Read idoma UJÓWƐ̄LU 1 Bible Online

UJÓWƐ̄LU 1 - idoma bible

UJÓWƐ̄LU 1

¹Ami ā wɛ Ujówɛ̄lu, ɔyí ɔlɛ́ Upɛ́tūwɛ̄lu. Olɛhɔ̄ nɛ̄ Óndú ā je gā um ā yɔ̄ á.

²Aá jāhɔ̄, anyākwɔ́cɛ, odúúdú ācɛ kú Ujúda, aá jāhɔ̄. Ɔdā ɛ́gɛ́nyā yá jéjée eko kú aá, ámāŋ ka eko kú aádáádā aá āā?

³Aá kɛlā lɛ ayí aá lɛyíkwu ɔ́, kú ayí aá kéē ka lɛ ayí uwā, nɛ̄ ayí uwā klla géē ka lɛ ipɔ́ɔma ɔhá nēe gboce uwá ā.

⁴Ɔdā nɛ̄ ɔ́wá kú efūma nēe gē hɛ́ odée lé ŋmá ajɛ habɔ̄ tá ā, ɔ́wá kú efūma ɔhá nēe ī wu nēe gboce uwá ā, kwú kpó lé ŋmá ajɛ. Ɔdā nɛ̄ efūma o tá ómbili habɔ̄ tá ā, efūma kú ífi kwú kpó lé.

⁵Aá lɛ héyī kú aá jikwū, ācɛ o gwá ejé, odúúdú ācɛ ō gwéejé, aá jikwū É kwú ɔcí ufáyin ɛ̄yīpɛ̄ nēé gē bī lɛ yá ejé ā ú kpó hɛ́ bónū ɛɛ́.

⁶ Ɔ́wá kú efūma le ɔfú kpó kwu ajɛ kú ɔlɛ́ alɔ ɛɛ́, é lɔfú nɛ̄hi, é klla lɛwa nɛ̄hi nēé tōō gbaáluka ŋ́. Ayīnu kú uwā lulé bɛ̄ɛka ayīnu kú ágábá ā.

⁷É kwú ɔcí kú ufáyin kú alɔ ā ú yíífi ɛɛ́, é klla kwú ɔcí ufígi kú alɔ ú lé ŋmá ajɛ ɛɛ́. É kwú ɔcí ā ú gwā āpū, jāā gbéeko nɛ̄ abɔ̄ ɔcí ā kwú pīya ɛnɛ̄hɛ́.

⁸Aá jikwū, bɛ̄ɛka ɔ́ncɛ́nya nɛ̄ ó jé ɔ̄cɛnyīlɔ ɛ́ɛ́ ŋ́, nōo gē yēkwu kú ikwū nōo ŋmó ɔ̄cɛ nōo gáā lɛ ɔ́ ā.

⁹Īkpɔ̄dɛ̄hɔ̄ í yɔ̄ ipú Agblīihɔ-nɛ̄hi, nēé gē bī le gwɛ́ɛya lɛ Óndú ɛ́ɛ́ gɛ ŋ́. Ācogwɛ́ɛya ā bá ī jikwū klla gē yɔ́tūnōbí, ohígbū ka é gwɛ́ɛya lɛ Óndú ā glá gɛ ŋ́.

¹⁰Ajɛ ɛhɔ̄ ā tá áncā, ajɛ ā yɔ́tūnōbí ohígbū ka é kwú igwu ā ú kpó yíífi, ɔcí ufáyin kwú ŋmɔ́lá, ɔcí nēé hī ka ólīfu ā kwú ŋmɔ́lá ŋmá ajɛ dúúdú.

¹¹Aá yɔ́tūnōbí, ācɛ o hɛ́ɛhɔ̄, aá jikwū, aá nēe gē leyīkwu ɔcí kú ufáyin ā, ohígbū ka é kwú igwu mɛ́mla iyē ú kpó yíífi.

¹²Ɔcí kú ufáyin mɛ́mla ɔcí kú ufígi ā kwú ŋmɔ́lá ɛɛ́, odúúdú ɔcí ō gwíīkpó, kwu Upómɛ̄gránāte, alī,[1] mɛ́mla odúúdú ɔcí ɔhá ā, kwú kpó wúla ēpū klla le pɛ́ gekwú ɛɛ́, éeyē kú ācɛ ā mɛ ɛɛ́.

¹³Aá kwú úwé ekwu ú wu iyē, ká aá jikwū. Aá nēe wɛ ācogwɛ́ɛya kú ɛyí ede ā, aá ga ipú Agblīihɔ-nɛ̄hi ā kú aá lɛ úwé ekwu kpó wu iyē, cɛ́ɛ́ kú aá yɔ́tūnōbí otú gbɔ́ɔcī! Ohígbū ka īkpɔ̄dā mɛ́mla ejé í yɔ̄ nɛ̄ aá gē le gwɛ́ɛya ipú Agblīihɔ-nɛ̄hi kú Óndú ā ɛ́ɛ́ gɛ ŋ́.

¹⁴Aá lɛ ɛ̄cī nɛ̄ aá í gwōkónu ā tū. Aá lɛ ɛjɛ̄ɛ̄jī ācɛ hīgwú tɔ̄há! Aá lɛ odúúdú anyākwɔ́cɛ ā túbá tɔ̄ɔ̄há, mla odúúdú ācɛ kú Ujúda ā, ipú Agblīihɔ-nɛ̄hi kú Óndú ā, kú aá jikwū klá anú.

¹⁵ Eléélelé! Ɛ̄cī kú Óndú ā le kwu ajaajɛ ɛɛ́, ɛ̄cī nɛ̄ Ɔwɔicō nōo lɔfú fíyɛ́ dúú ā géē kpó aɔ́dā dóódu yíífi.

¹⁶Alɔ leyīkwu áncā ɛ́ɛ́ nɛ̄ ɔdɛ̄hɔ̄ kú alɔ je kpó yíífi á. Ɔ̄cɛ dúú ī gwéeyē ipú Agblīihɔ-nɛ̄hi kú Ɔwɔicō kú alɔ ā gɛ ŋ́.

¹⁷Īkpɔ̄dɛ̄hɔ̄ kú alɔ le pɛ́ gekwú ipú ajɛ ohɔ́lá. Īkpɔ̄dɛ̄hɔ̄ í yɔ̄ ɛ́ɛ́ nɛ̄ alɔ gē kpó tū ŋ́. Ɔbā kú alɔ nōo táncā ā kwú ca tāajɛ.

¹⁸Aɛ́bɛ́ bá ī tíifu! Aɔ́dāajɛ ɔhá kú alɔ ā bá ī móōwē, ohígbū ka ácí í yɔ̄ nēé gē lé ɛ́ɛ́ gɛ ŋ́.

¹⁹Óndú, awɔ nɛ̄ n gē jikwū klá uwɔ á. Ohígbū ka odúúdú ácí mɛ́mla ɔcí kwú kpó ŋmɔ́lá bɛ̄ɛka ɔdā nɛ̄ ɔlá je uwá kpó yi tāajɛ ā.

²⁰Kwu aɛ́bɛ́ kú ipácí ā gē jikwū klá awɔ, ohígbū ka aáyɔ́kpá kpɛ́mm ā kwú kpó ŋmó ɛɛ́, ɔlá klla kwú odúúdú ácí kú ígbíli ā ú kpó yi ɛɛ́.