Read idoma UHOSÍI 7 Bible Online

UHOSÍI 7 - idoma bible

UHOSÍI 7

¹Ó ka eko dúúmā nɛ̄ anúɔ gáā hɛ́ ācɛ kú Ísrɛ̄lu tá, kéē jɛ̄ ga ɔbū lɔhi ɔhá nɛɛ, ɔdā dóódu nɛ̄ anúɔ kē ī má ipú uwā ā wɛ obíipú mla uce obɔ̄bí kú uwā. É gē hɛ́ iyī uwā lé, gē ca inu kú ācɛ, nyɔ̄ ī wūūwī, klla ī hɛ́ ācɛ éjulúgwu úláyi ɛbɛɛbɛ.

²Óndú ā ka ka é kē ī gbɛlá ka anúɔ géē blakwu odúúdú obɔ̄bí kú uwā ā ŋ́. Amáŋ, íne nɛ́ɛ gē bīya nɛ̄ ɔ́ le uwá yɛ jīla tá ā tá anúɔ eyī péee.

³Óndú ā ka ācɛ ɔ́ɔ gē bī ojuju obɔ̄bí le plla ɔcɛ́, mla aígabɔ̄ kú nū.

⁴Ó ka odúúdú uwā wɛ ācɛ nēe ī gbajā mla o cikpɔ́nyā ācɛ ɔhá. Ó ka íwɔ́tū kú ūwā ɔ́ɔ lɛbɛ̄ɛka ɛfú nēé kpó tū útuló nɛ̄ ɔ̄cɛ oyá-igbō ā, í wīya ɔ́ ŋ́ jāā gbéeko nɛ̄ ó gáā kpó igbō tū ipú nū.

⁵Ɛ̄cī kú ucɛ kú ɔcɛ́ ā, é gē cɛ̄ lɛ ejé ī kwú ɔcɛ́ mla aígabɔ̄ kú ɔlɛ́ nū, cɛ́ɛ́ kéē bá ī líla tɔ̄há.

⁶Ɔtū kú uwā le mu mla ojuju obɔ̄bí bɛ̄ɛka ɔlá nōo mu útuló a. Ícɔ̄nū kú uwā yɔ̄ ī hetū bɛ̄ɛka ɔhɔ̄lá ā otú. Cɛ́ɛ́ ɔ̄cɔ̄ɔ̄cī ó kwú hɛ́ wulu gbɔɔ́ ō cɛ̄ bɛ̄ɛka ígblɛ́nyī ɔlá ā.

⁷Ɔtū kú ɛjɛ̄ɛ̄jī ūwā kwɔ́lá nɛ̄hi bɛ̄ɛka ɔlá kú útuló ā. É gē kpó aótrɛ̄yí kú uwā ŋmó ipú ícɔ̄nū kú uwā. Ó ka ɛ́ɛ le aɔ́cɛ́ kú uwā kpó ŋmó éyééye. Amáŋ ɔ̄cɛ dúúmā kú uwā ɔ́ɔ kē gbɔ̄ɔkɔ lɛ anúɔ cɛ́ɛ́ kú anúɔ tá ɔ̄ abɔ̄ ŋ́.

⁸Óndú ā ka ācɛ Ísrɛ̄lu ɔ́ɔ le pīyatɔ̄há mla aéwɔhá. Ó ka ɛ́ɛ lɛbɛ̄ɛka igbō nɛ̄ ó jé ɔlá lɔhi ŋ́ mā.

⁹Ó ka é jé ka, ogboló ce aéwo ɔhá kú uwā ā, ɔ́ɔ kwú ɔfú kú uwā ú ŋmá ɛgiyí uwā ɛɛ́ ŋ́. Ó ka eko kú uwā ipú ɛcɛ ā, ɔ́ɔ gbɔɔ́ ō nyɛ́ ɛɛ́, amáŋ é kē jé ŋ́.

¹⁰Óndú ā ka ɔbɔ́cɛ kú ācɛ Ísrɛ̄lu ɔ́ɔ yɔ̄ ī cē ijáalí tū uwā. Ó ka ipú odóódu ɔdā nēé yá uwā ā, é cīgbīhi wā ɛgiyí anúɔ nōo wɛ Óndú, Ɔwɔicō kú uwā gaá dɔɔ̄ka anúɔ ŋ́.

¹¹Ó ka ācɛ Ísrɛ̄lu yɔ̄ ī wu gicō gaajɛ bɛ̄ɛka okóohō nōo wɛ olíla ā. Aflɛ́yí, ó le tá Íjīpiti nyɔ̄ gaá dɔɔ̄kā otábɔ̄. Igbɔhá ā, ɔ́ɔ ŋmá abɔ́ɔ ga í tá Asírīya dúú.

¹²Amáŋ, abɔ̄ uwá gē bá ī nyɔ̄ ā, ó ka anúɔ géē nā ɛ́yá daa, cɛ́ɛ́ anúɔ lɛ uwá kwú bɛ̄ɛka aígbáanɔ ā. Ó ka anúɔ géē yá ūwā italā ohígbū ɔdā ōbɔ̄bí, nēé yá ā.

¹³Ó ka unwalu mla ífi kóō yɔ̄ lɛ uwá, ohígbū ka ɛ́ɛ nyɛ̄ɛ̄ ŋmá ɛgiyí anúɔ klla kwú ɛyí í bú kwu anúɔ. Ó ka ɛ́ɛ géē kpó ūwā yíífi. Ó klla ka anúɔ dɔɔ̄kā ō nya uwá tá dúú, amáŋ é le ɛ̄kɛ̄mgbɛ̄ kā bá anúɔ.

¹⁴Ó ka ɛ́ɛ gē gbɔ̄ɔkɔ lɛ anúɔ ipú ɔtū kú uwā ŋ́. Ikɔkɔ nēé géē gbɔ̄ɔkɔ lɛ anúɔ ā, ɛ́ɛ gē lɛ iyī uwā fīyajɛ, bá ī jikwū bɛ̄ɛka ācɛ o pā ɛcí ā. Eko nēé gē gbɔ̄ɔkɔ ohígbū īkpɔ̄dā mla ejé ā, ó ka ɛ́ɛ gē yá iyī uwā ágbe bɛ̄ɛka ācɛ o pā ɛcí ā. Ó ka ɛ́ɛ wɛ ācɛ o kwu anúɔ ɔkɔ.

¹⁵Óndú ā ka nááná nɛ̄ anúɔ le uwá bī jɛ̄, klla lɔfú tū uwā iyē ā, ó ka ɛ́ɛ bá gē yá ojuju obɔ̄bí tū anúɔ kpɔ́.

¹⁶Ó klla ka ka ɛ́ɛ bá ī nyɛ̄ɛ̄ ŋmá ɛgiyí anúɔ ga ɛgiyí Ubáal, ɛcí nɛ̄ ó lɔfú ŋ́ mā. Ó ka é wɛ ācɛ nēé tōō lɛ ɔtūce uwá ŋ bɛ̄ɛka ɔtā nōo le pú ā. Ó ka abɔ̄ nɛ̄ aótrɛ̄yí kú ūwā ɔ́ɔ gē kɛlā abɔ̄ ɔbɔ́ɔ̄cɛ ā, é géē kwú ikwū ɔlɔ́lá, cɛ́ɛ́ ācɛ kú Íjīpiti í yɛhɛ tū ūwā.