Read idoma UHOSÍI 5 Bible Online

UHOSÍI 5 - idoma bible

UHOSÍI 5

¹Ó ka ācogwɛ́ɛya kéē pó ɛlā nyā. Ó ka ācɛ Ísrɛ̄lu kéē jāhɔ̄, ācɛ kú ipɔ́ɔnū ɔlɛ́ ɔcɛ́, aá jāhɔ̄. Ó ka ɛ́ɛ cíkā ō kɛpɔ̄ okpaakpa. Ohígbū ɔ́ɔmā, Óndú ā ɔ́ɔ géē kɛpɔ̄ tū ūwā. Ó ka ɛ́ɛ lɛbɛ̄ɛka ukpa nēé tá ajɛ Umísīpa, é klla lɛbɛ̄ɛka ɛ́yá nēé tá klá ɛyí ɛfu kú Utábɔ ā.

²Ó ka ɛ́ɛ klla lɛbɛ̄ɛka ɔ̄gɔ̄[6] olipú nēé bū tayínū ipú ɔlɛ́ kú Akésiya, cɛ́ɛ́ kéē kwú ācɛ ā. Óndú ā ka anúɔ géē yá odúúdú uwā italā.

³Ó ka anúɔ jé Ɛfrēm, ka anúɔ kē jé ɔdā dóódu lɛyíkwu ɔ́. Ó klla ka ka abɔ̄ Ísrɛ̄lu ɔ́ɔ nyɛ̄ɛ̄ ŋmá ɛgiyí anúɔ bɛ̄ɛka ɔnyā ō lɛ ɔbá nōo nyɛ̄ɛ̄ nyɔ̄ ī yɔ̄ ī yá akwuna nɔ́ɔ gē je iyīnū tēelihɔ ā.

⁴Ɔdōbɔ̄bí nɛ̄ ācɛ ā yá ā í cɛ̄ lɛ uwá pīyɛyí wā ɛgiyí Ɔwɔicō glá gɛ ŋ́. Ó ka ɛcí nēé gē pā le jé ūwā iyē nɛ̄ɛ̄nɛ̄hi nēé habɔ̄ ɔ̄ tá glá ŋ́, ka ó cɛ̄ lɛ uwá jé ami nōo wɛ Óndú ā ŋ́.

⁵Ó ka ɔbɔ́ɔ̄cɛ ō yá kú Ísrɛ̄lu ɔ́ɔ géē cɛ̄ ijáalí tá ūwā. Íne nēé bīya ā géē cɛ̄ lɛ uwá lɛ ikpó gbaajɛ, klla í gwōnū. Ācɛ kú Ujúda kē í lɛ ikpó gbo ajɛ í gwōnū mla uwá.

⁶Ó ka é géē bī álá mla ɛna kú uwā i gwɛ́ɛya lɛ Óndú ā kéē lɛ Óndú ā ɔtū gbo, amáŋ ó gáā mīyɛ ŋ́. Ó nyɛ̄ɛ̄ hī uwā tá.

⁷Ó ka é yá ucē ɔwɛ okpaakpa ɛgiyí Óndú ā ŋ́. Ka ayí nēé ma ā í wɛ ayí kú Óndú ā ŋ́. Ó ka ó gbojī gɛ ŋ́, é géē je uwá mɛ́mla ajɛ kú ūwā yíífi eko kú ucɛ kú ɔyā ɛ̄yīpɛ̄.

⁸Ó ka é lɛ opo kú ɛfú tá Ugíbēya, kéē lɛ opo tá Uráma, kéē lɛ ɛgba kú ɛfú dɛ̄ Ubɛtáfin. Ó ka ācɛ kéē ga ɔgbɛ́fú, ācɛ kú Ubɛ́njamin.

⁹Ó ka ɛ̄cī nɛ̄ Óndú ā géē yá ācɛ italā yɔ̄ ī wā ɛ́ɛ́. Ó ka ɔdā ɔ́ɔmā ɔ́ɔ í yá piíí.

¹⁰Óndú ā ka anúɔ le cɔ̄nū, ohígbū ka anyākwɔ́cɛ kú Ujúda ā, le ɛfú kpó tá Ísrɛ̄lu, klla mīyɛ ajɛ kú uwā ŋmá ɛgiyí uwā. Ó ka ohígbū ɔ́ɔmā anúɔ géē pīya ōwē klá uwá bɛ̄ɛka éŋkpɔ̄ ā.

¹¹Ó ka Ísrɛ̄lu ɔ́ɔ yɔ̄ ī móōwē kú abɔ̄ nēé da ɔ́ ɛyí tāajɛ ā. Ó ka ka ɛ́ɛ yɔ̄ ī dɔɔ̄ka otábɔ̄ ŋmá ɛgiyí ācɛ nēé tá ūwā abɔ̄ glá ŋ́ mā.

¹²Ohígbū ɔ́ɔmā ā, Ó ka anúɔ géē je Ísrɛ̄lu yíífi ɛ́gɛ́nɛ̄ ɛha ī bíya odée ā. Ka anúɔ klla í je ācɛ kú Ujúda ā yíífi ɛ́gɛ́nɛ̄ ɔcí ī je gbokwu ā.

¹³Ó ka eko nɛ̄ Ísrɛ̄lu lɛ ōcē nɛ̄hi kú abɔ̄yīnū ā má, nɛ̄ Ujúda kē lɛ ágbe kú abɔ̄yīnū máā, anɔ́ɔ Ísrɛ̄lu le tá Asírīya kóō dɔɔ̄kā otábɔ̄ ŋmá ɛgiyí igbómína kú abɔ́ɔ, amáŋ ó gaá hɛ́ uwā tá ŋmá ōcē mla ágbe kú uwā ā glá ŋ́.

¹⁴Ó klla ka anúɔ géē tū ācɛ kú Ísrɛ̄lu mɛ́mla Ujúda iyē, í nuunu tá ūwā bɛ̄ɛka ágábá ā. Ó ka anúɔ abɔ̄yī anúɔ géē je uwá fā nyɛŋɛnyɛŋɛ í mā uwā tá bá ajɛ. Ó ka nɛ̄ anúɔ lɛ uwá pi nyɛ̄ɛ̄, ka ɔ̄cɛ dúú ɔ́ yɔ̄ nōo lɔfú nya uwá tá glá ŋ́.

¹⁵Óndú ā ka anúɔ géē cīgbīhi kwu ācɛ ɔlɛ́ anúɔ jāā gbéeko nēé lɛ ōwē kú íne nēé bīya ā má jɛ̄, nēé géē gbɔɔ́ ō wā í dɔɔ̄kā anúɔ. Eko ōhī, ipú ōwē mla ákanya kú ūwā ā, ɛ́ɛ géē dɔɔ̄kā anúɔ.