Read idoma ÉMƆ̄SI 2 Bible Online

ÉMƆ̄SI 2 - idoma bible

ÉMƆ̄SI 2

¹Óndú ā kahíníī, “Ohígbū ɔ́bíipú ce ɔ́bíipú icō nɛ̄ ācɛ Umówābu bī ā, n géē yá uwā italā piíí. Ń gáā pīya ɔtū kú um abɔ̄ ŋ́. Ohígbū ka é lɛ ojīlīmā ce okwū kú ɔcɛ́ kú ācɛ Ɛ́dɔm ŋ́, anɔ́ɔ é kwú ɔ̄ ú fu ŋmá únóji, klla kwú ikpokwú kú nū ú yɔlá gbewo putuu á.

²N géē tū ɔlá ga ajɛ kú Umówābu, n klla í je igá olɔfú nɛ̄hi kú ɔkplɛ́fú kú igelī nɛ̄hi kú Ukɛríyɔ̄tu yɔlá tāajɛ. Ācɛ Umówābu géē pɛ́ kwú ipú útú nōo í hɛ́ abɔ̄ aícɔ́ɔja bá ī dɛ̄gba klla bá yɔ̄ ī tóopo ɔgbɛ́fú ā.

³N géē ŋmó ɔcɛ́ kú ajɛ kú Umówābu mɛ́mla odúúdú aótrɛ̄yí kú ɛyí ajɛ ɔ́ɔmā.”

⁴Óndú ā kahíníī, “Ohígbū ɔ́bíipú ce ɔ́bíipu icō kú ācɛ Ujúda ā, n géē yá uwā italā. É tá ɛlā nɛ̄ n gē nwū uwā ā. É klla lɛyí táajɛ lɛ íne kú um ŋ́. Aɔ́wɔ ɛ̄kɛ̄mgbɛ̄ nɛ̄ aádáádā uwā gē gbā ā, le uwá bī nyíleyī ŋmá ɔwɛ kú ami nōo wɛ Ɔwɔicō ɔ̄kwɛ̄yi ā.

⁵Ohígbū ɔ́ɔmā ā, n géē tū ɔlá ga ajɛ kú Ujúda, klla í je igá olɔfú nɛ̄hi kú ɔkplɛ́fú kú Ujerúsālɛm ā yɔlá tāajɛ.”

⁶Óndú ā kahíníī, “Ohígbū ɔ́bíipú ce ɔ́bíipú icō nɛ̄ ācɛ Ísrɛ̄lu bī ā, n géē yá uwā italā. É kwú ācɛ ɔkwɛ̄yi mla ācɛ okpaakpa, nēé má ije cíla ulé nēé bī ŋ́ mā, ú lá ga ɔfiyɛ. É gē je aógbɛhá ā fūlabɔ̄ áblákpá nēé lá ā kwɛyí ije.

⁷É gē lɛ ikpó da ācɛ nēé lɔfú ŋ́ mla ācɛ nēé lɛ ɔ̄cɛ o tá uwā abɔ̄ ŋ́ mā ɛyí tāajɛ. É klla gē kwu aógbɛhá ga okónu ogwu ŋmá ɔwɛ hīli iyī uwā. Ádā mla ɔyí gē cikpó ɔfiyɛ nɔnya ékpónú tɔ̄há, anɔ́ɔ é le uwēyi je lɛ iye otīīhɔ kú um ā á.

⁸Ɛgiyí ede dóódu, ācɛ gē gwutá ɛyí īlī nēé miyɛ̄ cabɔ̄ ŋmá ɛgiyí aógbɛhá nēe bī uwā ulé ā. É klla gē gwá ejé nēé nú abɔ̄fú ŋmá ɛgiyí ācɛ nēe bī uwā ulé ā, ipú Agblīihɔ-nɛ̄hi kú Ɔwɔicō kú uwā.”

⁹Óndú ā yɔ̄ ī kɛlā kpɔ́ kahíníī, “Nááná ā, ācɛ ɔlɛ́ um, ohígbū aá nɛ̄ n je ācɛ Ámɔn, ācɛ nēe jɛ̄ bɛ̄ɛka ɔcí Uloko ā, klla lɔfú bɛ̄ɛka ɔci nēe hī ka usɛ́da ā, ca tāajɛ dúúdú á.

¹⁰N bī aá bɛ̄cɛ ŋmá ajɛ kú Íjīpiti, klla bī aā bū ipu ígbíli iháyí ofɛpa, klla kwú ajɛ kú ācɛ kú Ámɔn ú lɛ aá, kóō le pīya ákú aá.

¹¹N le ācɛ ōhī kú ayí aá fu kéē le pīya ācomɛ́ɛbɛ́, mla aóklóbīya ōhī kú ɔlɛ́ kéē lɛ pīya aátámɔ̄kpá. Ɛ̄nyā í wɛ ɔkwɛ̄yi ŋ́ nɛɛ ācɛ kú Ísrɛ̄lu? Ami, Óndú ā, le ka ɛɛ́.

¹²Amáŋ, aá le yá kú aátámɔ̄kpá ā, kéē gwá ejé, aá klla le ɔ́da je lɛ ācomɛ́ɛbɛ ā kéē híī cɛ̄hɔ̄ kú um lɛ aá ŋ́.

¹³Abālɔbányā, n géē je aá da báajɛ, cɛ́ɛ́ aá géē bá ī tíifu bɛ̄ɛka úgbɔ́nya, nēé le iyó nɛ̄hi kpó ce ɔ́ nōo yɔ̄ ī jíliyē klla yɔ̄ ī kɛlā kákáká ā.

¹⁴Ācɛ nēe kwinya fíyɛ́ dúú kú ɔlɛ́ aá ā, í gáā kwu ga ɛga dúú glá ŋ́, ɔfú géē hɛ́ ācɛ o lɔfú nɛ̄hi abɔ̄, anɔ́ɔ aícɔ́ɔja í kōō gáā nya oyēeyī kú iyī uwā tá glá ŋ́.

¹⁵Ācɛ o bī ɔtā kpɛ́fú kú aá, í gáā háyi glá ŋ́, ācɛ o kwinya nɛ̄hi ā, í gáā kwu glá ŋ́. Ācɛ o kpɛ́fu ɔnya, í gáā kwu ŋmá ɛgiyí ikwū nōo í ŋmó uwā ā glá ŋ́.

¹⁶Ɛ̄cī ɔ́ɔmā ā, aícɔ́ɔja nēe lɛ ɔtū fíyɛ́ kpɛ́mm ā, géē kpó iyɔ́fú kú uwā bónū í je pɛ́ kwu. Ɛlā kú ami, Óndú ā yɔ̄ á.”