Read idoma ÉMƆ̄SI 3 Bible Online

ÉMƆ̄SI 3 - idoma bible

ÉMƆ̄SI 3

¹Anɔ́ɔ Émɔ̄si klla ka kpɔ́ kahíníī, “Ācɛ kú Ísrɛ̄lu, aá jāhɔ̄ lɛ ɛlā nɛ̄ Óndú ā ka lɛyíkwu aá ā, lɛyíkwu odúúdú éwo nɛ̄ ó bī bɛ̄cɛ ŋmá Íjīpiti ā.

²Ó ka Óndú ɔ́ɔ kahíníī, “Ipú odúúdú éwo kú ɛcɛ ā, aá ōfōōfū aá nɛ̄ n jé, klla le ɛlá kwu aá á. Ɔdā nōo yá ɛ́ɛ́ nɛ̄ n géē yá italā piíí ā wɛ, ohígbū íne kú um nɛ̄ aá bīya ā.”

³Émɔ̄si klla ka kpɔ́ kahíníī, “Ācɛ ɛpa tīīkpó glá, ɔ́dāŋ ka é tɛtɛ lɛ ɛga nēé í jīla ā miya gbɔbú ŋ́ nɛɛ?

⁴Ágábá gē tōoji ipú ūpū icííci, ɔ́dāŋ koó má ɛbɛ́ nɛ̄ ó í kwú lé ŋ́ nɛɛ? Ɔyí ágábá gē ka ɔdā tɔ̄ɔkɔ ŋmá ɛga nɛ̄ ó yɔ̄ ā, ɔ́dāŋ ka ó kwú ɛbɛ́ dúúmā ŋ́ nɛɛ?

⁵Íkōtō gē kwú ígbáanɔ, ɔ́dāŋ ka ó lɛ ikpó wu ɔ́ ŋ́ nɛɛ? Ukpa gē tá icííci, ɔ́dāŋ ka odée í lɛ ikpó wu ɔ́ ŋ́ nɛɛ?

⁶Ɔ̄nyɛ le opo kú ɛfú nēé tá ā pó ipú igelī nɛ̄hi, nɛ̄ ó gáā yúufi ŋ́ mā a? É gáā je igelī nɛ̄hi dúúmā yíífi icííci glá ŋ́, ń táafú ŋ́, Óndú ā tū ācɛ ā ɛhɔ̄ á.

⁷Ɔkwɔ̄ɔ̄kwɛ̄yi, ɔdā dúúmā nɛ̄ Óndú, Ɔwɔicō gáā yá, ó gē lɛ da ācomɛ́ɛbɛ, ācocɛ̄hɔ̄ kú nū gbɔbū.

⁸Eko nɛ̄ ágábá le oji tū, ɔnyɛ í gáā yúufi ŋ́ māā? Óndú, Ɔwɔicō le elā ka, ɔ̄nyɛ í gáā nyɔ̄ í cɛ̄ olɛhɔ̄ ɔ́ɔmā ŋ́ māā?”

⁹Óndú klla yɔ̄ ī kɛlā kpɔ́ kahíníī, “Aá da ācɛ nēe lā ipú agbla kú ɔcɛ́ kú Íjīpiti mɛ́mla Ássidɔ̄du ā, kéē le túbá ɛyí ɛfu nēe yɛ Usamérīya jila tá ā, kú aá má ígbájí mɛ́mla ɔbíipú nɛ̄ ācɛ bá gē bī ā.”

¹⁰Óndú ā ka kpɔ́ kahíníī, “É kōō jé ō yá ɔdā olɔhi ŋ́. É le iyó nēé nū ŋmá ɛgiyí ācɛ abɔ̄fú ā, tīkwū klá inu kú ɔlɛ́ uwā.

¹¹Ohígbū ɔ́ɔmā aólɛlā kú aá géē cīíbɔm tū ajɛ kú aá, cɛ́ɛ́ é kwú aɔ́kplɛ́fú kú aá ú kpó ca tāajɛ, lɛ aɔ́dā nēe bá ipú inu kú ɔlɛ́ uwā ā kpó wu.”

¹²Óndú ā klla kahíníī, “Ɛ́gɛ́nɛ̄ ɔ̄cogbāálá gē nú iklííkpó ɛpa ámāŋ ka ahɔ̄ kú álá ŋmá ɛgiyí ágábá nōo kwú ɔ̄ lé ā, ɛ́gɔ́ɔmā nēé géē nya ācɛ Usamérīya tá mla āyā éyééye kú agōdō ámāŋ ka úgādā ácakpō kú uwā nēe kpó cē ā lɛ dúú á.”

¹³Óndú, Ɔwɔicō nōo lɔfú fíyɛ́ dúú ā kahíníī, “Aá jāhɔ̄ abālɔbányā kú aá pi ayí kú Ujékɔ̄pu ahɔ̄.”

¹⁴ Óndú ā kahíníī, “Ɛ̄cī nɛ̄ n géē yá ayí kú Ísrɛ̄lu italā, ohígbū íne nēé bīya ā, n géē je ede kú Ubɛ́tɛlu ā yíífi. Odúúdú ɔ́kíkā kú ede ā géē je ca tāajɛ.

¹⁵N géē kpó aínu kú ɔnɔ̄ mɛ́mla ákú eko ofū ā wúla tāajɛ. Aínu nɛ̄ aá bī ayīnu adāgbá le yá uwā ifa ā, géē wúla tāajɛ. É klla géē kpó aínu nɛ̄hi kú aá yíífi.”