Read idoma UHOSÍI 4 Bible Online

UHOSÍI 4 - idoma bible

UHOSÍI 4

¹Aá pó ɛlā kú Óndú ā, ācɛ kú Ísrɛ̄lu. Ohígbū ka Óndú ā le ɛlā kpó ce aá nēe wɛ ācɛ kú ajɛ ā, ohígbū ka aá í yá ūcē nōo lɛ kpaakpa ipéeyī Ɔwɔicō gɛ ŋ́. Aá klla ī gbonɛnɛ lɛ aɔ́mpa aá gɛ ŋ́. Ɔ̄cɛ dúúmā í cɛ̄ɛ̄lā kú Ɔwɔicō ipú ajɛ ā ɛ́ɛ́ gɛ ŋ́.

²Ācɛ alɛwa ipú ajɛ ā bá ī gbɔkpá ɛ̄kɛ̄mgbɛ̄, ó ka é bá ī kɛ̄mgbɛ̄ klla bá ī ŋmó ɔ̄cɛ, bá ī wūwī klla bá ī gbaajā ipú ajɛ ā. Ó ka ɛ́ɛ le odúúdú aíne kpó bīya.

³Ohígbū ɛ̄nyā yá nɛ̄ ajɛ ā je ŋmíkpākplā, anɔ́ɔ ɔdā dóódu í yɔ̄ ipú nū gɛ ŋ́ má. Kwu aɛ́bɛ́ mɛ́mla aígbáanɔ mɛ́mla aébéenyi le pɛ́ gekwú ɛɛ́.

⁴Nááná ā, Óndú ā ka ɔ̄cɛ dúúmā kóō kpɛ́lāce ācɛ ā ŋ́, ɛ́ɛ́ nēé gē ka ífulá tū uwā ŋ́. Ó ka ācogwɛ́ɛya ā nɛ̄ anúɔ lɛ ikpɛ́lā mla uwá á.

⁵Ó ka ācɛ ā ɛ́ɛ gē túgagá ɔlɛ́ɛnɔ, ācomɛ́ɛbɛ́ ā gē túgagá otú. Ó ka anɔ́ɔ géē je Ísrɛ̄lu ɛ́nɛ́ uwā yíífi.

⁶Ó ka é ī kpó ācɛ ɔlɛ́ anúɔ yíífi ohígbū ka é jé kwu anúɔ ŋ́. Óndú ā klla ka abɔ̄ ācogwɛ́ɛya tá kéē lɛyí táajɛ lɛ íne kú anúɔ nōo wɛ Ɔwɔicō kú uwā ā, ohígbū ɔ́ɔmā anúɔ géē tá ūwā, ka é wɛ ɔ̄comɛ́ɛbɛ kú anúɔ gɛ ŋ́. Ó ka anúɔ klla í tá ayí uwā dúú.

⁷Ó da uwá ka abɔ̄ nēé nyīla lɛ ā, ɛ́gɔ́ɔmā nēé bīya íne kú anúɔ tōōtɔ̄ɔ̄ lɛ á. Ó ka anúɔ géē je ojīlīmā kú ūwā pīya uwēyī.

⁸Ó ka ɛ́ɛ gē gbagbénú ŋmá íne nɛ̄ ācɛ ɔlɛ́ anúɔ gē bīya ā, ka ohígbū ɔ́ɔmā é gē dɔɔ̄ka kéē bīya íne kú anúɔ fíyɛ́ tōōtɔ̄ɔ̄.

⁹Ó ka é géē má ɛdɔ ōwē ékpónú ā mla ācɛ o hile ā dúú. Ó klla ka anúɔ géē cíla uwá ulé, í yá ūwā italā kú íne nēé bīya ā.

¹⁰Ó ka ɛ́ɛ géē lé ɔdōlé, amáŋ é gáā nū ipú ŋ́. É géē bá ī gbā aɔ́wɔ nɛ̄ ó cíkā ŋ́ mā ɛ̄gbā, nááná é kē nyila ŋ́. Ohígbū ka ɛ́ɛ le igbīhi cēkwu anúɔ nyɔ̄ í gbā aɔ́wɔ ɔhá ɛ̄gbā.

¹¹Ó ka ejé ɛdɔ ɛyɛ́ɛyɛ́yí nēé ī gwá ā í cɛ̄ lɛ uwá jéeyī gɛ ŋ́.

¹²Ó da uwá ka é gē dɔɔ̄kā ɛbɛ oōmá ŋmá ɛgiyí ígbɔ́cí. Ka ígbɔ́cí kóō géē da uwá ɔdā nēé dɔɔ̄kā ō jé ā. Ó ka ɛ́ɛ nyɛ̄ɛ̄ ŋmá ɛgiyí anúɔ bɛ̄ɛka ɔnyā ō lɛ ɔbá, nōo je pīya akwuna ā, le kwu ga ɛgiyí aɔ́wɔ ɔhá ā.

¹³Ó ka ɛ́ɛ gē gwɛ́ɛya ɛyí aɛ́fu nɛ̄hi ā, klla ī yi ɔtulalī ɔlá ɛyí aɛ́fu nɛ̄ŋcɛ́, ɛ́ɛ ī pa ɛcí ɛháajɛ ɔkwu kú ɛdɔ aɔ́cí ɛyɛ́ɛyɛ́yí. Ó ka ohígbū ɔ́ɔmā ā, ayí nɔ̄nyā kú uwā le pīya akwuna, anyā ayínɔ̄nyīlɔ kú ūwā klla gbɔɔ́ ō gbaajā dúú.

¹⁴Amáŋ, ó ka anúɔ í gáā yá uwā italā ohígbū ajā nēé gbo ā ŋ́. Ohígbū ka uwá abɔ̄yī uwā gē ga ɛgiyí aákwuna kú aíkpɛ́cí [4]dúú. Ó ka ācɛ ā ɛ́ɛ klla ī nyɔ̄ mla uwá, gē gwɛ́ɛya lɛ ɛcí dúú. Ó ka, ka ɛ́gɛ́nɛ̄ ɛ́ɛ kwu ita ka “Ācɛ nēé jééyī ŋ́ mā í je kpó yíífi.”

¹⁵Ó ka nááná nɛ̄ uwá nēe wɛ ācɛ Ísrɛ̄lu í kōō lɛyí táajɛ lɛ anúɔ gɛ ŋ́ mā, ká ācɛ Ujúda kéē híīī yá ɔdā ékpónú ɔ́ɔmā ŋ́. É ka é híī tá uwā ɔkwu ga Ugígalu, amáŋ ka Ubɛ́tafín [5]gaá gbā ɛ̄gbā icííci ɔ́ɔmā ŋ́, ɛ́ɛ́ nēé gē bī iyē kú Óndú nōo yēeyī ā lɛ cokónu abɔ́ɔ ŋ́.

¹⁶Ó ka ācɛ kú Ísrɛ̄lu ɔ́ɔ gē yíkpɛ̄yí olɔfú bɛ̄ɛka ɛna ā. Ó ka ɔwɛ nyá nɛ̄ anúɔ í je ɔdōlé lɛ uwá bɛ̄ɛka aálá ipácí glá āā.

¹⁷Ó ka ācɛ kú Ísrɛ̄lu ɔ́ɔ kwú pīya aɔ́fiyɛ kú aɛ́cí. Ó ka é mā uwā tá kéē nyɔ̄ ɔwɛ kú abɔ̄yī uwā mɛ́ɛnɛ.

¹⁸Eko nēé lɛ ejé gwá nɛ̄hi ā, é gbo akwuna ō yá. Uwēyī he uwá ɔtū fíyɛ́ ojīlīma mla ocɛ̄tra á.

¹⁹Ó ka ofúlutu ɔ́ɔ géē kpó uwā klla í je uwá kpó nyɔ̄, cɛ́ɛ́ kú ɔdā uwēyī nēé jé ŋ́, gē nyɔ̄ ī pā ɛcí ā, lɛ uwá kpó ŋmó.