, n géē je ajɛ kú ācɛ Ísrɛ̄lu tá áncā, ɛ́gɛ́nɛ̄ ɔ̄cɛ gē je ɔnyā ōgbajā tá ohɛ́ɛwa bɛ̄ɛka ɛ́gɛ́nɛ̄ ó wɛ eko nɛ̄ ɛ́nɛ́ nū ma ɔ́ ā. N géē yá ɔ̄ kóō kwú pīya bɛ̄ɛka ajɛ o ŋmókókó mɛ́mla ɛ̄nɛ̄ ó yá ɔdɛ̄hɔ̄ dúú glá gɛ ŋ́ mā. Ijēēnyi géē je uwá kpó ŋmó.

⁴Ń gáā ményinyi ayí kú ācɛ Ísrɛ̄lu ŋ́ dúú, ɛ́gɛ́nɛ̄ ɔbá ɔnyā akwuna ā í gáā ményinyi ayí kú ɔnyā ā ŋ́ mā. Ohígbū keé wɛ ayí kú ajā nɛ̄ ɛ́nɛ́ ūwā gbo ā, mɛ́mla ayí kú akwuna ō yá kú nū.

⁵Ohígbū keé wɛ ayí kú ācɛ opɛ̄cí ɛ́gɛ́nɛ̄ ayī kú akwuna nɛ̄ ó jé ɔdā uwēyī ŋ́ mā lɛ ā. Ɔnyā ka anúɔ géē ga ɛgiyí aɔ́ya anúɔ nēe gē je ɔdōlé mɛ́mla éŋkpɔ̄ lɛ anúɔ gwá ā. Ó ka ācɛ gē kpó īlī ewulu mla īlī inyaŋgbɛ, anɔ̄ kú ɔcí nēé hī ólīfu mla ejé lɛ anúɔ dúú.

⁶Ohígbū ɔ́ɔmā ā ó ka anúɔ géē bī ɔcí ujē lɛ cē igá tū ɔ̄. Ó ka anúɔ klla í ma ɔdɔ yɛ jīla ɔ́ tá kóō lɛ ɔwɛ ŋmó tū ɔ̄.

⁷Ó géē kwu lɛyíkwu ga ɛgiyí aɛ́cí nēé gē pā, ɛ́gɛ́nɛ̄ ɔnyā gē kwu ga ɛgiyí aódiyɔ̄ kú nū ā. Amáŋ ó gáā kwú uwā ŋ́. Ó géē tíne uwā, amáŋ ó gáā má uwā ŋ́, cɛ́ɛ́ ó ī ka ka anúɔ géē cīgbīhi ga ɛgiyí ɔbá aflɛ́yí kú anúɔ ā, ɛ́gɛ́nɛ̄ ācɛ Ísrɛ̄lu í cīgbīhi ga ɛgiyí Óndú ā. Ó í ka ka eko nɛ̄ anúɔ yɔ̄ mla anú ā, ɔ́ɔ lɔhi lɛ anúɔ fíyɛ́ ɛ́gɛ́nɛ̄ ó lɛ abālɔbányā.

⁸Ācɛ Ísrɛ̄lu í kōō jé ka ami ɔɔ́ wɛ ɔ̄cɛ nōo gē je īkpɔ̄dā, ejé, anɔ̄, mla oje nɛ̄hɛ́ mɛ́mla oje ɔdɔ lɛ uwá nēé gē bī lɛ gbā ɛcí nēé hī ka Ubáalu ɛ̄gbā ā ŋ́.

⁹Ohígbū ɔ́ɔmā ā, ó ka anúɔ géē mīyɛ īkpɔ̄dā mla ejé kú anúɔ ā ŋmá ɛgiyí uwā. Ó ka anúɔ klla í mīyɛ īlī ewulu mla īlī inyaŋgbɛ lɛ ɔ́ kóō le klá ohɛ́ɛwa kú nū ā.

¹⁰Ó ka anúɔ géē je ɔ́ tá ohɛ́ɛwa ipéeyī aɔ́ya nū, nɛ̄ ɔ̄cɛ dúúmā kú uwā í gáā nya ɔ́ tá ŋmá abɔ̄ kú anúɔ glá ŋ́.

¹¹Ó ka anúɔ géē je aúcɛ kú nū mla aúcɛ kú iháyí iháyí mɛ́mla aúcɛ kú ɔyɔ̄ɔ̄yā mla éeyē ō gwó kú ɛ̄cī usábāti kú uwā bī wā oŋmɛ́yí.

¹²Ó ka anúɔ géē je aɔ́cí ufáyin kú nū mla aɔ́cí ufígi kú nū, nɛ̄ ó ka ka aɔ́ya anúɔ ɔ́ɔ je cíla anúɔ ulé ā yíífi. Ó klla ka anúɔ géē je ɛhɔ̄ kú ɔcí ufáyin kú nū ā pīya ígbíli nɛ̄ aɛ́bɛ́ obɔ̄bí géē kpó uwā yíífi.

¹³Ó ka anúɔ klla géē yá ɔ̄ italā ohígbū eko nɔ́ɔ je mlanyī anúɔ nyɔ̄ ī yi ɔtulalī ɔlá lɛ Ubáal ā, nɛ̄ ó je agbá kú nū tū ojibó kú ɛcí ā ɔkɔ, nyɔ̄ í tá aɔ́ya nū ɔkwu ā. Ó ka anúɔ nōo wɛ Óndú ā kɛlā ā á.

¹⁴Ó ka anúɔ géē bī ɔ̄ ga ipú ígbíli igbɔhá kpɔ́ ɛ́ɛ́. Cɛ́ɛ́ abɔ́ɔ ā, anúɔ géē kɛlā ihɔtū lɛ ɔ́ nōo í cɛ̄ lɛ ɔ́ kwúcē igbīhi wā ɛgiyí anúɔ.

¹⁵Ó ka anúɔ géē je ɛhɔ̄ kú ɔcí ufáyin kú nū ā cīgbīhi lɛ ɔ́, cɛ́ɛ́ anúɔ klla í je ɔpɛ́ nēé í hī ka unwalu ā pīya ɔwɛ kú eyīyōce. Óndú ā ka ɔ́ɔ géē cɛ̄lā kú anúɔ abɔ́ɔ, ɛ́gɛ́nɛ̄ ó yá eko nɛ̄ ó wɛ ɔ́ncɛ́nyā a. Eko nɛ̄ ó bɛ̄cɛ ŋmá Íjīpiti ā.

¹⁶Ó ka ɔ́ɔ gēe hī anúɔ ka ɔbá nū, igbɔhá kpɔ́ ɛ́ɛ́. Ó gáā hī anúɔ ka ubáal kú anúɔ gɛ ŋ́[3]

¹⁷Ó ka anúɔ í gáā cɛ̄ lɛ ɔ́ kɛlā hī iyē kú ɛcí nēé hī ka Ubáal ā igbɔhá ɛ́ɛ́ gɛ ŋ́.

¹⁸Ó ka anúɔ géē cokónu mla odúúdú aɛ́bɛ́ obɔ̄bí mɛ́mla aígbáanɔ eko ɔ́ɔmā, nēé gáā yá ācɛ ɔlɛ́ anúɔ ɔdā dúúmā ɛ́ɛ́ gɛ ŋ́. Ka anúɔ géē kpó iyó ɛfú dóódu ŋmá ajɛ ā kú ācɛ ɔlɛ́ anúɔ, kwu odúúdú ɔkpacaŋgelī mla ɔtā mɛ́mla ɔyī, cɛ́ɛ́ kéē lā ɛbɔ́.

¹⁹Ó ka anúɔ géē je Ísrɛ̄lu pīya ɔnyā anúɔ, ɛ́gɛ́nɛ̄ ɔ̄cɛ í kɛlā ā, ka anúɔ í yá ucē okpaakpa mɛ́mla ɔkwɛ̄yi mla anú, Ó ka anúɔ í yíihɔtū nɛ̄ ó ī mɛ ŋ́ tū ɔ̄. Anúɔ klla í ményīnyi nū.

²⁰Ó ka anúɔ géē yá okónu nɛ̄ anúɔ ce lɛ ɔ́ ka anúɔ í je ɔ́ pīya ákú anúɔ ā jīla. Ɔ́ɔ kē í cɛ̄ ka anúɔ wɛ Óndú nū.

²¹Óndú ā ka ipú ɛ̄cī ɔ́ɔmā ā, anúɔ géē je ɔ́da lɛ ɔkpáncō kóō lɛ ɔwɔ yā wāajɛ.

²²Anɔ́ɔ ajɛ kē í yá īkpɔ̄dɛ̄hɔ̄ mla ɔcí ufáyin, mla ɔcí nēé hī ólīfu ā, ɔpɛ́ nēé hī Ujésiríilu ā.

²³ Ó ka anúɔ géē kpó ācɛ ɔlɛ́ anúɔ bá ipú ajɛ ā, klla í yá kéē jɛ̄ gɔbū ipú ɔdā dóódu nēé gē yá ā. Ó klla ka ácɛ nēé hī ka “Ń ményinyi uwɔ ŋ́ mā,” ka anúɔ í ményinyi uwā. Ka ācɛ nɛ̄ anúɔ hī ka “É wɛ ācɛ ɔlɛ́ um ŋ́ mā,” géē pīya ācɛ ɔlɛ́ anúɔ. Ó klla ka ācɛ ā géē tóohi ka anúɔ wɛ Ɔwɔicō kú uwā á.