Read idoma ÉMƆ̄SI 7 Bible Online

ÉMƆ̄SI 7 - idoma bible

ÉMƆ̄SI 7

¹Émɔ̄si ka ɔdā nɛ̄ Óndú, Ɔwɔicō ɔ́ɔ mafú lɛ anúɔ ā yɔ̄ á. Ó kahíníī, “N má abɔ̄ ó yɔ̄ ī tútū kóō tū aɔ́wá kú aéfūma ɛhɔ̄ klá ajɛ ā. Ɛ̄nyā igbīhi kú eko nēé le ukpɛ̄ kú ácí kú aɛ́bɛ́ kú ɔlɛ́ ɔcɛ́ kpó hɛ́ ŋmá ajɛ kwɛyí, nɛ̄ ácí ɛ̄yīpɛ̄ gbɔɔ́ ō lū ŋmá ajɛ kpɔ́ ā.

²Ipú ɛbɛ nɛ̄ n má ā, n má abɔ̄ nɛ̄ aéfūma ā je ɛjɛ̄ɛ̄jī ɔdā dóódu nōo wɛ ɛ̄mɛ̄ɛ̄mɛ̄ ā kpó lé ŋmá ajɛ ā. Anɔ́ɔ n ka, ‘Óndú, kwú ɔdā nɛ̄ ācɛ ɔlɛ́ uwɔ yá ā í yá uwā ɛhi. Ɔwɛ nyá nɛ̄ ācɛ ɔlɛ́ uwɔ, ayí kú Ujékɔ̄pu lɔfú yēeyī lɛ glá ā? É kē le nyɛ́, é klla kē lɔfú ŋ́.’

³Óndú ā, kwú ɔtū kú nū ú pīyabɔ̄, anɔ́ɔ ó ka, ‘Ɔdā nāa má ā, í gáā yá ɛ́ɛ́ gɛ ŋ́.’

⁴Óndú, Ɔwɔicō le ɔdā ɔhá mafú gā um. Anɔ́ɔ ipú ɛbɛ ā, ó yɔ̄ ī tútū kóō bī ɔlá le yá ācɛ ɔlɛ́ nū italā. Ɔlá ā kwú éŋkpɔ̄ kú itekwú ú yi ŋmá ɛháajɛ kú ɛcɛ kpatáá ā, anɔ́ɔ ɔlá ā gbɔɔ́ ō je ajɛ áncā yi dúú á.

⁵Anɔ́ɔ n ka, ‘Óndú, Ɔwɔicō, n gbɔ̄ɔkɔ gā uwɔ, mā ɔ̄ tá. Abɔ̄ ayí kú Ujékɔ̄pu géē hile lɛ glá ā, é lɛwa ŋ́, é klla kē lɔfú ŋ́ dúú.’

⁶Óndú ā, kwú ɔtū kú nū ú pīyabɔ̄ ā, anɔ́ɔ ó ka, ‘Ń gáā yá odúúmā kú nū ɛ́ɛ́ gɛ ŋ́.’

⁷Óndú klla le ɛbɛ ɔhá mafú gā um kpɔ́. Ipú ɛbɛ ā, n má Óndú háyi pi ɔdɔ kú inu éyi nēé bī ɔcí ō le miya ɔdɔ kpaakpa le gwó ɔ̄. Anú abɔ̄yīnū ké bī ɔcí ō miya ɔdɔ kú inu abɔ̄.

⁸Anɔ́ɔ Óndú da um ka, ‘Émɔ̄si, ɔdí nāa yɔ̄ ī má ā?’ Anɔ́ɔ n tá ɔ̄ ohi ka, ‘Ɔcí ō le miya ɔdɔ kú inu’. Anɔ́ɔ Óndú klla ka, ‘Má ɔ̄, n géē je ɔcí ō le miya ɔdɔ kú inu nyā tá ɔtāhɛ̄ kú ācɛ ɔlɛ́ um, ayí kú Ísrɛ̄lu, kóō mafú lɛ uwá ka é le kpaakpa ŋ́. Ń gáā pīya ɔtū kú um abɔ̄ ŋmá o yá uwā italā gɛ ŋ́.

⁹Aɛ́ga nɛ̄ ayááyí kú Áyísīki gē gwɛ́ɛya ā, géē je gblífi tāajɛ. É géē kpó aɛ́ga o tīihɔ kú ācɛ Ísrɛ̄lu kpɛ́mm ā yíífi. N kē í héyī kwu ipɔ́ɔnū kú Ujérobōwam, ɔcɛ́ jāā gbēeko nēé lɛ uwá kpó ŋmó kwɛyí.”

¹⁰Anɔ́ɔ Amasíya, nōo wɛ ɔ̄cogwɛ́ɛya kú Ubɛ́tɛlu ā, le ɛhɔ̄ tū gé lɛ Ujérobōwam, ɔcɛ́ kú Ísrɛ̄lu ā ka, ‘Émɔ̄si mɛ́mla ācɛ Ísrɛ̄lu le ībīyājɛ yá tū uwɔ ɛɛ́ n. Ɛlā nɛ̄ ó ka ā lɔfú je ajɛ kú ɔlɛ́ alɔ yíífi glá.

¹¹Ɛlā nōo ka ā kē yɔ̄ á, ‘É géē je Ujérobōwam ŋmó ɔgbɛ́fú, cɛ́ɛ́ é lɛ ācɛ Ísrɛ̄lu kpó kwú ga ajɛ kú aéwɔhá kéē nyɔ̄ ī cɛ̄ ɔfiyɛ.”’

¹²Anɔ́ɔ Amasíya da Émɔ̄si kahíníī, “Ó jɛ̄ ɛɛ́, ɔ̄comɛ́ɛbɛ, nyɛ̄ɛ̄ ŋmá amānyā ga Ujúda, kú ā gaá bēē tɔ́ɔna kú ɛlā Ɔwɔicō abɔ́ɔ kéē gbā ulé gā awɔ.

¹³Ā híī kɛlā Ɔwɔicō Ubɛ́tɛlu amānyā gɛ ŋ́. Ohígbū ka amānyā wɛ ɛga otīihɔ nɛ̄ ɔcɛ́ mɛ́mla odúúdú ācɛ kú éwo nyā gē gbā Ɔwɔicō ɛ̄gbā á.’

¹⁴Anɔ́ɔ Émɔ̄si tá Amasíya ohi kahíníī, “Ń kē tɛtɛ wɛ ɔ̄comɛ́ɛbɛ́ ŋ́, ɛ́ɛ́ nɛ̄ n kē ī wɛ ɔyí kú ɔ̄comɛ́ɛbɛ́ ŋ́, amáŋ n wɛ ɔ̄cogbaálá mla ɔ̄cɛ o leyīkwu ɔcí kú ufígi.

¹⁵Anɔ́ɔ Óndú ā kwú um ŋmá álá ō gbō, anɔ́ɔ ó da um ka, ‘Nyɔ̄ gaá cɛ̄hɔ̄ kú um lɛ ācɛ ɔlɛ́ um, ayí kú Ísrɛ̄lu ā.

¹⁶Abālɔbányā, jāhɔ̄ kú ā pó ɛlā nɛ̄ Óndú, abɔ̄yī nū ka ā. Aá ka amíɔ̄ɔ̄ híī tɔ́ɔna kú ɛlā Ɔwɔicō ŋ́. Aá klla ka amíɔ̄ɔ̄ tɔ́ɔna kú ɛlā Ɔwɔicō lɛyíkwu Ísrɛ̄lu ŋ́.

¹⁷Óndú ā ka ohígbū ɔ́ɔmā, ‘Ɔnyā uwɔ géē je pīya akwuna ipú igelī nɛ̄hi ā. Ɛfú géē lé ayí uwɔ nɔ̄nyīlɔ mla ayí uwɔ nɔ̄nya piíí. É kē í miya ajɛ kú ɔlɛ́ uwɔ kē í je ɔ́ kpó kɔ̄ lɛ ācɛ ɔhá. Awɔ abɔ̄yī uwɔ kē í kwú ipú ajɛ kú ācɛ opɛ̄cí. É kē í kpó ācɛ Ísrɛ̄lu abɔ̄fú ŋmá ipú ajɛ kú abɔ̄yī uwā gaá lā ipú éwɔhá piíí.”