Read idoma ÉMƆ̄SI 1 Bible Online

ÉMƆ̄SI 1 - idoma bible

ÉMƆ̄SI 1

¹ Ɛlā nɛ̄ Émɔ̄si, ɔ̄cɛ éyi kú ācogbāálá nōo ŋmá igelī nɛ̄ŋcɛ́ kú Utɛ́kōwa ka lɛyíkwu ācɛ Ísrɛ̄lu ā yɔ̄ á. Ó kɛlā ā eko nɛ̄ Ussáya wɛ ɔcɛ́ kú Ujúda, nɛ̄ Ujérobōwam, ɔyí kú Ujéhāssi wɛ ɔcɛ́ kú Ísrɛ̄lu ā, iháyí ɛpa gbɔbū lɛ ajɛ ohɛ́wulu ā.

² Olɛhɔ̄ nōo wā gé lɛ Émɔ̄si ā kē yɔ̄ á. Anɔ́ɔ ó ka, “Óndú ā le ɔkɔ cɛyí dɛ̄gba ŋmá ɛfu kú Usáyɔn bɛ̄ɛka oji nɛ̄ ágábá gē tū eko nɛ̄ ó lɛ ɛbɛ́ má gáā kwú lé ā, ó dɛ̄gba ŋmá Ujerúsālɛm gblágádáá bɛ̄ɛka akpáabana ō gbo ā. Anɔ́ɔ ácí ɛ̄mɛ̄ɛ̄mɛ̄ nɛ̄ aɛ́bɛ́ gē lé ā kwú ŋmɔ́lá tāajɛ yéwú, ácí kú ɛfu nēé hī ka Ukámɛ̄lu[1] ā kwú wúlēpū booloo, klla le pɛ́ gekwú.”

³ Émɔ̄si ka Óndú ā ɔ́ɔ kahíníī, “Ohígbū ɔ́bíipú ce ɔ́bíipú icō nɛ̄ ācɛ Udamásikɔ̄si ɔlɛ́ ɔtāhɛ̄ kú Usiríya bī ā. Ohígbū ɔdā nēé yá ā, n géē yá uwā italā piíí, ń gáā habɔ̄ uwā tá ŋ́. É le ācɛ kú Ugílɛ̄di yíífi bɛ́ɛka ɛ́gɛ́nɛ̄ ɔ̄cɛ gē wú igwu mla ogbló kú oje ā.

⁴Óndú ā yɔ̄ ī kɛlā gɔbū kpɔ́ kahíníī, “Ohígbū ɔ́ɔmā ā, N géē kpó aɔ́lɛ́ kú Uhásɛ̄lu mɛ́mla ákú Ubenhádādi nēé hɛ́ igá olɔfú nɛ̄hi kóō wɛ ɔkplɛ́fú kú uwā yɔlá tāajɛ.

⁵N géē ca odūngwɔ̄ɔwɛ igá kú igelī nɛ̄hi kú ācɛ Udamásikɔ̄si ā tāajɛ, klla í kpó ācɛ nēe lā ɔpɛ́ kú Afɛ́n mla aótrɛ̄yí kú ācɛ Ubɛtɛ́dɛn ā yíífi. É géē kpó ācɛ kú Usiríya bɛ̄ɛka aálagbá ā ga ajɛ kú Ukɛ́ri.”

⁶ Óndú ā kahíníī, “Ohígbū ɔ́bíipú ce ɔ́bíipú icō nɛ̄ ācɛ kú Ufilístiya bī ā, n géē yá uwā italā. É le odúúdú ewɔhá kpó kwú, anɔ́ɔ é kwú uwā ú kpó lá, lɛ ācɛ kú Ɛ́dɔm ɛ́gɛ́nɛ̄ ācɛ ī je ɔfiyɛ lá ā.

⁷Ohígbū ɔ́ɔmā ā, n géē tū ɔlá ga ɔdɔ kú igelī nɛ̄hi kú Ugása, cɛ́ɛ́ n kwú igá olɔfú nɛ̄hi kú ɔkplɛ́fú ā ī yɔlá tāajɛ.

⁸N géē fu aótrɛ̄yí kú Ássidɔ̄di mla Ássikēlɔn ɔkwu ŋmá ajɛ. N géē yá ācɛ ipú igelī nɛ̄hi kú Ékrɔn itala. Odúúdú ācɛ Ufilístiya nēe hile ā géē pɛ́ kwú.”

⁹Óndú ā kahíníī, “Ohígbū ɔ́bíipú ce ɔ́bíipú icō kú ācɛ kú Utáya ā, n géē yá uwā italā. É le okónu nēé ce mla ācɛ Ísrɛ̄lu kéē lé tɔ̄há ā nyílá, anɔ́ɔ é kwú odúúdú ācɛ nēe lā eyīpɔ́lɛ́ éyi, ú kpó lá bɛ̄ɛka ɔfiyɛ ā ga ajɛ kú Ɛ́dɔm.

¹⁰Ohígbū ɔ́ɔmā ā, n géē tū ɔlá klá ɔdɔ kú ipú igelī nɛ̄hi kú Utáya, cɛ́ɛ́, ó kwú yi tāajɛ.”

¹¹ Óndú ā kahíníī, “Ohígbū ɔ́bíipú ce ɔ́bíipú icō kú ācɛ kú Ɛ́dɔm ā, n géē yá uwā italā. É bī ɔkpacaŋgelī le aɔ́máapú uwā[2] ācɛ Ísrɛ̄lu, kpó ŋmó. É kē ményinyi uwā ŋ́. Ánya kú uwā í kē cɛ̄ lɛ ɔtū kú uwā gbo fíyaa ŋ́.”

¹²Ohígbū ɔ́ɔmā ā, Óndú ā ka, n géē tū ɔlá ga ipú igelī nɛ̄hi kú Utéman, cɛ́ɛ́, ó kwú igá olɔfú kú ɔkplɛ́fú kú nū nōo yɔ̄ Ubósira ā í yi tāajɛ.”

¹³Óndú ā klla kahíníī, “Ohígbū ɔ́bíipú ce ɔ́bíipú icō nɛ̄ ācɛ Ámɔn bī ā, n géē yá uwā italā piíí, ń gáā je uwā ɛhi ŋ́. Ohígbū ka eko nēé bá gē kpɛ́fú tú ācɛ Ugílɛ̄di, o yá ɛ́ɛ́ kú ajɛ kú uwā kóō nwuné ā, é yá ucē ɔbíipú nɛ̄hi, é bī ɔkacaŋgelī le yíla anyā ō yīipú ipú tɛ́ɛcɛ icííci.

¹⁴Ohígbū ɔ́ɔmā a, n géē tū ɔlá gaá je igá olɔfú nɛ̄hi kú ɔkplɛ́fú kú Urába yi tāajɛ. Cɛ́ɛ́ é géē bá ī dīíbáa ɛ̄cī nēé gbɔɔ́ ō kpɛ́fú ā. Ekwukwu kú ācɛ nēe gē kpɛ́fú ā géē dɛ̄ kwuuu bɛ̄ɛka ofúlutu nɛ̄hi ā.

¹⁵Aɔ́cɛ́ mɛ́mla aótrɛ̄yí kú uwā géē kwinya ɔ́ci ŋmá ɔlɛ́ uwā ga ɛga ɔhá.