Read idoma UHOSÍI 6 Bible Online

UHOSÍI 6 - idoma bible

UHOSÍI 6

¹Ācɛ ā ka ka é wā kú aá kwúcē ga ɛgiyí Óndú ā, nááná nɔ́ɔ le aá iyē catāpū ā, anú ɔ́ɔ gáā hɛ́ aá tá á. É ka ɔ́ɔ le aá yá ágbe, amáŋ ɔ́ɔ géē tá aá ágbe ā.

²Eko nɛ̄ ɛ̄cī ɛpa ā le gla, ɔ́ɔ géē lɔfú tū aá iyē. Ɛ̄cī ɔ́mɛɛtá ā, ɔ́ɔ géē je aá cāŋjɛ, cɛ́ɛ́ kú aá bá iyɔ̄bū nū.

³É ka aá klla cēyītīkwū kú aá lɛ Óndú ā jé. É ka ɔ́ɔ géē wā ɛgiyí aá piíí ɛ́gɛ́nɛ̄ eyī í nyā piíí ā, é ka ɔ́ɔ géē wā ɛgiyí aá piíí ɛ́gɛ́nɛ̄ ɔwɔ í yā piíí, kóō kpó éŋkpɔ̄ tāajɛ ā.

⁴Óndú ā da Ísrɛ̄lu mɛ́mla Ɛ́frēm ɔkā ka ɔdí nɛ̄ anúɔ géē yá mla uwá ā. Ó ka ihɔtū nēé lɛ lɛ anúɔ ā, ɔ́ɔ lɛbɛ̄ɛka ébú kú ɔ̄cɔ̄ɔ̄cī nōo gbojī ō mɛtāajɛ ŋ́ mā.

⁵Ó ka ɔ́ɔmā ɔ́ɔ yá ɛ́ɛ́ nɛ̄ anúɔ tū ācomɛ́ɛbɛ kú anúɔ ɛhɔ̄ mla ɛlā kú ɛpɔ̄bí mɛ́mla ífi á. Ó klla ka ɛpɔ̄bí nɛ̄ anúɔ ŋmó ūwā ɔ́ɔ tá cāā bɛ̄ɛka ɛ́gɛ́nɛ̄ eyī gē nyā péee ā.

⁶ Óndú ā ka ɔdā nɛ̄ anúɔ cɛgbá ŋmá ɛgiyí ūwā eko dóódu ā, ɔ́ɔ wɛ ihɔtū. Ó koó wɛ ɛya ō gwó ŋ́. Ó ka anúɔ klla tíne kú ācɛ ɔlɛ́ anúɔ kéē je anúɔ fíyɛ́ ɛya ō yɔlá dúúdú lɛ anúɔ.

⁷Ó ka amáŋ, ɔkwɔɔkwu nēé gā ajɛ kú Ádām ā,[7] ó ka ɛ́ɛ le okónu nɛ́ɛ ce mla anúɔ ā bīya klla tá kéē lɛyí táajɛ lɛ anúɔ.

⁸Ó ka ajɛ kú Ugílííd ɔ́ɔ wɛ igelī nɛ̄hi nōo le mu mla ācɛ o yá ɔdōbɔ̄bí mɛ́mla ācɛ oŋmó ācɛ ɛbɛɛbɛ.

⁹Ó klla ka ācogwɛ́ɛya ā lɛbɛ̄ɛka aɔ́wá kú ācɛ o hɛ́ éjulúgwu nēe gē bá ī gbēyī ācɛ ɔhá ɔwɛ ā. Ó ka ɛ́ɛ kōō ī ŋmó ɔ̄cɛ ɔwɛ nɛ̄ ɔ́ yɛ ga Usɛ́kɛm ɛga otīihɔ ɔ́ɔmā. Ó ka ɛ́ɛ jégēdē bá gē yá ɛdɔ ɔdā ōbɔ̄bí ɛyɛ́ɛyɛ́yí.

¹⁰Ó ka anúɔ má ɔdōbɔ̄bí nɛ̄hi ipú ɔlɛ́ kú Ísrɛ̄lu. Ācɛ kú Ísrɛ̄lu ɔ́ɔ le iyī uwā iyē tēelihɔ mla ɛcí nēé gē pā ā.

¹¹Ó ka uwá nɛ́ɛ wɛ ācɛ kú Ujúda ā, anúɔ le eko éyi tū, nɛ̄ anúɔ géē yá uwā italā, ohígbū ɔdōbɔ̄bí nɛ́ɛ bá ī yá ā dúú. Nááná nɛ̄ anúɔ tínē ō yá ɔdōlɔhi lɛ ācɛ ɔlɛ́ anúɔ bɛ̄ɛka otɛtɛ ā.