Read idoma ÉMƆ̄SI 5 Bible Online

ÉMƆ̄SI 5 - idoma bible

ÉMƆ̄SI 5

¹Aá pó ijē kú ikwāyidɔ nɛ̄ n gáā gwó lɛ aá ā, ācɛ kú Ísrɛ̄lu.

²Áaa, Ísrɛ̄lu, nōo lɛbɛ̄ɛka ɔ̄cɛnya nɛ̄ ó jé ɔ̄cɛnyīlɔ ŋ́ mā, má gwōnū ɛɛ́ oo! Ācɛ kē kwú pɛ́ kwu hī ɔ̄ tá ɛɛ́. Ɛhɛ́ɛ, ó kōō má ɔ̄cɛ dúúmā nōo géē tá ɔ̄ abɔ̄ je ɔ́ cāŋjɛ ŋ́.

³Óndú, Ɔwɔicō kahíníī, “Igelī nɛ̄hi éyi kú Ísrɛ̄lu, le aícɔ́ɔja úlā ɛpa ce ofu igwó (1,000) tū ga ɔgbɛ́fu, amáŋ, aícɔ́ɔja ofɛhɔ̄ ōfōōfū uwā pīyɛyí wá ɔlɛ́ á. Igelī nɛ̄hi ɔhá le aícɔ́ɔja ofɛhɔ̄ tū ga ɛcɛ, amáŋ, igwó ōfōōfū ūwā pīyɛyí wɛ ɔlɛ́ á.”

⁴Óndú ā kɛlā lɛ ācɛ kú Ísrɛ̄lu kahíníī, “Aá wā ɛgiyí um, kú aā yēeyī.

⁵Aá híīī ga Ubiyɛssɛ́ba gaá gbā ɛ̄gbā ŋ́. Aá híī tíne um Ubɛ́tɛlu ŋ́, Ubɛ́tɛlu í gáā wɛ ɔdā dúúmā ŋ́. Aá kē híī ga Ugígalu ŋ́, ohígbū ka é í kpó ācɛ kú abɔ́ɔ abɔ̄fú ga ɛga nēé géē cɛ̄ ɔfiyɛ ā.

⁶Aá wā ɛgiyí Óndú ā, cɛ́ɛ́ kú aá yēeyī, ɔ́dāŋ ka aá gā ɛgiyí Óndú ā ŋ́, ó géē hɛ́ wɛ́ɛcɛ bɛ̄ɛka ɔlá, í je ācɛ ipɔ́ɔnu kú Ujósɛ̄fu yi tāajɛ. Ɔ̄cɛ dúúmā í gáā yɔ̄ nōo í nyí ɔlá kú Ubɛ́tɛlu ā ŋ́.

⁷Aá nēe gē je epɔ̄ okpaakpa gbájí, klla gē pīya ācɛ tū ipú ɔdā nōo wɛ ukpɛ̄ kú uwā ā géē je yíífi.

⁸Óndú yá ínyílɔ́wɔ, mla ogbɔ̄lɛ́ gbēyī ɔyā á. Ó gē je otú pīya ɔlɛ́ɛnɔ, klla ī je ɔlɛ́ɛnɔ pīya otú glá. Ó le éŋkpɔ̄ hīgwú ŋmá itekwú ā, klla kwú ɔ̄ ú pīya klla ɛcɛ. Iyē kú nū wɛ Óndú.

⁹Ó gē kpó ɛga olɔfú mɛ́mla ācɛ olɔfú yíífi.

¹⁰Ācɛ kú ɔlɛ́ aá gē wɔ́tū ācɛ ohɛ́pɔ̄ mɛ́mla ācɛ o cē ijáalí okpaakpa ā.

¹¹Aá le abɔ̄ da ācɛ ogbɛhá ā ɛyí tāajɛ. Aá klla gē nú īkpɔ̄dɛ̄hɔ̄ abɔ̄fú ŋmá ɛgiyí uwā. Ohígbū ɔ́ɔmā, aá gáā lā ipú ɔlɛ́ ɛcɔ̄ nɛ̄ aá gwó lɛ iyī aá ŋ́, aá klla gáā gwá ejē kú ɔcí ufáyin o lɔhi nɛ̄hi nɛ̄ aá hí ā ŋ́.

¹²N jé ɛ́gɛ́nɛ̄ íne nɛ̄ aá bīya ā bɔ̄bí lɛ ā. N kē klla jé áluka ɔ́bíipú nɛ̄ aá bī ā. Aá gē mīyɛ ómíci, gē kɛpɔ̄ újí tū ācɛ ogbɛhá, cɛ́ɛ́ aógbɛhá ā í gáā lɛpɔ̄hi únɛ́pɔ̄ kú aá glá ŋ́.

¹³Ohígbū ɔ́ɔmā a, o yɔ̄ cíí wɛ ɔdā kú íjéeyī nɛ̄ ɔ̄cɛ lɔfú yá eko obɔ̄bí ɛ́gɛ́nyā ā á.

¹⁴Aá dɔɔ̄kā ɔdā nōo lɔhi kú aá yá. Aá híīī yá ɔdōbɔ̄bí ɛ́ɛ́ gɛ ŋ́, cɛ́ɛ́ kú aá yēeyī. Cɛ́ɛ́ kú Óndú, Ɔwɔicō nōo lɔfú fíyɛ́ kpɛ́mm ā kóō géē yɔ̄ pī aá, ɛ́gɛ́nɛ̄ aá gbɛlá ka ɔ́ɔ yɔ̄ pī aá ā.

¹⁵Aɔ́dā nōo bɔ̄bí ā kóō wú aá ɔtū, aɔ́dā nēe lɔhi ā, kéē he aá ɔtū. Aá cíkā ō má keé yɔ̄ ī kɛpɔ̄ ɔkwɛ̄yi únɛ́pɔ̄ eko dóódu. Eko ōhī, Ɔwɔicō géē ményinyi aá nēe wɛ ācɛ kú Ísrɛ̄lu ohile, nēe bá eyī kpɔ́ ɛ́ɛ́ mā.

¹⁶Ohígbū ɔ́ɔmā, Óndú, Ɔwɔicō nōo fíyɛ́ dúú ā kahíníī, “Ācɛ géē tū ɛgíkwū ɛyí ɔɔ́pu, ācɛ klla kē í jikwū odúúdu úláyi kú ajɛ kú Ísrɛ̄lu, géē yɔ̄ ī ka, ‘Eléélelé! Eléélelé.’ É klla ī hī aɔ́glɛ́jí igwú kéē gáā jikwū tɔ̄há mla ācɛ nēe gbā ije lɛ uwá kéē jikwū ā.

¹⁷Ācɛ géē yɔ̄ ī jikwū ipú ɛhɔ̄ ufáyin. Ɔdā nyā géē yá pií, ohígbū ka n géē wā gaá yá aá italā.

¹⁸Ó géē bɔ̄bí nɛ̄hi lɛ aá nēe gē cɛgbá ɛ̄cī ɛpɔ̄ kú Óndú ā. Ɔdíyá nɛ̄ aá gē cɛgbá ɛ̄cī ɛpɔ̄ kú Óndú ā?

¹⁹Ó lɛbɛ̄ɛka ɛ́gɛ́nɛ̄ ɔ̄cɛ gē kwu ŋmá ɛgiyí ágábá, nɛ̄ ɔgwú gē jila anú ɔwɛ ā, ámāŋ ka, ɔ̄cɛ nōo gā ɔlɛ́ gaá kwú abɔ̄ ú bayi ɔdɔ nɛ̄ ɛgwā le ɔ́ kwú ā.

²⁰Ɛ̄cī ɛpɔ̄ kú Óndú ā géē bī ajɛ odobū wā, ɔ̄cɛ í gáā má ɔlá má ɔdā dúúmā glá ŋ́. Ó géē wɛ ɛ̄cī kú ajɛ odɔɔlúú, nɛ̄ ɔdā dúúmā í gáā fíyajɛ ŋ́.

²¹ Óndú ā ka ucɛ kú ojīleyī kú ɛ̄gbā ō gbā kú uwā ɔ́ɔ he anúɔ ɔtū ŋ́.

²²Óndú ā kahíníī, “Ɔ́dāŋ ka, aá le ɛya o yɔlá dúúdú mɛ́mla ɛya kú īkpɔ̄dɛ̄hɔ̄ kú aá bī gé um nááná, ń gáā mīyɛ ŋ́. Ń gáā mīyɛ aɛ́bɛ́ ojɔ̄kwū nɛ̄ aá kpó bá, kú aá gáā je gwɛ́ɛya gā um ā ŋ́.

²³Aá kwú uya kú ije kú aá ú ŋmá ɛgiyí um. Ń gáā jāhɔ̄ lɛ ɛ̄ngwū o gwo lɔnyɛ kú aá ŋ́.

²⁴Ikɔkɔ ɔ́ɔmā, aá yá kú ɛpɔ̄ ɔkwɛ̄yi kóō pɛ́ bɛ̄ɛka éŋkpɔ̄ ɔkpá ā. Aá yá kú uce okpaakpa kóō kpɔ.

²⁵Óndú ā klla yɔ̄ ī kɛlā gɔbū kpɔ́ kahíníī, “Aá gwó ɛya gā um klla gbā um ɛ̄gbā iháyí ofɛpa nɛ̄ aá bá ipú ígbíli ā, ācɛ Ísrɛ̄lu?

²⁶Amáŋ, abālɔbányā ā, aá géē kpó aójibó kú Usakutu nɛ̄ aá hī ɔcɛ́ kú ɔwɔ kú ɔlɛ́ aá ā, mɛ́mla ákú Ukayiwán, ɔwɔ nɛ̄ aá yá gbla ínyílɔ́wɔ ā

²⁷eko nɛ̄ n géē kpó aá abɔ̄fú glá Udamásikɔ̄si gaá lā ɛga ɔhá gwū ɔlɛ́ aá tá.” Ami nōo wɛ Ɔwɔicō nōo lɔfú fíyɛ́ dúú kɛlā yɔ̄ á.”