Read idoma UHOSÍI 8 Bible Online

UHOSÍI 8 - idoma bible

UHOSÍI 8

¹Óndú ā ka é lɛ opo tá, ohígbū ka aólɛlā ā le wu klíicō, lɛyíkwu ācɛ ɔlɛ́ anúɔ, bɛ̄ɛka aúcē nēe yɔ̄ ī pīya kéē wāajɛ gaá je ɔyí ugwū ā. Ó ka ācɛ ɔlɛ́ anúɔ ɛ́ɛ le okónu nɛ̄ anúɔ ce mla uwá ā nyíla klla le íne kú anúɔ bīya.

²Ó ka nááná nēé gē ka ka aá nēe wɛ ācɛ Ísrɛ̄lu ā, gē hī anúɔ ka Ɔwɔicō kú uwā ā,

³ka uwá nɛ́ɛ wɛ ācɛ Ísrɛ̄lu ā, tá ɔdā olɔhi ā, ohígbū ɔ́ɔmā, aólɛlā kú uwā géē nū uwā inya.

⁴Ó ka ācɛ ɔlɛ́ anúɔ ɔ́ɔ le ɔcɛ́ tū lɛ iyī uwā, anúɔ í kē jé ɔdā dúú lɛyíkwu ɔ́ ŋ́. É bī oje nɛ̄hɛ́ mɛ́mla oje ɔdɔ le íkpékwīja ma lɛ iyī ūwā. Ó ka ɛ́ɛ géē je kpó yíífi ohígbū ɔ́ɔmā.

⁵Óndú ā ka íkpēkwīja kú oje ɔdɔ nēé ma bɛ̄ɛka ɔbá ɛna, nɛ̄ ācɛ kú Usamérīya gē gba ɔ̄ ɛ̄gbā ā, ɔ́ɔ gē wú anúɔ ɔtū. Ó ka anúɔ kpɔ́tūfúlú nɛ̄hi lɛyíkwu uwá. Ó klla ka eko nyá nɛ́ɛ géē habɔ̄ ɛcí nēé gē pā ā tá ā?

⁶Ó ka ɔ̄coyúklɔ́ abɔ̄ kú Ísrɛ̄lu ɔ́ɔ ma íkpékwīja ɔ́ɔmā á. Ó ka ɔ́ɔ kē wɛ ɔwɔ fúlufúlu ŋ́. Ikpēkwīja kú oje ɔdɔ nɛ̄ ācɛ Usamérīya ɔ́ɔ ge gbā ɔ̄ ɛ̄gbā ɔ́ɔmā, í je ca putuu.

⁷Ó ka eko nēé le owu nyi, ɛ́ɛ géē cē ofúlutu. Ó klla ka īkpɔ̄dɛ̄hɔ̄ dúúmā nɛ̄ ó jé ŋ́, ka é gáā lɛ ɔ́ yá igbō glá ŋ́. Óndú klla ka ɔ́dāŋ ka ɔ́ɔ kōō le jé, nááná aéwo ɔhá gáā je ɔɔ́ lé á.

⁸Ísrɛ̄lu lɛbɛ̄ɛka aéwo ɔhá dóódu ā, ó tū ile ŋ́, bɛ̄ɛka ácakpō ɛtɛ́ ā.

⁹Ó ka ācɛ Ísrɛ̄lu, ɛ́ɛ lɛ ɔtūkpɔ́ bɛ̄ɛka ijakī kú ipácí ā, ɛ́ɛ le lé ga ɔwɛ nɔ́ɔ hi uwá ɔtū ā ɛɛ́. Ó ka ɛ́ɛ le pɛ́ ga Asírīya gáā dɔɔ̄kā ācɛ nōo í tá uwā abɔ̄ ŋmá abɔ́ɔ. É klla le ulé cílá aéwo ɔhá kéē gbō uwā ɛyí.

¹⁰Óndú ā ka abɔ̄ é le éwo ɔhá pūla nááná ā, ó ka anúɔ géē tū uwā bá ɛga éyi, cɛ́ɛ́ anúɔ bī ɔcɛ́nɛ̄hi kú Asírīya lɛ italā nōo í lɔnɔ tū uwā nɛ̄hi yá ūwā.

¹¹Ó ka ɛ́gɛ́nɛ̄ ede nɛ̄ ācɛ Ísrɛ̄lu gwó kéē gwɛ́ɛya nōo ī yá kéē kwú íne nēé bīya ā í yá uwā ɛhi ā, ɛ́gɔ́ɔmā nɛ̄ ede ɛga o bīyíne kú uwā lɛwa lɛ á.

¹²Ó ka anúɔ le íne kú anúɔ alɛwa tá tāajɛ lɛ uwá, amáŋ é tá íne ā, gē má íne ā bɛ̄ɛka ɔdā ɔhá nēé jé uwā jéjéé ɛ́ɛ́ ŋ́ mā.

¹³Ó ka ɛ́ɛ gē bī ɛbɛ́ lɛ gwɛ́ɛya lɛ anúɔ, amáŋ ɛ́ɛ gē je ɛbɛ́ ā lé á. Amáŋ Óndú ā ka ucɛ kú ūwā ɔ́ he anúɔ ɔtū ŋ́. Ó ka anúɔ í gáā je íne nēé bīya ā yá ūwā ɛhi ŋ́, amáŋ anúɔ géē yá ūwā italā. Ó ka anúɔ géē kpó ūwā cīgbīhi ga Íjīpiti.

¹⁴Óndú ā ka ācɛ Ísrɛ̄lu ɔ́ɔ le aágblɔ̄cɛ́ kpó gwó lɛ iyī uwā. Amáŋ ɛ́ɛ kwú mlanyī ɔ̄cɛ nɔ́ɔ yá uwá ā. Ó ka ācɛ kú Ujúda ɔ́ɔ lɛ aígelī nɛ̄hi nēé le igá ɔdɔ hɛ́ tū ɔ̄ ā kpó gwó lɛ iyī uwā. Ó ka amáŋ, anúɔ géē kpó uwā yɔlá tāajɛ.