Read idoma ÉMƆ̄SI 4 Bible Online

ÉMƆ̄SI 4 - idoma bible

ÉMƆ̄SI 4

¹Émɔ̄si klla ka Óndú ā ɔ́ɔ kahíníī, “Aá jāhɔ̄ lɛ ɛlā nyā, ācɛnyā kú Usamérīya. Aá nēe jɔ̄kwū bɛ̄ɛka aɛ́na kú Ubássan ā. Aá nēe gē yá ācɛ nēé lɔfú ŋ́ mā ɔdōbɔ̄bí, klla ī lɛ abɔ̄ da aógbɛhá ɛyí tāajɛ ā. Aá nēe gē da aɔ́bá aá kéē bī ejé wā kú aá gwá.

²Óndú, Ɔwɔicō nōo lɔfú fíyɛ́ dúú ā, bī oōtīihɔ kú nū le okónu ce kahíníī, “Ɛ̄cī éyi géē wā, nēe géē bī uwɔ lɛ kpó aá ŋmá amānyā, ɛ́gɛ́nɛ̄ é gē kwú ebéenyi mla uwɔ ā.

³É géē pi aá ga ɛga nɛ̄ ɔdɔ ca ā, cɛ́ɛ́ é kwú aá ú tá tɛ́ɛcɛ ga Uhámɔn. Abɔ̄ Óndú ā ka lɛ á.”

⁴Óndú, Ɔwɔicō ā kahíníī, “Aá ga ɛga otīihɔ nēe yɔ̄ Ubɛ́tɛlu mla Ugígalu ā, kú aá nyɔ̄ ī bīyíne, kú ínoōbīya kóō nwuné tōōtɔ̄ɔ̄. Aá bī ɛbɛ́ wā gaá gwɛ́ɛya ɔ̄cɔ̄ɔ̄cī dóódu, aá klla bī ɛhi kú éyi ŋmá ipú igwó wā ɛ̄cī ɛtɛ́ɛ́tá.”

⁵Aá nyɔ̄ kú aá gaá bī igbō kú īkpɔ̄dɛ̄hɔ̄ kú aá gwɛ́ɛya, cɛ́ɛ́ kú aá tá um ahínyá, cɛ́ɛ́ kú aá gwō ohígbū ɛya nɛ̄ aá gwó cabá fíyɛ́ ɛ̄nɛ̄ é cɛgbá ā. Ohígbū ka ɔdā ɛ́gɛ́nyā he aá ɔtū ō yá á.

⁶Ami bī ɔkpɛtā gé lɛ odúúdú aígelī nɛ̄hi kú ɔlɛ́ aá á, nááná, ó kē kwú aá iyē, cɛ́ɛ́ kú aá le cīgbīhi wā ɛgiyí um ŋ́.

⁷Ń cɛ̄ lɛ ɔwɔ yā eko nɛ̄ ɔdɛ̄hɔ̄ kú áá cɛgbá ɔwɔ fíyɛ́ dúú ā ŋ́. N gē cɛ̄ lɛ ɔwɔ yā ipú igelī nɛ̄hi éyi, ń kē cɛ̄ lɛ ɔwɔ ā yá ipú igelī nɛ̄hi ɔhá ŋ́. Ɔwɔ ī yá tū ajɛ kú ɛhɔ̄ éyi, ó kē ī yā tū ajɛ ɛhɔ̄ kú ɛga ɔhá ŋ́. Cɛ́ɛ́, ajɛ kú ɛhɔ̄ nɛ̄ ó yā tū ɔ̄ ŋ́ mā, kwú ŋmó.

⁸Ācɛ kú igelī nɛ̄hi alɛwa gē pɛ́ ŋmá igelī nɛ̄hi éyi ga ɔhá, gē dɔ̄ɔ̄kā ɛga nēé leyīce ka aá géē má éŋkpɔ̄ gwá nōo lɔfú híjēnyi kú uwā glá. Nááná, aá cīgbīhi wā ɛgiyí um ŋ́ kpɔ́.

⁹N le owu okwɔ́lá tɛ̄hɔ̄ klá ɔdɛ̄hɔ̄ kú aá kóō le uwá ŋmɔ́lá tāajɛ. Efúma kwú odúúdú ɔdɛ̄hɔ̄ kú aá, ɔcí ufígi, ɔcí nēé hī ka ólífu ā ú kpó lé ŋmá ajɛ. Náánā, aá cīgbīhi wā ɛgiyí um ŋ́.

¹⁰N le ōcē obɔ̄bí tū klá aá, ɛ́gɛ́nɛ̄ n tū klá ācɛ Íjīpiti ā. N le ayípóklóbīya kpó ŋmó ɔgbɛ́fú, klla kwú ɔnya ɛfú kú uwā í kpó nyɛ̄ɛ̄. N cɛ̄ lɛ ípī kú okwū kú ɔlɛ́ aá le mu aá ɛnwū. Nááná, aá cīgbīhi wā ɛgiyí um ŋ́ kpɔ́.

¹¹Óndú ā klla kahíníī, “N le ācɛ ōhī kú aá kpó yíífi ɛ́gɛ́nɛ̄ n yá Usɔ́dɔm mɛ́mla Ugomóra ífi ā. Ācɛ nēe hile ā lɛbɛ̄ɛka ɛfú nēé pi ŋmá ipú ɔlá ā. Nááná ā, aá cīgbīhi wā ɛgiyí um ŋ́ kpɔ́.”

¹²Óndú ā kahíníī, “Ohígbū ɔdā nēe bā ā, ācɛ Ísrɛ̄lu, n géē yá aá italā. Abɔ̄ n kē tútū kú n̄ yá ɔdā nɛ̄ n ka ā, aá le tútū kú aá leyī méyī mla um.”

¹³Ɔwɔicō ma ɛfu kwu ajɛ á. Anú klla kē yá owu á. Ó gē je ɛlá nɛ̄ ó gē gbo ā mafú lɛ ācɛ. Ó kwú ɔ̄cɔ̄ɔ̄cī ú pīya ajɛ odobū. Anú gē gbō odúúdú ɛcɛ kpátáá nyá á. Óndú ā nōo lɔfú fíyɛ́ dúú ā abɔ̄yīnū yá aɔ́dā nēe bá nyā á.