Read idoma UHOSÍI 9 Bible Online

UHOSÍI 9 - idoma bible

UHOSÍI 9

¹Ó da ācɛ Ísrɛ̄lu kéē híī yá bɛ̄ɛka ācɛ o pā ɛcí eko nɛ́ɛ ī gwéeyē ī lé ucɛ kú ūwā ŋ́. Ohígbū ka ɛ́ɛ nyɛ̄ɛ̄ ŋmá ɛgiyí Óndú, Ɔwɔicō kú uwā. Ó ka ɛ́ɛ gē pā ɛcí ɛga dóódu ɛ́gɛ́nɛ̄ ɔ̄cɛnyā gē gbajā tá ɛjɛ̄ɛ̄jī ācɛnyīlɔ ā. Ohígbū ka ɛ́ɛ gē jɔ́nyɛ kú ɔdā nēé ī mīyɛ ŋmá anú ā.

²Ó da uwá ka eko kpií, ɛ́ɛ́ gáā má īkpɔ̄dā mɛ́mla anɔ̄ kú ɔcí nēé hī ólīfu mɛ́mla ejé, nōo í jɛ̄ ūwā gɛ ŋ́.

³Ó ka ācɛ Ísrɛ̄lu géē nyɛ̄ɛ̄ ŋmá ajɛ kú Óndú ā. Ācɛ ōhī ká uwā géē ga Íjīpiti, aɔ́há géē ga Asíriya kéē lé ɔdōlé elihɔ.

⁴Ó da uwá ka é gáā lɛ ejé fu ajɛ lɛ Óndú ā ajɛ kú éwɔhá ā glá ŋ́. É kōō gáā gwɛ́ɛya kú ūwā lɛ ɔ́ ŋ́ dúú. Ó ka ɔ̄cɛ dóódu nōo lɛ igbō kú uwā ā lé, géē je iyī nū tēelihɔ bɛ̄ɛka ɔ̄cɛ nōo lé ɔdōlé kú ɛyíkwū ā. É géē lé ohígbū ɛmiyɛ kú uwā ōfōōfūnū. É gáā bī igbō ā gé lɛ Óndú ā ipú Agblīihɔ-nɛ̄hi kú nū ŋ́.

⁵Ó da uwá ɔ̄kā ɔdā nēé gē yá eko nɛ̄ eko kú ucɛ ɛyɛ́ɛyɛ́yí kú Óndú ā le yá ā?

⁶Eko nɛ̄ ífi gā, nɛ̄ ācɛ ā le pahīla ā, ó ka ācɛ kú Íjīpiti ɔ́ɔ géē tū uwā bá klla í kpó uwā nyi ajɛ kú Umémfisi. Ó ka agbénú kú oje nɛ̄hɛ́ mla ɛga nɛ̄ inu kú ūwā tɛtɛ kwu ā, ácí ɔ́ɔ géē je mu tū ɔ̄.

⁷ Ó ka ɛ̄cī nēé í yá ācɛ italā nōo wɛ eko nēé géē mīyɛ ulé kú ɔdā nēé yá ā ɔ́ɔ gā ɛɛ́. Ó klla ka ka eko nɛ̄ ɔ́ɔmā le yá, ācɛ Ísrɛ̄lu ɔ́ɔ géē jé ɔ̄. Ó ka ɛ́ɛ gē ka ka ɔ̄comɛ́ɛbɛ nōo gē kɛlā nyā ā wɛ olíla. É í ka ka ɔ̄cɛ nɛ̄ alelékwū ī kɛlā bū okónu kú nū nyā wɛ ojɛɛ́lɛ́. Ó ka ācɛ géē wɔ́tū anúɔ nɛ̄hi ohígbū ka íne nɛ́ɛ bīya ā nwuné nɛ̄hi.

⁸Ó ka Ɔwɔicō ɔ́ɔ tū anúɔ ɛhɔ̄ bɛ̄ɛka ɔ̄comɛ́ɛbɛ kú nū ā, ka anúɔ pi uwá ahɔ̄. Nááná ɛga dóódu nɛ̄ anúɔ nyɔ̄, ɛ́ɛ gē jē ukpa gbēyī anúɔ bɛ̄ɛka ígbáanɔ ā. Ó kōō ipú Agblīihɔ-nɛ̄hi kú Ɔwɔicō abɔ̄yī nū ā, ācɛ ā kwú pīya aólɛlā kú ɔ̄comɛ́ɛbɛ́.

⁹ Ó ka ācɛ ā gē yá ɔdā dóódu ipú obíipú nɛ̄hi, bɛ̄ɛka ɛ́gɛ́nɛ̄ nɛ́ɛ wɛ ajɛ kú Ugíbēya ā[8] Ó ka Ɔwɔicō ɔ́ɔ géē blatū íne nēé bīya ā klla í yá ūwā italā ohígbū nū.

¹⁰Óndú ā ka eko nɛ̄ anúɔ pīyɛ Ísrɛ̄lu ā, ɔ́ɔ lɛbɛ̄ɛka īkpɔ̄cí kú ufáyin nōo yɔ̄ ī jɛ̄ ipú ígbíli ā. Ó ka eko nɛ̄ anúɔ má aádáádā ūwā aflɛ́yí ā, ɛ́ɛ lɛbɛ̄ɛka oōpīya kú īkpō aflɛ́yí kú ufígi ā. Ó ka amáŋ, eko nɛ́ɛ gā ɛyí ɛfu kú Upéyɔ ā, ɛ́ɛ gbɔɔ́ ō gbā Ubáal ɛ̄gbā, anɔ́ɔ eko kpií ɛ́ɛ kwú cá anúɔ eyī bɛ̄ɛka aɔ́wɔ nēe he uwá ɔtū nɛ̄hi ɔ́ɔmā.

¹¹Oōnwuné mla ojīlīmā kú Ísrɛ̄lu géē wu ŋmá ɛgiyí nū, bɛ̄ɛka ígbáanɔ ā. É gáā ma ayí ɛ́ɛ́ gɛ ŋ́, anyā uwā í gáā yíipú ɛ́ɛ́ gɛ ŋ́, ɛ́ɛ́ nēé ī yíipú ayípɛ̄ dúú gɛ ŋ́.

¹²É kōō lɛ ayí ma nááná, ó ka anúɔ géē kpó ayí ā, ŋmá ɛgiyí uwā, nɛ̄ ɔyí dúúmā í gáā yēeyī ŋ́. Ó ka eko nɛ̄ anúɔ lɛ igbīhi cē kwu uwá ā, ɔdōbɔ̄bí nɛ̄hi géē yá uwā.

¹³Ó ka ɛ́gɛ́nɛ̄ anúɔ má ayí kú Ísrɛ̄lu lɛ ā, é le ɔdā nōo í ŋmó ūwā ā miya táajɛ lɛ uwá, ó géē bī ayí nū ga ɛga nēé ŋmó ūwā ā.

¹⁴Ó ka Óndú, ɔdā nɔ́ɔ dɔɔ̄kā kóō je lɛ uwá ā, wɛ ɔ̄gɔ̄ma nōo ī plla ɔyí mɛ́mla amɛ̄ nɛ̄ ó lɛ enyi nɛ̄ ɔyí gē gwá ŋ́.

¹⁵Ó ka ɔdōbɔ̄bí nēe gē yá ā, gbɔɔ́ ŋmá Ugígal. Ó ka abɔ́ɔ nɛ̄ anúɔ gbɔɔ́ ō wú ɔtū ūwā ŋmá á. Ó ka ohígbū ɔdōbɔ̄bí nēé yá ā, anúɔ géē nū ūwā bɛ̄cɛ ŋmá ɔlɛ́ anúɔ. Anúɔ í kē gáā yíihɔtū ūwā igbɔhá ɛ́ɛ́ gɛ ŋ́. Ka aótrɛ̄yí kú uwā le īkpɛ̄yí olɔfú yá tú anɔ́ɔ.

¹⁶Ó ka ācɛ kú Ísrɛ̄lu ɔ́ɔ lɛbɛ̄ɛka ɔcí nɛ̄ ɛgba kú nū kwú wā, nɛ̄ ó gáā gwá ikpō glá gɛ ŋ́ mā. Ó ka é gáā lɛ ayí ɛ́ɛ́ gɛ ŋ́. Amáŋ, ɔ́dāŋ ka ɛ́ɛ kōō lɛ ayí lɛ nááná, anúɔ géē kpó ayí nēe he uwá ɔtū ā ŋmó bónū.

¹⁷Ó ka Ɔwɔicō ɔ́ɔ géē tá ūwā bónū, ohígbū ka é jāhɔ̄ lɛ ɔ́ ŋ́. Ó ka é géē pīya ācɛ o bɔ́lɔ́ɔ́lɛ́ ipú aéwo kú ipú ɛcɛ ā.