Read idoma ÉMƆ̄SI 6 Bible Online

ÉMƆ̄SI 6 - idoma bible

ÉMƆ̄SI 6

¹Émɔ̄si klla kahíníī, “Ó géē bɔ̄bí nɛ̄hi lɛ aá nēe lā ipú abahi ipú ɔlɛ́ kú Usáyɔn ā, mɛ́mla aá nēe gbɛlá ka aá bá lɔhi Usamérīya ā. Aá nēe wɛ ācɛ nɛ̄hi kú éwo nɛ̄hi nyā, nɛ̄ ācɛ kú Ísrɛ̄lu gē pɛ́ wā ɛgiyí aá, cɛ́ɛ́ kú aá tá uwā abɔ̄ ā.

²Aá nyɔ̄ ga ipú igelī nɛ̄hi kú Ukáline kú aá gáā má ɔ̄. Aá ga ipú igelī nɛ̄hi kú Uhamáti nōo nwuné nɛ̄hi ā, aá klla ga Ugáti nōo wɛ igelī nɛ̄hi kú ācɛ Ufilístiya ā. Éwo kú Ísrɛ̄lu mɛ́mla ákú Ujúda lɔhi fíyɛ́ uwā á nɛɛ? Ajɛ kú uwā nwuné fíyɛ́ ákú aá.

³Aá nēe gbɛlá kú ɛ̄cī ɛpɔ̄ kú Óndú ā ɔ́ɔ bá ɛ́ɛ́ ŋ́ mā, ɔdōbɔ̄bí nɛ̄ aá gē yá ā, gē pi ɛ̄cī wā ajaajɛ fíyaa.

⁴Ó géē bɔ́bí lɛ aá nēe gwutá agōdō abahi kú aá ā. Aá le abɔ̄ nānda, bá ī lé ucɛ kú ɛbɛ́ omlede mla ɛbɛ́ ɛdrɔ́ kú ɛna.

⁵Aá gē bī ɛ̄ngwū le gwííjē ahi, nɛ̄ aá tū abɔ̄yī aá ā. Aá gē tū ijē ɛ̄yīpɛ̄ klla gē bī ɛ̄ngwū lɛ gwó ɔ́, ɛ́gɛ́nɛ́ Udéfīdi gē yá ā.

⁶Aá gē bī ógo nɛ̄hi lɛ gwá ejé. Aá klla ī le ɔtulalī nōo lɔhi fíyɛ́ dúú ā tū iyē, amáŋ aá kē yɔ́tūnōbí ohígbū Ísrɛ̄lu nōo je yíífi ā ŋ́.

⁷Ohígbū ɔ́ɔmā ā, aá géē wɛ ācɛ aflɛ́yí nēe géē nyɔ̄ í cɛ̄ ɔfiyɛ ajɛ kú éwɔhá á. Cɛ́ɛ́, ucɛ kú aá kpɛ́mm ā mɛ.

⁸Óndú, Ɔwɔicō le alɔ ahɔ̄ pi lɔfú lɔfú ɛɛ́. Ó kahíníī, “Ɔbɔ́ɔ̄cɛ́ kú ācɛ Ísrɛ̄lu gē wú um ɔtū. Ń je aɔ́lɛ́ kú abahi nēé gwó lɛ iyī uwā a ka ɔdā dúúmā ŋ́. N géē je igelī nɛ̄hi kú uwā nōo wɛ Usamériya, ɔlɛ́ ɔtāhɛ̄ kú uwā a mɛ́mla ɛjɛ̄ɛ̄jī ɔdā dóódu nēe bá ipú nū ā, lɛ aólɛlā kú uwā.”

⁹Óndú ā klla ka kpɔ́ kahíníī, “Ɔ́dāŋ ka ācɛ igwo hile ŋmá ipɔ́ɔnū ékpónú ā nɛɛ, é géē pɛ́ kwú.

¹⁰Ɔmáapú okwū ā, nōo wɛ ɔ̄cɛ nōo í nyi okwu ā, géē je okwū ā bɛ̄cɛ ŋmá ipú inu. Cɛ́ɛ́, ɔmáapú okwu ā, géē hī ɔ̄cɛ dúúmā nōo hile ɔlɛ́ ā kpɔ́ ɛ́ɛ́ mā igwú ka, ‘Ɔ̄cɛ ɔhá dúúmā hile yɔ̄ ipú inu mla awɔ kpɔ́ ɛ́ɛ́ nɛɛ?”’ Ɔ̄cɛ ā í tóohi kahíníī, “Ehéee.” Cɛ́ɛ́ ɔmáapú okwū ā í da kóō, “Yɔ̄ cíí! Ālɔ̄ leyī kwɛcɛ, kú ālɔ̄ híī hī iyē kú Óndú ā ŋ́.”

¹¹Ámɔ́si kahíníī, “Má ɔ̄, eko nɛ̄ Óndú ā le ɔ́da je, é géē je aínu nɛ̄hi mɛ́mla aínu nɛ̄ŋcɛ́ ā kpó ca ŋiniŋiniŋini.

¹²Aɔ́nya gē kwinya ɛyí ápátɛ́cɔ̄ nɛɛ? Ɔ̄cɛ dúúmā lɔfú bī ɔbɛ́ɛna hɛ́hɔ̄ eyī kú ísu glá āā? Amáŋ, aá le ɛpɔ̄ ɔkwɔ̄ɔ̄kwɛ̄yi ā pīya ɛcí ō ŋmó ɔ̄cɛ, aá klla kwú ɛpɔ̄hi ō lé, ú pīya ɔdā ohɔ́ɔnɔ.

¹³Aá nēe gē gwéeyē ka aá mīyɛ igelī nɛ̄ŋcɛ́ kú Ulodɛ́ba ā, nōo wɛ áncā ā[3], é klla ī ka kahíníī, “Ɔfú kú abɔ̄ kú alɔ nɛ̄ alɔ bī le mīyɛ Ukaném lɛ iyī alɔ á ā”

¹⁴Óndú nōo lɔfú fíyɛ́ dúú ā, kahíníī, “Aá má ɔ̄ Ísrɛ̄lu, n géē pūla éwo éyi tū aá. É géē mīyɛ ajɛ kú aá tū ɔkwu, klla í lɛ abɔ̄ da aá ɛyí tāajɛ ŋmá ɔwɛ kú Uhamáti nōo yɔ̄ ɛhícō ā jāā ga ɔkpá kú Arébīya, nōo yɔ̄ ɛháajɛ ā.